1 तीमुथियुस 4:3 - Bagheli Bible

³ जउन काज-बिआह करँइ से रोकि हँय, अउर खाँइ बाली कुछ चीजन काहीं न खाँइ चाही, इआ कहिके उनसे दूरी रहँइ के हुकुम देइहँय; जिनहीं परमातिमा एसे बनाइन हीं, कि बिसुआसी अउर सत्य काहीं जानँइ बाले, परमातिमा काहीं धन्यबाद दइके उनहीं खाँय।

1 तीमुथियुस 4:3 ပူးပေါင်းရင်းမြစ်များ

मत्ती 14:19

अउर भीड़ के मनइन से कहिन, कि “चारय माहीं बइठि जा।” अउर उन पाँचठे रोटी अउर दोनहूँ मछरिन काहीं लिहिन; अउर स्वरग कइती निहारिके धन्यबाद दिहिन, अउर रोटिन काहीं टोरि-टोरिके चेलन काहीं दिहिन, अउर चेला लोग, सगले मनइन काहीं परस दिहिन।

मत्ती 15:11

जऊँ मनई के मुहें से पेटे के भीतर जात हय, उआ मनई काहीं असुद्ध नहीं करय, बलकिन जउन बातँय मनई के मुहें से (मन से) निकरती हईं, केबल उँइन बातँय मनई काहीं परमातिमा के नजर माहीं असुद्ध करती हईं।”

मत्ती 15:36

अउर यीसु ऊँ सातठे रोटी, अउर मछरिन काहीं हाँथे म लइके, परमातिमा काहीं धन्यबाद दइके टोरिन, अउर अपने चेलन काहीं देत गें, अउर चेला लोग मनइन काहीं परसत गें।

लूका 24:30

जब यीसु उनखे साथ खाना खाँइ बइठें, तबहिनय ऊँ रोटी लइके परमातिमा काहीं धन्यबाद दिहिन, अउर रोटी टोरिके उनहीं देंइ लागें।

यूहन्ना 6:23

(तऊ तिबिरियास सहर से कइएकठे छोट-छोट नाव उआ जघा माहीं आईं, जहाँ प्रभु यीसु, परमातिमा के धन्यबाद किहे के बाद उनहीं रोटी, मछरी खबाइन तय।)

खास चेलन 27:35

अउर एतना कहिके, ऊँ रोटी लइके सगलेन के आँगे परमातिमा के धन्यबाद किहिन; अउर टोरिके खाँइ लागें।

रोमियन 14:17

काहेकि परमातिमा के राज, खाँय-पिअँइ से सम्बन्धित नहिं आय, पय अगर हम पंचे परमातिमा के नजर माहीं निरदोस जीबन जी, अउर सगले मनइन से मेल-मिलाप से रही, अउर पबित्र आत्मा से मिलँइ बाले आनन्द माहीं जीबन बिताई, त परमातिमा हमरे पंचन के जीबन माहीं राज करिहँय।

रोमियन 14:3

अउर उआ मनई जउन हरेकमेर के खाना खात हय, त ओही, उआ मनई काहीं तुच्छ न समझँइ चाही, जउन कुछ चीजन काहीं नहीं खाय। उहयमेर उहव मनई जउन कुछ चीजन काहीं नहीं खाय, उआ मनई काहीं जउन सगली चीजन काहीं खात हय, बुरा न कहँइ चाही; काहेकि परमातिमा दोनव जनेन काहीं अपनाइन हीं।

रोमियन 14:6

अउर जे कोऊ एक दिन काहीं दुसरे दिन से बढ़िके मानत हय, त उआ ओही प्रभू काहीं सम्मान देंइ के खातिर मानत हय। अउर जे कोऊ सब चीजन काहीं खात हय, उहव प्रभू काहीं सम्मान देंइ के खातिर खात हय, काहेकि उआ जउन कुछू खात हय, ओखे खातिर परमातिमा के धन्यबाद करत हय। अउर जे कोऊ कुछ चीजन काहीं नहीं खाय, उहव प्रभू काहीं सम्मान देंइ के खातिर नहीं खाय, अउर उहव परमातिमा के धन्यबाद करत हय।

1 कुरिन्थियन 6:13

अउर तूँ पंचे इआ कहते हया, कि “खाना पेट के खातिर आय, अउर पेट खाना के खातिर आय” पय परमातिमा खाना अउर पेट दोनव काहीं नास कइ देइहँय। अउर हमार पंचन के देंह ब्यभिचार करँइ के खातिर नहीं, प्रभू के महिमा के खातिर बनाई गे ही, अउर प्रभू हमरे देंह के भलाई के खातिर हें।

1 कुरिन्थियन 7:28

पय अगर तूँ पंचे काजव कइ लेते हया, त उआ पाप न होय; अउर अगर कउनव कुमारी बिटिया आपन काज करत ही, त उआ कउनव पाप न होय; पय अइसन मनइन काहीं दुख-मुसीबत सहँय क परी, पय हम उनहीं इनसे बचामँइ चाहित हएन।

1 कुरिन्थियन 8:8

पय खाना हमहीं पंचन काहीं परमातिमा के लघे नहीं पहुँचाबय, चाह हम पंचे खई, त ओसे हमहीं कउनव फायदा न होई, अउर चाह न खई, त हमहीं पंचन काहीं कुछू नुकसान न होई।

कुलुस्सियन 2:16

एसे खाँय-पिअँइ के चीजन के बारे माहीं इआ कि तेउहार मनामँइ के बारे माहीं, इआ नबा चाँद नाम के तेउहार मनामँइ के बारे माहीं, इआ पबित्र दिन के बारे माहीं कोहू काहीं फँइसला न करँय दिहा।

कुलुस्सियन 3:17

अउर तूँ पंचे जउन कुछू काम करा, इआ कि बचन सुनाबा, सगले काम प्रभू यीसु मसीह के नाम से करा, अउर उनहिन के व्दारा पिता परमातिमा के धन्यबाद करत रहा।

1 तीमुथियुस 2:4

अउर परमातिमा इआ चाहत हें, कि सगले मनई मुक्ती पामँय; अउर ऊँ सत्य काहीं निकहा से जान लेंय

1 तीमुथियुस 4:4

काहेकि परमातिमा जउन मनइन के खाँय के खातिर, हरेक चीजन काहीं बनाइन हीं, ऊँ सगली निकही हईं, अउर कउनव अइसा चीज नहिं आय, जिनहीं खाबा न जाय सकय; पय इआ कि परमातिमा से प्राथना अउर धन्यबाद कइके खाबा जाय।

1 तीमुथियुस 5:14

एसे हम पवलुस इआ चाहित हएन, कि जमान बिधबा काज-बिआह कइलेंय, अउर लड़िका-बच्चा पइदा करँय, अउर आपन घर-गिरिस्ती सम्हारँय, अउर मसीह बिरोधी मनइन काहीं बदनाम करँइ के मोका न देंय।

इब्रानियन 13:4

अउर काज-बिआह सबके बीच माहीं मान-सम्मान के बात समझी जाय, अउर उनखर बिछउना निस्कलंक होंइ चाही, अरथात जिनखर बिआह होत हय, उनहीं पबित्र होंइ चाही, काहेकि परमातिमा ब्यभिचारिन, अउर दुसरे के मेहेरिआ के साथ नजायज सम्बन्ध बनामँइ बालेन के न्याय करिहँय।

इब्रानियन 13:9

एसे तूँ पंचे हरेकमेर के बाहिरी उपदेसन के बातन माहीं न परा, जउन बिसुआस से भटकाय देती हईं। बलकिन अपने मन काहीं परमातिमा के किरपा से बिसुआस माहीं मजबूत करा, इआ नहीं कि तूँ पंचे खाँय-पिअँइ के नेमन माहीं परि जा, काहेकि जे कोऊ ईं खाँय-पिअँइ के नेमन काहीं मानत हें, उनहीं आत्मिक जीबन के खातिर कउनव फायदा नहीं भ आय।