1 तीमुथियुस 6:16 - Bagheli Bible

¹⁶ केबल परमातिमा अमर हें, अउर ऊँ अगम्य जोति माहीं रहत हें, जिनखे लघे कोऊ नहीं जाय सकय, अउर न आज तक कउनव मनई उनहीं देखिस आय, न कबहूँ देखेन पाई, उनखर मान-सम्मान अउर राज जुग-जुग बना रही। आमीन।

1 तीमुथियुस 6:16 ပူးပေါင်းရင်းမြစ်များ

यूहन्ना 1:18

परमातिमा काहीं कबहूँ कोऊ नहीं देखिस, पय केबल परमातिमा के एकलउते लड़िका, जउन हमेसा उनहिन के साथ रहत हें, उँइन उनखे बारे माहीं हमहीं पंचन काहीं बताइन हीं।

यूहन्ना 14:9

तब यीसु उनसे कहिन, “हे फिलिप्पुस, हम एतने दिना से तोंहरे पंचन के साथ हएन, अउर का तूँ हमहीं नहीं जनते आह्या? जे कोऊ हमहीं देखिस ही, उआ पिता काहीं देखिस ही, पुनि तूँ काहे कहते हया, कि हमहीं पिता काहीं देखाबा।

यूहन्ना 6:46

काहेकि वास्तव माहीं पिता परमातिमा काहीं कोऊ नहीं देखिस, केबल उँइन पिता परमातिमा काहीं देखिन हीं, जेही ऊँ पठइन हीं।

यूहन्ना 8:58

तब यीसु उनसे कहिन, “हम तोंहसे सही-सही कहित हएन; अब्राहम के पइदा होंइ से पहिलेव हम रहेन हँय।”

इफीसियन 3:21

परमातिमा के बड़ाई मसीही मन्डली माहीं, अउर मसीह यीसु माहीं, अनन्त पीढ़िन तक जुग-जुग होत रहय। आमीन।

फिलिप्पियन 4:20

हमरे पंचन के पिता परमातिमा के बड़ाई जुग-जुग तक होत रहय। आमीन!

कुलुस्सियन 1:15

ऊँ त देखाई न देंइ बाले परमातिमा के रूप आहीं, अउर सगले संसार माहीं पहिलउठा आहीं।

1 तीमुथियुस 1:17

अब हमेसा राज करँइ बाले राजा, अरथात अबिनासी, जिनहीं कोऊ कबहूँ नहीं देखिस, एकलउते परमातिमा के आदर अउर बड़ाई जुग-जुग होत रहय। आमीन।

इब्रानियन 13:8

काहेकि यीसु मसीह जइसन पहिले रहे हँय, उहयमेर आजव हें, अउर ऊँ हमेसा उहयमेर रइहँय।

याकूब 1:17

काहेकि हरेक निकहा बरदान, अउर हरेक उत्तम दान, परमातिमा से मिलत हय, जउन जोतियन के परमपिता आहीं, जउने माहीं न त कउनव बदलाव होइ सकय, अउर न नछत्रन के गति-बिधिअन से पइदा भे छाया से उआ बदल सकय।

1 यूहन्ना 1:5

जउन खुसी के खबर हम पंचे उनसे सुनेन हय, उहय तोंहईं सुनाइत हएन, उआ इआ आय, कि परमातिमा जोति आहीं; अउर उनमा एक्कव अँधिआर नहिं आय।

1 यूहन्ना 1:7

पय जइसन ऊँ उँजिआर माहीं चलत हें, उहयमेर अगर हमहूँ पंचे उँजिआर माहीं चली, त एक दुसरे के साथ हमार पंचन के सहभागिता ही; अउर परमातिमा के लड़िका यीसु के खून, हमहीं पंचन काहीं सगले पापन से सुद्ध करत हय।

1 यूहन्ना 4:12

परमातिमा काहीं कबहूँ कोहू नहीं देखिस, अगर हम पंचे आपस माहीं प्रेम करित हएन, त परमातिमा हमरे पंचन के जीबन माहीं बास करत हें; अउर उनखर प्रेम हमरे जीबन माही सिद्ध होइगा हय।

यहूदा 1:25

अउर हमहीं पंचन काहीं मुक्ती देंइ बाले, एकलउते परमातिमा के महिमा, अउर बैभव अउर सक्ती, अउर अधिकार, हमरे पंचन के प्रभू यीसु मसीह के द्वारा, जइसन सनातन काल से हय, अबहिनव होय, अउर आमँइ बाले जुगन-जुगन तक होत रहय। आमीन!

दरसनन के बातँय 1:6

अउर हमहीं पंचन काहीं एकठे राज, अउर अपने पिता परमातिमा के खातिर याजक घलाय बनाय दिहिन हीं; उनहिन के महिमा अउर सामर्थ जुगन-जुगन तक रहय। आमीन।

दरसनन के बातँय 1:8

प्रभू परमातिमा, जउन हें, अउर जउन रहे हँय, अउर जउन आमँइ बाले हें, जउन सबसे सक्तिसाली हें, इआ कहत हें, “हमहिन अल्फा अउर ओमेगा आहेन।”

दरसनन के बातँय 21:3

अउर हम सिंहासन म से, कोहू काहीं खुब चन्डे इआ कहत सुनेन, “देखा, परमातिमा के डेरा, मनइन के बीच माहीं हय, ऊँ उनखे साथ निबास करिहँय, अउर ऊँ पंचे उनखर लोग होइहँय, अउर परमातिमा खुद उनखे बीच माहीं रइहँय, अउर उनखर परमातिमा होइहँय।

दरसनन के बातँय 22:5

पुनि रात न होई, अउर उनहीं पंचन काहीं, दिया अउर सुरिज के उँजिआर के जरूरत न होई, काहेकि प्रभू परमातिमा, उनहीं पंचन काहीं उँजिआर देइहँय, अउर ऊँ पंचे जुगन-जुगन तक राज करिहँय।

दरसनन के बातँय 4:11

“हे हमार पंचन के प्रभू, अउर परमातिमा, अपनय महिमा, अउर मान-सम्मान, अउर सामर्थ के काबिल हएन; काहेकि अपनय सगली चीजन काहीं बनाएन हय, अउर ऊँ अपनय के मरजी से बनाई गे रही हँय, अउर बनाई गई हँय।”

दरसनन के बातँय 7:12

“आमीन! हमरे पंचन के परमातिमा के बड़ाई, अउर महिमा, अउर ग्यान, अउर धन्यबाद, अउर मान-सम्मान, अउर सामर्थ, अउर सक्ती जुगन-जुगन तक बनी रहय। आमीन!”