Josua 24:23 - Godɨn Eghaghanim: Akar Gavgavir Dɨkɨrɨzir Ghurim ko Igiam

²³ Ezɨ Josua ua me mɨgɨa ghaze, “Ia ikɨzir igharazibar aser ian tongɨn itiba, da batokegh. Egh Ikiavɨra Itir God, a Israelian God, ia uan navir averiabar aven an ziamra fɨva, uari isɨ a danɨngigh.”

Josua 24:23 ပူးပေါင်းရင်းမြစ်များ

Josua 24:14

Egha Josua ghua kamaghɨn mɨgei, “Ia Ikiavɨra Itir Godɨn atiating, an akabar gɨn mangɨva, guizbangɨra an apengan ikɨ an ingangarim damuva, uan inazir afeziabar aseba batokegh, kar me fomɨra Mesopotemian kantri ko Isipɨn kantrin ikia dar ziaba fe.

Aghuzir Akaba 2:2

Egh nɨghnɨzir aghuim anɨdir akaba baragh. Egh nɨ fofozir aghuim inisɨ pamten ingar.

Onger Akaba 141:4

Nɨ na ateghtɨ nan navim arazir kuraba bagh dɨkavan markɨ. Kɨ gumazir kuraba ko uari akuva arazir kuratam damuan kogham. Nɨ na ateghtɨ, kɨ me ko men isar kurabar ikian kogham.

Onger Akaba 119:36

Nɨ nan navim damightɨ a nɨn akabar gɨn mangɨsɨvɨra dɨkav. Nan navim bizir igharaziba bagh dɨkavan kɨ aghua.

Ua Me Ini 20:23

Ia orakigh. Ia gol ko silvan asebar marvir guabar ingar, dar ziaba fan markɨ. Kɨ uabɨra, ia bar nan ziamra fam.

Hosea 14:8

“O Efraimia, ia ua marvir guabar ziaba fan kogham. Kɨ uabɨra, ian azangsɨziba baragham. Egh deraghvɨra ia geghuvam. Eghtɨ ia nan apengan ikiam, mati gumazim aruemɨn dughiamɨn, temer ekiamɨn dughuazimɨn apengan aperaghav iti. Ia isir bizir aghuiba bar, kɨrara dar mɨngarim.”

1 Atriviba 8:58

An e damutɨ en naviba a baghvɨra ikɨ, egh an Akar Gavgaviba, ko an arazir a ifongeziba ko, bizir a damuasa en inazir afeziabav kemeziba, e deravɨra dar gɨn mangam.

1 Atriviba 8:57

Ikiavɨra Itir God, a en God, a faragha en inazir afeziaba ko ikezɨ moghɨn, datɨrɨghɨn an e ko ikiam. An e ateghtɨ, e pura uarira ikian kogham.

Onger Akaba 81:10

Kɨ Ikiavɨra Itir God, ian God. Kɨ Isipɨn ia inigha azenan ize. Ia nɨghnɨzir gavgavim na ikɨtɨ, kɨ bar deravɨra ia damuam. Mati kuarazir nguzim akam akarigha itima, an amebam biziba atera iza an akam mɨkɨri.