2 पतरस 2:1 - Bagheli Bible

¹ जउन मेर से इजराइली लोगन के बीच माहीं, कुछ मनई रहे हँय, जउन कहत रहे हँय, कि हम पंचे परमातिमा के सँदेस बतामँइ बाले आहेन, पय बास्तव माहीं, ऊँ पंचे लबरी बोलँइ बाले रहे हँय। उहयमेर से तोंहरेव पंचन के बीच माहीं, लबरी सिच्छा देंइ बाले उपदेसक होइहँय, जउन नास करँइ बाली लबरी सिच्छा के सुरुआत, लुक छिपिके करिहँय, अउर ऊँ पंचे प्रभू काहीं अपनामँइ से इनकार करिहँय, जउन उनहीं मुक्ती दिहिन हीं। अउर खुद काहीं हरबिन बिनास होंइ के काबिल बनाय लेइहँय।

2 पतरस 2:1 ပူးပေါင်းရင်းမြစ်များ

मत्ती 10:33

पय जे कोऊ मनइन के आँगे इआ कही, कि हम यीसु मसीह के चेला न होंहेन, त हमहूँ घलाय स्वरग माहीं रहँइ बाले अपने पिता परमातिमा के आँगे इआ कहि देब कि ईं हमार चेला न होंहीं।”

मत्ती 24:11

अउर खुब जने परमातिमा के लबरी सँदेस बतामँइ बाले तइआर होइहँय, अउर खुब जनेन काहीं बिसुआस से भटकइहँय।

मत्ती 24:24

काहेकि लबरे मसीह, अउर परमातिमा के सँदेस बतामँइ बाले लबरे मनई तइआर होइहँय, अउर ऊँ पंचे बड़े-बड़े चिन्ह अउर अचरज के काम देखइहँय, कि होइ सकय त चुने मनइन काहीं घलाय भटकाय देंय,

मत्ती 24:5

काहेकि खुब मनई अइसन होइहँय जउन हमरे नाम से आइके कइहँय, कि ‘हम मसीह आहेन’ अउर खुब मनइन काहीं बिसुआस से भटकाय देइहँय।

मत्ती 7:15

“परमातिमा के झूँठ सँदेस बतामँइ बालेन से सचेत रहा, काहेकि ऊँ पंचे गाड़र कि नाईं भेस बनाइके तोंहरे पंचन के लघे आबत हें, पय ऊँ पंचे भीतर से डगर कि नाईं खतरनाक होत हें।

मरकुस 13:22

काहेकि लबरे मसीह, अउर परमातिमा के सँदेस बतामँइ बाले लबरे मनई तइआर होइहँय, अउर ऊँ पंचे बड़े-बड़े चिन्ह अउर अचरज के काम देखइहँय, कि होइ सकय त चुने मनइन काहीं घलाय भटकाय देंय,

लूका 12:9

पय जे कोऊ मनइन के आँगे इआ कही, कि हम यीसु मसीह के चेला न होंहेन, त हमहूँ घलाय स्वरग माहीं रहँइ बाले अपने पिता परमातिमा के स्वरगदूतन के आँगे, इआ कहि देब, कि ईं हमार चेला न होंहीं।”

लूका 21:8

यीसु कहिन, “सतरक रह्या, कि तोंहईं कोऊ बिसुआस से भटकाए न पाबय, काहेकि खुब जने हमरे नाम से आइके कइहँय, ‘कि हम मसीह आहेन’ अउर इहव कइहँय, कि ‘संसार के अन्त के समय लघे आइगा हय।’ तूँ पंचे उनखे बातन के बिसुआस न किहा।

लूका 6:26

“हाय तोंहरे ऊपर जब संसार के मनई तोंहईं भला कहँय, काहेकि उनखर बाप-दादा, परमातिमा के लबरी सँदेस बतामँइ बालेन के साथव, अइसय करत रहे हँय।”

रोमियन 16:18

काहेकि इआमेर के मनई हमरे पंचन के प्रभू यीसु मसीह के सेबा नहीं करँय, बलकिन अपने कमाई के खातिर सेबा करत हें; अउर मीठ-मीठ बातँय कइके भोले-भाले मनइन काहीं बिसुआस से भटकाय देत हें।

1 कुरिन्थियन 11:19

अउर तोंहरे बीच माहीं जरूर गुटबन्दी होई, कि जउने इआ बात जाने मिल जाय, कि कउन बिसुआसी सच्चे हें, अउर कउन नहिं आँय।

1 कुरिन्थियन 6:20

काहेकि परमातिमा दाम चुकाइके तोहईं पंचन काहीं खरीद लिहिन हीं, एसे तूँ पंचे अपने देंह के द्वारा परमातिमा के बड़ाई करा।

1 कुरिन्थियन 7:23

अउर परमातिमा दाम चुकाइके, तोंहईं पंचन काहीं खरीद लिहिन हीं, एसे तूँ पंचे मनइन के दास न बना।

गलातियन 2:4

पय इआ, ऊँ झूँठे बिसुआसी लोगन के कारन भ, जउन सच्चे बिसुआसी लोगन के बीच माहीं भेद लेंइ के खातिर घुसि आएँ तय, कि उआ अजादी काहीं जउन हमहीं पंचन काहीं मसीह यीसु के व्दारा मिली हय, हमार पंचन के भेद लइके पुनि हमहीं पंचन काहीं गुलाम बनामँइ।

गलातियन 3:13

पय मसीह जउन हमरे पंचन के खातिर स्रापित बने हें, हमहीं मोल लइके मूसा के बिधान के सराप से छोड़ाइन हीं। जब मसीह क्रूस माहीं लटकाए गें, ऊँ हमरे पाप के सराप काहीं अपने ऊपर लइ लिहिन, काहेकि पबित्र सास्त्र माहीं इआ लिखा हय, कि “जे कोऊ कठबा माहीं लटकाबा जात हय, उआ स्रापित हय।”

गलातियन 4:17

ऊँ गलत सिच्छा देंइ बाले तोंहईं पंचन काहीं अपने पच्छ माही करँइ के कोसिस करत हें, पय उनखर उद्देस निकहा नहिं आय। ऊँ पंचे इआ चाहत हें, कि तूँ पंचे हमसे अलग होइजा, जउने तुहूँ पंचे उनखे पीछे चलँइ बाले बनि जा।

गलातियन 5:20

मूरत के पूजा करब, टोना मारब, इरखा करब, झगड़ा करब, जलन रक्खब, क्रोध करब, स्वार्थी होब, फूट डारब, गुटबन्दी करब,

इफीसियन 1:7

अउर हमहीं पंचन काहीं जेतने यीसु मसीह माहीं बिसुआस करित हएन, यीसु मसीह के खून के द्वारा अपने पापन से मुक्ती अरथात माफी मिली हय, काहेकि परमातिमा हमरे पंचन के ऊपर बड़ी दया किहिन।

इफीसियन 4:14

जउने हम पंचे चुने बुदे लड़िका कि नाईं न रही, जउन ठग बिद्या अउर चतुराई के बातन माहीं, अउर दुसरेन के भ्रम माहीं डारँइ बाली बातन माहीं, अउर गलत उपदेसन माहीं परि जात हें, अउर जउनी कइती नहीं जाँय चाहँय ओहिन कइती भटक जात हें।

फिलिप्पियन 3:19

अउर अपने देंह के इच्छन काहीं पूर करब परमातिमा से बढ़िके मानत हें, अउर अपने सरम बाली बातन के ऊपर घमन्ड करत हें, अउर धरती के बुरी चीजन माहीं आपन पूर मन लगाए रहत हें, अइसन करँइ बालेन के अन्त बिनास अरथात नरक हय।

कुलुस्सियन 2:18

अउर अइसा मनई, जउन अपने-आप काहीं कस्ट दइके स्वरगदूतन के पूजा-पाठ माहीं लगा रहत हय, अइसन मनई से सचेत रहा, कहँव उआ तोंहईं पंचन काहीं बिसुआस से भटकाइके, मिलँइ बाले इनाम से बंचित न कइ देय, अइसन मनई दिब्य दरसन माहीं देखी बातन माहीं लगा रहत हय, अउर अपने झूँठ ग्यान के बेकार घमन्ड करत हय।

कुलुस्सियन 2:8

अउर सचेत रहा, कि कोऊ तोंहईं संसार के लबरी ग्यान से धोखा दइके, बिसुआस से भटकाय न देय, काहेकि इआ मनइन के पुरान परम्परन के बिचारन, अउर पुरान समय से चली आय रही संसारिक सिच्छन के लबरी ग्यान आय, एखर मसीह के बचन से कउनव लेन-देन नहिं आय।

1 तीमुथियुस 5:8

पय अगर कोऊ अपने नात-रिस्तेदारन, अउर खासकर अपने घर-परिबार के मनइन के मदत नहीं करय, त उआ प्रभू के बिसुआस से भटकिगा हय, अउर उआ, जउन मनई प्रभू के ऊपर बिसुआस नहीं करँय उनहूँ से अधिक बुरा बनिगा हय।

2 तीमुथियुस 4:3

हम इआ एसे बताइत हएन, कि एक समय अइसा अई, कि जब मनई उत्तम उपदेस काहीं सुनँय तक न चइहँय, ऊँ अपने मन के मुताबिक अपने खातिर उपदेस देंइ बालेन काहीं एकट्ठा कइ लेइहँय। ऊँ उहय उपदेस सुनइहँय, जउन ऊँ पंचे सुनँय चाहत हें।

तीतुस 1:11

इआमेर के मनइन काहीं गलत साबित कइके उनखर मुँह बंद करँइ चाही, काहेकि ईं लोग जादा पइसा कमाँय के खातिर, लोगन काहीं गलत सिच्छा दइके, पूरे घर के लोगन काहीं बिगाड़ देत हें।

तीतुस 3:10

अगर कउनव पाखन्डी मनई मसीही मन्डली माहीं फूट डारत हय, त ओही एक दुइ बेर समझाबा, ओखे बादव अगर उआ नहीं सुधरय, त ओसे अलग रहा।

इब्रानियन 10:29

त तूँ पंचे इआ जानिल्या, कि ओही बहुत भारी सजा मिली, जउन परमातिमा के लड़िका के अपमान करत हय, अउर करार के खून काहीं अपबित्र ठहराबत हय, जउने से उआ पबित्र कीन ग रहा हय। अउर उआ किरपा करँइ बाली पबित्र आत्मा के घलाय अपमान करत हय।

1 पतरस 1:8

काहेकि तूँ पंचे यीसु काहीं नहीं देखे आह्या, तऊ उनसे प्रेम करते हया, अउर अब त उनहीं बिना देखेन, उनखे ऊपर बिसुआस कइके अइसन आनन्दित अउर मगन होते हया, जउन बखान से बाहर अउर महिमा से भरा हय।

2 पतरस 2:3

अउर ऊँ पंचे लालच के कारन, अपने बनावटी बातन से तोंहसे पंचन से धन कमँइ हँय, उनखे इआ काम के सजा परमातिमा के द्वारा पहिलेन से निस्चित कीन जाय चुकी हय। अउर उनखर बिनास तइआर हय, अउर उनखर इन्तजार कइ रहा हय।

1 यूहन्ना 2:26

हम ईं बातन काहीं तोंहईं उनखे बारे माहीं लिखेन हय, जउन तोंहईं पंचन काहीं भरमाय देत हें।

1 यूहन्ना 4:1

हे पियार साथिव, हरेक आत्मा के बिसुआस न माना, बलकिन हमेसा उनहीं जाँच परखिके देखा, कि का ऊँ परमातिमा के तरफ से आहीं कि नहीं? इआ बात हम तोंहसे एसे कहि रहेन हय, काहेकि झूँठ बोलँइ बाले खुब नबी संसार माहीं तइआर होइगे हँय।

यहूदा 1:18

ऊँ पंचे, तोंहसे कहा करत रहे हँय, कि “अन्त के दिनन माहीं अइसन मनई अइहँय, जउन परमातिमा के बचन के हँसी उड़इहँय, अउर अपने बुरी इच्छन के मुताबिक चलिहँय।

यहूदा 1:4

हम इआ बात तोंहईं पंचन काहीं एसे बताइत हएन, काहेकि तोंहरे बीच माहीं, चुप्पय से कुछ अइसन मनई घुसि आए हँय, जिनखे सजा के बारे माहीं, पहिलेन से पबित्र सास्त्र माहीं लिखा हय, कि “ईं पंचे परमातिमा के बचन काहीं मानँइ बाले न होंहीं, अउर हमरे पंचन के परमातिमा के दया काहीं, भोग-बिलास करँइ के बहाना बनाय डारिन हीं, अउर हमरे पंचन के एकलउते मालिक, अउर प्रभू यीसु मसीह काहीं अपनामँइ से इनकार करत हें।”

दरसनन के बातँय 13:14

ऊँ चमत्कार के कामन के कारन, जिनहीं पहिल खतरनाक जानबर के आँगे देखामँइ के अधिकार ओही दीन ग रहा हय; उआ धरती के रहँइ बालेन काहीं, इआमेर भरमाबत रहा हय, अउर उनसे इआ कहत रहा हय, कि जउने खतरनाक जानबर के तलबार लगी रही हय, उआ जिन्दा होइगा हय, ओखर मूरत बनाबा।

दरसनन के बातँय 2:13

हम इआ त जानित हएन, कि तूँ उहाँ रहते हया, जहाँ सइतान के सिंहासन हय; अउर तूँ हमरे नाम माहीं बने रहते हया; अउर हमरे ऊपर बिसुआस करँइ से, उन दिनन माहीं पीछे नहीं हट्या, जउने माहीं हमार बिसुआस के काबिल गबाह अन्तिपास, तोंहरे पंचन के बीच माहीं, उआ जघा माहीं मार डारा ग, जहाँ सइतान रहत हय।

दरसनन के बातँय 2:9

हम तोंहरे कस्ट अउर गरीबी काहीं जानित हएन; (पय तूँ धनी हया) अउर जउन मनई अपने-आप काहीं यहूदी कहत हें, अउर आहीं न, बलकिन सइतान के सभा आहीं, उनखे बुराई काहीं घलाय जानित हएन।

दरसनन के बातँय 3:8

हम तोंहरे कामन काहीं जानित हएन; देखा, हम तोंहरे आँगे एकठे दुअरा खोलिके रखे हएन, जउने काहीं कोऊ बन्द नहीं कइ सकय; तोंहार सक्ती थोरिन काहीं त हय, तऊ तूँ हमरे बचन काहीं पालन किहे हया, अउर हमरे नाम काहीं इनकार नहीं किहे आह्या।

दरसनन के बातँय 5:9

अउर ऊँ पंचे इआ नबा गाना गामँइ लागें, कि “अपनय इआ किताब काहीं लेंइ, अउर एखर मुहरँय खोलँय के काबिल हएन; काहेकि अपना बध होइके अपने खून से हरेक कुल, अउर भाँसा, अउर लोग, अउर जाति म से परमातिमा के खातिर लोगन काहीं मोल लिहेन हँय।

दरसनन के बातँय 6:10

ऊँ पंचे खुब चन्डे गोहराइके कहिन, “हे मालिक, हे पबित्र, अउर सत्य; अपना कब तक न्याय न करब? अउर धरती के रहँइ बालेन से, हमरे खून के बदला कब तक न लेब?”