Solomon 2:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Nan roroar gumazir kɨ bar ifongezim, a gumazir igiar igharazibar tongɨn ikia, mati temer dagher aghuiba itim, a ruarimɨn ikia temer igharazibar tongɨn ti. Aruer ekiamɨn dughiam kɨ an dughuazimɨn aven ikiasa bar ifonge. Temer kamɨn ovɨziba bar deragha nan akatorimɨn bar isɨngi.

Solomon 2:3 ပူးပေါင်းရင်းမြစ်များ

Aisaia 32:2

Gumazamiziba akurvazim bagh izɨtɨ, gumazir dapanir kaba deravɨra vaghvagh bar deravɨra men akurvagham. Gumazir dapanir kaba, gumazamizibar danganir mogomemɨn mɨn ikiam, eghtɨ dughiar amozir ekiaba ko amɨnir ekiaba izɨtɨ, me mangɨ men uari mongam. Eghtɨ me mati dɨpaba puvatɨzir danganimɨn, dɨpam ivemara an zui moghɨn ikɨ, egh mati dagɨar ekiam aruem apazagha, danganir orangtɨzimɨn mɨn iti. Aruem bar gavgavightɨ, gumazamiziba mangɨ an apazangɨn dapiagh ikɨ avughsam.

Aisaia 25:4

Gumazamizir biziba puvatɨziba, nɨ deravɨra me geghuva men gari. Gumazamizir onganarazibagh amiba, osɨmtɨzibar dughiamɨn itima, nɨ men mogomer danganir bar gavgavimɨn mɨn iti. Atrivir kurabar adariba ko anɨngaghariba, mati amɨnir gavgavim iza dɨpenir bɨrim ginifi. Ezɨ nɨ mati averpenim me avarazɨ, amɨnir gavgavim izɨva me gɨnobaghan kogham. Ezɨ gumazir kurabar adariba, mati aruemɨn fefem dɨpaba puvatɨzir danganimɨn ikegha pamtem me gisira. Ezɨ nɨ mati, me tememɨn dughuazimɨn apengan ikia, aruemɨn fefemɨn uari apasi. Ezɨ amɨnim ko amozimɨn dughiamɨn, nɨ biziba puvatɨzir gumazamiziba avarazɨ me deravɨra iti, ezɨ aruer gavgavim me gapongezir puvatɨ, mati overiamɨn ghuariaba aruemɨn fefeim avarazɨ, nguibam bar orangi. Nɨ ifaghatir apanibar akaba dukumizɨ, atrivir kurabar dɨmdiaba pura gefi.

Hibru 12:2

E Iesusra ganam, an en nɨghnɨzir gavgavimɨn mɨngarim, egh an en nɨghnɨzir gavgavim damightɨ, a gɨn deraghvɨram otogham. Iesus fo, a bar deravɨra Godɨn akamɨn gɨn mangɨ egh a gɨn bar deravɨra ikɨva bar akuegh mamaghɨra ikiam. Egha a bizir kam gɨnɨghnɨgha gavgavigha ikia osɨmtɨziba atera ter ighuvimɨn ovenge. Gumazamiziba kamaghɨn nɨghnɨgha ghaze, gumazir ter ighuvimɨn ovengezim, a bar gumazir arazir kurabagh amim, egha aghumsɨzir ekiam isi. Ezɨ Iesus aghumsɨzim gɨnɨghnɨzir puvatɨgha, egha areme. Egha datɨrɨghɨn a Godɨn agharir guvimɨn atrivir dabirabimɨn aperaghav iti.

Esekiel 47:12

Ezɨ Godɨn Dɨpenimɨn otozir faner kamɨn mɨriamningɨn, temer igharagha garir aghuiba otiv bɨvɨra ikiam. Temer kabar dafariba da mɨsɨngan kogham. Temer kaba, dɨpar iza Godɨn Dɨpenimɨn otozimɨn boroghɨn iti, kamaghɨn amizɨ, da iakɨnibar zurara bɨvɨra ikiam. Eghtɨ gumazamiziba temer kabar ovɨzibar amɨva, dar dafariba iniva uan duaba ko arɨmariaba akɨram.”

Aisaia 4:6

Averpenir kam mati, Godɨn gavgavim ko angazangarimɨn ababanim, a Jerusalem avɨva, aruer bar gavgavim apazagham, egh uaghan amozir ekiabar dughiamɨn, a Jerusalem damutɨ, a deravɨra ikiam.

Aisaia 4:2

Dughiatam gɨn otoghtɨ, Ikiavɨra Itir God Ter Aguam damightɨ, a ua ghuzir igiam otogham. Eghtɨ a nguazim damutɨ dagher aghuiba otivam. Eghtɨ Israelian ikiavɨra itir varazira, me bizir kabar gantɨ, da bar deraghtɨ, me bar akuegham.

Solomon 5:16

A nan torima, kɨ an isɨngtɨzim isi. An mɨkarzim bar moghɨra na gamima, kɨ bar a gifonge. O ia Jerusalemɨn amiziba, kɨ ifongezir gumazir kam, a nan roroar aghuim, an ganganim kamaghɨn gari.

Solomon 4:16

O notɨn amɨnim, nɨ osegh dɨkafigh. O sautɨn amɨnim, nɨ dɨkavigh izɨ. Gua dɨkavigh izɨ nan azenim givang, egh danganiba bar dar amutɨ, da azenir kamɨn mughuriar aghuim ikiam. Eghtɨ nan roroar gumazir kɨ bar ifongezim, uan azenimɨn izɨva, egh an ter ovɨzir bar aghuibar amam.

Solomon 2:5

Nan roroam, kɨ bar nɨ gifonge, ezɨ nan damaziba nan sirizɨ, nan agharapaniba bar nan amɨra. Ga uaning, nɨ ter ovɨziba ko wainɨn ovɨzir me apuzizir taba na danightɨ, kɨ dar amegh ua gavgavim iniam.

Onger Akaba 91:1

Gumazim, Godɨn Bar Pɨn Itim, deragh an gansɨ an a bagh mangɨtɨ, God deragh an ganam. A Godɨn Gavgaviba Bar Itimɨn boroghɨn ikɨtɨ, God dughuazimɨn mɨn anevaragham.

Onger Akaba 89:6

O Ikiavɨra Itir God, nɨn Nguibamɨn aven, tav nɨn mɨn itir puvatɨ. Nɨn nguibamɨn enseltam nɨ ko magh ghuzir puvatɨ.

Onger Akaba 57:1

O God, nɨ nan apangkuvigh nan akuragh. Kɨ nɨn boroghɨra ikia bar deragha iti, mati tuarir nguziba uan amebamɨn avɨzibar apengan modoghav ikia deraghavɨra iti. Kɨ kamaghɨra deravɨra ikɨ mangɨtɨ, bizir na gasɨghasɨghamin kaba mangɨ gɨvagham.

Onger Akaba 45:2

O atrivim, nɨ gumazir ganganir aghuim gamim. Gumazir igharazitam nɨn mɨn garir puvatɨ. Mɨgɨrɨgɨar nɨn akamɨn otiviba bar deravɨra zui. Ezɨ God deragha nɨ gamua mamaghɨra iti.

Gumazir Dapaniba 9:15

Ezɨ temer dozir dɨkoniba itim kamaghɨn mɨgei, ‘Kɨ ian atrivimɨn otivsɨ, ia guizbangɨra ifongegh, bar moghɨra izɨ nan aguabar apengan orangtɨzimɨn ikɨ. Ia aghuaghtɨ, avim nan aguabar otogh izɨva Lebanonɨn sidan temer ruariba bar dar isigham.’ ”

Solomon 1:16

Ame! Nan roroar gumazir kɨ bar ifongezim, nɨ bar dera. Nɨn ganganiba bar dera, ezɨ kɨ bar nɨ gakonge. Gan mɨsiam mati, grazir garir aghuim.

Solomon 4:13

Nɨ mati azenir aghuim, temer bar aghuiba an iti. Temer maba dagher aghuiba iti, ezɨ maba mughuriar aghuim zuir boreba iti. Maba me dar sandan aghuibar dar ingari, egha maba, daghebagh amima, da isɨngi. Temer kaba, dar ovɨziba bar isɨngigha, nguazir kamɨn ter ovɨziba bar dagh afira. Dar eboriba bar isɨngigha, nguazir kamɨn ter eboriba bar dagh afira.

Solomon 7:13

O nan roroar gumazir kɨ bar ifongezim, kɨ temer ovɨzir aghuiba ini, ter ovɨzir kaba e dav gɨa ghaze, amiziba an ovɨziba isa akavsiar arazim gamua da apima, dar mughuriam gumazim damutɨ, an amuim ko daku, egh boriba batam, kɨ da isa tiar akamɨn boroghɨn da atɨ, eghtɨ nɨ dar amam. Kɨ fomɨra maba ini, egha maba kɨ datɨrɨghɨra da ini. Kɨ uan ifongiam isa nɨ baghavɨra anetɨ. Egh ga ter ovɨzir kamɨn mughuriam ini ga uan ifongiam damutɨ, a dɨkavam.

Solomon 8:11

Atrivim Solomonɨn wainɨn azenim Balhamonɨn nguibamɨn iti. Gumaziba azenir kamɨn ingarsɨ, me vaghvagh 1,000 silvan dagɨaba isɨ Atrivim Solomon danɨng.

Solomon 8:12

Solomon mar uan 1,000 silvan dagɨaba ini. Ezɨ gumazir azenimɨn ingariba, me mar uan 200 silvan dagɨaba ini. Ezɨ kɨ bizir kabagh nɨghnɨzir puvatɨ, kɨ uabɨ, nan wainɨn azenim iti. Kɨ uabɨ wainɨn azenir kamɨn gari.

Joel 1:12

Wainɨn ikarɨziba ko fighɨn temeba bar mɨsɨngi. Ezɨ temer igharazir ovɨzir aghuiba itiba, da uaghan mɨsɨngi. Kamaghɨn amizɨma, gumazamizibar arazir bar akongezim, a bar gɨfa.

Onger Akaba 45:3

Nɨ atrivir bar gavgavim. Nɨ adiarir bar aghuim gamizɨ nɨn ziam bar pɨn mar iti. Nɨ uan mɨdorozir sabam inigh uan oghɨriam gikegh mɨsoghsɨ gan.