Sekaraia 9:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Tair, a nguibar ekiar gavgavimɨn oto. Ezɨ an gumazamiziba uari bagha dɨvazir mɨtiar bar gavgavimɨn ingarigha uan nguibar ekiam avɨni. Me uaghan uari bagha silvan avɨriba geghufi, da nguazir mɨnezibar mɨn iti. Ezɨ me golɨn bar avɨriba itima, da men damazibar pura bizir kɨnibar mɨn iti.

Sekaraia 9:3 ပူးပေါင်းရင်းမြစ်များ

Esekiel 27:33

Nɨ dagɨaba bagha ongarir torimɨn azenan amadir biziba, da kantriba bar dar ifongiaba agɨfa. Atriviba, nɨn bizir nɨ amadiba bangɨn, biziba bar izɨfa.

Jopɨn Akɨnafarim 27:16

Gumazir kuraba silvan dagɨar avɨrim ko korotiar avɨrim akumakum, nguazir mɨnemniabar mɨn, uan dɨpenibar dar pozibav kɨnam.

2 Samuel 24:7

Egha me uamategha sautɨn amadaghan iza, Tairɨn nguibar ekiamɨn otifi, nguibar ekiar kam a dɨvazir gavgavim iti. Egha gɨn me dɨkavigha Tair ategha ghua, Hivia ko Kenanian nguibar ekiaba bar dagh arui. Egha me abuan ghua Judan sautɨn amadaghan otogha, ghua Berseban nguibar ekiamɨn otogha ghua Negevɨn nguazimɨn otifi.

Josua 19:29

Egha ua ighuigha Raman nguibar ekiamɨn otogha iza, Tairɨn nguibar ekiamɨn tu, nguibar ekiar kamɨn dɨvazim bar gavgafi. Egha mɨtaghniam ua ragha Hosan nguibar ekiamɨn otogha ghua Mediterenianɨn Ongarir Ekiamɨn tu. Aserɨn anabam uaghan nguibar ekiar kaba ini: Mehebel, Aksip,

Aisaia 23:8

Tinara mɨgɨava arazir kurar kam gamizɨma, a Tairɨn oto, nguibar ekiar kam atriviba amɨsevezɨ, me nguibar ekiar igharazibagh ativagha dar gari? Ezɨ a dagɨaba bagha, biziba amaga dagh ivezir ingarir gumaziba, atrivibar otaribar mɨn itima, nguazir kamɨn itir gumazamiziba bar, ziar ekiam me ganɨdi.

Jopɨn Akɨnafarim 22:24

Kamaghɨn deragham, nɨ kantrin Ofirɨn inizir golɨn bar aghuiba isɨ, danganir kurabar da makunigh.

1 Atriviba 10:27

Solomon atrivimɨn itir dughiamɨn, a temer sidan avɨriba ko silvan avɨriba inigha Jerusalemɨn ize. Ezɨ dughiar kamɨn silvan avɨriba ikia, dagɨar kɨnibar mɨn pura tintinibar irav iti. Egha uaghan temer sidan bar avɨriba iti, mati temer Israelɨn mɨghsɨar muziaribar izezibar mɨn iti.

1 Atriviba 10:21

Ezɨ ingangarir gumaziba gol inigha Solomon bagha dɨpaba apir itaribar ingari. Egha Lebanonɨn Ruarir Pɨzimɨn Dɨpenimɨn aven itir itariba bar, me golɨn aghuimɨn dar ingari. Solomonɨn dughiamɨn, gumazamizibar nɨghnɨzim, silva pura bizim, kamaghɨn amizɨ, me silvan bizir katamɨn ingarizir puvatɨ.

Aisaia 23:11

Ikiavɨra Itir God uan agharim ghufegha gɨfa, an ongarim gisɨn an amadagha, kantrin ongarir mɨriamɨn itir kabagh asɨghasɨghasava ami. Kamaghɨn amizɨ, kantrin kabar itir gumazamiziba atiatiava agoi. A Kenanɨn nguazimɨn nguibar ekiar gavgavir kabagh asɨghasɨghasa akam anigha gɨfa.

Esekiel 26:12

Ian apaniba ian dagɨaba okɨmɨva, ia dagɨaba bagha amadir biziba tintinimɨn da iniam. Me ian dɨvaziba akurarightɨ da irɨtɨ, me ian dɨpenir bar aghuiba akararigh bar adagh asɨghasigham. Egh me ian dagɨaba ko temeba ko nguaziba isɨ ongarimɨn da makunigham.

Esekiel 27:34

Datɨrɨghɨn nɨ ikuvigha ongarir torir konimɨn aven iraghu. Nɨn biziba ko gumazir nɨn ingariba, me bar nɨ ko ongarim giraghuegha gɨvagha puvatɨ.

Jopɨn Akɨnafarim 3:15

Gumazir aruar gol ko silvan uan dɨpenibagh arɨghizɨ, da bar izɨvaziba, me datɨrɨghɨn bar ovea ghue. Kɨ men mɨn deravɨra dakuasa.

Esekiel 27:27

Ezɨ nɨn dagɨaba ko, dagɨaba bagha amadir bizir aghuiba ko, kurkazir biziba ko, kurimɨn suirazir gumaziba ko, nɨn ingangarir gumaziba ko, nɨn kurimɨn ingarir gumaziba ko, nɨn biziba amadir gumaziba ko, nɨn mɨdorozir gumaziba ko, kurimɨn aruir gumaziba, me bar kurimɨn itima, kurim ikuvizɨma, me bar ongarir torimɨn ovenge.

Esekiel 28:1

Ikiavɨra Itir Godɨn Ekiam kamaghɨn na mɨgei,

Amos 1:9

“Ia oragh! Ikiavɨra Itir God Akar Gavgavir kam ia ganɨga ghaze, Tairɨn nguibar ekiamɨn gumazamiziba, arazir kurabagh amua ghuavɨra iti. Me ikɨzir mabar gumazamiziba bar me isa Idomɨn kantrin me amadazɨ, Idomia me isa kalabusɨn mɨn me atɨ. Me fomɨra ikɨzir kaba ko deragh dapiasa akam akɨri, ezɨ puvatɨ, me datɨrɨghɨn uan akar dɨkɨrɨzim abɨki. Kamaghɨn amizɨ, nan anɨngagharim guizbangɨra me bagha bar ekefe, ezɨ kɨ ivezir kuram me danɨngam.