Malakai 2:17 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁷ Ia mɨgɨrɨgɨar guar avɨribagh amizɨma, Ikiavɨra Itir God ian mɨgɨrɨgɨar kaba bar dar amɨra. Ia kamaghɨn azangsɨsi, “E mɨgɨrɨgɨar manabagh amizɨ, Ikiavɨra Itir God en amɨra?” Ia kamaghɨn mɨgei, “Ikiavɨra Itir God gumazir arazir kurabagh amibav gɨa ghaze, Me dera, ezɨ a me gifonge.” Egha ia tintinibar kamaghɨn mɨgei, “Gumazamiziba ghaze, God arazir aghuibaram amua gumazamizibar araziba akɨri. Ezɨ e an garima, a guizɨn arazir katam gamizir puvatɨ.” Kamaghɨn amizɨ, a ian mɨgɨrɨgɨar kaba bar dar aghua.

Malakai 2:17 ပူးပေါင်းရင်းမြစ်များ

Aisaia 43:24

Ezɨ ia ofa damuasa uan dagɨaba isa, na bagha ighurunir mughuriar aghuim zuibagh ivezezir puvatɨ. Egha ia ofaba bagha sipsipba na danɨngasa, ia dar ovir aghuir avɨriba sara na ganɨngizir puvatɨ. Kamaghɨn amizɨ, ian arazir kuraba na gamima, kɨ osɨmtɨzim ateri. Ezɨ bizir kam na gamizɨ, kɨ ian arazir kurabar aghua.

Sefanaia 1:12

Dughiar kamɨn, kɨ lamba inigh Jerusalemɨn averiam buriam. Gumazir nan arazibagh ifongezir puvatɨziba, me ghaze me uari biziba bar dar amuam. Me ghaze God pura iti. A gumazir aghuibar akurvazir puvatɨgha, gumazir kurabar araziba ikarvazir puvatɨ. Eghtɨ kɨ gumazir kabagh asɨghasigham.

Fofozir Gumazim 8:11

Dughiar mabar, gumazamiziba uan arazir kurabar ivezir kuram zuamɨram a isir puvatɨ. Kamaghɨn bizir kam gumazamizibar nɨghnɨziba fema, me arazir kurabar amuasa gavgavighavɨra iti.

Amos 2:13

“Ia oragh! Kɨ datɨrɨghɨn ia dɨkabɨraghtɨ ia magɨregham. Osɨmtɨzir ia iniamim mati gumazim bizir osɨmtɨzim ateri an akɨragharim a gami moghɨn, ia mɨzazir ekiam baragham.

Esekiel 16:43

“Nɨ aghɨrimra itima, kɨ bar deravɨra nɨ gami, ezɨ nɨ bizir kam bakɨnɨghɨnigha egha arazir kurar kabagh ami. Nɨ guizbangɨra arazir kurar avɨrir kɨ aghuazibagh ami. Egha nɨ manmaghsua, tuavimɨn amizimɨn arazir kam gami. Kamaghɨn amizɨ, kɨ nɨn arazir kurar kaba ikarvagh egh ivezir kuram nɨ danɨngam. Kɨ Ikiavɨra Itir Godɨn Ekiam, kɨ kamaghɨn mɨkemegha gɨfa.”

Esekiel 8:12

Ezɨ Ikiavɨra Itir God, kamaghɨn na mɨgei, “Nguazir kamɨn gumazim, Nɨ gan! Israelian gumazir dapaniba mɨtarmemɨn mueghav ikia arazir kurar kabagh ami. Me vaghvagha uan marvir guaba bagha ofa gamir dakoziba iti. Me ghaze, Ikiavɨra Itir God ti men garir puvatɨ. Ikiavɨra Itir God ti akɨrim ragha nguazir kam gasara.”

Jeremaia 15:6

Kɨ Ikiavɨra Itir God, kɨ guizbangɨra mɨgei, ia akɨrim na gasaragha bar nan saghon iti. Ezɨ kɨ uabɨ uan agharimɨn ian mɨsogh, ia gasɨghasɨghasava ami. Kɨ dughiar avɨribar ian apangkuva ghua, datɨrɨghɨn kɨ aghua.

Aisaia 30:18

Guizbangɨra, Ikiavɨra Itir God, a Godɨn guizɨn arazibagh amim. Kamaghɨn amizɨ, a ian apangkuvighasa ifongiar bar ekiam iti. A uan apangkuvim ian akakaghasa ia mɨzua iti. Gumazamizir nɨghnɨzir gavgavim an ikiava, uarir akurvaghasa a mɨzua itiba, me bar akuegham.

Aisaia 7:13

Ezɨ Aisaia an akam ikaragha ghaze, “Ia Atrivim Devitɨn ovavir boriba, ia bar deraghvɨram oragh! Ian araziba gumazamizibagh amima me bar ian amɨra. Ia uaghan nan God, kamaghɨram a damutɨ a ti ian amɨragham, o?

Aisaia 1:14

Kɨ, iakɨnir igiabar ia nan ziam fer araziba ko, ia mɨzevezir isar ekiar igharaziba, kɨ uan navir averiamɨn aven bar dagh ifongezir puvatɨ. Bizir kaba bar osɨmtɨzim na ganɨdi, ezɨ kɨ da ateran porporegha bar dar amɨra.

Jopɨn Akɨnafarim 36:17

Ezɨ datɨrɨghɨn God nɨn gari, nɨ mati gumazir arazir kurabagh amim, egha nɨ isa kotiam gatɨgha osɨmtɨzim nɨ ganɨngi. Ezɨ nɨ manmaghɨn osɨmtɨzir kam gitagham? Ti puvatɨgham.

Jopɨn Akɨnafarim 34:17

Nɨ manmaghɨn nɨghnɨsi, Godɨn Gavgavim Itim, a ti deravɨra nguazir kamɨn gumazamizibagh ativagh men ganan kogham o? Ezɨ manmaghsua, nɨ akam arazir aghuibagh amir God gasa ghaze, a ti arazir kuram gamigha guizɨn arazimɨn gɨn mangan aghua?

1 Samuel 2:3

“E gumazamiziba, e kamaghɨn deragh fogham, Ikiavɨra Itir God bizir e amiba, a bar dagh fo, egha a en araziba tuisɨsi. Ezɨ ia gumazamizir pura tiariba akarava aruava uan ziaba feba, ia arazir kam ategh uan akaba dukuagh.

Malakai 3:8

Ezɨ kɨ ia mɨgɨa ghaze, Ia nan biziba okei. Egha ia ti ghaze, arazir ia amir kam a dera, a? Bar puvatɨ. Egha ia arazir kam ataghɨrazir puvatɨ. Egha ia gɨn ua kamaghɨn nan azangsɨsi, ‘Nɨ manmaghsua ghaze e nɨn biziba okei?’ Kɨ kamaghɨn ia mɨkɨmam, Nan Akar Gavgavim ghaze, ia ingara isir biziba, ia bar da tuiraghtɨ pozir 10plan otoghtɨ, ia pozitam isɨ na danɨngam. Kar nan bizimra.

Malakai 2:14

Ezɨ ia kamaghɨn Godɨn azangsɨsi, “Manmagh amizɨ, nɨ en ofaba isir puvatɨ?” Bizir kamɨn mɨngarim kamakɨn, Ikiavɨra Itir God fo, nɨ fomɨra uan mugamra ikia, amuimɨn ikiasa Godɨn damazimɨn akar dɨkɨrɨzir gavgavim gamigha ghaze, nɨ amizir kam ateghan kogham. Amizim, kar nɨn roroam. Ezɨ puvatɨ, nɨ akar dɨkɨrɨzir kam abigha gɨfa.

Esekiel 9:9

Ezɨ a na ikaragha ghaze, “Israelɨn ikɨzim ko Judan ikɨzim arazir kurar bar avɨrim gami, ezɨ osɨmtɨzir bar ekiam iti. Nguazir kamɨn, arazir gumaziba uariv soghava ariaghirim bar ekefe. Ezɨ nguibar ekiar kamɨn gumazamiziba uarir ikɨzɨrɨzir arazim bar izɨfa. Me ghaze, Ikiavɨra Itir God ti nguazir kam akɨrim ragha a gasara. Egha en garir puvatɨ.

Jopɨn Akɨnafarim 34:36

Jop gumazir arazir kurabagh amibar mɨn bizibav gei. Ezɨ nan ifongiam kamakɨn, God kamaghɨra a damu mangɨvɨvra ikɨtɨ a fogh suam, a mɨgɨrɨgɨar kabar amuvɨra ikiam, o ti puvatɨgham.

Godɨn Araziba 32:4

En God zurara kamaghɨra iti. A zurara guizɨn arazibaram ami. A mati dagɨar ekiar mamɨn mɨn gavgavigha kamaghɨra iti. A zurara uan akamɨn gɨn ghua egha ifarir puvatɨ. Ezɨ an araziba bar deragha egha voroghɨra iti. A guizɨn arazimɨn gɨn ghua biziba tuisɨgha egha ifarir puvatɨ.

Jopɨn Akɨnafarim 9:24

God gumazir kuraba ataghizɨ me nguazir kam gativagha an gari. Egha jasbar nɨghnɨzibagh amima, da onganigha deravɨra kotiabagh amir puvatɨ. God ti bizir kabar amutɨ, da otivan koghtɨ, tinara dar amutɨ da otivam?

Aisaia 29:15

Gumazamizir uan nɨghnɨzir kuraba ko uan arazir kuraba Ikiavɨra Itir Godɨn da mongasava amiba, mevzika! Me bar ikuvigham! Me arazir kurar kaba, mogomer danganiba ko dɨmagaribar dagh amua kamaghɨn mɨgɨa ghaze, “Tinara en ganigh e gɨfogham?”

Aisaia 43:22

Egha Ikiavɨra Itir God ua kamaghɨn mɨgɨa ghaze: O Israelia, ia Jekopɨn adarasi, ia nan ziam dɨbora, a fer puvatɨ. Manmaghɨn amizɨ ia amɨragha nan aghua?

Jeremaia 17:15

Israelia kamaghɨn na dɨpova mɨgɨa ghaze, “E manadɨzoghɨn gantɨ, Ikiavɨra Itir God, bizir kurar a damuasava mɨkemezir kabar amutɨ, da otivam? A datɨrɨghɨn guizbangɨra dar amutɨ, da otivtɨ, e dar ganika!”

Jeremaia 44:22

Ia arazir bar kuribagh ami, ezɨ gɨn Ikiavɨra Itir God ian arazir kurar kam bar a giporpore. Bizir kam bangɨn, a ian nguazim gamizɨ, a ikuvigha nguazir kɨnimɨn oto. Ezɨ gumazitam an itir puvatɨgha iza datɨrɨghɨn tu. Kamaghɨn amizɨ, Kantrin Igharazibar Gumazamiziba akar kurabar uan apanibav kɨmasa kamaghɨn mɨgei, ‘Ia Juda ikuvizɨ moghɨn, ia ikuvigham.’

Esekiel 18:25

“O Israelɨn ikɨzim, ia zurara kamaghɨn mɨgei, ‘Ekiam amir arazir kaba, da derazir puvatɨ.’ Israelia, ia deravɨra nan akam baragh. Ia ghaze, nan araziba ti ikufi. Bar puvatɨ. Iarara ian arazibara bar ikufi!

Jeremaia 12:1

O Ikiavɨra Itir God, nɨ kotiaba tuisɨzir arazim a bar dera, ezɨ kɨ zurara uan osɨmtɨzim akɨrsɨ akamadarim nɨ ko a damuan kogham. Ezɨ arazir kɨ fozir puvatɨzir maba iti, ezɨ guizɨn nɨn arazir kotiaba tuisɨzim, kɨ a bagh nɨn azangsɨghasa. Manmaghɨram amizɨ gumazamizir arazir kurabagh amiba me zurara deragha iti? Ezɨ manmagh amizɨ, ifavaribagh amir gumaziba deraghavɨra ikia ghuavɨra iti?