2 कुरिन्थियन 7:2 - Bagheli Bible

² काहेकि हम पंचे कोहू के कुछू नहीं बिगाड़ेन आय, अउर न कोहू के साथ अन्याय किहेन आय, अउर न कोहू के साथ छलय किहेन आय, एसे तूँ पंचे अपने पूरे हिरदँय से हमसे पंचन से प्रेम करा।

2 कुरिन्थियन 7:2 ပူးပေါင်းရင်းမြစ်များ

मत्ती 10:14

अउर जे कोऊ तोंहईं सोइकार न करय, अउर तोंहरे बातन काहीं न सुनय, त उआ घर इआ सहर से निकरत समय अपने गोड़ेन के धूधुर झार दिहा।

मत्ती 10:40

अउर जे कोऊ तोंहईं पंचन काहीं सोइकार करत हय, उआ हमहीं सोइकार करत हय, अउर जे कोऊ हमहीं सोइकार करत हय, उआ हमहीं पठमँइ बाले परमातिमा काहीं सोइकार करत हय।

लूका 10:8

जउने सहरन अउर गाँमन माहीं जया, अउर उहाँ के मनई अपने घर माहीं स्वागत-सत्कार करँइ, त जउन कुछू तोहईं खाँइ काहीं देंय उहय खया।

खास चेलन 20:33

हम कोहू के चाँदी, सोने के इआ कि ओन्हा के लालच नहीं किहेन।

रोमियन 16:18

काहेकि इआमेर के मनई हमरे पंचन के प्रभू यीसु मसीह के सेबा नहीं करँय, बलकिन अपने कमाई के खातिर सेबा करत हें; अउर मीठ-मीठ बातँय कइके भोले-भाले मनइन काहीं बिसुआस से भटकाय देत हें।

2 कुरिन्थियन 1:12

हमहीं पंचन काहीं इआ बात के घमन्ड हय, कि हम इआ बात सच्चे मन से कहि सकित हएन, कि हम पंचे इआ संसार के मनइन के साथ, अउर खास करके तोंहरे पंचन के साथ, परमातिमा के किरपा के मुताबिक बेउहार किहेन हय। हम पंचे उआ बेउहार सरलता अउर सच्चाई के साथ किहेन हँय, जउन परमातिमा से मिलत हय, अउर उआ संसार के बुद्धी से नहीं मिलय।

2 कुरिन्थियन 11:16

हम पुनि तोंहसे पंचन से कहित हएन, कि कोऊ हमहीं मूरुख न समझय; अगर तूँ पंचे हमहीं मूरुख समझते हया, त मूरुखय समझिके हमरे बातन काहीं मानि ल्या, जउने हमहूँ थोर काहीं घमन्ड कइ सकी।

2 कुरिन्थियन 11:9

अउर जब हम तोंहरे साथ माहीं रहेन हय, तबहूँ हमहीं पइसा के जरूरत रही हय, पय हम कोहू से नहीं माँगेन, कि जउने ओखे ऊपर हमार बोझ न परय, काहेकि जउन भाई लोग मकिदुनिया प्रदेस से आए रहे हँय, उँइन पंचे हमरे जरूरत काहीं पूर कइ दिहिन तय। अउर हम हरेक बात माहीं तोंहरे पंचन के ऊपर बोझ नहीं बनेन आय, अउर न कबहूँ बनबय करब।

2 कुरिन्थियन 4:2

पय हम पंचे लज्जित करँइ बाले, अउर गुप्त कामन काहीं छोंड़ि दिहेन हय, अउर अपने चतुराई से नहीं चली, अउर न त परमातिमा के बचन माहीं मिलबटय करित आहेन, बलकिन परमातिमा के नजर माहीं, सत्य काहीं सरल रूप से बताइके, हरेक मनइन के सोच-बिचार माहीं आपन भलाई बइठाइत हएन।

फिलिप्पियन 2:29

एसे तूँ पंचे प्रभू माहीं, उनखर बड़े आनन्द के साथ स्वागत किहा, अउर इआमेर के मनइन के आदर किहा करा।

कुलुस्सियन 4:10

अरिस्तरखुस जउन हमरे साथ जेल माहीं हें, अउर मरकुस जउन बरनबास के भाई लागत हें। (जिनखे बारे माहीं हम तोंहईं पंचन काहीं बताए रहे हएन, कि अगर ऊँ तोंहरे पंचन के लघे आमँय, त उनखे साथ निकहा बेउहार किहा।)

1 थिस्सलुनीकियन 2:10

तूँ पंचे एखर खुदय गबाह हया, अउर परमातिमा घलाय गबाह हें, कि तोंहरे सगले बिसुआसी लोगन के बीच माहीं, हमार पंचन के बरताव कइसन पबित्र, धारमिक, अउर निरदोस रहा हय।

फिलेमोन 1:12

हम ओही पुनि तोंहरे लघे पठइत हएन, जउन हमरे जिगर के टुकड़ा आय।

फिलेमोन 1:17

एसे अगर तूँ हमहीं प्रभू के काम माहीं आपन साझीदार मनते हया, त ओहू काहीं हमरे कि नाईं समझिके सोइकार करा।

2 यूहन्ना 1:10

अगर कोऊ तोंहरे पंचन के लघे आबय, अउर मसीह के इहय सिच्छा काहीं न देय, त ओही अपने घर माहीं न घुसँय दिहा, अउर न ओसे नबस्कार किहा।