Sekaraia 11:5 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁵ Sipsipɨn kabar ghuaviba dav sogha ghaze, ‘E ti arazir kuram gamir puvatɨ.’ Me sipsipbav sogha, dar tuziba dagɨaba bagha da amagava, dagɨaba isa ghaze, ‘E dagɨar gumazibar otivigha gɨfa. Kamaghɨn amizɨ e Ikiavɨra Itir Godɨn ziam fam.’ Ezɨ sipsipbagh eghuvir gumaziba me uaghan, sipsipbar apangkuvir puvatɨ.”

Sekaraia 11:5 ပူးပေါင်းရင်းမြစ်များ

Jeremaia 50:7

Ezɨ gumazir maba men gara me mɨsosi. Ezɨ men apanir kaba kamaghɨn mɨgei: ‘Gumazamizir kaba, uari arazir kuramɨn Ikiavɨra Itir God gami. Ikiavɨra Itir God, danganir aghuimɨn mɨn iti, me an mangɨ deraghvɨra ikiam. Men ovaviba nɨghnɨzir gavgavim an ikia, a men akuraghasa me a mɨzua iti. Ezɨ Ikiavɨra Itir Godɨn kam, me anetegha arazir kuram gami. Kamaghɨn ami, e me gasɨghasɨgh egh, osɨmtɨziba puvatɨgham.’ ”

Hosea 12:8

Egha me kamaghɨn mɨgei: ‘E dagɨaba itir gumazibar otivigha gɨfa. E bizir avɨriba iti. Eghtɨ gumazitam kamaghɨn mɨkɨman kogham, e okɨmakɨar arazim gamua dagɨar gumazibar otifi. E arazir kuratam gamizir puvatɨ.’

2 Pita 2:3

Ifavarir tisan kaba dagɨar avɨriba baka, kamaghɨn me eghaghanir ifavarir avɨribar amuva, ian dagɨaba ko biziba iniam. Fomɨra God me isɨ kot darɨghasa dughiam atɨgha, ghaze, me bar ikuvigham. Ezɨ God akuir puvatɨ. A fomɨra me mɨkemezɨ moghɨn me gasɨghasɨghasa me bagha gara iti.

Jon Osirizir Akar Aghuim 16:2

Me ian anogoreghtɨ ia ua God ko mɨgeir dɨpenibar aven ikian kogham. Eghtɨ gɨn dughiam izɨtɨ, gumaziba ia mɨsoghtɨ ia arɨmɨghiram, egh me suam, me Godɨn ingangarir aghuim gami.

Matyu 23:13

Egha Iesus ua kamaghɨn mɨgei, “Ia Judan Arazibagh fozir gumaziba ko Farisiba, Iavzika, ia bar ikuvigham! Ia ifavaribagh amir gumaziba! Ia God Bizibagh Ativamin Dughiamɨn tiam asarazɨ, gumazamiziba azenan iti. Egha ia uaghan aven mangan aghua. Ezɨ gumazamiziba aven mangasava amima ia men tuaviba apɨri.

Esekiel 34:21

Ia sipsipɨn gavgaviba itiba, ia zurara sipsipɨn gavgaviba puvatɨziba uan komba ko, uan dapaniba ko, uan namnabar da munamadima, da tintinibar zui.

Esekiel 34:10

Kɨ Ikiavɨra Itir Godɨn Ekiam, kɨ kamaghɨn mɨgɨa ghaze, kɨ ian apanim gami. Kɨ uan sipsipba ian dafariba dam ua da inigham, egh ia ateghtɨ ia ua sipsipbagh eghuvir gumazibar mɨn ikian kogham. Egh ia ua uarira uarir akuraman kogham. Kɨ uan sipsipba ian akatoriba da ua da inightɨ, ia uam damamin sipsipba puvatɨgham.”

Esekiel 34:6

Nan sipsipba tintinibar arua mɨghsɨabar ghuavanadi. Egha pura tintinibar nguazir kamɨn danganiba bar dar zui. Ezɨ tav me bagha gara me burir puvatɨ.

Jeremaia 2:3

Egha dughiar kamɨn ia Israelia, ia nan gumazamizibara ikia, mati nan azenimɨn itir dagher faragha aniziba. Ezɨ nan dagher kabar maba isir gumazamiziba, osɨmtɨzim me batozɨ kɨ me gasɨghasɨki. Kɨ Ikiavɨra Itir God kɨ mɨkemegha gɨfa.”

Nehemia 5:8

Me uari akuvazɨ kɨ kamaghɨn me mɨgei, “Ia bar fo, en gumazamizitaba, ikɨzir igharazimɨn pura ingangarir gumazir kɨnibar ikɨtɨma, e ua me givezɨsɨ pamtem ingar, dagɨar rurir dafabar amuam. Ezɨ datɨrɨghɨn, ia uan namakaba paza me gamua, me ataghizɨ, me pura ingangarir gumazamizir kɨnibar mɨn iti, ezɨ me e givesi.” Kɨ kamaghɨn me mɨgeima, gumazir dapaniba nɨmɨra ikia akatam ikarazir puvatɨ.

2 Atriviba 4:1

Dughiar mamɨn Godɨn akam inigha izir gumazibar okoruamɨn mav, an amuim Elisa bagha ize. An pam aremezɨ an odiarimɨn iti. Egha a kamaghɨn Elisan diava arai, “O gumazir ekiam, nan pam areme. Nɨ fo, a zurara Ikiavɨra Itir Godɨn atiati an apengan iti. Egha a faragha gumazir mam da pura dagɨaba ini. Ezɨ datɨrɨghɨn kɨ da ikarvaghamin dagɨaba puvatɨ. Ezɨ gumazir kam nan otarimning iniasa izi, egh aning damutɨ aning an ingangarir gumazir kɨnimningɨn otogham.”

Akar Mogomem 18:13

Bizir me amaga dagɨaba isir igharaziba uaghan iti, adar kara, sinamon ko, apir iriziba ko, pauran mughuriar aghuim gamim ko, grisɨn igharagha garir mughuriar aghuiba zuiba ko, sandan aghuim ko, wain ko, wel ko, plauan aghuim ko witba; men bulmakauba ko, sipsipba ko hoziaba ko dar karisba ko, pura ingangarir gumazamizir kɨniba, me dagɨaba bagha men ikɨrɨmɨriba amadi. Bizir kaba bar, gumazamizir dagh ivezamiba puvatɨ.

Jon Osirizir Akar Aghuim 10:1

Egha Iesus ua kamaghɨn mɨgei, “Kɨ bar guizbangɨra ia mɨgei, gumazim sipsipbar dɨvazimɨn tiar akamɨn aven zuir puvatɨgha, tuavir igharazimɨn dɨvazimɨn ikiavkɨnigha aven ghu, a mati okɨmakɨar gumazim, egha gumazir igharazibar biziba okei.

Akar Mogomem 3:17

“Ia kamaghɨn mɨgɨa ghaze, ‘E bizir avɨriba ko dagɨar avɨriba iti. E bizitamɨn otevir puvatɨ.’ Ezɨ puvatɨ. Ian dabirabim pazavɨra itima, gumazamiziba ian garava bar ian apangkufi. Ia bar biziba puvatɨgha damaziba okavigha bibiabara iti. Egha ia uari bizir kam gɨfozir puvatɨ.

Hosea 12:9

Ezɨ kɨ Ikiavɨra Itir God, kɨ ian ifavarim gɨfogha gɨfa. Kɨ fomɨra kantri Isipɨn ia inigha ian akua azenan ize. Egh kɨ ia damutɨ, ia uan dɨpenir aghuiba ategh ua purirpenibar dakuam, mati kɨ ia ko gumazamiziba puvatɨzir danganimɨn itima, ia amizɨ mokɨn.

Amos 2:6

“Ia oragh! Ikiavɨra Itir God Akar Gavgavir kam ia ganɨga ghaze, Israelia arazir kurabagh amua ghuavɨra iti. Israelia uan namakabar amamangatɨzɨ, me pura men biziba inigha, ua da ikarvaghan iburaghburaki. Ezɨ Israelia pura uan bizir namakabagh anɨngizibagh nɨghnigha, gumazir kaba biziba amadi moghɨn me amadi, ezɨ gumazir ekiaba me givese. Ezɨ me pura gumazir ekiar kabar ingangarir gumazir kɨnibar ikiam. Ezɨ Israelia gumazir ekiar kaba da dagɨaba inigha, gumazir pura men bizir me da inizibar biziba ikarvasi. Gumazir men biziba pura da iniziba, mevzika, me osɨmtɨziba puvatɨ, ezɨ bizir me Israelia da pura iniziba dar ivezim ekevezir puvatɨ. Dar ivezimɨn dɨbobonim, dagarir asuamning givezamin dagɨabar ko magh ghue. Egha Israelia tong men apangkuvir puvatɨ. Kamaghɨn amizɨ, nan anɨngagharim guizbangɨra me bagha bar ekefe. Eghtɨ kɨ ivezir kuram me danɨngam.