1 थिस्सलुनीकियन 2:4 - Bagheli Bible

⁴ पय जइसन परमातिमा हमहीं पंचन काहीं काबिल ठहराइके खुसी के खबर सँउपिन हीं, हम पंचे उहयमेर बखान करित हएन; अउर एमाहीं मनइन काहीं नहीं, बलकिन परमातिमा काहीं, जउन हमरे पंचन के मनन काहीं जाँचत हें, प्रसन्न करित हएन।

1 थिस्सलुनीकियन 2:4 ပူးပေါင်းရင်းမြစ်များ

लूका 12:42

तब प्रभू कहिन, “उआ बिसुआस के काबिल अउर बुद्धिमान सगले भन्डार के मालिक को कहाबत हय, उहय जेखर मालिक, ओही नोकर-चाकरन के ऊपर मुखिया बनामँय, कि उआ समय माहीं सगलेन काहीं खाँय बाली चीजन काहीं देय।

लूका 16:11

एसे जब तूँ पंचे इआ संसार के धन काहीं सम्हारँय माहीं, बिसुआस के काबिल नहीं आह्या, त परमातिमा के बचन रूपी सच्चा धन तोंहईं को सउँपी?

यूहन्ना 21:17

तब यीसु समौन पतरस से तिसराय कहिन, “हे समौन, यूहन्ना के लड़िका, का तूँ हमसे प्रेम करते हया?” तब पतरस उदास होइगें, कि यीसु तिसराय अइसन कहिन हीं; कि “का तूँ हमसे प्रेम करते हया?” तब समौन उनसे कहिन, “हे प्रभू, अपना त सबय जानित हएन, अउर इहव जानित हएन, कि हम अपना से प्रेम करित हएन”, इआ सुनिके यीसु उनसे कहिन, “हमरे गड़रन काहीं चराबा।”

रोमियन 8:27

अउर सगले मनइन के मन के बातन काहीं जाँच करँइ बाले परमातिमा इआ जानत हें, कि पबित्र आत्मा के इच्छा का ही? काहेकि उआ उनखे पबित्र भक्तन के खातिर परमातिमा के मरजी के मुताबिक उनसे बिनती करत हय।

1 कुरिन्थियन 7:25

अउर जिनखर काज नहीं भ आय, उनखे बारे माहीं हमहीं प्रभू से कउनव हुकुम नहीं मिला आय, पय प्रभू के जउन किरपा हमहीं मिली हय, ओहिन के द्वारा बिसुआस के काबिल होंइ के कारन, हम इआ सलाह देइत हएन।

1 कुरिन्थियन 9:17

काहेकि अगर हम अपने मरजी से इआ काम करित हएन, त इनाम पामँइ के हकदार हएन, पय अगर अपने मरजी से नहीं करी, तऊ खुसी के खबर के प्रचार करँइ के जबाबदारी हमहीं सउँपी गे ही।

2 कुरिन्थियन 2:17

काहेकि हम पंचे ऊँ खुब मनइन कि नाईं नहिं आहेन, जउन खुद के फायदा के खातिर परमातिमा के बचन माहीं मिलाबट कइके प्रचार करत हें, बलकिन हम पंचे अपने सच्चे मन से, परमातिमा के तरफ से, अउर परमातिमा काहीं हाजिर जानिके, मसीह के प्रचार करित हएन।

2 कुरिन्थियन 4:2

पय हम पंचे लज्जित करँइ बाले, अउर गुप्त कामन काहीं छोंड़ि दिहेन हय, अउर अपने चतुराई से नहीं चली, अउर न त परमातिमा के बचन माहीं मिलबटय करित आहेन, बलकिन परमातिमा के नजर माहीं, सत्य काहीं सरल रूप से बताइके, हरेक मनइन के सोच-बिचार माहीं आपन भलाई बइठाइत हएन।

2 कुरिन्थियन 5:11

एसे हम पंचे परमातिमा के भय मानिके लोगन काहीं समझाइत हएन। परमातिमा हमरे पंचन के बारे माहीं सब कुछ जानत हें। अउर हम पंचे इहय आसा करित हएन, कि तुहूँ पंचे घलाय हमरे पंचन के बारे माहीं जनते होइहा।

2 कुरिन्थियन 5:16

एसे अब से हम पंचे कउनव मनई काहीं संसारिक नजर से न देखब, काहेकि एक समय हमहूँ पंचे मसीह काहीं संसारिक नजर से देखत रहे हएन। तऊ अब से हम पंचे मसीह काहीं संसारिक नजर से न देखब।

गलातियन 1:10

का एसे तोंहईं पंचन काहीं अइसन लागत हय, कि हम मनइन काहीं प्रसन्न करँइ चाहित हएन? कि परमातिमा काहीं प्रसन्न करँइ चाहित हएन? पय तूँ पंचे इआ जानिल्या, कि अगर हम अबे तक मनइन काहीं प्रसन्न करत रहित, त मसीह के सेबक न होइत।

गलातियन 2:7

पय एखे बिपरीत जब ऊँ पंचे इआ समझिन कि, परमातिमा जइसन यहूदी लोगन काहीं खुसी के खबर सुनामँइ के काम पतरस काहीं सँउपिन तय, उहयमेर गैरयहूदी लोगन काहीं खुसी के खबर सुनामँइ के जबाबदारी हमहीं सँउपिन हीं।

इफीसियन 3:8

अउर हम जउन सगले पबित्र मनइन म से सगलेन से छोट आहेन, तऊ हमरे ऊपर बड़ी दया भे ही, कि गैरयहूदी लोगन काहीं मसीह के अपार दया के खुसी के खबर सुनाई, जउने ऊँ पंचे घलाय खुब आत्मिक आसीस पामँय।

इफीसियन 6:6

अउर मनइन काहीं खुस करँइ बालेन कि नाईं देखाला के खातिर सेबा न करा, बलकिन मसीह के सेबकन कि नाईं, जउन पूरे मन से परमातिमा के इच्छा के मुताबिक चलत हें, उहयमेर तुहूँ पंचे अपने मालिकन के पूरे मन से सेबा करा।

कुलुस्सियन 3:22

हे सेबकव, अपने संसारिक मालिकन के सगली बातन माहीं, उनखे हुकुमन काहीं माना, अउर ऊँ सेबकन कि नाईं नहीं, जउन मनइन काहीं प्रसन्न करँइ के खातिर देखाला क त सेबा करत हें, पय बाद माहीं नहीं करँय, पय तूँ पंचे, परमातिमा के भय मानत उनखर निकही सेबा करा।

1 तीमुथियुस 6:20

हे तीमुथियुस, हम तोहईं जउन सत्य बचन सउँपेन हँय, उनहीं सगले मनइन काहीं सिखाबत रहा, अउर जउन सिच्छा परमातिमा के बिरोध माहीं हय, उआ सिच्छा के फालतू बातन से तूँ दूरी रहा,

2 तीमुथियुस 1:14

अउर पबित्र आत्मा के व्दारा, जउन हमरे पंचन के जीबन माहीं रहत हय, जउन तोंहईं सउँपा ग हय, इआ निकही थाती के रखबारी करा।

2 तीमुथियुस 2:2

अउर परमातिमा के जउने बातन काहीं खुब मनइन के आँगे हम तोहईं बतायन तय, उन बातन काहीं अइसन काबिल मनइन काहीं सउँपि द्या; जउन दुसरे काहीं सिखामँइ के काबिल होंय।

तीतुस 1:3

अउर अपने नियुक्त समय माहीं अनन्त जीबन देंइ के बारे माहीं, अपने बचन काहीं बतामँइ के काम, हमहीं मुक्ती देंइ बाले परमातिमा हुकुम दइके सँउपिन हीं।

इब्रानियन 4:13

अउर संसार के कउनव चीज परमातिमा के नजर से छिपी नहिं आय, बलकिन ऊँ घलाय जउन हमरे पंचन के काम के हईं, काहेकि संसार के सगली चीजँय, उनखे नजर माहीं खुली हईं अउर देखाई देती हईं।

1 पतरस 4:11

अउर अगर कोऊ बोलत हय, त अइसन बोलय मानो परमातिमा के बचन आय; अगर कोऊ सेबा करय; त उआ सक्ती से करय जउन परमातिमा ओही देत हें; जउने हरेक बातन माहीं यीसु मसीह के द्वारा परमातिमा के बड़ाई होय, काहेकि बड़ाई अउर अधिकार जुग-जुग तक उनहिन के आय। आमीन।

दरसनन के बातँय 2:23

हम ओखे लड़िका बिटिअन काहीं मारि डारब; अउर तब सगली मसीही मन्डली जान लेइहँय, कि हिरदँय अउर मन काहीं जाँचय-परखँय बाले हमहिन आहेन, अउर हम तोंहरे पंचन म से हरेक काहीं, उनखे कामन के मुताबिक बदला देब।