Malakai 4:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ Ikiavɨra Itir Godɨn Gavgaviba Bar Itim ghaze, “Ia deragh oragh. Dughiatam izɨtɨ, gumazamizir akaba batogha uan ziaba fava arazir kurabagh amiba, avir ekiam tuzibar isi moghɨn, otogh bar men isitɨ, me bar gevegham. Eghtɨ temer aguatam, o ter bitam ikian kogham.

Malakai 4:1 ပူးပေါင်းရင်းမြစ်များ

2 Tesalonika 1:8

Egh God gɨfozir puvatɨziba ko en Ekiam Iesusɨn Akar Aghuimɨn gɨn zuir puvatɨziba, Iesus ivezir kuram me ikarvagham.

2 Pita 3:7

Kamaghɨra God fomɨra mɨkemezɨ moghɨn, a datɨrɨghɨn mɨgɨrɨgɨar igharazim anɨngi, datɨrɨghɨn overiam ko nguazim ikia avim bagha mɨzuai, avim otoghɨva bar aning kuavaremegham. Ezɨ nguazim ko overiam Godɨn Kotiar Ekiam Otivamin Dughiam bagha mɨzuai. Dughiar kamɨn gumazamizir akɨrim ragha God gasaraziba, me bar ikuvigham.

Malakai 3:2

Eghtɨ dughiar a izamin kam, tinara an kotiamɨn aven guizbangɨra mɨkɨmam? Eghtɨ an azenaram otogh izamin dughiar kam, tinara tugh an ganam? Bar puvatɨgham. Guizbangɨra, a mati, avim bar puvɨra isia golɨn isigha bizir kuraba bar da adangizɨ moghɨn, a izam. Egh mati, sopɨn gavgavir inir mɨzɨrɨzim rutɨ a bar zueghamimɨn mɨn ganam.

Aisaia 47:14

“Ezɨ puvatɨ, me mati ogheba mɨsigha iti, ezɨ avir mam gumazir kabar isi me gasɨghasɨgham. Eghtɨ me uarira uarir akurvaghan kogham. Bar guizbangɨra, me kamaghɨn mɨkɨman markɨ, ‘Kɨ mangɨ avir mɨriamɨn daperagh uan mɨkarzim fefem a danɨngam.’ Puvatɨ. Avir kam bar men isigham.

Aisaia 5:24

Ia Ikiavɨra Itir Godɨn Gavgaviba Bar Itimɨn akaba baraghan aghua. Ia akɨrim ragha Israelian Godɨn Bar Zuezimɨn Akar Gavgavibagh asaragha gɨfa. Kamaghɨn amizɨ, ia dadar mɨsɨngizibar mɨn ikuvigham, mati dar biba kurigha gɨvazɨ, dar akɨmariba asiaghira nguazim gɨra, mɨnezibar mɨn mɨgha ghue. Osɨmtɨzir kam bar zuamɨram ia batogham, mati avim isia ghua dadar mɨsɨngizibagh irɨgha zuamɨra isigha gɨfa.

Obadia 1:18

Egh Jekopɨn ovavir boriba, me avimɨn mɨn otivigham. Guizbangɨra, Josepɨn ovavir boriba, me avir mɨzariamɨn mɨn otivigham, egh Ison ovavir boriba avim dadam girɨgha an isi moghɨn men isigham. Eghtɨ Ison ovavir boritam ua ikian kogham. Kɨ Ikiavɨra Itir God, kɨ mɨkemegha gɨfa.”

Malakai 3:15

E gumazir uari fa akaba batozibar gari, me bar akuegha deraghavɨra iti. Ezɨ gumazir arazir kurabagh amiba, me bizir aghuir avɨriba iti. Ezɨ gumazir arazir kuraba Godɨn akakaghasa dagh amiba, me ghaze, God ti me gasɨghasɨgham, ti puvatɨgham? Ezɨ God me gasɨghasɨghizir pu. Bar puvatɨ.’ ”

Sefanaia 1:18

Dughiar kamɨn, Ikiavɨra Itir God uan anɨngagharim akagham, eghtɨ men gol ko silva tong bar men akuraghan kogham. Bar puvatɨgham. An anɨngagharim, avimɨn mɨn otogh nguazimɨn ruaghateviba bar dar isigham. A zuamɨram otogh, nguazimɨn gumazamiziba bar me agɨvagham.

Jopɨn Akɨnafarim 18:16

Gumazamizir arazir kurabagh amiba bar gɨvagham, mati temem, an biba ko an aguaba mɨsɨngizɨ a bar mɨsɨngi.

Luk Osirizir Akar Aghuim 21:20

Iesus ua kamaghɨn mɨgei, “Nɨ Jerusalemɨn nguibamɨn gantɨ mɨdorozir gumaziba izɨ a kontɨma, nɨ fogh suam, a gasɨghasɨghamin dughiam roghɨra ize.

Luk Osirizir Akar Aghuim 19:43

Dughiam izɨtɨ, nɨn apaniba izɨ nguibam avɨnizir dɨvazimɨn boroghɨn nguazir pozir ekiabav kɨnɨva nɨ ekɨarughtɨ, nɨ arɨmangɨghan kogham.

Matyu 3:12

A witba mɨsevir savol an agharimɨn iti, eghtɨ a uan witba mɨsɨva dar daghebar arɨghɨva, witba mɨsevir dɨpenimɨn witɨn mɨseviba aviva, egh dar mɨseviba avir munger puvatɨzimɨn da akuntɨma, da isiam.”

Malakai 4:5

“Nan Dughiar kam, a Dughiar Bar Ekiam, kɨ an gumazamizibar amightɨ me bar atiatigham. Dughiar kam a tɨghar otivam, kɨ faraghɨvɨra Elaija amadaghtɨma an akam akurir gumazimɨn mɨn ia bagh izam.

Malakai 3:18

Eghtɨ dughiar kamɨn, ia gumazamizir arazir aghuibagh amiba ko arazir kurabagh amiba, kɨ me gamir arazim, ia an ganam. Arazir aghuibagh amir gumazim, a nan akamɨn gɨn zui. Ezɨ arazir kurabagh amir gumazim, a nan akam batosi.”

Sekaraia 14:1

Eghtɨ Ikiavɨra Itir Godɨn kotiar ekiamɨn dughiam izam. Eghtɨ dughiar kamɨn apaniba izɨ Jerusalemɨn dagɨaba ko biziba iniam. Me ian damazibar bizir aghuir kaba tuiragh uari danɨngam.

Sefanaia 1:14

Ikiavɨra Itir God Izamin Dughiar Ekiam, a roghɨra ize, egh a bar zuamɨram otogham. Ikiavɨra Itir God Izamin Dughiar Ekiam, a gumazamizibar amutɨ, me bar osemegham. Dughiar kamɨn, mɨdorozir gumazir gavgaviba, me uaghan atiating pamten arangam.

Nahum 1:10

Ia mati gumazim dɨpar onganim amegha bar ongani, eghtɨ a bar ia agɨvagham, mati avim benir dɨkoniba ko, grazir bar mɨsɨngizibar isi.

Joel 2:1

Ikiavɨra Itir God Izamin Dughiar Ekiam, a bar roghɨra izi. Kamaghɨn amizɨ, Saionɨn nguibam, a Godɨn mɨghsɨamra, ia a gisɨn ikɨ, sɨghabagh iviva dɨbɨaribar tong. Eghtɨ Judan nguazimɨn itir gumazamiziba bar nɨghɨva akong.

Ua Me Ini 15:7

Nɨ uan gavgavir ekiamɨn uan apaniba abɨra, egha nɨ uan navir anɨngazim avimɨn mɨn otogha men isia, mati avim grazir mɨdiaribar isi.

Joel 2:31

Eghtɨ aruem mɨtarmeghtɨ, iakɨnim ghuzimɨn mɨn otogham. Bizir kaba faragh otivightɨ, gɨn Ikiavɨra Itir God Izamin Dughiar Ekiam otogham. Dughiar ekiar kam otoghtɨ, gumazamiziba bar atiatigham.

Amos 2:9

“Israelia nan gumazamiziba, kɨ ia bangɨn Amoria gasɨghasɨki. Gumazir kaba temer sidabar mɨn ruarigha, egha okɨn temebar mɨn gavgafi. Ezɨ Amoria kɨ bar moghɨra me gasɨghasɨki.

Esekiel 7:10

Egha Ikiavɨra Itir God ua kamaghɨn na mɨgei: Ia gan! Dughiam otogha gɨfa! Ezɨ asɨghasɨzir ekiam otivasa. Israelia zurara uan namakabar ikuvava, arazir aghuibar me gamir puvatɨ. Me zurara uari pɨrafir arazim gami.

Aisaia 41:2

Tinara aruem anadi naghɨn atrivim garugha a fezɨ, a kantriba ko mɨsogha ghua egha bar moghɨra me abɨni. Godra kantriba an agharim gatɨgha, a gamima, an atrivir igharaziba abɨri. An mɨdorozir sabam ko pim bar me agefi, ezɨ me mati nguazir mɨneziba ko raizɨn afezibar mɨn otozɨ, amɨnim me gɨva zui.

Aisaia 40:24

Atriviba mati, akɨmarir igiaba gumazamiziba datɨrɨghɨra da opari, ezɨ dar biba tɨghar nguazimɨn magɨram. Eghtɨ Ekiam amɨnir fefem amadaghtɨ, a izamin dughiamɨn, me zuamɨra mɨsɨngam. Eghtɨ amɨnim mɨnezir muziarimɨn mɨn, me giveragh mangɨgham.

Onger Akaba 119:119

Nɨ kamaghɨn nɨghnɨsi, nguazir kamɨn itir gumazamizir kuraba bar, mati bizir kurar gumazamiziba makunasava amiba. Kamaghɨn amizɨ, kɨ bar nɨn akabagh ifonge.

Luk Osirizir Akar Aghuim 6:23

Men afeziaba fomɨra kamaghɨra Godɨn akam inigha izir gumazibagh amizɨ moghɨn, me ia gami. Ia uaghan ivezir ekiam Godɨn Nguibamɨn a iniam. Kamaghɨn amizɨ dughiar kam otoghtɨ, ia bar akongeghɨva agorogem sara pɨn uari akun.

Aisaia 9:18

Gumazamizibar arazir kurabara me gasɨghasɨsi. Mati avim benir ataghatariba ko ogher kurabar isia ghua, temer dafaribagh irɨgha ghua, ruarir ekiam girɨzɨ a isi. Ezɨ maburan mɨgharim dɨkavigha ghuavanadi.

Aisaia 9:19

Ikiavɨra Itir Godɨn Gavgaviba Bar Itim bar anɨngaghegha, nguazir kamɨn ruaghatevibar itir gumazamiziba bar me gasɨghasɨki. A mati avim ruarir ekiamɨn isia bar a gasɨghasɨghizɨ moghɨn, bar me gasɨghasɨki. Gumazamiziba uaghan vaghvagha men nɨghnɨzibar gɨn ghua, igharaz darazi dɨkabɨnasava ami.

Esekiel 20:38

Ian tongɨn itir akaba batogha arazir kurabagh amir gumazamiziba, kɨ me batueghtɨ, me ua ian tongɨn ikian kogham. Me datɨrɨghɨn kantrin igharazibar nguazibar ikia kalabuziamɨn iti, eghtɨ kɨ dar me inigh azenan izam. Eghtɨ me ua Israelɨn nguazimɨn aven mangan kogham. Eghtɨ ia kamagh fogh suam, kɨ Ikiavɨra Itir God.

Esekiel 21:32

Avim ia gasɨghasigham, eghtɨ ian ghuziba ian nguazimra iram. Eghtɨ tav ua ia gɨnɨghnɨghan kogham. Kɨ Ikiavɨra Itir God, kɨ kamaghɨn mɨkemegha gɨfa.”

Esekiel 24:11

Nɨ datɨrɨghɨn mɨnevsevim isɨ avivkɨabagh isɨn anefaghtɨ, a isi mangɨ bar aghefegh. Mɨner kam, a bar mɨze, eghtɨ mɨnemɨn itir mɨneziba isi mangɨ bar gɨvaghtɨ, mɨnem ua bar zuegham.

Esekiel 34:17

Kɨ Ikiavɨra Itir Godɨn Ekiam, kɨ kamaghɨn mɨgei: Kɨ vaghvagh ian araziba tuisɨgham, egh kɨ sipsipba vongɨn dar arɨgh, memeba vongɨn dar arɨgham.

Malakai 3:3

Avim golɨn isima a golrama otivi moghɨn, a gumazamizibar araziba tuisɨgham. Kamaghɨra Ikiavɨra Itir Godɨn ingangarir gumazim, Livain adarazir arazir kuraba batuegh, egh Ikiavɨra Itir God bagh ofan aghuiba inigh izam.

Onger Akaba 37:9

Gumazamizir nɨghnɨzir gavgavim Ikiavɨra Itir Godɨn itiba, me uan nguazimɨn ikɨ deraghvɨra ikiam. Eghtɨ gumazamizir kuraba bar ikuvigham.