Solomon 1:8 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁸ O nan amizir dirim, nɨn ganganim bar deragha amizir igharazibar ganganiba bar dagh afira. Nɨ nan gansɨ, nɨ memebar diarir nozibar gɨn mangɨ. Nɨ dar gɨn mangɨ, egh nɨ grazir aghuibar apigham, eghtɨ nɨn memeba dar amam. Grazir kaba sipsipbagh eghuvir gumazibar averpenibar boroghɨn iti.

Solomon 1:8 ပူးပေါင်းရင်းမြစ်များ

Solomon 6:1

O nɨ amizir dirim, nɨ bar amizir igharazibagh afira. Nɨn roroar gumazir nɨ bar ifongezim managh ghu? Nɨ e mɨkemeghtɨ, e nɨn akuragh a buriam. A tuavir manamɨn ghu?

Solomon 5:9

O amizir dirim, nɨn ganganim bar deragha amizir igharazibar ganganiba bar dagh afira. Nɨ ifongezir roroar gumazir kam, a gumazir manmaghɨn garim? A ti e amizir igharaziba en paba bar dagh afira, kamaghɨn amizɨ nɨ ghaze, e nɨ ko akar kam akɨram.

Jems 5:10

Nan adarasi, ia fomɨra Godɨn akam inigha izir gumazir Ekiamɨn ziamɨn akam akuniziba, ia me gɨnɨghnɨgh. Apaniba arazir kurabar me gami, ezɨ me tuivigha gavgavigha osɨmtɨzir kam ateri. Ia men arazir kam inigh, egh men gɨn mangɨ.

Jems 2:21

Fomɨra en ovavim Abraham uan otarim Aisak isa ofa gamir dakozimɨn anetɨgha Godɨn ofa gami moghɨn a gami. Ezɨ dughiar kamɨn God an arazimɨn ganigha egha Abraham mɨgɨa ghaze, nɨ nan damazimɨn dera.

Hibru 13:7

Ia uan siosɨn gumazamizir dapanibagh nɨghnɨgh, me fomɨra Godɨn akamɨn gun ia mɨkeme. Ia men arazir aghuiba ko men ovevem gɨnɨghnɨgh. Egh men nɨghnɨzir gavgavimɨn arazim, ia uaghan an gɨn mangɨ.

Hibru 6:12

Ia amɨrvaghan markɨ. Ia gumazir nɨghnɨzir gavgavim ikia egha zuamɨram amɨrvazir puvatɨzibar mɨn ikɨ. Egh bizir God fomɨra uan boribar anɨngasa akam akɨriziba, ia da iniam.

Efesus 5:27

A kamaghsua, a sios damightɨ an an damazimɨn bar aghungigh, egh bar zueghɨva, arazir kuratam puvatɨgh, duar kuriba ko seghsariba puvatɨghɨva, bizir kurar maba sara uaghan puvatɨgham. Kamaghɨn Krais a bagha uabɨ isa a ganɨngi.

1 Korin 11:1

Mati kɨ Kraisɨn arazibar gɨn zui moghɨn, ia nan arazibar gɨn mangɨ.

Jon Osirizir Akar Aghuim 21:15

Iesus uan suren gumaziba ko amegha gɨvagha, Iesus kamaghɨn Saimon Pitan azai, “Saimon, Jonɨn otarim, nɨ ti bar na gifonge, egha nɨ na gifongezir arazir kam, a gumazir kaba na gifongezir arazibagh afira?” Ezɨ Pita ghaze, “Are, Ekiam, nɨ fo, kɨ nɨ gifonge.” Ezɨ Iesus a mɨgei, “Nɨ nan gumazamiziba sipsipɨn nguzibar mɨn men akurvagh deraghvɨra men gan.”

Jeremaia 6:16

Ikiavɨra Itir God uan gumazamizibav gɨa ghaze: “Ia tuavir akamɨn mɨtɨgh nɨghnigh, ia tuavir manam mangɨsɨ ifuegh, an mangɨ. Ia tuavir aghuir ian inazir afeziaba faragha ghuezim bagh gan an apigh an mangɨ. Ia tuavir kamɨn mangɨtɨ, bizitam osɨmtɨzim ia danɨngan koghtɨ, ian naviba purama amɨraghɨrɨgh nɨmɨra ikiam.” Ezɨ Israelia a ikaragha ghaze, “Ti puvatɨgham, E tuavir mamɨn gɨn mangan aghua.”

Solomon 4:10

Nɨ nan amuim, egha nɨ guizɨn nan dɨghorim, nɨ bar na gifonge, ezɨ kɨ bar akonge. Nɨn ifongiar kam, a bar isɨngi, egha wainɨn isɨngtɨzim gafira. Sandan mughuriar nɨ uabɨ gazuir kam, a pauran mabar mughuriaba bar dagh afira.

Solomon 4:7

Nan amizir kɨ bar ifongezim, nɨn ganganim bar dera. Nɨn mɨkarzim duar kuritam an itir puvatɨ.

Solomon 4:1

O amizir kɨ ifongezim, nɨn ganganim bar dera. Bar guizbangɨra, nɨ amizir dirim. Nɨ uan guam mongasa nir avɨzim uan dapanim gike. Ezɨ kɨ nɨn damazimningɨn gari, aning kuarazir bunbamɨn damazimningɨn mɨn dɨkɨravɨra gara bar dera. Nɨn dapanir arɨzim gɨrakɨrangɨn guraghav itim, pigha ruaragha bar dera, mati memen pɨzir okoruam bar akuegha, uari fa kura Gileatɨn Mɨghsɨamɨn ghuaghiri.

Solomon 2:10

Nan roroar gumazir kɨ bar ifongezim kamaghɨn na mɨgei: “O nan amizir kɨ bar ifongezim, nɨ nan amizir dirim, nɨ dɨkavigh azenan izɨ, egh na ko, ga arɨ mangam.

Solomon 1:15

Ame! Nɨ amizir bar dirim ezɨ kɨ bar nɨ gifonge. Ezɨ nɨ uaghan na gifonge, ezɨ nɨn damazim bar dera mati kuarazir bunbamɨn damazim.

Aghuzir Akaba 8:34

Gumazamizir deraghvɨra nan akam baraziba, me bar akongegh. Me zurara dughiabar iza nan dɨpenimɨn tiar akamɨn boroghɨra tuivav ikia egha na mɨzuai, ezɨ kɨ akam me ganɨdi.

Onger Akaba 45:13

Atrivimɨn amuir bar igiam, an akua itir danganimra ikia ganganiba bar dera. A korotiar me tret golɨn nuavigha kurkezim aru.

Onger Akaba 45:11

Nɨ kamaghɨn damuva atrivimɨn damazimɨn ganganir bar aghuim damutɨ, a nɨn gan nɨ gifuegham. A nɨn gumazir ekiam, nɨ an akaba baragh dar gɨn mangɨ.

Onger Akaba 16:3

Godɨn gumazamizir nguazir kamɨn itiba, me bar gumazamizir aghuiba. Kɨ me ko ikiasa bar akonge.

Jems 2:25

Ezɨ tuavir kamra, arazir kurabagh amir amizim Rahap, moga garir gumazir Josua amadazimningɨn akuragha aning amadazɨma aning tuavir igharazimɨn ghu. Kamaghɨn amizɨma God amizir kam mɨgɨa ghaze, nɨ nan damazimɨn dera.