1 तीमुथियुस 1:4 - Bagheli Bible

⁴ अउर तूँ उहाँ के बिसुआसिअन काहीं समझाबा, कि ऊँ अइसन किस्सा-कहानिन से अउर अनन्त बंसाबलियन से दूरी रहँय, जउने से लड़ाई-झगड़ा होत हें, काहेकि जउन मुक्ती पामँइ के प्रबन्ध परमातिमा किहिन हीं, उआ केबल प्रभू यीसु मसीह के ऊपर बिसुआस करे से मिलत ही, उनसे इनखर कउनव लेन-देन नहिं आय। उहय बात काहीं पुनि कहित हएन।

1 तीमुथियुस 1:4 ပူးပေါင်းရင်းမြစ်များ

2 कुरिन्थियन 1:12

हमहीं पंचन काहीं इआ बात के घमन्ड हय, कि हम इआ बात सच्चे मन से कहि सकित हएन, कि हम पंचे इआ संसार के मनइन के साथ, अउर खास करके तोंहरे पंचन के साथ, परमातिमा के किरपा के मुताबिक बेउहार किहेन हय। हम पंचे उआ बेउहार सरलता अउर सच्चाई के साथ किहेन हँय, जउन परमातिमा से मिलत हय, अउर उआ संसार के बुद्धी से नहीं मिलय।

इफीसियन 3:2

परमातिमा हमरे ऊपर बड़ी दया कइके हमहीं नियुक्त किहिन हीं, कि तूँ पंचे जउन गैरयहूदी आह्या, हम आइके परमातिमा के खुसी के खबर सुनाई। एखे बारे माहीं तूँ पंचे जरूर सुने होइहा।

1 तीमुथियुस 3:16

हम पंचे जउन भक्ती करित हएन, ओखर रहस्य खुब महान हय, एमाहीं कउनव सन्देह नहिं आय, उआ भेद इआमेर से हय, मसीह मनई के देंह लइके जनम लिहिन, अउर पबित्र आत्मा उनहीं धरमी ठहराइन, अउर ऊँ स्वरगदूतन काहीं देखाई दिहिन, अउर सगले जातिअन माहीं उनखे बारे माहीं प्रचार कीन ग, अउर संसार के सगले मनई उनखे ऊपर बिसुआस किहिन, अउर परमातिमा बड़े आदर के साथ उनहीं स्वरग माहीं जिन्दय ऊपर उठाय लिहिन।

1 तीमुथियुस 4:7

पय तूँ बुढ़ान मनइन के व्दारा सुनाई जाँय बाली उन मनगढ़ंत किस्सा-कहानिन से दूरी रहा, जिनखर परमातिमा के बचन से कउनव लेन-देन नहिं आय, अउर परमातिमा के सत्य सिच्छा मनइन काहीं सिखामँइ माहीं लगे रहा।

1 तीमुथियुस 6:11

पय हे परमातिमा के भक्त, तीमुथियुस, तूँ त ईं बातन से दूरिन रहा; अउर धारमिक बनँइ के पूर कोसिस करा, अउर हमेसा परमातिमा के भक्ती करा, अउर यीसु मसीह के ऊपर बिसुआस रक्खा, अउर सगलेन से प्रेम करा, अउर धीरज रक्खा, अउर नम्र बने रहा।

1 तीमुथियुस 6:20

हे तीमुथियुस, हम तोहईं जउन सत्य बचन सउँपेन हँय, उनहीं सगले मनइन काहीं सिखाबत रहा, अउर जउन सिच्छा परमातिमा के बिरोध माहीं हय, उआ सिच्छा के फालतू बातन से तूँ दूरी रहा,

2 तीमुथियुस 2:14

जउने बातन काहीं हम तोहईं बताएन हय, उनहीं बिसुआसी मनइन काहीं सुध देबाबा, अउर प्रभू काहीं गबाह मानिके उनहीं चेताय द्या, कि बचन के सब्दन काहीं लइके फालतू बहँस न करँय, काहेकि इनसे कउनव फायदा नहीं होय; बलकिन सुनँइ बाले बिसुआस से भटक जात हें।

2 तीमुथियुस 2:22

एसे हे तीमुथियुस, तूँ जबानी के बुरी इच्छन से दूरी रहा, अउर जउन सुद्ध मन से प्रभू के नाम लेथें, उनखे साथ पूरी धारमिकता, अउर बिसुआस के साथ, बड़े प्रेम से मिल-जुलिके रहा।

2 तीमुथियुस 2:23

पय फालतू बहँस करँइ, अउर बाद-बिबाद से अलग रहा; काहेकि तूँ जनतेन हया, कि इनसे झगड़ा होत हय।

2 तीमुथियुस 4:4

ऊँ सत्य उपदेस काहीं न सुनिके कथा-कहानिन काहीं सुनँय माहीं मन लगइहँय।

तीतुस 1:1

हम पवलुस आहेन, हे तीतुस, इआ चिट्ठी हम तोंहईं लिख रहेन हँय, जउन परमातिमा के सेबक आहेन, अउर यीसु मसीह के चुने खास चेला आहेन, परमातिमा जिनहीं चुनिन हीं, ऊँ लोगन काहीं बिसुआस के बारे माहीं, अउर जउन सत्य बचन उनहीं भक्ती के मुताबिक, जीबन जिअँइ के खातिर मदत करत हय, उआ सिखामँइ के खातिर हमहीं पठबा ग हय।

तीतुस 1:14

अउर यहूदी लोगन के मनगढ़ंत कथा-कहानिन, अउर ऊँ मनइन के हुकुमन माहीं मन न लगाया, जउन परमातिमा के सत्य बचन से भटक जात हें।

तीतुस 3:9

पय मूर्खता के जउने बातन से बिबाद होत हें, अउर बंसाबलिअन के बिबाद से, अउर मूसा के बिधान के बातन से सम्बन्धित बिबादन से बँचे रहा, काहेकि ईं सगली बातन से कउनव फायदा नहीं होय, बलकिन नुकसानय होत हय।

इब्रानियन 13:9

एसे तूँ पंचे हरेकमेर के बाहिरी उपदेसन के बातन माहीं न परा, जउन बिसुआस से भटकाय देती हईं। बलकिन अपने मन काहीं परमातिमा के किरपा से बिसुआस माहीं मजबूत करा, इआ नहीं कि तूँ पंचे खाँय-पिअँइ के नेमन माहीं परि जा, काहेकि जे कोऊ ईं खाँय-पिअँइ के नेमन काहीं मानत हें, उनहीं आत्मिक जीबन के खातिर कउनव फायदा नहीं भ आय।

2 पतरस 1:16

काहेकि जब हम पंचे, तोंहईं अपने प्रभू यीसु मसीह के सामर्थ के, अउर उनखे आमँइ के खबर बतायन तय, त उआ कहानी अपने हुसिआरी से गढ़िके न होय बतायन तय, बलकिन जउन हम पंचे अपने आँखिन से उनखे महिमा काहीं देखन तय, उहय बतायन हय।