1 तीमुथियुस 2:6 - Bagheli Bible

⁶ जउन खुद काहीं सगले मनइन काहीं मुक्ती देंइ के खातिर, क्रूस माहीं बलिदान कइके कीमत चुकाइन हीं; इआ काम परमातिमा के ठहराए सही समय माहीं प्रभू यीसु मसीह पूर कइके गबाही दिहिन हीं।

1 तीमुथियुस 2:6 ပူးပေါင်းရင်းမြစ်များ

मत्ती 20:28

जइसन कि मनई के लड़िका एसे नहीं आबा, कि ओखर सेबा कीन जाय, बलकिन एसे आबा हय, कि खुदय दुसरेन के सेबा करय, अउर उआ खुब मनइन काहीं मुक्ती देंइ के खातिर आपन प्रान देय।”

मरकुस 1:15

अउर ऊँ कहिन, “सही समय आइगा हय, अउर हरबिन परमातिमा राजा बनिके आमँइ बाले हें; पाप करब छोंड़िके परमातिमा के लघे आबा, अउर खुसी के खबर के बिसुआस करा।”

मरकुस 10:45

काहेकि मनई के लड़िका एसे नहीं आबा, कि ओखर सेबा-सहाई कीन जाय, बलकिन एसे आबा हय, कि खुदय दुसरेन के सेबा-सहाई करय, अउर उआ खुब मनइन काहीं मुक्ती देंइ के खातिर आपन प्रान देय।”

यूहन्ना 10:15

जउनमेर पिता हमहीं जानत हें, उहयमेर हमहूँ पिता काहीं जानित हएन। अउर हम अपने गड़रन के खातिर आपन प्रान देइत हएन।

यूहन्ना 6:51

अनन्त जीबन देंइ बाली जउन रोटी स्वरग से उतरिके आई हय, उआ हमहिन आहेन। अगर कोऊ इआ रोटी म से खई, त हमेसा जिअत रही, अउर जउन रोटी हम संसार के मनइन के अनन्त जीबन के खातिर देब, उआ हमार माँस आय।”

रोमियन 16:26

पय अब ओही हमेसा रहँइ बाले परमातिमा के हुकुम से उनखे सँदेस बतामँइ बालेन के लिखी किताबन के द्वारा, सगले जातिअन के मनइन काहीं बताबा ग हय, कि जउने उनखे ऊपर बिसुआस कइके, ऊँ पंचे उनखर हुकुम मानँइ बाले होइ जाँय।

रोमियन 5:6

काहेकि जब हम पंचे मुक्ती पामँइ माहीं असमर्थ रहेन हय, अउर परमातिमा के हुकुमन काहीं नहीं मानत रहे आहेन, तऊ हमरे पंचन के खातिर मसीह उचित समय म खुद काहीं बलिदान किहिन।

1 कुरिन्थियन 1:6

अउर मसीह के बारे माहीं जउन गबाही, हम तोहईं पंचन काहीं बताए रहेन हय, उआ तोंहरे बीच माहीं सच्ची साबित भे ही।

2 कुरिन्थियन 5:21

यीसु मसीह, जिनखे जीबन माहीं कउनव पाप नहीं रहा आय, उनहिन के ऊपर परमातिमा, हमरे पंचन के सगले पापन के बोझ लाद दिहिन, कि जउने हम पंचे यीसु मसीह के द्वारा परमातिमा के नजर माहीं निरदोस ठहरी।

गलातियन 1:4

यीसु मसीह हमरे पंचन के पापन के खातिर खुद काहीं बलिदान कइ दिहिन, जउने पिता परमातिमा के इच्छा के मुताबिक, हमहीं पंचन काहीं इआ बुरे संसार से छोड़ामँइ।

गलातियन 4:4

पय जब परमातिमा के द्वारा निस्चित कीन समय पूर होइगा, तब ऊँ अपने लड़िका काहीं पठइन, जउन मेहेरिआ से पइदा भें, अउर मूसा के बिधान के अधीन रहिके ओखर पालन करत रहे हँय।

इफीसियन 1:17

हम प्राथना करा करित हएन, कि हमार पंचन के प्रभू यीसु मसीह के परमातिमा, तोंहईं समझँय के अउर दिब्य दरसन के अइसन आत्मा के सक्ती देंय, कि जउने तूँ पंचे ऊँ महिमावान परमपिता काहीं पहिचान सका।

इफीसियन 1:7

अउर हमहीं पंचन काहीं जेतने यीसु मसीह माहीं बिसुआस करित हएन, यीसु मसीह के खून के द्वारा अपने पापन से मुक्ती अरथात माफी मिली हय, काहेकि परमातिमा हमरे पंचन के ऊपर बड़ी दया किहिन।

इफीसियन 3:5

इआ भेद पुरान पीढ़ी के मनइन काहीं इआमेर नहीं बताबा ग रहा आय, जइसन कि अब परमातिमा अपने पबित्र खास चेलन अउर नबिअन काहीं पबित्र आत्मा के द्वारा बताइन हीं।

इफीसियन 5:2

अउर जइसन मसीह घलाय हमसे पंचन से प्रेम किहिन हीं, उहयमेर तुहूँ पंचे एक दुसरे से प्रेम करा। अउर प्रेमय के कारन हमहीं पंचन काहीं मुक्ती देंइ के खातिर, ऊँ परमातिमा काहीं प्रसन्न करँइ बाले सुगन्धित बलिदान के रूप माहीं, उनखे आँगे खुद काहीं बलिदान कइ दिहिन।

2 थिस्सलुनीकियन 1:10

इआ उहय दिन होई, जब प्रभू यीसु अपने पबित्र लोगन माहीं महिमा पामँइ के खातिर, अउर सगले जउन उनखे ऊपर बिसुआस करत हें, उनखे बीच माहीं अचरज के कारन होंइ के खातिर अइहँय; ओमाहीं तुहूँ पंचे सामिल होइहा, काहेकि तूँ पंचे हमरे गबाही के बिसुआस किहा हय।

1 तीमुथियुस 6:15

परमातिमा, प्रभू यीसु मसीह काहीं सही समय माहीं प्रगट करिहँय, जउन परम धन्य अउर एकलउते अधिपति, राजन के राजा अउर प्रभुअन के प्रभू आहीं,

2 तीमुथियुस 1:8

एसे तूँ प्रभू के बारे माहीं दुसरेन काहीं बतामँइ माहीं न लजा, अउर न हमहिन से लजा, जउन खुसी के खबर सुनामँइ के कारन जेल माहीं बंद हएन, पय परमातिमा के दिहे सामर्थ के मुताबिक खुसी के खबर काहीं सुनामँइ के खातिर, हमरे कि नाईं दुख उठाबा,

तीतुस 1:3

अउर अपने नियुक्त समय माहीं अनन्त जीबन देंइ के बारे माहीं, अपने बचन काहीं बतामँइ के काम, हमहीं मुक्ती देंइ बाले परमातिमा हुकुम दइके सँउपिन हीं।

तीतुस 2:14

यीसु मसीह अपने इच्छा से हमरे पँचन खातिर मउत काहीं अपनाइन हीं, कि जउने हमहीं पँचन काहीं हरेकमेर के अधरम से छोड़ाय लेंय, अउर सुद्ध कइके अपने खातिर अइसन प्रजा बनाय लेंय, जउन निकहे-निकहे कामन काहीं करँइ के खातिर हरेक समय तइआर रहँय।

इब्रानियन 9:12

अउर ऊँ बोकरन अउर बछबन के खून काहीं लइके नहीं, बलकिन एक बेरकिन माहीं हमेसा के खातिर भेंट के रूप माहीं अपनेन खून काहीं लइके महापबित्र जघा माहीं चलेगें, अउर हमरे पंचन के खातिर पापन से मुक्ती पाउब निस्चित कइ दिहिन ही।

1 पतरस 2:24

ऊँ खुदय हमरे पंचन के पापन काहीं अपने देंह के ऊपर लए क्रूस माहीं चढ़िगें, जउने हम पंचे पाप के सम्बन्ध से पूरी तरह से मुक्त होइके, परमातिमा के नजर माहीं जउन निकहा हय, उहय करी; अउर उनहिन के मार खाँइ से तूँ पंचे चंगे भया हय।

1 पतरस 3:18

काहेकि मसीह घलाय हमरे पंचन के पापन के बदले माहीं, दुख उठाइन हीं, अरथात ऊँ निरदोस रहे हँय, तऊ हम पंचे जउन पापी रहेन हँय, हमरे खातिर एक बेरकी मरिगें, कि जउने हमहीं पंचन काहीं परमातिमा के लघे लइ आमँय। मसीह सारीरिक रूप से त मारे गें, पय आत्मिक रूप से जिआय दीनगें।

1 यूहन्ना 4:10

प्रेम एमाहीं नहीं आय, कि हम पंचे परमातिमा से प्रेम किहेन हय; बलकिन एमाहीं हय, कि परमातिमा हमसे पंचन से प्रेम किहिन हीं; अउर हमरे पापन के माफी के खातिर, अपने लड़िका काहीं पठइन हीं।

दरसनन के बातँय 1:5

अउर यीसु मसीह के तरफ से, जउन बिसुआस के काबिल गबाह, अउर मरेन म से जि उठँय बालेन माहीं पहिलउठा, अउर धरती के राजन के ऊपर घलाय सासन करँइ बाले आहीं, तोंहईं पंचन काहीं किरपा अउर सान्ती मिलत रहय। ऊँ हमसे पंचन से प्रेम करत हें, अउर उँइन अपने खून के द्वारा हमहीं पंचन काहीं पापन से छोड़ाइन हीं।

दरसनन के बातँय 5:9

अउर ऊँ पंचे इआ नबा गाना गामँइ लागें, कि “अपनय इआ किताब काहीं लेंइ, अउर एखर मुहरँय खोलँय के काबिल हएन; काहेकि अपना बध होइके अपने खून से हरेक कुल, अउर भाँसा, अउर लोग, अउर जाति म से परमातिमा के खातिर लोगन काहीं मोल लिहेन हँय।