इफीसियन 1:7 - Bagheli Bible

⁷ अउर हमहीं पंचन काहीं जेतने यीसु मसीह माहीं बिसुआस करित हएन, यीसु मसीह के खून के द्वारा अपने पापन से मुक्ती अरथात माफी मिली हय, काहेकि परमातिमा हमरे पंचन के ऊपर बड़ी दया किहिन।

इफीसियन 1:7 ပူးပေါင်းရင်းမြစ်များ

मत्ती 20:28

जइसन कि मनई के लड़िका एसे नहीं आबा, कि ओखर सेबा कीन जाय, बलकिन एसे आबा हय, कि खुदय दुसरेन के सेबा करय, अउर उआ खुब मनइन काहीं मुक्ती देंइ के खातिर आपन प्रान देय।”

मत्ती 26:28

काहेकि इआ करार के हमार उआ खून आय, जउन खुब मनइन के पापन के माफी के खातिर बहाबा जई।

मत्ती 6:12

अउर जइसन हम पंचे अपने गुनहगारन काहीं माफ किहेन हय, उहयमेर अपनव हमरे अपराधन काहीं माफ करी।

मरकुस 14:24

अउर यीसु उनसे कहिन, “इआ करार के हमार उआ खून आय, जऊँ खुब लोगन काहीं बचामँइ के खातिर बहाबा जई।

लूका 1:77

अउर प्रभू के खातिर तइआर लोगन काहीं मुक्ती के ग्यान देइहा, जउन उनहीं अपने-अपने पापन काहीं मान लिहे से मिली।

लूका 24:47

अउर यरूसलेम सहर से लइके सगले जातिअन माहीं पाप से मन फिरामँइ के, अउर पापन से माफी पामँइ के प्रचार, उनहिन के नाम से कीन जई।

यूहन्ना 20:23

जउने मनइन के पापन काहीं तूँ पंचे माफ करिहा, उनखर पाप माफ कीन जइहँय, अउर जिनखे पापन काहीं तूँ पंचे माफ न करिहा, उनखर पाप माफ न कीन जइहँय।”

खास चेलन 10:43

सगले परमातिमा के सँदेस बतामँइ बाले उनखे बारे माहीं गबाही दिहिन हीं, कि जे कोऊ उनखे ऊपर बिसुआस करी, ओही उनखे नाम के द्वारा पापन के माफी मिली।”

खास चेलन 2:38

तब पतरस उनसे कहिन, “अपने-अपने मन काहीं बदला, अउर तोंहरे पंचन म से हरेक जन, अपने-अपने पापन के माफी के खातिर, यीसु मसीह के नाम से बपतिस्मा ल्या; त तूँ पंचे पबित्र आत्मा के दान पइहा।

खास चेलन 20:28

एसे अपना पंचे आपन अउर अपने पूरे झुन्ड के रखबारी करी; जउने खातिर पबित्र आत्मा अपना पंचन काहीं अँगुआ ठहराइन हीं; कि अपना पंचे परमातिमा के मसीही मन्डली के रखबारी करी, जेही ऊँ अपने खून से मोल लिहिन हीं।

खास चेलन 3:19

एसे तूँ पंचे आपन मन फिराबा, अउर परमातिमा के तरफ लउटि आबा, जउने तोंहार पंचन के पाप धोबरि जाँय, अउर तोंहईं सान्ती अउर आनन्द मिलय।

रोमियन 2:4

का तूँ परमातिमा के असीमित दया अउर सहनसीलता अउर धीरज काहीं तुच्छ जनते हया? तोंहईं इआ जानँइ चाही, कि परमातिमा के दया तोंहईं पस्चाताप करब सिखाबत ही।

रोमियन 3:24

पय परमातिमा के किरपा से जउन मुक्ती यीसु मसीह के ऊपर बिसुआस किहे से मिलत ही, ओखे द्वारा हम पंचे सेंत-मेंत माहीं, परमातिमा के नजर माहीं निरदोस ठहराए जइत हएन।

रोमियन 3:25

परमातिमा यीसु मसीह काहीं, उनखे ऊपर बिसुआस किहे के द्वारा पापन से मुक्ती देबामँइ के खातिर मनइन काहीं दिहिन हीं। परमातिमा इआ काम यीसु मसीह के बलिदान के रूप माहीं किहिन हीं। अइसा इआ देखामँइ के खातिर किहिन हीं कि परमातिमा सहनसील हें, काहेकि ऊँ पहिले मनइन काहीं उनखे पापन के सजा दिहे बिना छोंड़ि दिहिन तय।

रोमियन 9:23

अउर जउने मनइन के ऊपर परमातिमा दया करत हें, उनहीं इआ देखामँइ के खातिर, कि ऊँ केतना महान हें, उनखर सहत रहिगें, अउर ऊँ मनइन काहीं अपने बड़े सम्मान माहीं भागीदार बनामँइ के खातिर पहिलेन से तइआर किहिन हीं।

1 कुरिन्थियन 1:30

अउर उनहिन के द्वारा तूँ पंचे मसीह यीसु माहीं बने हया, जउन परमातिमा के तरफ से हमरे पंचन के खातिर ग्यान ठहरे हँय, अउर उनहिन के द्वारा हम पंचे परमातिमा के नजर माहीं निरदोस साबित भएन हँय, पबित्र बनाए गएन हँय, अउर हरेक बुराइन से छुटकारा घलाय पाए हएन।

2 कुरिन्थियन 8:9

अउर तूँ पंचे हमरे पंचन के प्रभू यीसु मसीह के किरपा काहीं जनतेन हया, कि ऊँ केतना धनी रहे हँय, तऊ ऊँ तोंहरे पंचन के खातिर एसे कंगाल बनिगें, कि जउने तूँ पंचे उनखे कंगाल होंइ से धनी बन जा।

इफीसियन 1:14

उआ पबित्र आत्मा हमरे पंचन के बारिसदार होंय के बयाना के रूप माहीं, उआ समय तक के खातिर हमहीं पंचन काहीं दीनगा हय, जब तक कि ऊँ हमहीं पंचन काहीं, जउन उनखर मोल लीन आहेन, पूरी तरह से छुटकारा नहीं दइ देंय, इआ कारन सगले मनई उनखे महानता के स्तुति करिहँय।

इफीसियन 1:18

अउर हमार बिनती इहव हय, कि तोंहरे पंचन के मन के आँखी खुल जाँय, अउर तूँ पंचे उआ प्रकास के दरसन कइ सका, जउने तोंहईं पंचन काहीं इआ मालुम होइ जाय, कि उआ आसा का आय, जउने के खातिर ऊँ तोंहईं पंचन काहीं बोलाइन हीं। अउर अपने चुने सगले मनइन काहीं जउन बारिसदार होंय के हक्क ऊँ देइहँय, उआ केतना अदभुत अउर महान हय।

इफीसियन 1:6

उनखे उआ किरपा के महिमा के बड़ाई होय, जउने काहीं ऊँ हमहीं पंचन काहीं, जेतने उनखे पियार लड़िका यीसु मसीह माहीं बिसुआस करित हएन, सेंत-मेंत माहीं दिहिन हीं।

इफीसियन 1:8

जउने काहीं परमातिमा अपने पूरे ग्यान अउर समझ सहित हमहीं पंचन काहीं बहुतायत से दिहिन हीं।

इफीसियन 2:4

पय परमातिमा जउन खुब दयालू हें; ऊँ अपने बड़े प्रेम के कारन, हमसे पंचन से प्रेम किहिन हीं।

इफीसियन 2:7

जउने आमँइ बाले समयन माहीं परमातिमा अपने दया के असीमित धन देखामँइ, जउन यीसु मसीह के ऊपर बिसुआस करँइ के द्वारा हमहीं पंचन काहीं मिला हय।

इफीसियन 3:16

हम प्राथना करित हएन, कि परमातिमा अपने महिमा के धन के मुताबिक, तोंहईं पंचन काहीं इआ बरदान देंय, कि तूँ पंचे उनखे पबित्र आत्मा से सामर्थ पाइके, अपने अन्दर के सुभाव माहीं मजबूत होत जा।

इफीसियन 3:8

अउर हम जउन सगले पबित्र मनइन म से सगलेन से छोट आहेन, तऊ हमरे ऊपर बड़ी दया भे ही, कि गैरयहूदी लोगन काहीं मसीह के अपार दया के खुसी के खबर सुनाई, जउने ऊँ पंचे घलाय खुब आत्मिक आसीस पामँय।

फिलिप्पियन 4:19

अउर हमार परमातिमा घलाय अपने उआ धन के मुताबिक, जउन मसीह यीसु माहीं महिमा समेत हय, तोंहरे हरेक कमी-घटी काहीं पूर करिहँय।

कुलुस्सियन 1:14

उनखे लड़िकय के द्वारा हमहीं पंचन काहीं मुक्ती मिली हय, अरथात हमहीं पंचन काहीं अपने पापन के माफी मिली हय।

कुलुस्सियन 1:27

अउर इआ बात काहीं परमातिमा उनखे ऊपर एसे प्रगट किहिन हीं, कि जउने उनहीं मालुम होय, कि गैरयहूदी लोगन माहीं उआ भेद के महिमा के कीमत केतनी बड़ी ही? अउर उआ इआ आय, कि मसीह जउन महिमा के आसा आहीं, तोंहरे जीबन माहीं निबास करत हें।

कुलुस्सियन 2:13

अउर तूँ पंचे अपने पापन के कारन अउर बिना खतना के देंह के कारन आत्मिक रूप से मरे रहे हया, पय परमातिमा तोंहईं पंचन काहीं मसीह के साथय-साथ अनन्त जीबन दिहिन हीं, अउर हमरे पंचन के सगले पापन काहीं हमेसा के खातिर माफ कइ दिहिन हीं।

कुलुस्सियन 2:2

जउने उनखे मनन काहीं उत्साह मिलय, अउर ऊँ पंचे आपस म एक दुसरे से प्रेम माहीं बँधि जाँय, अउर बिसुआस के उआ सगला धन जउन सच्चे ग्यान से मिलत हय, उनहीं पंचन काहीं मिल जाय, जउने पिता परमातिमा के भेद काहीं, अरथात मसीह काहीं पहिचान लेंय।

1 तीमुथियुस 2:6

जउन खुद काहीं सगले मनइन काहीं मुक्ती देंइ के खातिर, क्रूस माहीं बलिदान कइके कीमत चुकाइन हीं; इआ काम परमातिमा के ठहराए सही समय माहीं प्रभू यीसु मसीह पूर कइके गबाही दिहिन हीं।

तीतुस 2:14

यीसु मसीह अपने इच्छा से हमरे पँचन खातिर मउत काहीं अपनाइन हीं, कि जउने हमहीं पँचन काहीं हरेकमेर के अधरम से छोड़ाय लेंय, अउर सुद्ध कइके अपने खातिर अइसन प्रजा बनाय लेंय, जउन निकहे-निकहे कामन काहीं करँइ के खातिर हरेक समय तइआर रहँय।

तीतुस 3:6

अउर परमातिमा हमहीं पंचन काहीं पाप करँइ से मुक्ती देंइ बाले, यीसु मसीह के व्दारा, हमहीं पंचन काहीं पबित्र आत्मा बहुतायत से दिहिन हीं।

इब्रानियन 9:22

अउर इआ बात बेलकुल सही ही, कि बिधान के मुताबिक हमेसा, सगली चीजँय खून के द्वारा सुद्ध कीन जाती हईं; अउर बिना खून बहाए पापन के माफी नहीं मिलय।

1 पतरस 2:24

ऊँ खुदय हमरे पंचन के पापन काहीं अपने देंह के ऊपर लए क्रूस माहीं चढ़िगें, जउने हम पंचे पाप के सम्बन्ध से पूरी तरह से मुक्त होइके, परमातिमा के नजर माहीं जउन निकहा हय, उहय करी; अउर उनहिन के मार खाँइ से तूँ पंचे चंगे भया हय।

1 पतरस 3:18

काहेकि मसीह घलाय हमरे पंचन के पापन के बदले माहीं, दुख उठाइन हीं, अरथात ऊँ निरदोस रहे हँय, तऊ हम पंचे जउन पापी रहेन हँय, हमरे खातिर एक बेरकी मरिगें, कि जउने हमहीं पंचन काहीं परमातिमा के लघे लइ आमँय। मसीह सारीरिक रूप से त मारे गें, पय आत्मिक रूप से जिआय दीनगें।

1 यूहन्ना 2:12

हे पियार लड़िकव, हम तोंहईं एसे लिखित हएन, कि यीसु मसीह के कारन तोंहार पंचन के पाप माफ कीन गें हँय।

1 यूहन्ना 2:2

ऊँ केबल हमरे पंचन के पापन के माफी के खातिर भर नहीं, बलकिन सगले संसार के पापन के माफी के खातिर घलाय बलिदान भें।

1 यूहन्ना 4:10

प्रेम एमाहीं नहीं आय, कि हम पंचे परमातिमा से प्रेम किहेन हय; बलकिन एमाहीं हय, कि परमातिमा हमसे पंचन से प्रेम किहिन हीं; अउर हमरे पापन के माफी के खातिर, अपने लड़िका काहीं पठइन हीं।

दरसनन के बातँय 14:4

ईं ऊँ पंचे आहीं, जउन मेहेरिअन के साथ असुद्ध नहीं भे रहे आहीं, बलकिन कुमार हें; ईं उँइन पंचे आहीं, जउन जहाँ कहँव मेम्ना जात रहे हँय, ईं पंचे उनखे पीछे-पीछे चल देत रहे हँय, ईं पंचे त परमातिमा अउर मेम्ना के खातिर, पहिल फल होंइ के खातिर, मनइन म से मोल लीन गे हँय।

दरसनन के बातँय 5:9

अउर ऊँ पंचे इआ नबा गाना गामँइ लागें, कि “अपनय इआ किताब काहीं लेंइ, अउर एखर मुहरँय खोलँय के काबिल हएन; काहेकि अपना बध होइके अपने खून से हरेक कुल, अउर भाँसा, अउर लोग, अउर जाति म से परमातिमा के खातिर लोगन काहीं मोल लिहेन हँय।