1 पतरस 3:4 - Bagheli Bible

⁴ बलकिन तोंहार पंचन के सिंगार त मन के भीतर छिपा निकहा सुभाव होंइ चाही, जइसन नम्रता, अउर मन के दीनता के कबहूँ न नास होंइ बाली सजाबट, से सजे रहब, काहेकि परमातिमा के नजर माहीं एखर बड़ी कीमत ही।

1 पतरस 3:4 ပူးပေါင်းရင်းမြစ်များ

मत्ती 11:29

हमार जुँआ अपने ऊपर उठाय ल्या; अउर हमसे सिखा; काहेकि हम नम्र अउर मन माहीं दीन हएन: इआमेर से तूँ पंचे अपने-अपने मनन माहीं आराम पइहा।

मत्ती 21:5

कि “सिय्योन के बिटिया से कहा, कि देखा, तोंहार राजा तोंहरे लघे आबत हें; ऊँ नम्र हें अउर गदहा के ऊपर बइठ हें; हाँ गदही के बच्चा के ऊपर।”

मत्ती 23:26

हे आँधर फरीसी लोगव, पहिले खोरबन अउर टठिअन काहीं भीतर से माजा, जउने ऊँ बहिरेव से घलाय साफ होइ जाँय।”

मत्ती 5:5

ऊँ पंचे धन्य हें, जउन नम्र हें, काहेकि ऊँ पंचे धरती के अधिकारी होइहँय।

लूका 11:40

हे निरबुध्दिव, परमातिमा जउन देंह के बहिरे के हिस्सा काहीं बनाइन हीं, का उँइन देंह के भीतर के हिस्सा काहीं नहीं बनाइन?

लूका 16:15

तब यीसु उनसे कहिन, “तूँ पंचे त मनइन के आँगे अपने-आप काहीं बड़ा धरमी ठहरउते हया, पय परमातिमा तोंहरे मन के बात काहीं जानत हें, काहेकि जउन चीज मनइन के निगाह माहीं महान ही, उआ परमातिमा के नजर माहीं तुच्छ ही।

रोमियन 1:23

अउर कबहूँ न नास होंइ बाले परमातिमा के महिमा काहीं, नास होंइ बाले मनइन, अउर पंछिन, अउर पसुअन, अउर रेंगँइ बाले जीव-जन्तुअन कि नाईं मूरत बनाइके, उनहीं मूरतिन माहीं बदल डारिन।

रोमियन 2:29

पय यहूदी उहय कहाई, जउन भीतर से अरथात मन माहीं यहूदी हय, अउर सच्चा खतना उआ आय, जउन पबित्र आत्मा के द्वारा मन के होत हय, उआ नहीं कि जउन मूसा के बिधान माहीं लिखे के मुताबिक हय, इआमेर करँइ बाले मनई के बड़ाई, मनइन के तरफ से नहीं, बलकिन परमातिमा के तरफ से होत ही।

रोमियन 6:6

अउर हम पंचे इआ जानित हएन, कि हमार पंचन के पुरान पापी सुभाव यीसु मसीह के साथ क्रूस माहीं चढ़ाय दीन ग हय, कि जउने हमार पंचन के पाप के इआ देंह नास होइ जाय, अउर आँगे हम पंचे पाप के दासता माहीं न रही।

रोमियन 7:22

काहेकि हम त परमातिमा के बिधान से अपने पूरे मन से खुसी रहित हएन।

2 कुरिन्थियन 10:1

हम पवलुस यीसु मसीह कि नाईं नम्र अउर दीन होइके तोंहसे पंचन से बिनती करित हएन, जबकि हमरे पीठ पीछे कुछ मनई कहत हें, कि हम डरपोक हएन। पय हम इआ लिखी चिट्ठी माहीं खुब निडर देखइत हएन।

2 कुरिन्थियन 4:16

एहिन से हम पंचे हिम्मत नहीं हारी; जबकि हमार पंचन के देंह कमजोर होत जात ही, तऊ हमार पंचन के अन्तर आत्मा हरेक दिन नई होत जात ही।

गलातियन 5:23

अउर किरपा करब, भलाई करब, बिसुआस के काबिल होब, नम्र होब, अउर संयम रक्खब, ईं बातन के बिरोध माहीं कउनव नेम नहिं आय।

इफीसियन 4:2

अरथात हमेसा दीनता अउर नम्रता के साथ जीबन जिआ, अउर प्रेम के साथ धीरज धइके एक दुसरे के गलतिन काहीं सहि ल्या।

कुलुस्सियन 3:12

काहेकि तूँ पंचे परमातिमा के चुने पबित्र अउर पियार आह्या, एसे करुना, भलाई, दीनता, कोमलता अउर सहनसीलता काहीं अपनाबा।

कुलुस्सियन 3:3

काहेकि तूँ पंचे पुरान पापी सुभाव के खातिर मर गया हय, अउर तोंहार पंचन के नबा जीबन मसीह के साथ परमातिमा के लघे सुरच्छित हय।

1 थिस्सलुनीकियन 4:11

अउर जइसन हम पंचे तोंहईं हुकुम दिहेन हय, उहयमेर सान्ति के साथ रह्या, अउर आपन-आपन काम धंधा करँइ के, अउर अपने-अपने हाँथन से कमाँय के कोसिस करा।

2 थिस्सलुनीकियन 3:12

इआमेर के मनइन काहीं हम पंचे प्रभू यीसु मसीह के नाम से इआ हुकुम देइत, अउर समझाइत हएन, कि ऊँ पंचे चुपचाप काम धन्धा कइके अपनेन कमाई के रोटी खाबा करँय।

1 तीमुथियुस 2:2

अउर प्रसासन चलामँइ बालेन, अउर ऊँच पद बाले अधिकारिन के खातिर घलाय प्राथना किहा, एसे कि जउने हम पंचे सान्ति के साथ निडर होइके, परमातिमा के भक्ती करत गम्भीरता से जीबन बिताय सकी।

2 तीमुथियुस 2:25

अउर उआ अपने बिरोधिन काहीं नम्रता से समझाबय, का पता परमातिमा उनहीं मुक्ती पामँइ के मन देंइ, अउर ऊँ सत्य काहीं पहिचान लेंइ।

तीतुस 3:2

अउर कोहू काहीं बदनाम न करँय, लड़ाई-झगड़ा करँइ बाले न बनँय; बलकिन कोमल सुभाव के होंय, अउर सगले मनइन के साथ नम्र बेउहार करँय।

याकूब 1:21

एसे बुरे कामन, अउर चारिव कइती फइली दुस्टता से दूरी रह्या, बलकिन उआ बचन काहीं नम्रता से अपनाय ल्या, जउन तोंहरे हिरदँय माहीं बोबा ग हय, उहय तोंहरे प्रान के मुक्ती कइ सकत हय,

1 पतरस 1:23

काहेकि तूँ पंचे नास होंइ बाले बीज से नहीं, बलकिन कबहूँ न नास होंइ बाले बीज से, अरथात परमातिमा के जिन्दा अउर हमेसा ठहरँय बाले बचन से नबा जनम पाए हया।

1 पतरस 3:15

बलकिन मसीह काहीं आपन प्रभू मानिके, अपने-अपने मन काहीं पबित्र रख्या, अउर जे कोऊ तोंहरे आसा के बारे माहीं पूँछँय, त तूँ पंचे नम्रता अउर परमातिमा के भय के साथ, जबाब देंइ के खातिर हमेसा तइआर रह्या।