Maika 2:8 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁸ Ikiavɨra Itir God kamaghɨn gumazir kabav gɨa ghaze, nan gumazamiziba, ia apanibar mɨn me gami. Men marazi mɨdorozim gamigha uamategha uan dɨpenibar izegha ghaze, e deragha uamategha izegha avughsi. Ezɨ puvatɨ, ia ghua me azenan azuir korotiaba men akɨragharibar da adangi.

Maika 2:8 ပူးပေါင်းရင်းမြစ်များ

Aisaia 9:21

Manasen anabamɨn adarasi, Efraimɨn anabamɨn adarazi abɨnasa, ezɨ Efraimia Manaseba abɨnasa. Egha aning uaghan Judaba abɨnasa. Kamaghɨn amizɨ, Ekiam me ateghtɨ me uarira uarigh asɨghasɨgham, eghtɨ bizir kam an anɨngagharim agɨvaghan kogham. Puvatɨ. A tɨghar ivezir kuram isɨ me danɨngvɨra ikiam.

Onger Akaba 55:20

Nan namakam, a uan namakabara mɨsosi. Egha me ko fomɨrama amizir akar dɨkɨrɨzim abɨki.

2 Samuel 20:19

Nɨ oragh. En nguibar ekiam a Israelɨn kantrin aven nguibar ekiaba bar dar faraghavɨra iti. E tintinibar mɨsozir puvatɨgha deravɨra apiagha, uan arazir aghuibar gɨrara zui. Ezɨ nɨ datɨrɨghɨn nguibar ekiar kam gasɨghasɨghasa. Nɨ bizir tizim bagha, Ikiavɨra Itir God baghavɨra itir bizim gasɨghasɨghasava ami?”

Jeremaia 12:8

Nan gumazamizir kaba, nan apanim gamigha, na dɨkabɨnasa pamten diava arai, mati laionɨn mam ruarimɨn ikia pamten aroi. Kamaghɨn, kɨ me gifongezir puvatɨ.

Maika 3:2

Ia arazir aghuir kamɨn aghuagha arazir kuram bagha bar ifonge. Ian arazir kaba mati, ia nan gumazamizir angamɨra itibar iniba aghora da mɨsi. Egha men agharibar itir tuziba aghora da mɨsefi.

Maika 3:3

Ian arazir kaba mati ia nan gumazamizibar iniba mɨsa men aghariba apɨragharɨgha dagh asegha, men tuziba aghoraghsua da api. Ia mati, me mɨnem daghuasa asɨzir tuzir agharibar itiba aghoraghsuegha da mɨnem gaghui.

Maika 7:2

Gumazir aghuitam nan kantrin aven itir puvatɨ. Gumazitam guizbangɨra Godɨn gɨn zuir puvatɨ. Bar puvatɨ. Dughiabar zurara gumazamiziba uarira uarir apanibagh amua uarigh asɨghasɨghasa uari bagha tuaviba buri, mati gumazim asɨzibav soghasa, azuazim agura.

Maika 7:3

Gumazamizir bar arazir kurabagh fogha dagh amiba, me zuraram arazir kurabagh ami. Gavmanɨn ingarir gumaziba ko, jasba kotɨn dughiamɨn, me gumazamizibar azangsɨzima, me moga dagɨabar me giveza me gakaghorima, me paza kotiaba barasi. Gumazir ziar ekiaba itiba pura uan ifongiabar jasbav geima, jasba guizɨn arazim ategha pura gumazir kurar kabar ifongiabar gɨn zui.