Maika 4:5 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁵ Kantrin Igharazibar Gumazamiziba uan asebar ziaba fɨ, men akabar gɨn mangam. Eghtɨ e Israelia, Ikiavɨra Itir God, en God, e zuraram an ziam fɨ mamaghɨra ikiam.

Maika 4:5 ပူးပေါင်းရင်းမြစ်များ

Sekaraia 10:12

Kɨ uan gumazamizibar amightɨ me gavgavigham. Eghtɨ me nan apengan ikɨ nan ziam fɨva, nan akabar gɨn mangam. Kɨ Ikiavɨra Itir God, kɨ mɨkemegha gɨfa.”

Kolosi 3:17

Ezɨ bizir manaba ia dagh ami, mɨgɨrɨgɨaba o ingangariba, ia bizir kaba bar Ekiam Iesusɨn ziamɨn dar amu. Egh an ziamɨn ia God Afeziam mɨnabɨ.

Josua 24:15

Ia Ikiavɨra Itir Godɨn ziam fan aghuaghɨva deravɨra nɨghnigh, ia godɨn manamɨn ziam fam? Ian ovaviba fomɨra Mesopotemian nguazimɨn ikia ziaba fezir aseba, ia da fam? O, Amoria, ia men nguazir ia datɨrɨghɨn itir kam, men aseba, ia da fam? Ezɨ kɨ ko, nan dɨpenimɨn itir adarazi bar moghɨra, e Ikiavɨra Itir Godɨn ziamra fam.”

Aisaia 2:5

O Jekopɨn ovavir boriba, ia izɨ. Ikiavɨra Itir God uan Akar Gavgaviba isa uan angazangarimɨn mɨn e ganɨdi. Da angazangarim mɨn tuavim en akakasi, egha an Akar Gavgaviba, deravɨra tuavim en aka. Eghtɨ e Akar Gavgavir kabar gɨn mangam.

Onger Akaba 48:14

Ia kamagh me mɨkɨm suam, “Godɨn kam a en God, a zurara ikia kamaghɨra iti. Egh a zurara en faragh mangɨ tuavim en akakagham.”

Kolosi 2:6

Ezɨ ia Krais Iesus en Ekiam a inigha gɨfa, kamaghɨn amizɨ ia a ko daruva an poroghɨv ikɨ.

Aisaia 26:8

O Ikiavɨra Itir God, e nɨn Akar Gavgavibar gɨn zui, egha e nɨ baghavɨra gara, nɨrara mɨzua iti. Egha uan navir averiabar aven nɨn ziar ekiam bar a gifongegha ghaze, gumazamiziba bar nɨ gɨfogh zurara nɨ gɨnɨghnɨgham.

2 Atriviba 17:34

Egha datɨrɨghɨn uaghan gumazamizir kaba arazir kamɨn gɨn ghuavɨra iti. Me guizbangɨra Ikiavɨra Itir Godɨn ziam fer puvatɨ, egha me arazir God ifongeziba ko, bizir a damuasa me mɨkemeziba ko, Araziba ko, Akar Gavgaviba, me dar gɨn zuir puvatɨ, kar a Jekopɨn ovavir boribagh anɨngizir araziba. Jekop a gumazir kam, God ziar igharazir kam Israel a ganɨngi.

2 Atriviba 17:29

Ezɨ ikɨzir kabar gumazamiziba me uan arazibar gɨn ghuavɨra ikia, egha uari bagha asebar marvir guabar ingari. Egha me marvir guar kaba isa, Israelia fomɨra asebar ziaba fasa mɨghsɨabar pɨn itir danganir ingarizir kabagh arɨki. Egha ikɨzir vaghvaziba uari bagha marvir guabar ingara da isa nguibar me itibagh arɨsi.

Jenesis 17:1

Ezɨ Abram gɨn azenir 99pla anetuzɨma, Ikiavɨra Itir God a batogha a mɨgɨa ghaze, “Kɨ Gavgaviba Bar Itir God. Nɨ zurara nan akam baragh, nan apengan ikɨva nan damazimɨn deragh arazir aghuibar amu.

Onger Akaba 71:16

O Ekiam, nɨ Ikiavɨra Itir God, kɨ nɨn gavgavir ekiam gɨnɨghnɨgh nɨn ziam fam. Egh kamaghɨn akam akun suam, “Ikiavɨra Itir God uabɨra dera.”

Aposel 14:16

Fomɨra, God nguibaba bar, me ataghizɨma me pura uan nɨghnɨzibar arua bizibagh ami.

Aisaia 26:13

O Ikiavɨra Itir God, en God, gumazir ekiar igharaziba fomɨra e gativaghava en gari. Ezɨ e ziar ekiam nɨraram anɨdi.

Godɨn Araziba 27:10

Kamaghɨn amizɨ, ia Ikiavɨra Itir God, ian Godɨn akaba baragh! Ia an Akar Gavgavir kɨ datɨrɨghɨn ia ganɨdiba ko arazir a ifongeziba, ia bar dar gɨn mangɨ.”

Onger Akaba 20:6

Kɨ datɨrɨghɨn fo, Ikiavɨra Itir God, uabɨ uan atrivir a ua baghavɨra mɨsevezir kam, an an akurvasi. A uan Nguibar aghuimɨn ikia, an azangsɨziba barasi. Egha uan gavgavimɨn an akurvazima, a mɨdorozimɨn uan apaniba abɨri.

Jeremaia 32:40

Egh kɨ me ko Akar Dɨkɨrɨzir Gavgavir Igiam damuam. Eghtɨ Akar Dɨkɨrɨzir Gavgavir kam ikɨ mamaghɨra ikiam. Kɨ kamaghɨn akam akɨrigh suam, Kɨ deragh me damuamin arazim ateghan kogham. Egh kɨ nɨghnɨzir aghuim me danɨngam, eghtɨ me nan atiating nan apengan ikiam, egh me ua na ateghan kogham.