2 पतरस 1:8 - Bagheli Bible

⁸ काहेकि अगर ईं सगली बातँय तोंहरे पंचन के जीबन माहीं बनी रइहँय, अउर बढ़त जइहँय, त तोहईं पंचन काहीं, हमरे पंचन के प्रभू यीसु मसीह काहीं पहिचानय माहीं निस्फल, अउर निकम्मा न होंइ देइहँय।

2 पतरस 1:8 ပူးပေါင်းရင်းမြစ်များ

मत्ती 13:22

अउर जउन जरबइलन माहीं बोए बीज कि नाईं हें, ऊँ ईं आहीं, जउन परमातिमा के बचन काहीं सुनिन, पय संसारिक चिन्ता, अउर धन के लालच माहीं फँसिके, परमातिमा के बचन काहीं दबाय देत हें, अउर ऊँ पंचे बिना फर के बिरबा कि नाईं होइ जात हें।

मत्ती 20:3

अउर ओखे बाद ऊँ पुनि सकारे नव बजे के करीब निकरें, अउर बजार माहीं दुसरे मनइन काहीं बेफालतू माहीं ठाढ़ देखिन।

मत्ती 20:6

अउर ओखे बाद करीब पाँच बजे ऊँ पुनि निकरें अउर बजार माहीं अउरव मनइन काहीं इहाँ-उहाँ ठाढ़ पाइन, तब उनसे कहिन, कि ‘तूँ पंचे काहे दिन भर इहाँ बेफालतू माहीं ठाढ़ रहि गया?’ तब ऊँ पंचे उनसे कहिन, कि ‘हम पंचे एसे ठाढ़ रहि गएन, कि हमहीं पंचन काहीं कोऊ काम माहीं नहीं लगाइस।’

मत्ती 25:26

पय मालिक उआ दास काहीं जबाब दिहिन, कि ‘हे दुस्ट अउर आलसी दास, जब तँय इआ जानत रहे हए, कि हम जहाँ बीज नहीं बोई उहाँ से काटित हएन, अउर जहाँ नहीं छीटी उहँव से बटोरित हएन;

यूहन्ना 15:2

हमरे हरेक उन डेरइअन काहीं, जउने माहीं फर नहीं लागँय, ऊँ काटि डारत हें, अउर हरेक उन डेरइअन काहीं जउन फरती हईं, ऊँ छाँटत हें, जउने उनमा अउर जादा फर लागँय।

यूहन्ना 17:3

अउर अनन्त जीबन इआ आय, कि ऊँ पंचे अपना काहीं जउन एकलउते परमातिमा आहेन, अउर यीसु मसीह काहीं जिनहीं अपना पठयन हँय, जानँय।

यूहन्ना 5:42

पय हम जानित हएन, कि तोंहरे जीबन माहीं परमातिमा के प्रेम नहिं आय।

रोमियन 12:11

अउर अपने काम माहीं कबहूँ आलसी न बना; बलकिन आत्मिक उत्साह के साथ प्रभू के सेबा माहीं लगे रहा।

1 कुरिन्थियन 15:58

एसे हे हमार पियार भाई-बहिनिव, तूँ पंचे बिसुआस माहीं मजबूत होइके, प्रभू माहीं अटल रहा, अउर प्रभू के काम करँइ के खातिर, खुद काहीं पूरी तरह से समरपित कइ द्या, काहेकि तूँ पंचे इआ जनते हया, कि प्रभू के खातिर जउन मेहनत तूँ पंचे करते हया, उआ बेकार न होई।

2 कुरिन्थियन 13:5

अउर अपने-आप काहीं तूँ पंचे जाँचा-परखा, कि बिसुआस माहीं बने हया, कि नहीं, अउर इहव जाँच करा कि मसीह तोंहरे पंचन के जीबन माहीं हें, कि नहीं। नहीं त तूँ पंचे परमातिमा के नजर माहीं निकम्मा ठहरिहा।

2 कुरिन्थियन 8:2

हम इआ बात काहीं एसे बताइत हएन, कि जब उनखे जीबन माहीं दुख-मुसीबत के कारन बड़ी परिच्छा आईं तय। तऊ ऊँ पंचे खुसी रहे हँय, अउर उनखे ऊपर भारी गरीबी आय गे रही हय। तऊ उनखर दान देंइ के उदारता कम नहीं भय, बलकिन बढ़िनगे रही हय।

2 कुरिन्थियन 8:7

एसे जइसन तूँ पंचे हरेक बातन माहीं, अरथात बिसुआस माहीं, बात करँइ माहीं, ग्यान माहीं, अउर हरेकमेर के उपकार करँइ माहीं, अउर हमसे पंचन से प्रेम करँइ माहीं, बढ़त जाते हया। उहयमेर दान करँइ के काम माहीं घलाय बढ़त जा।

2 कुरिन्थियन 9:14

अउर ऊँ पंचे तोंहसे प्रेम करत हें, अउर तोंहरे खातिर प्राथना करत रहत हें, काहेकि तोंहरे पंचन के ऊपर परमातिमा के बड़ी किरपा हय।

फिलिप्पियन 1:9

अउर हम हमेसा इहय प्राथना करत रहित हएन, कि तोंहार पंचन के प्रेम, ग्यान अउर हरेकमेर के सोचँय-समझँय के छमता अउर बाढ़त जाय।

फिलिप्पियन 2:5

अउर जइसन मसीह यीसु के सुभाव रहा हय, उहयमेर तोंहरव पंचन के सुभाव होय।

फिलिप्पियन 3:8

बलकिन हम अपने प्रभू मसीह यीसु के उत्तम बातन काहीं पहिचान लिहेन हय, इआ कारन से मूसा के बिधान के सगली बातन काहीं तुच्छ समझित हएन; अउर सगली चीजन काहीं कूरा-कचरा समझिके छोंडि दिहेन हय, जउने मसीह काहीं अपनाय सकी।

कुलुस्सियन 1:10

जउने तोंहार चाल-चलन प्रभू के काबिल होय, अउर तूँ पंचे हरेकमेर से प्रभू काहीं प्रसन्न करँइ बाला जीबन जिअा, अउर तूँ पंचे हरेकमेर के भलाई के कामन काहीं करँइ माहीं लगे रहा, अउर परमातिमा के ग्यान माहीं लगीतार बढ़त जा।

कुलुस्सियन 2:7

अउर मसीह माहीं जड़ कि नाईं मजबूती के साथ आँगे बढ़त जा, अउर जइसन तोंहईं पंचन काहीं सिखाबा ग रहा हय, उहयमेर बिसुआस माहीं मजबूत होत चले जा, अउर परमातिमा काहीं जादा से जादा धन्यबाद देत रहा।

कुलुस्सियन 3:16

अउर मसीह के बचन काहीं जादा से जादा अपने हिरदँय माहीं बसाबा, जउने परमातिमा के ग्यान से भरपूर होइके एक दुसरे काहीं सिखाबा, अउर गलती करँइ त चेताबा, अउर परमातिमा के इआ किरपा के कारन उनखे खातिर अपने-अपने मनन माहीं भजन, स्तुति के गाना, अउर आत्मिक गाना गाबत रहा।

1 थिस्सलुनीकियन 3:12

अउर प्रभू अइसन करँय, कि जइसन प्रेम हम पंचे तोंहसे रक्खित हएन; उहयमेर तोंहरव प्रेम आपस माहीं एक दुसरे के साथ, अउर सगले मनइन के साथ बढ़य, अउर मजबूत होत जाय।

1 थिस्सलुनीकियन 4:1

हे भाई-बहिनिव, हम पंचे तोंहसे बिनती करित हएन, अउर तोंहईं प्रभू यीसु के नाम से समझाइत हएन, कि जइसन तूँ पंचे हमसे पंचन से निकहा चाल-चलन चलब, अउर परमातिमा काहीं प्रसन्न करब सिखे हया, अउर उहयमेर चलते घलाय हया, त इहइमेर अउर आँगे बढ़त चले जा।

2 थिस्सलुनीकियन 1:3

हे भाई-बहिनिव, तोंहरे बारे माहीं हमहीं पंचन काहीं, हर समय परमातिमा काहीं धन्यबाद देत रहँइ चाही, अउर इआ उचितव हय, एसे कि तोंहार बिसुआस खुब बाढ़त जात हय, अउर तोंहार सगलेन के प्रेम घलाय आपस माहीं खुब बाढ़त जात हय।

1 तीमुथियुस 5:13

एखे साथय-साथ ऊँ घरन-घरन बागत फिरती हईं, अउर काम धंधा करब छोंड़िके आलसी बन जाती हईं, अउर केबल आलसी भर नहीं, बलकिन बेफालतू के बात करत रहती हईं, अउर दुसरे के कामन माहीं टाँग अँड़उती हईं, अउर अनुचित बातँय बोलती हईं।

तीतुस 3:14

हे तीतुस, तूँ सगले मसीही भाइन काहीं सिखाबा, कि ऊँ निकहे काम करत रहँय, जउने एक दुसरे के जरूरत काहीं पूर कइ सकँय, अउर उनखे कामन के व्दारा दुसरे लोगन काहीं फायदा मिलय।

फिलेमोन 1:6

हम इआ प्राथना करित हएन, कि बिसुआस माहीं तोंहार भागीदार होब, प्रभावसाली होय, अउर मसीह के द्वारा जउन आसिरबाद तोंहईं मिला हय, ओही पहिचान ल्या।

इब्रानियन 6:12

अउर हम पंचे इआ नहीं चाही, कि तूँ पंचे आलसी बना, बलकिन तूँ पंचे उनखे कि नाईं जीबन बिताबा, जउन बिसुआस अउर धीरज के द्वारा परमातिमा के वादन के बारिसदार बन जात हें।

2 पतरस 1:2

तूँ पंचे परमातिमा, अउर हमरे पंचन के प्रभू यीसु काहीं जान चुके हया, एसे तोंहईं परमातिमा के किरपा अउर सान्ती जादा से जादा मिलत रहय।

2 पतरस 1:3

परमातिमा अपने सक्ती से भक्तिमय जीबन जिअँइ के खातिर, अउर उनखे सेबा के खातिर, जउन कुछू हमहीं पंचन काहीं चाही, उआ सब कुछ दिहिन हीं। अउर हमहीं पंचन काहीं अपने ग्यान काहीं पामँइ के काबिल बनाइन हीं, अउर ऊँ हमहीं पंचन काहीं अपने महिमा अउर प्रताप के मुताबिक बोलाइन हीं।

2 पतरस 2:20

एसे कि जब ऊँ पंचे हमरे पंचन के प्रभू अउर मुक्ती देंइ बाले, यीसु मसीह के ऊपर बिसुआस किहे के द्वारा संसार के अनेकव प्रकार के बुराइन से बच निकरें तय, अउर पुनि ओहिन माहीं फँसिके हार गे हँय, त उनखर दसा पहिले से अउर जादा खराब होइगे ही।

2 पतरस 3:18

बलकिन हमरे पंचन के प्रभू, अउर मुक्ती देंइ बाले यीसु मसीह के किरपा, अउर पहिचान माहीं आँगे बढ़त जा। उनहिन के महिमा अबहिनव होय, अउर जुगन-जुगन तक होत रहय। आमीन।