Maika 4:13 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹³ Egha Ikiavɨra Itir God ghaze, “Jerusalemia, ia dɨkavigh mangɨ uan apanibagh asɨghasɨgh. Kɨ ia damightɨ, ia gavgavigh ikiam, mati bulmakaun mam ainɨn komba ko, brasɨn sueba ikia bar gavgafi. Kamaghɨn amizɨ, ia kantrin avɨriba dɨkɨ me abɨnigham. Egh apaniba faragha ia mɨsogha inizir biziba, ia uam ada inigh na danɨngam, kɨ nguazir kam bar a gativazir Ikiavɨra Itir God.”

Maika 4:13 ပူးပေါင်းရင်းမြစ်များ

Daniel 2:44

“Ezɨ dughiar atrivir kaba ikiavɨra itimɨn, Godɨn Uan Nguibamɨn Itim, a Dughiar a Gumazamizibagh Ativaghamin Tam a damightɨ, an otivam. Eghtɨ a ikɨ mamaghɨra ikiam. Eghtɨ atrivir maba da God Gumazamizibagh Ativaghamin Dughiar Kam dɨkabɨraghan kogham. Eghtɨ God Gumazamizibagh Ativaghamin Dughiam, an atrivir igharazibagh asɨghasigham. Eghtɨ an atrivir dughiar kam a ikɨ mamaghɨra ikɨvɨra ikiam.

Aisaia 23:18

Egh dagɨaba ko, bizir tizir Tair isiba, a ua baghvɨra da isɨ, dar pozim mɨkɨnan kogham. Puvatɨ. Da Ikiavɨra Itir Godɨn bizibar mɨn ikiam. Eghtɨ Tair inigha pozim mɨkɨnizir bizir kaba, Ikiavɨra Itir Godɨn damazimɨn ikiamin gumazamiziba bar da inigham, egh me damamin dagher bar avɨriba ko, korotiar aghuir daghuamin bar avɨriba ikiam.

Aisaia 18:7

Dughiar kamɨn, Itiopian kantrin gumazamiziba bizir bar aghuiba inigh mangɨ Ikiavɨra Itir Godɨn Gavgaviba Bar Itim danɨngam. A kantrin gavgavim. A kantrin dɨpar bar avɨriba itim. Kantrin kamɨn itir gumazamiziba bar ruarigha, mɨkarziba bar dera. Egha kantrin kam, mɨdorozimɨn ziar ekiam iti, ezɨ kantrin igharaziba bar an atiatingi. Eghtɨ me uan bizir aghuiba inigh izɨ Saionɨn Mɨghsɨamɨn izam. Ikiavɨra Itir God, ua bagha danganir kam amɨsefe, eghtɨ gumazamiziba an izɨ, an ziam fam.

1 Korin 16:2

Ia bar, Sandebar zurara, vaghvagh dagɨar ia isibar mɨrara, dagɨataba tuiragh, egh da isɨ uan dɨpenibar da mongegh. Eghtɨ dagɨaba tong avɨrasemegh. Eghtɨ dughiar kɨ izamimɨn, ia ua dagɨaba burian kogham.

Sekaraia 6:5

Ezɨ a kamaghɨn na ikaragha ghaze, “Karisɨn 4plan kaba, da 4plan amɨnir overiamɨn pɨn itibar ababanim gami. Da datɨrɨghɨra nguazir kamɨn oteviba bar dar garir Ekiamɨn damazimɨn ikegha, anetegha izi.”

Sekaraia 4:14

Ezɨ ensel kamaghɨn na mɨgɨa ghaze, “Olivɨn aguar kamning, aning gumazir pumuningɨn ababanim gami. Ekiam, a nguazir kamɨn oteviba bar dar gari, egha a uan ingangarim damuasa aning amɨsevegha, borem isa aningɨn dapanimning ginge.”

Jeremaia 51:33

Ikiavɨra Itir Godɨn Gavgaviba Bar Itim, Israelian God, a kamaghɨn mɨkeme: “Babilon, a guivir dirimɨn mɨn iti. Eghtɨ mati gumaziba raizɨn daghem iniasa a dɨkabɨri moghɨn, apaniba a dɨkabɨnigham. Ezɨ ingangarir kam damuamin dughiam, a roghɨra izegha gɨfa.”

Onger Akaba 68:29

Atriviba bizir aghuiba inigha iza, nɨn Dɨpenir Jerusalemɨn itimɨn nɨ ganɨdi.

Josua 6:19

Bizir me silva ko gol ko bras ko ainɨn ingariziba, kar Ikiavɨra Itir Godɨn bizibara. Ia da inigh izɨ an dagɨar dɨpenimɨn dar arɨkigh.”

Aisaia 5:28

Men bariba bar ghumizɨ, me pibar afegha, egha asasavɨra gara iti. Men hoziaba bar gavgafi, ezɨ men hoziabar dagarir puziba mati dagɨar bar gavgaviba egh bɨghiran kogham. Men karisba bar puvɨram akɨzɨrɨsi, ezɨ dar wilba amɨnir ekiamɨn mɨn ivemari.

Onger Akaba 72:10

Spenɨn kantrin atriviba ko arighatɨzibar atriviba, me bizir aghuiba a danɨngam. Egh uaghan, Seban kantri ko, Arebian kantrin atriviba, me a bagh takisba inigh izam.

Godɨn Araziba 33:25

Eghtɨ an nguibar ekiaba avɨnizir dɨvaziba, ainɨn itiar akar gavgaviba ikiam. Eghtɨ a zurara dar aven deraghvɨra ikɨva, atiatingan kogham.”

Aisaia 21:10

Ezɨ kɨ ghaze: “O ia nan gumazamiziba, ian apaniba ia mɨsoke, mati gumaziba witɨn ovɨzibav sosi. Ezɨ kɨ datɨrɨghɨn, Ikiavɨra Itir Godɨn Gavgaviba Bar Itim na ganɨngizir akam, kɨ ia mɨkemegha gɨfa, kar Israelian God.”

Jeremaia 51:20

Ikiavɨra Itir God kamaghɨn mɨgei: “Babilon, nɨ mati kɨ mɨsoghasa inizir bizir mam, nɨ nan ifanim mɨn iti. Kɨ nɨ inigha, kantrin avɨriba mɨsaragharɨgha, egha nguibar gavgavir avɨribagh asɨghasɨki.

Hosea 10:11

“Fomɨra Efraim mati bulmakaun amebar igiar mam, a rais dɨkabɨnasa deravɨra sure gami, eghtɨ gumazamiziba raizɨn daghem iniam. Egha a ingangarir kam bar a gifonge. Ingangarim faragha bar an dera, ezɨ datɨrɨghɨn kɨ a damightɨ, an ingangarim bar osemegham. Datɨrɨghɨn kɨ Israel ko Juda damightɨ, aning bulmakaun mɨn, gumazim temem an fɨrim gikeghtɨ, a nguazim abɨzir bizim gekuam. A ingangarir dafam damuva, bizir kam gekutɨ, temem an fɨrim aghoram.

Habakuk 3:12

Nɨ adarir ekiam kantriba bar dar ikia, egha nɨ nguazim gisɨn arua, nguibaba bar da dɨkabɨni.

Onger Akaba 24:1

Nguazir kam ko an itir biziba bar, da bar Ikiavɨra Itir Godɨn bizibara. Ezɨ nguazimɨn itir gumazamiziba bar uaghan an bizibara.

Maika 5:7

Eghtɨ Jekopɨn ovavir boribar ikiavɨra itir varazira, me kantrin igharazir avɨribar gumazamizibar tongɨn ikɨ, men akurvaghamin gumazibar mɨn ikiam. Mati dɨmagaribar grazibagh irir ghuariaba, ko, temebagh izir amoziba, Ikiavɨra Itir God da amadagha dagh amizɨ, da deraghavɨram otifi. Bizir kaba me Godɨn gavgavimra dar amuam, men gavgaviba puvatɨ.

Sekaraia 12:3

Dughiar kam otogh gɨvaghtɨ, kɨ Jerusalem damightɨma a dagɨar bar osɨmtɨzimɨn mɨn otogham. Eghtɨ kantriba bar a ko mɨsoghsɨ uari akuvagh, me uari ikuvigham, mati gumazim dagɨar osɨmtɨzir kam fava mɨzazim isi.

Sekaraia 12:6

“Dughiar kamɨn kɨ Judan gumazir dapanibar amightɨ, me mati tuzim dafogha isi moghɨn, o mati witɨn azenir bar mɨsɨngizim dafogha isia mɨzariaba zui. Eghtɨ kantrin men boroghɨn itiba da bar gɨvagham. Eghtɨ Jerusalemɨn nguibar ekiamra, a itir danganimra ikɨvɨra ikiam.