Matyu 11:28 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁸ Ia, gumazamizir ingangarir ekiabagh amua osɨmtɨzir avɨriba ateriba, ia bar moghɨra na bagh izɨ. Eghtɨ kɨ aghuvsazim ia danɨngam.

Godɨn Akar Aghuim; Akar Dɨkɨrɨzir Gavgavir Igiam

²⁸ Ia, gumazir ingangarir ekiabagh amua osɨmtɨzir avɨriba ateriba, ia bar moghɨra na bagh izɨ. Eghtɨ kɨ aghuvsazim ia danɨngam.

Matyu 11:28 ပူးပေါင်းရင်းမြစ်များ

Matyu 11:29

Ia na da fofozim iniva nan mɨgɨrɨgɨabar apengan ikɨ, egh mati temer ruarir me bulmakauningɨn tuemning gatɨzɨma aning uaning inigha ingangarim gami moghɨn, ia nan apengan ikɨ. Ia na gɨfo, kɨ uan navir averiamɨn aven uabɨ dɨkabɨragha, egha gumazamizibar asughasusi. Egh kɨ ia damutɨ ia aghuvsazim iniam.

Jon Osirizir Akar Aghuim 7:37

Ezɨ isar ekiamɨn dughiar abuananam, a dughiar bar ekiam. Ezɨ dughiar kamɨn Iesus tugha egha pamten diagha kamaghɨn mɨgei, “Gumazitam o amizitam kuarim an pɨrtɨ, a na bagh izɨ egh dɨpam amam.

Jon Osirizir Akar Aghuim 6:37

Ezɨ gumazamizir Afeziam na ganɨngiziba, me bar na bagh izam. Egh gumazir na bagh izamim, kɨ a batueghan kogham.

Galesia 5:1

Krais, e Moses Osirizir Arazibar apengan ikian aghuaghava, kamaghɨn an e gamizɨ, e fɨriaghɨrɨ. Kamaghɨn amizɨ, ia tuivigh gavgafigh. Ia gumazamizitabar gantɨ, me ua ia damutɨ, ia ua ingangarir gumazamizir kɨnibar mɨn ikian markɨ.

Akar Mogomem 22:17

Ezɨ Godɨn Duam ko Sipsipɨn Nguzimɨn amuim, aning ghaze, “Ekiam Iesus, nɨ izɨ!” Eghtɨ gumazamizir uaghan akar kam baraghiziba, me uaghan kamaghɨn mɨkɨmam, “Nɨ izɨ!” Eghtɨ gumazitam kuarim an pɨrtɨ, a izɨ. Egh a dɨpam amɨsɨ, dɨpar ikɨrɨmɨrir zurara itim anɨdir kam puram a inigham, iveziba puvatɨ.

Jeremaia 6:16

Ikiavɨra Itir God uan gumazamizibav gɨa ghaze: “Ia tuavir akamɨn mɨtɨgh nɨghnigh, ia tuavir manam mangɨsɨ ifuegh, an mangɨ. Ia tuavir aghuir ian inazir afeziaba faragha ghuezim bagh gan an apigh an mangɨ. Ia tuavir kamɨn mangɨtɨ, bizitam osɨmtɨzim ia danɨngan koghtɨ, ian naviba purama amɨraghɨrɨgh nɨmɨra ikiam.” Ezɨ Israelia a ikaragha ghaze, “Ti puvatɨgham, E tuavir mamɨn gɨn mangan aghua.”

Onger Akaba 116:7

Kɨ fo, Ikiavɨra Itir God bar deragha na gami. Kamaghɨn, kɨ datɨrɨghɨn navir amɨrizimɨn ikɨva avughsɨ ikiam.

Aisaia 28:12

God uabɨ uan gumazamiziba nguazir otevir kamɨn me arɨki, egha kamaghɨn me mɨkeme, “Ia danganir kamɨn avughsɨ navir amɨrizim inigh ikɨ. Ia gumazamizir osɨmtɨziba aterava amɨraziba, ia nguazir kamɨn avughsɨ nɨmɨra ikɨ.” Ezɨ me an akam baraghan aghua.

Matyu 23:4

Me kamaghɨn amua, mati me bizir bar osɨmtɨziba isava gumazamizibar dɨpɨzibagh isɨn arɨzima, me da ateran buraghburasi. Egha me tong uan dafar puzitamɨn men akurvaghan nɨghnɨzir puvatɨ.

Hibru 4:1

Datɨrɨghɨn, God uaghan e inigh aghuvsazir danganimɨn aven mangasa akam akɨri. Ezɨ kamaghɨn ia uari bagh deravɨra gan, ian tav atam akuigh egh danganir kamɨn aven mangɨghan kogham.

Aisaia 66:2

Kɨ uabɨ, uan dafarimningɨn overiam ko nguazim ko biziba bar dar ingarizɨ, da otivigha iti. Nan navim kamaghɨn amir gumazamizibar iti: Gumazamizir uari abɨrava, uan arazir kuraba bagha osemegha, nan akam baregha nan atiatia nɨgha, nan apengan itiba, kɨ men gara bar me gifonge. Kɨ Ikiavɨra Itir God, kɨ mɨkemegha gɨfa.

Onger Akaba 38:4

Nan arazir kuraba bar na avaragha gɨfa, ezɨ osɨmtɨzir kaba mati kɨ bizir avɨrir maba ateri ezɨ da bar oseme. Ezɨ kamaghɨn, kɨ da ateran iburaghburaki.

2 Tesalonika 1:7

Egh ian osɨmtɨzir datɨrɨghɨn ia ateriba God da gɨvagh, avughsazim ia danɨngɨva uaghan e danɨngam. Dughiar kamɨn Ekiam Iesus uan enselɨn bar gavgavim itiba ko Godɨn Nguibam ategh azenara otogham, eghtɨ e avughsam. An avir bar gavgavir mɨzariaba sara izam.

Aisaia 11:10

Eghtɨ dughiar kamɨn, atrivir igiam, Jesin ovavir boribar tongɨn otogh, mati temer ghuzir igiam, temer dakar kamɨn oto. Eghtɨ gumazamiziba bar an gantɨ, a me bagh ababanimɨn mɨn ikiam. Eghtɨ gumazir kamra, kantribar gumazamiziba a bagh izɨ a baghvɨra ikiam. Eghtɨ an Dɨpenir an avughsɨ ikiamim, bar gavgavigh ziar bar ekiam ikɨtɨ, an angazangarim bar me gisiragham.

Onger Akaba 94:13

Nɨ kamaghɨn damigh avughsazim a danigham. Eghtɨ osɨmtɨziba a bativan kogh mangɨ, gumazamizir kuraba arɨmɨghiregh mozimɨn magɨregham.

Aisaia 61:3

Gumazamizir Saionɨn nguibamɨn aven ikiava aziba, kɨ bar akongezir arazim ko navir amɨrizim me danɨngtɨ, me gavgavigham. Egh kɨ averenir me uan dapanibagh atɨziba adegh, kurkazir aghuiba men kurkegham. Kɨ borem me daghuightɨ, me bar akuegh, men osɨmtɨzir ararem gɨvagham. Egh me ua uan gavgavim inigh, gumazim korotiar aghuim aruzɨ moghɨn, Ikiavɨra Itir God bagh bar akongegh onger akar aghuibar amuam. Egh me temer Okɨn, Ikiavɨra Itir God, uabɨ oparizibar mɨn, tuivigh ikɨ deraghvɨra Ikiavɨra Itir Godɨn gɨn mangɨ an ziar ekiam fam.

Fofozir Gumazim 1:8

Nguazir kamɨn biziba bar zurara ghuavɨra itima e dar gara dagh nɨghnɨgha bar dar amɨra. Guizbangɨra, e bizir kabar amɨrvagha dar gun mɨkɨmamin mɨgɨrɨgɨabagh asa. E bizir kabar garir ifongiam a gevir puvatɨ, e pura dar gara kamaghɨra iti. E bizir kaba barazir ifongiam a gevir puvatɨ, e da baraghavɨra iti.

Fofozir Gumazim 4:8

A kamakɨn, gumazir mam a uabɨra iti, egha boriba ko aveghbuaba puvatɨgha ingaravɨra ikia avughsaziba an puvatɨ. Egha a bizir bar avɨriba ikia kamaghɨn nɨghnɨsi, bizir kaba tɨghar nan ifongiam agɨvagham. Kɨ mangɨ zurara ingarvɨra ikiam. A kamagh uabɨ uabɨ mɨgeir puvatɨ, “Kɨ tizim bagha pura ingangarir mɨtiar kabagh amua dar daghetam isa pura ikia bar akongezir puvatɨ? Kɨ oveghtɨ tinara bizir kaba iniam? Puvatɨgham.” Gumazir kamaghɨn amimɨn araziba, da bar kufi. Ezɨ kɨ datɨrɨghɨn fo, arazir kam uaghan, an mɨngarim modozɨ e dagh fozir puvatɨgha okam nɨghnɨsi.

Aposel 15:10

Ezɨ kamaghɨn ia tizim bagh God damightɨ, a ian nɨghnɨzibar gɨn mangam? Egha osɨmtɨzir faragha en ovaviba ateran iburaziba ko, osɨmtɨzir e uaghan datɨrɨghɨn ateran iburaziba, da isa nɨghnɨzir gavgavim Iesusɨn itir darazigh arɨsi.

Jopɨn Akɨnafarim 5:7

E gumazamiziba, e uari osɨmtɨzir e bativibar mɨngariba. E uari osɨmtɨzibagh amima, da otifi, mati itam isia afuaghira, avir muziaribagh asavamadi.”

Onger Akaba 32:4

Dɨmagariba ko arueba, nɨ ivezir kuram na ganɨngizɨ nan gavgaviba bar gɨfa. Mati aruer ekiam nguazim gaboima a bar mɨsɨngi. (Ighiam gamua an suiam atugha avughsegha ua ighiam gami.)

Fofozir Gumazim 1:14

Overiamɨn apengan otivir biziba bar, kɨ deraghavɨra dar ganigha egha kɨ kamaghɨn fo, bar guizbangɨra, gumazamiziba amir biziba bar, dar mɨngariba bar mongezɨ, e dagh fozir puvatɨgha okam nɨghnɨsi. Da mati gumazim amɨnimɨn suighasa ivegha ghua, an suighan ibura.

Aisaia 1:4

Iavzika! Ia gumazamizir bar kuraba, ian araziba uaghan ikufi. Ia zurara arazir kurabagh amuavɨra itima, ian arazir kuram ia gekua ghuaghiri. Ia Israelia, ia uan Ikiavɨra Itir God ategha gɨfa. Guizbangɨra, ia akɨrim ragha Israelian Godɨn Bar Zuezim gasara.

Jopɨn Akɨnafarim 14:1

“E gumazamiziba dughiar otevimra nguazir kamɨn iti, egha amebam e batezir dughiamra, osɨmtɨziba e bativavɨra ikia, iza e aremezir dughiamɨn tu.

Jeremaia 31:25

Eghtɨ gumazitamɨn mɨkarzim amɨragham, kɨ ua gavgavim a danɨngam. Eghtɨ gumazitam amɨragh damaziba an siram, kɨ gavgavir igiam a danɨngam.”

Aposel 20:35

Ezɨ kɨ amizir ingangariba bar, kɨ kamaghɨn ian aka, e pamtemɨn ingangarir arazimɨn gɨn mangɨ, egh kamaghɨn, e ingaran iburazir gumazibar akurvagham. Egh ia Ekiam Iesus, a uabɨ mɨkemezir akam gɨnɨghnɨgh, ‘Nɨ bizir aghuarim munav ganɨdir arazim, a bar dera. Egha a nɨ ua baghavɨra biziba isir arazim gafira.’ ”

Jeremaia 35:16

Rekapɨn otarim, Jonadapɨn adarasi, deravɨra uan ovavimɨn akabar gɨn zui. Ezɨ ia gumazamiziba nan akamɨn gɨn zuir puvatɨ.