1 पतरस 1:1 - Bagheli Bible

¹ हम पतरस आहेन, अउर इआ चिट्ठी काहीं लिख रहेन हय, जउन यीसु मसीह के खास चेला आहेन, हम इआ चिट्ठी परमातिमा के चुने उन मनइन काहीं लिख रहेन हय, जउन पुन्तुस, अउर गलातिया, अउर कप्पदूकिया, अउर आसिया, अउर बिथुनिया प्रदेसन माहीं तितर-बितर होइके रहत हें।

1 पतरस 1:1 ပူးပေါင်းရင်းမြစ်များ

मत्ती 10:2

अउर यीसु मसीह के चुने खास बरहँव चेलन के नाम इआमेर से हँय: पहिल समौन जउन पतरस घलाय कहाबत हें, अउर उनखर भाई अन्द्रियास; जब्दी के लड़िका याकूब, अउर उनखर भाई यूहन्ना;

मत्ती 24:22

अउर अगर परमातिमा ऊँ दिनन काहीं कम न करते, त कउनव प्रानी न बचतें, पय अपने चुने मनइन के कारन परमातिमा ऊँ दिनन काहीं घटइहँय।

मत्ती 4:18

जब यीसु गलील प्रदेस के झील के किनारे-किनारे जात रहे हँय तब ऊँ दुइठे भाइन काहीं देखिन अरथात समौन जेखर नाम पतरस घलाय रहा हय, अउर उनखे भाई अन्द्रियास काहीं झील म जाल डारत देखिन; काहेकि ऊँ पंचे मछुआरा रहे हँय।

लूका 18:7

त का परमातिमा अपने भक्तन के न्याय न चुकइहँय? हाँ, जउन दिन-रात उनहीं पुकारत रहत हें? का परमातिमा उनखे खातिर देरी करिहँय? नहीं।

यूहन्ना 11:52

अउर केबल यहूदी लोगन भर खातिर नहीं, बलकिन एखे खातिर घलाय कि परमातिमा के सन्तानन काहीं, जउन संसार माहीं तितर-बितर रहत हें उनहीं एक कइ देंय।

यूहन्ना 7:35

इआ सुनिके यहूदी धारमिक अँगुआ लोग आपस माहीं कहँइ लागें, “ईं कहाँ जइहँय, कि हम पंचे इनहीं न पाउब: का ईं उनखे लघे जइहँय, जउन हमरे समाज के मनई यूनानी भाँसा बोलँइ बालेन के लघे तितर-बितर होइके रहत हें, अउर ईं यूनानी भाँसा बोलँइ बालेन काहीं घलाय उपदेस देइहँय?

खास चेलन 18:2

अउर उहाँ अक्विला नाम के एकठे यहूदी मनई मिलें, जिनखर जनम पुन्तुस सहर माहीं भ रहा हय; ऊँ अपने मेहेरिआ प्रिस्किल्ला के साथ इटली सहर माहीं उहय समय अउबय भे रहे हँय, काहेकि राजा क्लौदियुस सगले यहूदी लोगन काहीं, रोम देस से निकर जाँइ के हुकुम दिहिन रहा हय, एहिन से ऊँ पंचे उहाँ गे रहे हँय।

खास चेलन 18:23

अउर उहाँ कुछ दिना रहे के बाद पवलुस उहाँ से चलेगें, अउर एक तरफ से गलातिया अउर फ्रूगिया प्रदेसन माहीं, सगले चेलन काहीं बिसुआस माहीं मजबूत करत आँगे बढ़िगें।

खास चेलन 19:10

दुइ बरिस तक इहय होत रहिगा, इहाँ तक कि आसिया प्रदेस के रहँइ बाले का यहूदी लोग, का यूनानी जाति के मनई सगले जन प्रभू के बचन काहीं सुन लिहिन।

खास चेलन 6:9

तब उआ यहूदी सभाघर म से जउन लिबिरतीनों के कहाबत रही हय, उहाँ कुरेनी सहर अउर सिकन्दरिया सहर, अउर किलिकिया प्रदेस, अउर आसिया प्रदेस से आए कइअक जने ठाढ़ होइके, स्तिफनुस से बाद-बिबाद करँइ लागें।

खास चेलन 8:4

जउन तितिर-बितिर होइगे रहे हँय, ऊँ पंचे जहाँ-जहाँ जात रहे हँय, उहाँ-उहाँ खुसी के खबर सुनाबत रहे हँय।

1 कुरिन्थियन 16:19

आसिया प्रदेस के मसीही मन्डली के बिसुआसी लोग तोहईं पंचन काहीं, प्रभू के नाम माहीं नबस्कार करत हें; अक्विला अउर प्रिस्किल्ला अउर उनखे घर माहीं एकट्ठा होंइ बाली मसीही मन्डली के बिसुआसी लोग घलाय, तोहईं पंचन काहीं पूर मन से नबस्कार करत हें।

2 कुरिन्थियन 1:8

हे भाई-बहिनिव, हम पंचे इआ चाहित हएन, कि तूँ पंचे हमरे पंचन के दुखन के बारे माहीं जाना, जउन आसिया प्रदेस माहीं हमरे पंचन के ऊपर परा रहा हय, हम पंचे अइसन बड़ी भारी बिपत्ती माहीं परि गएन तय, जउन हमरे पंचन के सहँय से बाहर रही हय, इहाँ तक कि हम पंचे जिन्दा रहँइ के आसा घलाय छोंड़ि दिहेन तय।

गलातियन 1:2

अउर हमरे अउर सगले भाइन के तरफ से जउन हमरे साथ माहीं हें, इआ चिट्ठी गलातिया प्रदेस के मसीही मन्डली काहीं मिलय।

इफीसियन 2:12

अउर तूँ पंचे उआ समय मसीह से अलग रहे हया, अउर इजराइल देस के प्रजा के पद से अलग रहे हया, अउर परमातिमा अपने भक्तन काहीं जउन बचन दिहिन रहा हय, उनखे ऊपर आधारित करार के भागीदार नहीं रहे आह्या, अउर इआ संसार माहीं बिना परमातिमा के रहे हया।

इफीसियन 2:19

एसे तूँ पंचे अब बिदेसी मुसाफिर नहीं रहि गया, बलकिन पबित्र लोगन के साथी अउर उनखे देस माहीं रहँइ बाले परमातिमा के घराना के होइ गया हय।

2 तीमुथियुस 1:15

तूँ जनते हया, कि आसिया प्रदेस के सगले बिसुआसी हमहीं छोंड़िके चलेगें हें, उन माहीं फूगिलुस अउर हिरमुगिनेस घलाय हें।

इब्रानियन 11:13

ऊँ पंचे वादा के चीजन काहीं भले नहीं पाइन, तऊ बिसुआस माहीं बने रहिगें, अउर मरँय से पहिले वादा के चीजन काहीं दूरिन से देखिके खुब खुसी भें, अउर इआ मान लिहिन तय, कि हम पंचे इआ धरती माहीं परदेसी अउर बाहिरी मनइन कि नाईं हएन, अउर ओखे बाद परमातिमा के ऊपर बिसुआस करत ऊँ पंचे मरिगें।

याकूब 1:1

परमातिमा के अउर प्रभू यीसु मसीह के दास याकूब के तरफ से, उन बरहँव कुलन काहीं, जउन सगले संसार माहीं तितर-बितर होइके रहत हें, नबस्कार पहुँचय।

1 पतरस 2:11

हे पियार भाई-बहिनिव, हम तोंहसे बिनती करित हएन, कि तूँ पंचे अपने-आप काहीं परदेसी, अउर यात्री जानिके, इआ संसार के उन बुरी अभिलासन से बचे रहा, जउन तोंहरे आत्मा से युद्ध करती हईं।

2 पतरस 1:1

हम समौन पतरस इआ चिट्ठी काहीं लिख रहेन हय, जउन यीसु मसीह के दास अउर खास चेला आहेन। हम इआ चिट्ठी ऊँ मनइन काहीं लिख रहेन हय, जउन हमरे पंचन के परमातिमा, अउर मुक्ती देंइ बाले यीसु मसीह जउन हमहीं पंचन काहीं, परमातिमा के नजर माहीं निरदोस बनाइन हीं, उनहिन के द्वारा हमरे पंचन कि नाईं, ऊँ पंचे घलाय खुब कीमती बिसुआस पाइन हीं।

दरसनन के बातँय 1:11

कि “जउन कुछू तूँ देखते हया, ओही किताब माहीं लिखिके, सातव मसीही मन्डलिन के लघे पठय द्या, अरथात इफिसुस अउर इसमुरना, अउर पिरगमुन, अउर थुआतीरा, अउर सरदीस, अउर फिलदिलफिया, अउर लौदीकिया काहीं।”