2 तीमुथियुस 2:10 - Bagheli Bible

¹⁰ इहय कारन से हम परमातिमा के चुने लोगन के खातिर, हरेक दुख-मुसीबत काहीं उठाबत रहित हएन, जउने ऊँ पंचे घलाय मसीह यीसु के ऊपर बिसुआस करे से जउन मुक्ती मिलत ही, ओही अनन्त महिमा समेत पामँय।

2 तीमुथियुस 2:10 ပူးပေါင်းရင်းမြစ်များ

मत्ती 24:22

अउर अगर परमातिमा ऊँ दिनन काहीं कम न करते, त कउनव प्रानी न बचतें, पय अपने चुने मनइन के कारन परमातिमा ऊँ दिनन काहीं घटइहँय।

मत्ती 24:24

काहेकि लबरे मसीह, अउर परमातिमा के सँदेस बतामँइ बाले लबरे मनई तइआर होइहँय, अउर ऊँ पंचे बड़े-बड़े चिन्ह अउर अचरज के काम देखइहँय, कि होइ सकय त चुने मनइन काहीं घलाय भटकाय देंय,

मत्ती 24:31

अउर ऊँ तुरही के खुब तेज अबाज के साथ अपने स्वरगदूतन काहीं पठइहँय, अउर ऊँ पंचे अकास के एक छोर से दुसरे छोर तक, चारिव दिसन से उनखे चुने मनइन काहीं एकट्ठा करिहँय।”

लूका 18:7

त का परमातिमा अपने भक्तन के न्याय न चुकइहँय? हाँ, जउन दिन-रात उनहीं पुकारत रहत हें? का परमातिमा उनखे खातिर देरी करिहँय? नहीं।

लूका 22:57

पय पतरस इआ कहिके इनकार किहिन, “हे महिला, हम उनहीं नहीं जानी।”

यूहन्ना 11:52

अउर केबल यहूदी लोगन भर खातिर नहीं, बलकिन एखे खातिर घलाय कि परमातिमा के सन्तानन काहीं, जउन संसार माहीं तितर-बितर रहत हें उनहीं एक कइ देंय।

यूहन्ना 17:24

हे पिता परमातिमा, हम चाहित हएन, कि जिनहीं अपना हमहीं दिहेन हय, जहाँ हम रहब, उहाँ ऊँ पंचे हमरे साथ रहँय, कि जउने ऊँ पंचे हमरे उआ महिमा काहीं देखँय, जउन अपना हमहीं दिहेन हय, काहेकि अपना संसार काहीं बनामँइ से पहिले हमसे प्रेम किहेन हय।

यूहन्ना 17:9

इआ समय हम केबल उनखे खातिर प्राथना करित हएन, संसार के मनइन के खातिर नहीं, पय केबल उनहिन के खातिर प्राथना करित हएन, जिनहीं अपना हमहीं दिहेन हय, काहेकि ऊँ पंचे अपनय के आहीं।

रोमियन 2:7

जउन मनई धीरज के साथ लगीतार निकहा काम करत, परमातिमा के तरफ से बड़ाई अउर मान- सम्मान पामँइ अउर परमातिमा के साथ हमेसा रहँइ खातिर खोज माहीं लगे रहत हें, उनहीं परमातिमा अनन्त जीबन देइहँय।

रोमियन 9:23

अउर जउने मनइन के ऊपर परमातिमा दया करत हें, उनहीं इआ देखामँइ के खातिर, कि ऊँ केतना महान हें, उनखर सहत रहिगें, अउर ऊँ मनइन काहीं अपने बड़े सम्मान माहीं भागीदार बनामँइ के खातिर पहिलेन से तइआर किहिन हीं।

1 कुरिन्थियन 1:21

अउर परमातिमा के ग्यान के मुताबिक जइसन ऊँ चाहत रहे हँय, जब मनई अपने ग्यान से उनहीं नहीं पहिचानिन, त परमातिमा काहीं इआ निकहा लाग, कि मसीह के क्रूस माहीं बलिदान होंइ के खुसी के खबर के प्रचार के द्वारा, जउने काहीं मनई मूर्खता समझत हें, उहय खुसी के खबर के द्वारा बिसुआस करँइ बाले मनइन काहीं मुक्ती देंय।

1 कुरिन्थियन 9:22

अउर हम निबल मनइन के खातिर निबल बन गएन, कि जउने निबल मनइन काहीं प्रभू यीसु मसीह के लघे खींच लई, अउर हम हरेक मनइन के खातिर उनहिन कि नाईं बन गएन, कि जउने कउनव मेर से कइअक जनेन काहीं मुक्ती देबाय देई।

2 कुरिन्थियन 1:6

अगर हम पंचे खुब कस्ट पाइत हएन, त इआ तोंहरे पंचन के मुक्ती अउर सान्ती के खातिर आय, अउर अगर सान्ती पाइत हएन, त इहव तोंहरे सान्ती के खातिर आय; इहय सान्ती के असर से तुहूँ पंचे घलाय, धीरज के साथ उन दुखन काहीं सहि लेते हया, जिनहीं हमहूँ पंचे घलाय सहित हएन।

2 कुरिन्थियन 12:15

हमरे लघे जउन कुछू हय, त ओही हम तोंहरे खातिर खुसी के साथ खरचा करब, इहाँ तक कि अपने-आप काहीं घलाय तोंहरे खातिर खरचा कइ डारब। जब हम तोंहसे एतना प्रेम करित हएन, त का तोंहऊँ काहीं हमसे ओतनय प्रेम न करँइ चाही?

2 कुरिन्थियन 4:15

अउर सब कुछ तोंहरे पंचन के भलाइन के खातिर आय। जइसन-जइसन परमातिमा के किरपा जादा मनइन के ऊपर होत जात ही, त परमातिमा काहीं धन्यबाद देंइ बाले घलाय बढ़त जात हें। इआमेर से परमातिमा के महिमा बढ़त जात ही।

2 कुरिन्थियन 4:17

काहेकि हमार पंचन के पल भर के छोट-छोट दुख, हमहीं पंचन काहीं हमेसा के खातिर अनन्त महिमा देबाबत हें।

इफीसियन 3:13

एसे हम तोंहसे इआ बिनती करित हएन, कि जउन दुख-मुसीबत तोंहरे खातिर हम उठाय रहेन हय, उनखे कारन हिम्मत न हारा, काहेकि उनहिन माहीं तोंहार पंचन के भलाई हय।

कुलुस्सियन 1:24

अउर जउन दुख-मुसीबत हम तोंहरे पंचन के खातिर उठाइत हएन, उनखे कारन हम आनन्दित होइत हएन, अउर मसीह के देंह अरथात मसीही मन्डली के खातिर मसीह के यातनन माहीं जउन कुछ कमी रहिगे तय, ओही हम अपने देंह माहीं पूर कए देइत हएन।

कुलुस्सियन 1:27

अउर इआ बात काहीं परमातिमा उनखे ऊपर एसे प्रगट किहिन हीं, कि जउने उनहीं मालुम होय, कि गैरयहूदी लोगन माहीं उआ भेद के महिमा के कीमत केतनी बड़ी ही? अउर उआ इआ आय, कि मसीह जउन महिमा के आसा आहीं, तोंहरे जीबन माहीं निबास करत हें।

1 थिस्सलुनीकियन 5:9

काहेकि परमातिमा हमहीं पंचन काहीं क्रोध के खातिर नहीं, बलकिन एसे ठहराइन हीं, कि हम पंचे अपने प्रभू यीसु मसीह के व्दारा मुक्ती पाई।

2 थिस्सलुनीकियन 2:14

इहय मुक्ती काहीं पामँइ के खातिर परमातिमा के जउन खुसी के खबर हम पंचे तोंहईं बताएन तय, ओहिन के व्दारा परमातिमा तोंहईं बोलाइन हीं, कि तूँ पंचे हमरे प्रभू यीसु मसीह के महिमा काहीं पाबा।

2 तीमुथियुस 1:1

हम पवलुस आहेन, हे तीमुथियुस इआ चिट्ठी हम तोंहईं लिख रहेन हय, जउन तूँ हमरे पियार लड़िका कि नाईं हया, जउन अनन्त जीबन देंइ के वादा परमातिमा किहिन रहा हय, ओखे मुताबिक जेतने जने प्रभू यीसु मसीह के ऊपर बिसुआस करत हें, उनहीं बतामँइ के खातिर, परमातिमा के इच्छा से, हम यीसु मसीह के खास चेला आहेन।

2 तीमुथियुस 2:1

एसे हे बेटा तीमुथियुस, मसीह यीसु से जउन किरपा तोहईं मिली हय, ओसे तूँ आत्मिक जीबन माहीं मजबूत होइजा,

2 तीमुथियुस 2:3

अउर यीसु मसीह के सच्चे सिपाही कि नाईं, हमरे साथ दुख उठाबा।

तीतुस 1:1

हम पवलुस आहेन, हे तीतुस, इआ चिट्ठी हम तोंहईं लिख रहेन हँय, जउन परमातिमा के सेबक आहेन, अउर यीसु मसीह के चुने खास चेला आहेन, परमातिमा जिनहीं चुनिन हीं, ऊँ लोगन काहीं बिसुआस के बारे माहीं, अउर जउन सत्य बचन उनहीं भक्ती के मुताबिक, जीबन जिअँइ के खातिर मदत करत हय, उआ सिखामँइ के खातिर हमहीं पठबा ग हय।

1 पतरस 2:10

एक समय अइसन रहा हय, जब तूँ पंचे परमातिमा के प्रजा नहीं रहे आह्या, पय अब तूँ पंचे परमातिमा के प्रजा बन गया हय, पहिले तोंहरे पंचन के ऊपर परमातिमा के दया नहीं भे रही आय, पय अब तोंहरे पंचन के ऊपर परमातिमा के दया भे ही।

1 पतरस 5:10

अउर अब परमातिमा जउन अनन्त किरपा के सोता आहीं। उँइन तोंहईं मसीह के द्वारा अपने अनन्त महिमा माहीं बोलाइन हीं, तोंहईं थोरी देर तक दुख भोगे के बाद, खुदय तोंहईं बिसुआस माहीं मजबूत, स्थिर, अउर बलमान कइ देइहँय।