2 तीमुथियुस 4:1 - Bagheli Bible

¹ हे तीमुथियुस, परमातिमा अउर मसीह यीसु काहीं गबाह मानिके, जउन जिअत अउर मरे मनइन के न्याय करिहँय, यीसु मसीह जउन सगले मनइन के ऊपर राज करँइ के खातिर अइहँय, उनखर सुध देबाइके तोहईं हुकुम देइत हएन।

2 तीमुथियुस 4:1 ပူးပေါင်းရင်းမြစ်များ

मत्ती 16:27

हम ईं सगली बातन काहीं एसे कहित हएन, कि जब मनई के लड़िका, अपने पिता परमातिमा के महिमा माहीं, स्वरगदूतन के साथ अइहँय, उआ समय, ‘ऊँ हरेक जन काहीं उनखे कामन के मुताबिक प्रतिफल देइहँय।’

लूका 19:12

तब यीसु उनसे कहिन, “एकठे धनी मनई दूर देस जाँइ के तइआरी माहीं रहा हय, जउने उहाँ जाइके राज पद पाइके लउटि आबय।

लूका 19:15

जब उआ धनी मनई राज पद पाइके अपने सहर माहीं लउटा, तब अइसन भ कि उआ अपने सेबकन काहीं जिनहीं सोने के मोहर दिहिस रहा हय, अपने लघे बोलाइस, जउने मालुम करय कि ऊँ पंचे लेन-देन कइके केतना कमान हें।

लूका 23:42

तब पहिल बाला कहिस, “हे यीसु, जब अपना राजा बनिके राज करब, तब हमार सुधि लेब।”

खास चेलन 10:42

अउर ऊँ हमहीं हुकुम दिहिन हीं, कि सगले मनइन माहीं प्रचार करी, अउर गबाही देई, कि ईं उँइन आहीं; जिनहीं परमातिमा जिअत अउर मरे मनइन के न्याय करँइ के खातिर ठहराइन हीं।

खास चेलन 17:31

काहेकि परमातिमा एकठे दिन निस्चित किहिन हीं, जउने माहीं ऊँ, उआ मनई के द्वारा धरम से संसार के मनइन के न्याय करिहँय, जिनहीं ऊँ ठहराइन हीं, अउर उनहीं मरेन म से जिन्दा कइके, ईं सगली बातन काहीं निस्चित कइ दिहिन हीं।”

रोमियन 2:16

इआ सब उआ दिना प्रगट कीन जई, जब परमातिमा, हमरे सुनाए खुसी के खबर के मुताबिक, यीसु मसीह के द्वारा मनइन के गुप्त बिचारन के न्याय करिहँय।

कुलुस्सियन 3:4

अउर मसीह जउन हमार पंचन के जीबनदाता आहीं, जब ऊँ दुसराय प्रगट होइहँय, तब तुहूँ पंचे उनखे साथ महिमा समेत प्रगट कीन जइहा।

2 थिस्सलुनीकियन 2:8

तब उआ अधरमी प्रगट होई, जउने काहीं प्रभू यीसु अपने मुँहे के फूँक से मारि डरिहँय, अउर अपने आमँइ के तेज से भसम करिहँय।

1 तीमुथियुस 5:21

परमातिमा, अउर मसीह यीसु अउर जउने स्वरगदूतन काहीं परमातिमा चुनिन हीं, उनहीं गबाह मानिके, हम तोहईं चेतउनी देइत हएन, कि तूँ पूरे मन से ईं लिखी बातन काहीं माना किहा, अउर कउनव काम पच्छपात के साथ न किहा।

2 तीमुथियुस 1:10

पय अब हमहीं पंचन काहीं मुक्ती देंइ बाले यीसु मसीह, संसार माहीं आइके उआ किरपा काहीं प्रगट किहिन, अउर उँइन मउत के सक्ती काहीं खतम कइ दिहिन, अउर जउन परमातिमा के साथ हमेसा जीबन बितामँइ के मोका देत ही, उआ खुसी के खबर के प्रचार किहिन।

2 तीमुथियुस 2:14

जउने बातन काहीं हम तोहईं बताएन हय, उनहीं बिसुआसी मनइन काहीं सुध देबाबा, अउर प्रभू काहीं गबाह मानिके उनहीं चेताय द्या, कि बचन के सब्दन काहीं लइके फालतू बहँस न करँय, काहेकि इनसे कउनव फायदा नहीं होय; बलकिन सुनँइ बाले बिसुआस से भटक जात हें।

2 तीमुथियुस 4:18

अउर प्रभू हमहीं हरेक बुरे कामन से बचइहँय, अउर मुक्ती कइके अपने स्वरगराज माहीं सुरच्छित पहुँचइ हँय, उनहिन के बड़ाई जुग-जुग होत रहय। आमीन।

2 तीमुथियुस 4:8

भबिस्य माहीं हमरे खातिर धरम के उआ मुकुट धरा हय, जउन धरमी मनइन काहीं दीन जात हय, जउने काहीं प्रभू, जउन धरमी अउर न्यायी हें, हमहीं अउर उन सगलेन काहीं घलाय, जउन उनखे आमँइ के इन्तजार काहीं पियार जानत हें, न्याय के दिन देइहँय।

तीतुस 2:13

अउर उआ आनन्द मिलँइ के आसा रखिके, अपने महान परमातिमा, अउर पाप करँइ से छुटकारा देंइ बाले यीसु मसीह काहीं, महिमा के साथ धरती माहीं आमँइ के इन्तजार करत रही।

1 पतरस 1:7

अउर इआ एसे होत हय, कि तोंहार पंचन के बिसुआस, परिच्छा के द्वारा खरा निकरय, अउर तोंहार पंचन के जाँचा-परखा बिसुआस, आगी माहीं ताबा ग, नास होंइ बाले सोन से जादा कीमती हय, जब यीसु मसीह दुसराय अइहँय, त बिसुआस माहीं बने रहँइ के कारन, तोंहईं पंचन काहीं परमातिमा से बड़ाई, महिमा, अउर मान-सम्मान मिली।

1 पतरस 4:5

पय उनहीं पंचन काहीं अपने ईं बुरे कामन के हिंसाब, परमातिमा काहीं देंइ परी, जउन जिन्दा अउर मरे दोनव के न्याय करँइ काहीं तइआर हें।

1 पतरस 5:4

अउर जब संसार के रखबारी करँइ बाले परमप्रधान अइहँय, त तोंहईं पंचन काहीं महिमा के मुकुट दीन जई, जउन कबहूँ न मुरझई।

2 पतरस 1:11

बलकिन इआमेर से तोंहार पंचन के, हमरे पंचन के प्रभू अउर मुक्ती देंइ बाले यीसु मसीह के अनन्त राज माहीं, बड़े आदर के साथ स्वागत कीन जई।

2 पतरस 1:17

काहेकि जब ऊँ पिता परमातिमा से आदर अउर महिमा पाइन, अउर परमातिमा के उआ महिमा म से इआ बोल सुनान, कि “ईं हमार पियार लड़िका आहीं, हम इनसे प्रसन्न हएन।”

1 यूहन्ना 2:28

एसे हे पियार लड़िकव, मसीह माहीं बने रहा; कि जब ऊँ प्रगट होंय, त हमहीं पंचन काहीं साहस होय, अउर जब यीसु मसीह दुसराय आमँय, त उनखे आँगे हमहीं पंचन काहीं सरमिन्दा न होंय परय।

दरसनन के बातँय 1:7

देखा, ऊँ बदरिन के साथ आमँइ बाले हें; अउर हरेक आँखी उनहीं देखी, इहाँ तक कि जउन उनहीं बेधिन रहा हय, ऊँ पंचे घलाय उनहीं देखिहँय, अउर धरती के सगले कुल उनखे कारन छाती पिटिहँय। इआ जरूर होई। आमीन।