इफीसियन 2:3 - Bagheli Bible

³ इहइमेर पहिले हमहूँ पंचे सगले जन अपने देंह के बुरी इच्छन के मुताबिक दिन बिताबत रहेन हय, अउर अपने देंह अउर मन के बुरी इच्छन काहीं पूर करत रहे हएन, अउर अपने सुभाबय के कारन दुसरे मनइन कि नाईं परमातिमा से दन्ड पामँइ के काबिल रहे हएन।

इफीसियन 2:3 ပူးပေါင်းရင်းမြစ်များ

मरकुस 4:19

पय घर-परिबार के चिन्ता, अउर धन के लालच, अउर इहइमेर के खुब चीजन काहीं पामँइ के लालच माहीं फँसिके, परमातिमा के बचन काहीं बिसराय देत हें, अउर परमातिमा के आसीस नहीं पामँइ, अउर बिना फर के बिरबा कि नाईं होइ जात हें।

यूहन्ना 1:13

परमातिमा के सन्तान के रूप माहीं, ऊँ पंचे संसारिक रूप से, न त खून से पइदा भें, अउर न त मनइन के इच्छा से, अउर न महतारी-बाप के योजना से, बलकिन ऊँ पंचे परमातिमा से पइदा भे हँय।

यूहन्ना 8:44

काहेकि तूँ पंचे अपने पिता सइतान के सन्तान आह्या। अउर तूँ पंचे अपने पिता के मरजी काहीं पूर करँइ चहते हया। उआ त संसार के सुरुआतय से कतली आय, अउर उआ सत्य के पच्छ कबहूँ नहीं लिहिस। काहेकि ओखे जीबन माहीं सत्य हइअय नहिं आय: अउर झूँठ बोलब ओखर सुभाबय आय; काहेकि उआ हमेसा झूँठ बोलँइ बाला आय, बलकिन झूँठ बोलँइ के सुरुआतय करँइ बाला आय।

खास चेलन 14:16

अउर ऊँ बीते समयन माहीं, सगले जाति के मनइन काहीं अपने-अपने गइल माहीं चलँइ दिहिन।

रोमियन 1:24

एसे परमातिमा उनहीं पंचन काहीं उनखे मन के बुरी इच्छन के मुताबिक असुद्ध होंइ के खातिर छोंड़ दिहिन, कि ऊँ पंचे ब्यभिचार माहीं परिके आपस माहीं अपने देंहन के अपमान करँय।

रोमियन 11:30

काहेकि जइसन पहिले तुहूँ पंचे, परमातिमा के हुकुम काहीं नहीं मानत रहे आह्या, पय उनखे द्वारा परमातिमा के हुकुम काहीं न मानँइ के कारन, अब तोंहरे ऊपर दया भे ही।

रोमियन 13:14

बलकिन हम पंचे प्रभू यीसु मसीह के सगले सुभाव काहीं अपनाय लेई, अउर अपने मन के बुरी इच्छन काहीं पूर करँइ के कोसिस न करी।

रोमियन 2:14

एसे कि गैरयहूदी लोगन के लघे मूसा के द्वारा दीन बिधान नहिं आय, तऊ अपने सुभाबय से मूसा के बिधान के बातन कि नाईं चलत हें, त भले उनखे लघे मूसा के द्वारा दीन बिधान नहिं आय, तऊ ऊँ पंचे अपने खातिर खुदय बिधान हें।

रोमियन 5:10

काहेकि जब हम पंचे परमातिमा के बिरोध माही काम कइके उनखर बइरी रहेन हय, तब उनखर लड़िका यीसु मसीह अपने मउत के द्वारा अपने पिता परमातिमा के साथ हमार पंचन के मेल-मिलाप कराय दिहिन हीं, पुनि जब हमार पंचन के मेल-मिलाप होइगा हय, त उनखे जीबन के द्वारा हम पंचे जरूर मुक्ती पाउब।

रोमियन 5:9

एसे अब हम पंचे उनखे खून के कारन परमातिमा के नजर माहीं निरदोस होइ गएन हँय, त यीसु मसीह के द्वारा परमातिमा के क्रोधपूर्न सजा से जरूर बचाए जाब।

रोमियन 6:12

अउर तूँ पंचे अपने नासवान देंह माहीं पाप काहीं सासन न करँइ द्या, जउने तूँ पंचे पाप के बुरी इच्छन काहीं पूर न कए पाबा।

रोमियन 7:18

काहेकि, हम इआ जानित हएन, कि हमरे भीतर अरथात हमरे देंह माहीं कउनव निकही चीज निबास नहीं करय, एसे कि हम निकहा काम करँइ त चाहित हएन, पय करे नहीं पाई।

रोमियन 9:22

त एमा कउन अचरज के बात ही, अगर परमातिमा आपन सक्ती देखामँय के खातिर कुछ मनइन काहीं बनाइन, कि जउने उनखे ऊपर आपन क्रोध देखामँइ, जउन नास होइन के खातिर तइआर कीन गे रहे हँय, तऊ उनखर बड़े धीरज से सहत रहिगें।

1 कुरिन्थियन 4:7

अउर को कहत हय, कि तूँ पंचे दुसरे मनई से बढ़िके हया? अउर तोंहरे लघे अइसन कउन चीज ही, जउने काहीं तूँ पंचे परमातिमा से नहीं पाए आह्या? अउर अगर सब कुछ, तोहईं परमातिमय से मिला हय, त पुनि तूँ अइसन घमन्ड काहे करते हया, कि हम पंचे खुदय पाएन हँय?

2 कुरिन्थियन 7:1

एसे हे हमार पियार भाई-बहिनिव, जब परमातिमा हमसे पंचन से एतने कीमती वादा किहिन हीं, त आबा हम पंचे अपने देंह अउर आत्मा के सगली गंदगी काहीं दूर कइके, अपने-आप काहीं सुद्ध करी। अउर परमातिमा के भय मानत पूरी तरह से पबित्र बनी।

गलातियन 3:22

पय पबित्र सास्त्र माहीं घलाय इआ लिखा हय, कि सगला संसार पाप के कब्जे माहीं हय, इआ कारन केबल यीसु मसीह के ऊपर बिसुआस करँइ के द्वारा, बिसुआस करँइ बाले मनई परमातिमा के वादा पाय सकत हें।

इफीसियन 2:2

अउर तूँ पंचे उन दिनन माहीं, इआ संसार के गलत रास्तन माहीं चलत, अउर उआ आत्मा के मुताबिक जीबन बिताबत रहे हया, जउन इआ धरती के ऊपर के बुरी आत्मिक सक्तिन के स्वामी हय, उहय आत्मा अबहिनव उन मनइन के ऊपर काम करत हय, जउन परमातिमा के हुकुम काहीं नहीं मानँय।

इफीसियन 4:22

कि तूँ पंचे पिछले चाल-चलन के पुरान सुभाव काहीं छोंड़ि द्या, नहीं त उआ भरमामँइ बाली बुरी इच्छन माहीं फँसाइके जीबन काहीं भ्रस्ट कइ देत हय।

कुलुस्सियन 1:21

अउर पहिले जउन तूँ पंचे अपने बुरे कामन के कारन उनखर बइरी, अउर उनखे महिमा से दूरी रहे हया, अब परमातिमा मसीह के सारीरिक मउत के द्वारा, तोंहऊँ पंचन से घलाय मेल-मिलाप कइ लिहिन हीं।

1 थिस्सलुनीकियन 4:13

हे भाई-बहिनिव, हम पंचे इआ नहीं चाहित आहेन, कि तूँ पंचे उनखे बारे माहीं जउन प्रभू के ऊपर बिसुआस कइके मरिगें हँय, अनजान रहा; कहँव अइसन न होय, कि तूँ पंचे अबिसुआसी लोगन कि नाईं सोक करा, जिनहीं कउनव आसा नहिं आय।

1 थिस्सलुनीकियन 5:6

एसे हम पंचे अबिसुआसी लोगन कि नाईं सोबत न रही, बलकिन सचेत अउर अपने ऊपर काबू रखँइ चाही।

1 तीमुथियुस 6:9

पय जउन धनमान बनँइ चाहत हें, ऊँ अइसन परिच्छा, अउर जाल माहीं, अउर अनेकव फालतू, अउर खुद काहीं नुकसान पहुँचामँइ बाली इच्छन माहीं फँसि जात हें, जउन मनइन काहीं बिगाड़िके बिनास के खाईं माहीं गिराय देती हईं।

तीतुस 3:3

काहेकि हमहूँ पंचे बिसुआसी बनँइ से पहिले, नासमझ अउर परमातिमा के हुकुम न मानँइ बाले रहे हएन, अउर भ्रम माहीं परिके अनेकव प्रकार के बुरी इच्छा, अउर सुख-बिलास माहीं फँसे रहे हएन, अउर एक दुसरे से दुसमनी, अउर इरसा के जिन्दगी बिताबत रहे हएन, अउर एक दुसरे से नफरत कइके दुसमनी रक्खत रहे हएन।

1 पतरस 1:14

एसे तूँ पंचे हुकुमन काहीं मानँइ बाले लड़िकन कि नाईं बना, इआ नहीं कि जइसन तूँ पंचे पहिले, जब मसीह के ऊपर बिसुआस नहीं करत रहे आह्या, त बुरी इच्छन के मुताबिक जीबन जिअत रहे हया, त अब पहिले कि नाईं पुनि न बना।

2 पतरस 2:14

काहेकि उनखे आँखिन माहीं ब्यभिचार बसा हय, अउर ऊँ पंचे पाप किहे बिना रुकिन नहीं सकँय; ऊँ पंचे चंचल मन बालेन काहीं, लहाय-फुसलाय लेत हें; उनखे मनन काहीं लोभ करँइ के आदत होइगे ही, अउर ऊँ पंचे परमातिमा के तरफ से स्रापित हें।

2 पतरस 2:18

अउर ऊँ पंचे बेकार के घमन्ड बाली बातँय कइके, अउर अपने लुचपन के कामन के द्वारा, उनहीं अपने मन के बुरी इच्छन माहीं फसाय लेत हें, जउन भटकेन म से अबहिनय बिसुआस माहीं लउटि रहे हँय।

1 यूहन्ना 2:16

काहेकि जउन कुछू संसार माहीं हय, मतलब देंह के अभिलासा, अउर आँखिन के अभिलासा, अउर अपने कमाई के घमन्ड, उआ पिता परमातिमा कइती से नहीं, बलकिन संसार के तरफ से हय।

1 यूहन्ना 2:8

पुनि हम तोंहईं नबा हुकुम लिखित हएन; इआ आसा से कि सत्य, मसीह के अउर तोंहरे जीबन माहीं उजागर भ हय, काहेकि अँधिआर खतम होइ रहा हय, अउर सत्य के जोति चमकँइ लाग ही।