2 थिस्सलुनीकियन 1:4 - Bagheli Bible

⁴ इहाँ तक, कि हम पंचे खुदय परमातिमा के मसीही मन्डली माहीं तोंहरे बारे माहीं घमन्ड करित हएन, कि जेतने उपद्रव अउर दुख-मुसीबत तूँ पंचे सहते हया, उन सगलेन माहीं तोंहार धीरज अउर बिसुआस प्रगट होत हय।

2 थिस्सलुनीकियन 1:4 ပူးပေါင်းရင်းမြစ်များ

रोमियन 12:12

अउर अपने आसा माहीं आनन्दित रहा; दुख-मुसीबत माहीं धीरज रक्खा; अउर हमेसा प्राथना करँइ माहीं लगे रहा।

रोमियन 2:7

जउन मनई धीरज के साथ लगीतार निकहा काम करत, परमातिमा के तरफ से बड़ाई अउर मान- सम्मान पामँइ अउर परमातिमा के साथ हमेसा रहँइ खातिर खोज माहीं लगे रहत हें, उनहीं परमातिमा अनन्त जीबन देइहँय।

रोमियन 8:25

पय अगर हम पंचे जउने चीज काहीं नहीं देखी, ओखर आसा करित हएन, त ओखर धीरज के साथ इन्तजार घलाय करित हएन।

1 कुरिन्थियन 7:17

अउर प्रभू जेही जइसन जीबन दिहिन हीं, अउर परमातिमा जेही जउने परिस्थित से चुनि लिहिन हीं, त ऊँ पंचे उहय परिस्थित माहीं रहिके जीबन बितामँइ; अउर हम सगली मसीही मन्डलिन के खातिर इहय हुकुम देइत हएन।

2 कुरिन्थियन 12:10

इहय कारन से हम मसीह के खातिर अपने कमजोरिन माहीं, अपमान सहँइ माहीं, अउर गरीबी माहीं, अउर अपने ऊपर होंइ बाले अत्याचारन माहीं, अउर दुख-मुसीबतन माहीं, खुसी रहित हएन। काहेकि जब हम निबल होइत हएन, तबहिन हमहीं बल मिलत हय।

2 कुरिन्थियन 7:14

काहेकि तीतुस के आँगे हम तोंहरे पंचन के बारे माहीं, जउन घमन्ड देखायन तय, त हमहीं लज्जित नहीं होंय परा, बलकिन जइसन हम तोंहसे पंचन से सही-सही बात बतायन तय, उहयमेर हमार पंचन के घमन्ड देखाउब, तीतुस के आँगे सही निकरा हय।

2 कुरिन्थियन 7:4

अउर हम तोंहसे पूरे बिसुआस के साथ कहि रहेन हय, कि हमहीं तोंहरे पंचन के ऊपर बड़ा घमन्ड हय; अउर हमहीं तोंहरे कारन बड़ी सान्ती मिली हय; हम हरेकमेर के दुख-मुसीबतन काहीं सहत रहित हएन, तऊ हम खुब आनन्दित रहित हएन।

2 कुरिन्थियन 9:2

काहेकि तूँ पंचे मदत करँइ के खातिर हमेसा उत्साहित रहते हया। इहय कारन से हम तोंहरे बारे माहीं, मकिदुनिया प्रदेस माहीं रहँइ बाले, बिसुआसी भाई-बहिनिन के आँगे घमन्ड के साथ बताइत हएन, कि अखाया प्रदेस के रहँइ बाले बिसुआसी भाई-बहिनी, एक साल से दान देंइ के खातिर तइआर हें। अउर तोंहरे पंचन के इआ उत्साह काहीं देखिके, खुब बिसुआसी भाई-बहिनिन काहीं दान देंइ के प्रेरना मिली हय।

2 कुरिन्थियन 9:4

कहँव अइसा न होय, कि मकिदुनिया प्रदेस के कुछ मनई हमरे साथ आइके इआ देखँय, कि तूँ पंचे दान देंइ के खातिर तइआर नहिं आह्या, त हमहूँ काहीं अउर तोंहऊँ पंचन काहीं घलाय लज्जित होंइ परी, जबकि एखे बारे माहीं हम पंचे तोंहरे ऊपर बड़ा भरोसा रक्खित हएन।

1 थिस्सलुनीकियन 1:3

अउर अपने पिता परमातिमा के आँगे तोंहरे बिसुआस के काम, अउर प्रेम के मेहनत, अउर हमरे प्रभू यीसु मसीह माहीं आसा के धीरज काहीं लगीतार सुध करित हएन।

1 थिस्सलुनीकियन 2:14

एसे हे भाई-बहिनिव, तूँ पंचे परमातिमा के उन मसीही मन्डलिन के चाल-चलन काहीं अपनाय लिहा हय, जउन यहूदिया प्रदेस माहीं प्रभू मसीह यीसु माहीं हईं, काहेकि तुहूँ पंचे घलाय अपने लोगन से उहयमेर दुख पाए हया, जइसन ऊँ पंचे यहूदी लोगन से पाइन रहा हय।

1 थिस्सलुनीकियन 2:19

जब हम पंचे अपने प्रभू यीसु मसीह के दुसराय आमँइ के समय उनखे आँगे ठाढ़ होब, त तोंहईं पंचन काहीं छोंड़, हमार पंचन के आसा, आनन्द, अउर बड़ाई के मुकुट अउर का होइ सकत हय?

2 थिस्सलुनीकियन 3:5

अउर परमातिमा के प्रेम अउर मसीह के धीरज कइती बढ़ँइ के खातिर, प्रभू तोंहार अँगुआई करँय।

इब्रानियन 10:36

काहेकि तोंहईं पंचन काहीं धीरज धरब खुब जरूरी हय, जउने तूँ पंचे परमातिमा के मरजी काहीं पूर कइके, उनखे द्वारा कीन वादा के प्रतिफल पाबा।

इब्रानियन 6:12

अउर हम पंचे इआ नहीं चाही, कि तूँ पंचे आलसी बना, बलकिन तूँ पंचे उनखे कि नाईं जीबन बिताबा, जउन बिसुआस अउर धीरज के द्वारा परमातिमा के वादन के बारिसदार बन जात हें।

इब्रानियन 6:15

अउर इआमेर से अब्राहम धीरज धइके, परमातिमा के द्वारा कीन वादा के बात काहीं पाइन।

याकूब 5:11

देखा, हम पंचे धीरज धरइँ बालेन काहीं धन्य कहित हएन; तूँ पंचे अय्यूब के धीरज के बारे माहीं सुनबय भए होइहा, अउर प्रभू उनहीं धीरज के बदले माहीं जउन आसीस दिहिन तय, ओहू काहीं जनते होइहा, कि प्रभू केतने दयालू अउर करुनामय हें।

2 पतरस 1:6

अउर ग्यान माहीं आत्मसंयम काहीं, अउर आत्मसंयम माहीं धीरज काहीं, अउर धीरज माहीं परमातिमा के भक्ती काहीं,

दरसनन के बातँय 14:12

इआ पबित्र मनइन के धीरज धरँय के समय हय, जउन परमातिमा के हुकुमन काहीं मानत हें, अउर यीसु के ऊपर बिसुआस करत हें।