2 पतरस 1:4 - Bagheli Bible

⁴ जिनखे द्वारा ऊँ हमसे पंचन से खुब कीमती, अउर खुब बड़े वादन काहीं किहिन हीं, जउने तूँ पंचे ईं वादन के द्वारा, संसार के बुरी अभिलासन से होंइ बाली सड़ाहट से छूटिजा, अउर परमातिमा के सुभाव कि नाईं तोंहरव सुभाव होइ जाय।

2 पतरस 1:4 ပူးပေါင်းရင်းမြစ်များ

रोमियन 9:4

एसे कि ऊँ पंचे इजराइल के बंस के आहीं; अउर परमातिमा के गोद लीन सन्तान होंइ के हक्क उनहिन काहीं मिला हय। अउर ऊँ पंचे परमातिमा के सामर्थ के कामन काहीं देखि चुके हँय, अउर उनहिन के साथ परमातिमा करार घलाय किहिन तय, अउर मूसा नबी के द्वारा अपने बिधान काहीं दिहिन रहा हय, अउर उनहिन काहीं मन्दिर माहीं अराधना करँइ के खातिर कहिन तय। अउर उनहिन से वादा घलाय किहिन तय,

2 कुरिन्थियन 1:20

काहेकि परमातिमा जेतने वादा किहिन हीं, ऊँ सगले यीसु माहीं, सगले मनइन के खातिर “हाँ” बन जात हें, एसे हम पंचे यीसु मसीह के द्वारा “आमीन” घलाय कहित हएन, कि जउने हमरे पंचन के द्वारा परमातिमा के बड़ाई होय।

2 कुरिन्थियन 3:18

पय हमरे पंचन के चेहरा माहीं परदा नहिं आय, प्रभू के महिमा के चमक हमरे पंचन के चेहरा के द्वारा दुसरेन काहीं देखाई देत ही। जइसन अइना माहीं, त प्रभू के द्वारा जउन आत्मा आहीं, हम पंचे उनखे तेज चमकँइ बाले रूप कि नाईं थोरी-थोरी कइके बदलत जइत हएन।

2 कुरिन्थियन 6:17

एसे परमातिमा कहत हें, कि “उनखे पंचन के बीच से निकर जा, अउर उनसे अलग रहा; अउर असुद्ध चीजन काहीं न छुआ, तबहिन हम तोंहईं पंचन काहीं सोइकार करब।

गलातियन 3:16

मतलब इआ आय कि वादा त अब्राहम से, अउर उनखे बंस से कीन ग रहा हय; पय पबित्र सास्त्र माहीं इआ नहीं लिखा आय, कि उनखे बंसन से, जइसन कि बहुतन के खातिर माना जाय, पय ओमा एकय के बारे माहीं लिखा हय, तोंहरे बंस से, अउर उआ बंस यीसु मसीह आहीं।

गलातियन 6:8

काहेकि जे कोऊ अपने बुरे बिचार के बीज बोबत हय, त उआ अपने बुरे बिचार के व्दारा बिनास रूपी फसल काटी, अउर जे कोऊ आत्मा के खातिर बीज बोबत हय, उआ आत्मा के व्दारा अनन्त जीबन रूपी फसल काटी।

इफीसियन 4:13

अउर जब तक कि हम पंचे सगले जने बिसुआस माहीं, अउर परमातिमा के लड़िका के ग्यान माहीं एक न होइ जई, अउर मसीह के सगले गुनन काहीं अपने जीबन माहीं अपनाय के सिद्ध मनई न बन जई।

कुलुस्सियन 3:10

अउर नबा सुभाव काहीं अपनाय लिहे हया, जउन अपने बनामँइ बाले के स्वरूप के मुताबिक, परमातिमा के ग्यान काहीं पामँइ के खातिर नबा बनत जात हय।

इब्रानियन 12:10

हमार पंचन के संसारिक बाप, त अपने-अपने समझ के मुताबिक थोरेन दिन के खातिर डाँट-फटकार करत रहे हँय, पय परमातिमा त हमरे पंचन के फायदा के खातिर अइसन करत हें, कि जउने हम पंचे उनहिन कि नाईं पबित्र बन जई।

इब्रानियन 9:15

अउर इहय कारन से यीसु नई करार के बिचबई भे हँय, जउने उनखे मउत के द्वारा, जउन पहिल करार के समय के अपराध रहे हँय, उनसे छुटकारा मिलय, अउर परमातिमा के चुने मनई, करार के मुताबिक हमेसा के खातिर बारिसदार बन जाँय।

याकूब 1:27

हमरे पिता परमातिमा के लघे सुद्ध अउर निरमल भक्ती इआ आय, कि अनाथन अउर बिधबन के दुख माहीं, हम पंचे उनखर मदत करी, अउर अपने-आप काहीं संसार के बुरे कामन से निस्कलंक रखी।

2 पतरस 1:1

हम समौन पतरस इआ चिट्ठी काहीं लिख रहेन हय, जउन यीसु मसीह के दास अउर खास चेला आहेन। हम इआ चिट्ठी ऊँ मनइन काहीं लिख रहेन हय, जउन हमरे पंचन के परमातिमा, अउर मुक्ती देंइ बाले यीसु मसीह जउन हमहीं पंचन काहीं, परमातिमा के नजर माहीं निरदोस बनाइन हीं, उनहिन के द्वारा हमरे पंचन कि नाईं, ऊँ पंचे घलाय खुब कीमती बिसुआस पाइन हीं।

2 पतरस 3:13

पय हम पंचे परमातिमा के वादा के मुताबिक, एकठे नबा अकास, अउर नई धरती के पूर आसा लगाए हएन, जहाँ परमातिमा के सच्चे मनई निबास करिहँय।

2 पतरस 3:9

अउर इआ जानिल्या, कि प्रभू अपने वादा काहीं पूर करँइ के बारे माहीं, कबहूँ देरी नहीं करँय, जइसन देरी कुछ मनई समझत हें। पय परमातिमा तोंहरे बारे माहीं धीरज धरत हें, अउर ऊँ नहीं चाहँय, कि कउनव मनई नास होंय; बलकिन ऊँ इआ चाहत हें, कि सगले मनइन काहीं अपने पापन से पस्चाताप कइके, प्रभू के लघे आमँइ के मोका मिलय।

1 यूहन्ना 2:25

अउर परमातिमा हमहीं पंचन काहीं अनन्त जीबन देंइ के बचन दिहिन हीं।

1 यूहन्ना 3:2

हे पियार साथिव, हम पंचे परमातिमा के सन्तान आहेन, अउर अबे तक इआ प्रगट नहीं भ, कि हम पंचे का कुछ होब! पय एतना जानित हएन, कि जब यीसु मसीह दुसराय अइहँय, त हमहूँ पंचे उनहिन कि नाईं होइ जाब, काहेकि उनहीं ओहिन मेर देखब, जइसन ऊँ हें।