Sekaraia 9:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ Ikiavɨra Itir God kamaghɨn uan akam na ganɨga ghaze, Ikiavɨra Itir God, Distrik Hadrak ko, Damaskusɨn nguibar ekiam daperagh avughsɨ ikiam. Guizbangɨra, a uan damazimningɨn Israelian anababar gari moghɨn, a kantriba bar dar gumazamizibar gari.

Sekaraia 9:1 ပူးပေါင်းရင်းမြစ်များ

Malakai 1:1

Ikiavɨra Itir God, Israelia mɨkɨmasa akar kam isa Malakai ganɨngi.

Sekaraia 5:4

Ikiavɨra Itir Godɨn Gavgaviba Bar Itim ghaze, “Kɨ akar kam amadazɨma, a zui, eghtɨ a mangɨ okeir gumaziba ko, gumazir ifavaribagh amua pura nan ziam dɨboriba, a men dɨpenibar aven mangam. Egh akɨnafarir kam men dɨpenir akɨniba ko, dagɨaba bar da agɨvaghtɨ, gumazir kaba bar ikuvigham.”

Amos 3:12

Egha Ikiavɨra Itir God ua kamaghɨn mɨgei, “Laion sipsipɨn tam mɨsuegh anemeghtɨ, sipsipbagh eghuvir gumazim uam a inisɨ, mangɨ gantɨ, an mɨdiarir muziaribara ikiam, mati an suer agharimning ko kuarir nam. Eghtɨ arazir kamra, God Samarian itir gumazamizibar amuam. Samaria, a Israelɨn kantrin aven itir nguibar ekiam. Gumazamizir kaba deragha apiagha bar akongegha iti, me datɨrɨghɨn bar ikuvigham. Men tongɨn itir ikɨzir bar muziarim deragh ikɨvɨra ikiam, mati nguibar ekiamɨn itir bizir aghuiba bar ikuvizɨ, dakozir suemɨn otevimra irɨgh mamaghɨra ikiam.”

Jeremaia 16:19

O Ikiavɨra Itir God, nɨ gavgavim na ganɨga, nan danganir mogomemɨn mɨn ikia, egha osɨmtɨzibar dughiabar nɨ nan akurvasi. Nguazir kamɨn oteviba bar dar gumazamiziba bar, nɨ bagh izɨ kamaghɨn mɨkɨmam: En inazir afeziabar aseba, da pura bizir kɨniba, da e gifara, en akuraghan kogham.

Aisaia 52:10

Ikiavɨra Itir God uan gavgavim, kantribar gumazamiziba an ganasa, anekagha gɨfa. Eghtɨ a uan gumazamizibar akuragha ua me inizir gavgavir ekiam, nguazir kamɨn gumazamiziba bar an ganam.

Aisaia 13:1

God kantri Babilon gasɨghasɨghasa, kamaghɨn, a irebamɨn mɨn garir bizimɨn aven, akam isa Emosɨn otarim, Aisaia ganɨngi.

Onger Akaba 25:15

Kɨ zurara uabɨn akurvaghasa Ikiavɨra Itir Godɨn gara a mɨzuai, ezɨ a bizir na gasɨghasɨghasava amibar aven ua na isi.

2 Eghaghaniba 20:12

O, en God, mɨdorozir gumazir avɨrir kaba e mɨsoghasava ami. Ezɨ e me ko mɨsoghamin gavgaviba puvatɨ. Kamaghɨn amizɨ, nɨ uabɨ bar puv me damigh. Bar guizbangɨra, e fozir puvatɨ, e manmaghɨn damuam. Kamaghɨn amizɨ, e uarir akurvaghasa nɨ baghavɨra gara iti.”

Jenesis 14:15

Egha danganir kamɨn Abram uan mɨdorozir gumaziba tuira. Egha 4plan atrivir kaba ko dɨmagarimɨn mɨsogha me abɨni. Egha notɨn amadaghan Damaskusɨn nguibar ekiamɨn men agɨragha ghua, Hoban nguibar ekiamɨn tu.

Amos 1:9

“Ia oragh! Ikiavɨra Itir God Akar Gavgavir kam ia ganɨga ghaze, Tairɨn nguibar ekiamɨn gumazamiziba, arazir kurabagh amua ghuavɨra iti. Me ikɨzir mabar gumazamiziba bar me isa Idomɨn kantrin me amadazɨ, Idomia me isa kalabusɨn mɨn me atɨ. Me fomɨra ikɨzir kaba ko deragh dapiasa akam akɨri, ezɨ puvatɨ, me datɨrɨghɨn uan akar dɨkɨrɨzim abɨki. Kamaghɨn amizɨ, nan anɨngagharim guizbangɨra me bagha bar ekefe, ezɨ kɨ ivezir kuram me danɨngam.

Nahum 1:1

Godɨn akam inigha izir gumazim Nahum, a irebamɨn mɨn garir bizir mamɨn garima, God akar kam a ganɨngizɨ, an akɨnafarir kam osiri. Akar kam, a Niniven nguibar ekiamɨn akam. Godɨn akam inigha izir gumazim Nahum, an nguibam Elkos.

Jeremaia 32:19

Nɨ bizir aghuibar amuasa nɨghnɨsi. Nɨ gavgavim ikia, egha nɨ ingangarir ekiabagh ami. Nɨ gumazamiziba amir biziba nɨ bar adar gari. Egha nɨ vaghvagha gumazamiziba amir araziba tuisɨgha, arazir me amibar ivezimra ikarvagh me ganɨdi.

Sekaraia 4:10

Me ingangarimɨn garima a zuamɨra dɨkavigha zuir puvatɨ, ezɨ men naviba bar oseme. Egh me Serubabelɨn gantɨma, an ain itir ikarɨzimɨn suiragh nan dɨpenimɨn ingaram. Me fo, ikarɨzir kam, dɨpenir ingangariba voroghɨra zuir ababanim. Eghtɨ me ganigh fogh suam, dɨpenir ingangarim deraghvɨra zui, eghtɨ me bar akongegham.” Ensel ua kamaghɨn na mɨgei, “Lamɨn 7plan kaba da Ikiavɨra Itir Godɨn damazibar ababanimɨn mɨn iti. A zurara nguazir kamɨn oteviba bar dar gari.”