1 तीमुथियुस 4:12 - Bagheli Bible

¹² हे तीमुथियुस, तूँ अबे जमान हया, इआ कारन से कोऊ तोंहार निरादर न करँय पाबय, बलकिन तूँ अपने बात-चीत म अउर चाल-चलन म, अउर प्रेम करँइ म, अउर परमातिमा के ऊपर बिसुआस करँय, अउर अपने पबित्र जीबन से सगले बिसुआसिअन के खातिर आदर्स बन जा।

1 तीमुथियुस 4:12 ပူးပေါင်းရင်းမြစ်များ

मत्ती 18:10

यीसु उनसे पुनि कहिन, कि “देखा, तूँ पंचे ईं छोट से छोट मनइन म से जे हमरे ऊपर बिसुआस करत हें, कोहू काहीं तुच्छ न जान्या; काहेकि हम तोंहसे सही कहित हएन, कि स्वरग माहीं उनखर दूत, स्वरग माहीं रहँइ बाले हमरे पिता के लघे हमेसा हाजिर रहत हें।

1 कुरिन्थियन 11:1

अउर जइसन मसीह कि नाईं हमार चाल-चलन हय, उहयमेर तोंहार पंचन के चाल-चलन घलाय, हमरे कि नाईं होंइ क चाही।

फिलिप्पियन 4:8

एसे हे भाई-बहिनिव, जउन-जउन बातँय सत्य हईं, अउर जउन-जउन बातँय आदर के काबिल हईं, अउर जउन-जउन बातँय उचित हईं, अउर जउन-जउन बातँय पबित्र हईं, अउर जउन-जउन बातँय निकही हईं, अउर जउन-जउन बातँय मन काहीं नीक लागँइ बाली हईं, मतलब इआ, कि जउन-जउन बातँय जीबन माहीं निकहे बिचार पइदा करती हईं, अउर जउन सराहनीय बातँय हईं, उनहिन के ऊपर आपन ध्यान रक्खा।

1 थिस्सलुनीकियन 1:6

अउर तूँ पंचे भारी दुख माहीं पबित्र आत्मा के आनन्द के साथ, बचन काहीं मानिके हमरे पंचन के, अउर प्रभू कि नाईं चाल चलँइ लागे हया।

1 थिस्सलुनीकियन 2:10

तूँ पंचे एखर खुदय गबाह हया, अउर परमातिमा घलाय गबाह हें, कि तोंहरे सगले बिसुआसी लोगन के बीच माहीं, हमार पंचन के बरताव कइसन पबित्र, धारमिक, अउर निरदोस रहा हय।

1 तीमुथियुस 1:14

अउर प्रभू के किरपा हमहीं बहुतायत से मिली, अउर साथय-साथ उआ बिसुआस अउर प्रेम जउन मसीह यीसु के ऊपर बिसुआस किहे से मिलत हय, उहव हमहीं मिला।

2 तीमुथियुस 2:15

तूँ अइसन काम करँइ बाले बनँय के कोसिस करा, जउने परमातिमा के आँगे लजाँय न परय, बलकिन परमातिमा तोहईं अपने काम के काबिल समझँय, अउर तूँ परमातिमा के सत्य बचन काहीं निकहा से लोगन काहीं सिखामँइ बाले ठहरा।

2 तीमुथियुस 2:22

एसे हे तीमुथियुस, तूँ जबानी के बुरी इच्छन से दूरी रहा, अउर जउन सुद्ध मन से प्रभू के नाम लेथें, उनखे साथ पूरी धारमिकता, अउर बिसुआस के साथ, बड़े प्रेम से मिल-जुलिके रहा।

2 तीमुथियुस 2:7

जउन हम कहित हएन, ओखे ऊपर ध्यान द्या, अउर प्रभू तोहईं सगली बातन काहीं समझँइ के बुद्धी देइहँय।

तीतुस 2:15

बेटा, तूँ पूरे हक्क के साथ, ईं सगली बातन काहीं लोगन काहीं बताइके समझाबा, अउर सिखाबत रहा, इआ सब सिखामँइ के तोंहईं अधिकार हय, जउने कोऊ तोंहार अनादर न करँय पाबय।

तीतुस 2:7

तूँ जउन कुछू काम करा ऊँ निकहे होंय, जउने ईं सब कामन काहीं देखिके, जमान लोग उहयमेर जीबन जिअँइ। अउर तूँ जउन सिखाबा उआ निस्कपट होंइ चाही, जउने काहीं सुनिके लोग-बाग अपनाय सकँय।

याकूब 3:13

तोंहरे पंचन म से ग्यानी अउर हुसिआर को हय? जे कोऊ इआमेर होय, उआ अपने कामन काहीं निकहा चाल-चलन से नम्रता समेत देखाबय, जउन ग्यान से पइदा होत हय।

याकूब 3:17

पय जउन ग्यान परमातिमा के तरफ से आबत हय, उआ पहिले त पबित्र होत हय, अउर मिलनसार, कोमल अउर मीठ बोलँइ बाला अउर दयालू, अउर निकहे फर से लदा, अउर बिना पच्छपात के, अउर बिना कपट के होत हय।

1 पतरस 5:3

अउर जउन झुन्ड तोंहईं पंचन काहीं रखबारी के खातिर सउँपा ग हय, उनखे ऊपर आपन अधिकार न जताबा, बलकिन झुन्ड के खातिर आदर्स बना।