Malakai 3:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Avim golɨn isima a golrama otivi moghɨn, a gumazamizibar araziba tuisɨgham. Kamaghɨra Ikiavɨra Itir Godɨn ingangarir gumazim, Livain adarazir arazir kuraba batuegh, egh Ikiavɨra Itir God bagh ofan aghuiba inigh izam.

Malakai 3:3 ပူးပေါင်းရင်းမြစ်များ

Aisaia 1:25

O Jerusalem, kɨ ingangarir gavgavim foregha, nɨn arazir kuram akɨrmɨgham, mati gumaziba silvan itir mɨneziba amɨsɨvasa da tue moghɨn, kɨ bar avir pamtemɨn isimɨn nɨ tuam. Kamaghɨra, kɨ ian arazir mɨzɨrɨziba adangasa.

Aghuzir Akaba 17:3

Ikiavɨra Itir God kamaghɨn fofoghasa, e gumazir aghuiba o gumazir kuraba, egha en naviba badagh foghasa, mati me avimɨn gol ko silva tuaghɨva aningɨn gɨfofoghasa, ka guizbangɨn bizim, ti puvatɨ.

Hibru 12:10

En afeziar nguazimɨn itiba, dughiar bar otevibar me ifongezɨ moghɨn en araziba akɨrmɨsi. Ezɨ God kamaghɨn nɨghnɨsi, e guizɨn an damazimɨn zueghavɨra itir arazimra inigh an mɨraram otogham. Kamaghɨn amizɨ, an en akurvaghasa e akɨrmɨsi.

Daniel 12:10

Eghtɨ bizir kaba otiv gumazamizibar amutɨ me arazir aghuibar amuam. Egh me Godɨn damazimɨn zuegham. Egh gumazamizir fofozir aghuiba ko nɨghnɨzir aghuiba itir kaba, merara bizir kamɨn mɨngarim gɨfogham. Eghtɨ gumazamizir kuraba me bizir kamɨn mɨngarim gɨfoghan kogham. Egh me arazir kurar avɨrim damuam.

Sekaraia 13:9

Eghtɨ ikɨzir itir kam, a nan damazimɨn zueghsɨ, kɨ a damu ganigham, mati me silvaba ko, golɨn mɨneziba batueghasa, avimɨn da tuema da isi. Eghtɨ me na ko mɨkɨmtɨ, kɨ men mɨgɨrɨgɨaba baragham. Egh kɨ kamaghɨn me mɨkɨm suam, ‘Ia nan gumazamiziba.’ Eghtɨ me kamaghɨn na mɨkɨmam, ‘Nɨ Ikiavɨra Itir God nɨ en God.’ ”

Taitus 2:14

Krais kamaghɨn ifonge, a uam e inigh en arazir kuraba adangasa. Eghtɨ e bar zuegh an gumazamizibar mɨn ikiam. Egh e arazir aghuibar amusɨ bar ifongegham. Bizir kam bagha, a uabɨ uan mɨkarzim anigha, areme.

Filipai 2:17

Ian nɨghnɨzir gavgavim, a mati ofan mam ia a isa God ganɨdi. Kɨ foghan kogham, me ti na mɨsueghtɨ kɨ aremeghtɨ me nan ghuzim ingeghɨva wainɨn ofan mɨn a inigh ian ofan kam sarama a ingegham. Bizir kam otoghtɨ, kɨ bar akuegham. Kɨ guizbangɨra ia ko, e bar moghɨra bar akuegham.

Onger Akaba 66:10

Gumazim avimɨn silva tuagha an kuraba isa da makuri da bar zuezɨ moghɨn, e osɨmtɨziba ateri, God en gara e tuisɨgh foghasa, e gavgavis o puvatɨ. Egha tuavir kamɨn an e gamizɨ, e zue.

Akar Mogomem 3:18

“Kamagh amizɨ, kɨ nɨghnɨzir kam ia danɨngasa. Nan gol avim bar an isigha an itir bizir kuraba bar da adangi. Kamaghɨn ia golɨn kam na dama a givezegh, dagɨaba avɨrasemegham. Egh uaghan ia uan mɨkarzim avɨsɨ korotiar ghurghuritam givesegh, eghtɨ gumazamiziba ian gantɨ ia bibiabara ikɨva, aghumsɨghan kogham. Egh uaghan ia uan damazibar aghusɨ marasin givesegh, egh ia ganam.

1 Pita 2:9

Ezɨ God ia mɨsevegha gɨvazɨma ia an adarazir otifi. Egha ia atrivimɨn ofa gamir gumazamizibar mɨn otifi. Ia bar guizbangɨra Godɨn gumazamizibara, egha God baghavɨra iti. Egh ia Godɨn gumazamizibar ikɨva, an arazir aghuir a ia gamizibar gun mɨkɨmasa, ia mɨsefe. Ia faragha mɨtarmemɨn ikezɨ, a ian diagha uan angazangarir aghuimɨn ia atɨ.

1 Pita 1:7

Arazir kamɨn God ian nɨghnɨzir gavgavibar gan fogham, ia guizbangɨra nɨghnɨzir gavgavim an iti, o puvatɨ. E fo, gol a bizir aghuim, eghtɨ me avimɨn a tuaghɨva, a gɨfogham, a guizɨn gol, o puvatɨ. Gol a gɨvaghamin bizim. Ezɨ en nɨghnɨzir gavgavim bar gol gafira. Kamaghɨn amizɨma, arazaraziba ia bativtɨ ia fogh, ia nɨghnɨzir gavgavim Kraisɨn iti. Eghtɨ dughiar Krais Iesus ua izamim, a bar ia gakueghɨva, ian ziaba fɨva ziar ekiaba ia danɨngam.

Akɨnafarir Pol Romɨn Nguibar Ekiamɨn Itir Sios Bagha Osirizim 12:1

Kamaghɨn amizɨ, nan adarasi, kɨ Godɨn apangkuvir ekiam gɨnɨghnɨgha, kamaghɨn ia gakaghori: Ia uari uan inivafɨziba isɨ angamɨra itir ofan mɨn God danɨngvɨra ikɨ. Egh a baghvɨra ikɨva an ingangarim damu. Egh ia God damutɨ, a bizir kam bagh bar akuegham. Ia uari isɨ God danɨngamin arazir kam, kar guizɨn arazir Godɨn ziam fem.

Luk Osirizir Akar Aghuim 3:16

Ezɨ Jon bar men nɨghnɨziba ikaragha ghaze, “Kɨ dɨpamɨn ia rue. Ezɨ gumazir mam gɨn izam, an gavgavim bar nan gavgavim gafira. An dagarir asuabar beniba kɨ da fɨran gavgaviba puvatɨ. A Godɨn Duam ko avimɨn ia ruam.

Aghuzir Akaba 25:4

Me silva isɨ avimɨn a tuaghtɨ an poghezir dagɨar mɨnezir kuraba asighɨreghtɨ, silvara otogham. Eghtɨ gumazim an itarir aghuimɨn ingarigham.

Onger Akaba 4:5

Ia nɨghnɨzir gavgavim Ikiavɨra Itir Godɨn ikɨva, ofan a ifongezibar amu.

Akar Mogomem 1:6

An e gamizɨma, e atrivimɨn ofa gamir gumazamizibar otozɨma, God e gativazɨ e Godɨn ingangarim gami, God Iesusɨn afeziam. Zurazurara Krais ziar ekiam ikɨva egh biziba bar dar ganamin gavgavim ikɨ. Bar guizbangɨra.

1 Pita 2:5

Ezɨ ia uaghan, mati dagɨar angamɨra itiba. God ia damightɨ, ia dɨpenimɨn mɨn otoghtɨ, an Duam dɨpenir kamɨn aven ikiam. Eghtɨ God ua bagh ia mɨseveghtɨ, ia an ofa gamir gumazamizibar mɨn ikiam. Egh ia Krais Iesusɨn ziamɨn ia bar ofan mɨn uari isɨ God danɨng. Arazir kam, God bar a gifonge.

2 Timoti 4:6

Ezɨ kɨ uabɨ, nan ovevemɨn dughiam roghɨra ize. Eghtɨ nan ghuzim mati wainɨn dɨpar me God ganɨdimɨn mɨn, abuan irasava ami. Nan dughiar kɨ mangamim a roghɨra izegha gɨfa.

Hosea 14:2

Ia uamategh Ikiavɨra Itir God bagh izɨ, ofan mɨn kamaghɨn a ko mɨkɨm: “O God, nɨ bar moghɨra en arazir kuraba gɨn amadagh, egh e nɨ danɨngamin bizir aghuiba inigh. Datɨrɨghɨn e bulmakaun apuriba mɨsogh nɨn ofa damuan kogham. Puvatɨgham. Arazir aghuir e fomɨra damuasa nɨ ko akam akɨriziba, e dar amuam.

Aisaia 48:10

Kɨ ia damightɨ ia zueghasa nɨghnɨsi, egha kɨ avimɨn ia tuezir puvatɨ, mati gumazim silvan mɨneziba adangasa avimɨn da tue. Ia uan arazir kuraba ataghɨraghasa, kɨ osɨmtɨzir guar avɨriba ataghizɨ, da ia batifi. Kɨ tuavir kamɨn ian nɨghnɨziba ko araziba tuisɨsi.

Onger Akaba 116:17

Kɨ nɨ mɨnabɨsɨ nɨ bagh ofa damuam, egh nɨn ziamɨn dɨmɨva a fam.

Onger Akaba 50:23

Gumazim a na mɨnabi, mati a na bagha ofa gamua nan ziam fe. Gumazamizir nan akamɨn gɨn zuiba, kɨ men akuragh ua me iniam.”

Filipai 4:18

Ezɨ akɨnafarir kamɨn aven, kɨ ia na gamizir biziba bagha ia mɨnabi. Ia na bagha biziba inigha Epafroditusɨn dafarim gatɨzɨ a da inigha izezɨ kɨ da ini. Egha datɨrɨghɨn kɨ bizitam otevezir puvatɨ, kɨ mong bar izɨfa. Ia na ganɨngizir biziba, da mati mughuriar aghuim zuir ofa ia God ganɨdi. God ofan kamɨn gara a gifuegha bar akonge.

Aisaia 61:6

Eghtɨ ia uari Ikiavɨra Itir Godɨn ofa gamir gumazibar mɨn ikɨtɨ, me ziar kam Godɨn ingangarir gumaziba ia darɨgham. Eghtɨ Kantrin Igharazibar Gumazamiziba ia bagh bizir avɨriba inigh izɨtɨ, ia bizir bar avɨriba ikiam. Eghtɨ ia bizir avɨrir me ia danɨngamiba bagh, bar akuegham.

Onger Akaba 50:14

“Kamaghɨn deragham, ia bar God mɨnabagh. Kamaghɨn garir ofa ia a damu. Kɨ Godɨn Bar Pɨn Itim, bizir aghuir ia na danɨngasa mɨkemegha gɨvaziba, ia da isɨ na danɨng.

Onger Akaba 51:19

Dughiar kamɨn me ofan aghuir nɨn damazimɨn deraziba ko, asɨzim tuaghtɨ a bar isi mɨghɨrighamin ofa, me da isɨ nɨ danɨngam. Me uan bulmakaun apuriba inigh nɨn ofa gamir dakozimɨn izɨ nɨ bagh dar ofa damuam.

Jeremaia 9:7

Kamaghɨn, Ikiavɨra Itir Godɨn Gavgaviba Bar Itim mɨgɨa ghaze: “Kɨ uan gumazamizibar araziba tuisɨgh, mɨzazim me danɨngɨva men gan me gɨfofogham, mati gumazim silva isa avimɨn a tua, an mɨneziba mɨsɨva da batozɨ mokɨn. Kɨ gumazamizir kabar arazir kuraba bagh damuamin tuavitam ua itir puvatɨ. Bar puvatɨ.

Esekiel 20:38

Ian tongɨn itir akaba batogha arazir kurabagh amir gumazamiziba, kɨ me batueghtɨ, me ua ian tongɨn ikian kogham. Me datɨrɨghɨn kantrin igharazibar nguazibar ikia kalabuziamɨn iti, eghtɨ kɨ dar me inigh azenan izam. Eghtɨ me ua Israelɨn nguazimɨn aven mangan kogham. Eghtɨ ia kamagh fogh suam, kɨ Ikiavɨra Itir God.

Daniel 11:35

Eghtɨ apaniba gumazir dapanir tabav soghtɨ me arɨghiram. Eghtɨ men osɨmtɨzir kam gavgavim gumazamizir mabar anɨngam. Me arazir aghuibar amuva, Godɨn damazimɨn bar zuegham. Eghtɨ arazir kam gɨvaghan kogham. A kamaghɨra ikɨ mangɨ God inabazir dughiar abuananamɨn tugham.

Malakai 4:1

Ikiavɨra Itir Godɨn Gavgaviba Bar Itim ghaze, “Ia deragh oragh. Dughiatam izɨtɨ, gumazamizir akaba batogha uan ziaba fava arazir kurabagh amiba, avir ekiam tuzibar isi moghɨn, otogh bar men isitɨ, me bar gevegham. Eghtɨ temer aguatam, o ter bitam ikian kogham.

Dɨboboniba 8:6

“Nɨ Israelian gumazamizibar tongɨn Livaibar diaghtɨ me izɨtɨ, nɨ me damightɨ, me nan damazimɨn zuegh.

Onger Akaba 4:6

Gumazamizir avɨriba bizir aghuibar gan, bar akueghasa ifonge. O Ikiavɨra Itir God, nɨn guamɨn angazangarim e gisirazɨ moghɨn, nɨ bar e gifuegh en boroghɨra ikɨ, egh en apangkuvigh en akurvagh.