इफीसियन 2:12 - Bagheli Bible

¹² अउर तूँ पंचे उआ समय मसीह से अलग रहे हया, अउर इजराइल देस के प्रजा के पद से अलग रहे हया, अउर परमातिमा अपने भक्तन काहीं जउन बचन दिहिन रहा हय, उनखे ऊपर आधारित करार के भागीदार नहीं रहे आह्या, अउर इआ संसार माहीं बिना परमातिमा के रहे हया।

इफीसियन 2:12 ပူးပေါင်းရင်းမြစ်များ

लूका 1:72

कि हमरे बाप-दादन के ऊपर दया कइके, अपने पबित्र करार काहीं सुध करँय।

यूहन्ना 10:16

अउर हमार अउरव गाड़र हईं, जउन अबय तक गाड़र के इआ सार माहीं नहिं आहीं; हमहीं उनहूँ काहीं लइ आउब जरूरी हय, अउर ऊँ सगली हमार बात मनि हँय; तब एकयठे झुन्ड, अउर एकयठे चरबाहा होई।

यूहन्ना 15:5

हम दाखलता आहेन: तूँ पंचे डेरइआ आह्या; जे कोऊ हमसे जुड़ा रहत हय, अउर हम ओसे, त ओमाहीं खुब फर लागत हें, काहेकि तूँ पंचे हमसे अलग होइके कुछू नहीं कइ सकते आह्या।

यूहन्ना 4:22

तूँ पंचे जेही नहीं जनते आह्या, ओखर अराधना करते हया: अउर हम पंचे जेही जानित हएन ओखर अराधना करित हएन; काहेकि मनइन काहीं मुक्ती यहूदी लोगन म से मिली।

खास चेलन 2:39

काहेकि इआ वादा तोंहरे, अउर तोंहरे सन्तानन, अउर ऊँ सगले दूरी-दूरी के लोगन के खातिर घलाय हय, जिनहीं हमार पंचन के प्रभू परमातिमा अपने लघे बोलइहँय।”

खास चेलन 28:20

बलकिन एसे हम अपना पंचन काहीं बोलायन हय, कि अपना पंचन से मिली अउर बातचीत करी; काहेकि इजराइल के मनई जउने मसीहा के आमँइ के आसा कए रहे हँय, उहय मसीह के कारन हम इआ जंजीर माहीं बँधे हएन।

खास चेलन 3:25

तूँ पंचे परमातिमा के सँदेस बतामँइ बालेन के सन्तान, अउर उआ करार के भागीदार हया, जउने काहीं परमातिमा तोंहरे बाप-दादन से किहिन हीं, जब ऊँ अब्राहम से कहिन, कि ‘तोंहरे बंस के द्वारा धरती के सगले घराना आसीस पइहँय’।

रोमियन 9:8

अरथात इआ कि संसारिक रूप से पइदा होंइ बाले लड़िका- बच्चा परमातिमा के सन्तान न कहइहँय, बलकिन परमातिमा के वादा के मुताबिक पइदा भें सन्तानय अब्राहम के बंस माने जइहँय।

गलातियन 4:8

पहिले तूँ पंचे जब परमातिमा काहीं नहीं जानत रहे आह्या, त देबी देउतन काहीं परमातिमा मानिके उनखर दास बने रहे हया, जउन वास्तव माहीं परमातिमा न होंहीं।

इफीसियन 2:19

एसे तूँ पंचे अब बिदेसी मुसाफिर नहीं रहि गया, बलकिन पबित्र लोगन के साथी अउर उनखे देस माहीं रहँइ बाले परमातिमा के घराना के होइ गया हय।

इफीसियन 4:18

काहेकि उनखर बुद्धी अँधिआर से भरी हय, अउर अपने अग्यानता के कारन, अउर अपने मन के कठोरता के कारन, परमातिमा से मिलँय बाले अनन्त जीबन से ऊँ पंचे दूर हें।

कुलुस्सियन 1:21

अउर पहिले जउन तूँ पंचे अपने बुरे कामन के कारन उनखर बइरी, अउर उनखे महिमा से दूरी रहे हया, अब परमातिमा मसीह के सारीरिक मउत के द्वारा, तोंहऊँ पंचन से घलाय मेल-मिलाप कइ लिहिन हीं।

कुलुस्सियन 1:27

अउर इआ बात काहीं परमातिमा उनखे ऊपर एसे प्रगट किहिन हीं, कि जउने उनहीं मालुम होय, कि गैरयहूदी लोगन माहीं उआ भेद के महिमा के कीमत केतनी बड़ी ही? अउर उआ इआ आय, कि मसीह जउन महिमा के आसा आहीं, तोंहरे जीबन माहीं निबास करत हें।

कुलुस्सियन 1:5

इआ सब उआ आसा के कारन भ हय, जउन तोंहरे खातिर स्वरग माहीं सुरच्छित ही, अउर एखे बारे माहीं तूँ पंचे पहिलेन सत्य बचन, अरथात खुसी के खबर के द्वारा सुन चुके हया।

1 थिस्सलुनीकियन 4:13

हे भाई-बहिनिव, हम पंचे इआ नहीं चाहित आहेन, कि तूँ पंचे उनखे बारे माहीं जउन प्रभू के ऊपर बिसुआस कइके मरिगें हँय, अनजान रहा; कहँव अइसन न होय, कि तूँ पंचे अबिसुआसी लोगन कि नाईं सोक करा, जिनहीं कउनव आसा नहिं आय।

1 थिस्सलुनीकियन 4:5

अउर इआ काम बुरी इच्छा से न किहा, जउनमेर ऊँ जातिअन के मनई करत हें, जउन परमातिमा काहीं नहीं जानँय।

2 थिस्सलुनीकियन 2:16

हमार पंचन के प्रभू यीसु मसीह खुदय, अउर हमार पिता परमातिमा जउन हमसे पंचन से प्रेम किहिन हीं, अउर अपने किरपा से कबहूँ न खतम होंइ बाली सान्ती अउर उत्तम आसा दिहिन हीं,

1 तीमुथियुस 1:1

हम पवलुस आहेन, हे तीमुथियुस इआ चिट्ठी हम तोंहईं लिख रहेन हँय, जउन हमहीं मुक्ती देंइ बाले परमातिमा अउर हमरे आसा के अधार मसीह यीसु के हुकुम से मसीह यीसु के खास चेला आहेन,

इब्रानियन 11:34

आगी के लपट काहीं ठंड किहिन; तलबार के धार से बचिके निकरिगें, निबलता माहीं सक्ती पाइन; लड़ाई माहीं बहादुर निकरें; अउर बिदेसी सेनन काहीं मारिके भगाइन।

इब्रानियन 6:18

अउर परमातिमा के कबहूँ न बदलँइ बाली ऊँ दुइठे बातँय, अरथात “कसम” अउर “वादा” के द्वारा हमहीं पंचन काहीं इआ पता चलत हय, कि “परमातिमा कबहूँ झूँठ साबित होइन नहीं सकँय।” एसे हमार पंचन के साहस अउर मजबूत होइ जात हय, अउर हम पंचे जउन उनखे सरन माहीं दउड़े चले आएन हँय, कि उआ आसा काहीं पाई, जउन आँगे धरी हय।

इब्रानियन 8:6

पय जउन सेबा के काम मसीह यीसु काहीं मिला हय, उआ पहिले के महायाजकन के सेबा के काम से बढ़िके हय, काहेकि यीसु जउने नई करार के बिचबई बने हँय, उआ पुरान करार से उत्तम ही, काहेकि उआ उत्तम चीजन के करार के ऊपर आधारित ही।

1 पतरस 1:21

अउर तूँ पंचे उँइन यीसु मसीह के कारन, परमातिमा के ऊपर बिसुआस करते हया, जउन यीसु मसीह काहीं मरेन म से पुनि जिआइके, उनहीं महिमा दिहिन, कि जउने तोंहार पंचन के आसा अउर बिसुआस परमातिमा के ऊपर होय।

1 पतरस 1:3

हमरे पंचन के प्रभू यीसु मसीह के पिता परमातिमा के धन्यबाद होय, जउन यीसु मसीह काहीं मरेन म से जिआइके, अपने बड़ी दया से हमहीं पंचन काहीं अनन्त जीबन पामँइ के खातिर, जउन जिअत आसा ही, ओखे खातिर नबा जनम दिहिन हीं।

1 पतरस 3:15

बलकिन मसीह काहीं आपन प्रभू मानिके, अपने-अपने मन काहीं पबित्र रख्या, अउर जे कोऊ तोंहरे आसा के बारे माहीं पूँछँय, त तूँ पंचे नम्रता अउर परमातिमा के भय के साथ, जबाब देंइ के खातिर हमेसा तइआर रह्या।

1 यूहन्ना 3:3

अउर जे कोऊ उनखे ऊपर इआ आसा रक्खत हय, उआ अपने काहीं उहयमेर पबित्र रक्खत हय, जइसन मसीह पबित्र हें।