1 तीमुथियुस 3:7 - Bagheli Bible

⁷ अउर मसीही मन्डली के अलाबव, गाँव समाज के मनइव ओखर मान-सम्मान करत होंय, अइसन न होय कि उआ निन्दित होइके, जइसा पंछी सिकारी के जाल माहीं फँसि जात हय, उहइमेर उहव सइतान के जाल माहीं फँसि जाय।

1 तीमुथियुस 3:7 ပူးပေါင်းရင်းမြစ်များ

मरकुस 4:11

यीसु उनसे कहिन, “परमातिमा के राज के जउने बातन काहीं दूसर लोग नहीं जानँय, ऊँ बातन काहीं परमातिमा तोहईं समझाइन हीं, पय दुसरे लोगन से सगली बातँय उदाहरनन माहीं कही गई हँय, एसे कि जउने पबित्र सास्त्र माहीं लिखी यसायाह नबी के बात पूर होय।”

खास चेलन 10:22

तब ऊँ पंचे कहिन, “कुरनेलियुस सुबेदार जउन धरमी मनई हें, अउर परमातिमा के भय मानँइ बाले, अउर यहूदी जाति माहीं उनखर खुब सम्मान हय, ऊँ स्वरगदूत से इआ हुकुम पाइन हीं, कि अपना काहीं अपने घर माहीं बोलाइके अपना से बचन सुनँय।”

खास चेलन 22:12

अउर हनन्याह नाम के मनई जउन मूसा के बिधान के मुताबिक भक्त, अउर जिनखर उहाँ के रहँइ बाले सगले यहूदी लोगन माहीं बड़ा नाम रहा हय, हमरे लघे आएँ।

खास चेलन 6:3

एसे हे भाइव, अपने बीच म से सातठे नीक मनइन काहीं चुनि ल्या, जउन पबित्र आत्मा से भरपूर अउर बुद्धिमान होंय, कि जउने उनहीं हम पंचे इआ काम करँइ के जिम्मेबारी सउँपि देई।

1 कुरिन्थियन 10:32

अउर तूँ पंचे न त यहूदी लोगन के खातिर, न त गैरयहूदी लोगन के खातिर, अउर न परमातिमा के मन्डली के बिसुआसी लोगन के खातिर, बिसुआस से भटकामँइ के कारन बना।

1 कुरिन्थियन 5:12

अउर जे कोऊ मसीही मन्डली के बहिरे के आहीं, अरथात अबिसुआसी आहीं, त उनखर न्याय करँइ के हमार कउनव मतलब नहिं आय, पय तोहईं पंचन काहीं उनखर न्याय करँइ क चाही, जउन मसीही मन्डली के भीतर के अरथात बिसुआसी आहीं

2 कुरिन्थियन 6:3

काहेकि हम पंचे हरेक बातन माही, इआ ध्यान रक्खित हएन, कि कोहू काहीं हमरे पंचन के ऊपर दोस लगामँइ के मोका न मिलय। जउने हमरे पंचन के सेबा माहीं कउनव कलंक न लागय।

2 कुरिन्थियन 8:21

काहेकि हमहीं पंचन काहीं इआ बात के हमेसा चिन्ता रहत ही, कि हम पंचे उहय काम करी, जउन प्रभू के नजर भर माहीं निकहा नहीं, बलकिन जउन मनइन के नजर माहीं घलाय निकहा होत हय।

कुलुस्सियन 4:5

अउर जउन मनई प्रभू के ऊपर बिसुआस नहीं करँय, त जब उनहीं बचन सुनामँइ के कीमती मोका मिलय, त ओखर सही ढँग से उपयोग करा।

1 थिस्सलुनीकियन 4:12

जउने तोंहईं कउनव चीज के कमी न होय, अउर मसीही मन्डली के बाहर बालेन के साथ निकहा बरताव किहा।

1 थिस्सलुनीकियन 5:22

अउर हरेकमेर के बुराइन से बचे रहा।

1 तीमुथियुस 3:6

फेर इहव बात ही, कि नबा-नबा बिसुआसी अँगुआ न बनय, कहँव अइसा न होय, कि उआ पद के घमन्ड कइके सइतान कि नाईं सजा पाबय।

1 तीमुथियुस 5:14

एसे हम पवलुस इआ चाहित हएन, कि जमान बिधबा काज-बिआह कइलेंय, अउर लड़िका-बच्चा पइदा करँय, अउर आपन घर-गिरिस्ती सम्हारँय, अउर मसीह बिरोधी मनइन काहीं बदनाम करँइ के मोका न देंय।

1 तीमुथियुस 6:9

पय जउन धनमान बनँइ चाहत हें, ऊँ अइसन परिच्छा, अउर जाल माहीं, अउर अनेकव फालतू, अउर खुद काहीं नुकसान पहुँचामँइ बाली इच्छन माहीं फँसि जात हें, जउन मनइन काहीं बिगाड़िके बिनास के खाईं माहीं गिराय देती हईं।

2 तीमुथियुस 2:26

अउर एखे व्दारा सचेत होइके परमातिमा के इच्छा पूरी करँइ के खातिर, सइतान के चंगुल से अजाद होइ जाँय।

तीतुस 2:5

अउर नीक-नागा पहिचानँय, अउर पतिब्रता, एखे साथय-साथ घर-दुआर के जबाबदारी, अउर आपन करतब्य निकहा से निभामँइ बाली बनँय, अउर अपने मंसेरुअन के कहा-बतान मानँइ बाली बनँय, जउने परमातिमा के बचन के बुराई न होंइ पाबय।

तीतुस 2:8

अउर जउन सही हय, उहय तूँ, लोगन काहीं सिखाबत रह्या, जउने कोऊ ओही गलत न कहँइ पामँय, अउर जउन हमार बिरोध करत हें, उनहीं कउनव गलती न मिलय जउने ऊँ सरमिन्दा होंय।

3 यूहन्ना 1:12

दिमेत्रियुस के बारे माहीं सबय कोऊ सराहत हें, बलकिन सत्य घलाय खुदय गबाह हय, अउर हमहूँ पंचे घलाय सराहित हएन, अउर तूँ त जनतेन हया, कि हमार पंचन के गबाही सही हय।