Josua 11:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Ezɨ Ikiavɨra Itir God kamaghɨn Josua mɨgei, “Gurumzaraghan dughiar kamra, kɨ Israelian akuraghtɨ me bar uan apanibav sueghtɨ me arɨghiregham. Kamaghɨn amizɨ, nɨ men atiatingan markɨ. Egh ia bar men hoziabar suer agɨribar aghoregh, men karisbar apongeghtɨ da isigh.”

Josua 11:6 ပူးပေါင်းရင်းမြစ်များ

Josua 10:8

Ezɨ Ikiavɨra Itir God, Josua mɨgɨa ghaze, “Nɨ men atiatingan markɨ, kɨ me isa ian agharim gatɨgha gɨfa. Men tav ia abɨraghan kogham.”

2 Samuel 8:4

Egha Devit Hadateserɨn mɨdorozir gumazir avɨriba ini. A 20,000plan mɨdorozir gumaziba isa, 1,700plan mɨdorozir gumazir hoziabagh apiaghira mɨsoziba ini. Egha Devit uaghan, 100plan karisbagh etuir hoziaba ini. A uaghan hoziar igharazibar suer agɨriba aghorezɨ, da daruan ibura.

1 Samuel 11:9

Ezɨ mɨdorozir gumazir kaba, kamaghɨn Jabesian akam inigha izir gumazibav gei, “Ia ua Jabesɨn mangɨ kamaghɨn uan gumazamizibav mɨkɨm: E gurumɨn aruemɨn, izɨ ian akuragh ian apanibar gɨntɨgham.” Ezɨ Jabesian akam inigha izir gumazir kaba ghua akar kamɨn gun uan gumazamizibav geima, me oregha bar akonge.

Josua 11:9

Ezɨ Josua Ikiavɨra Itir God a mɨkemezɨ moghɨn men hoziabar suer agɨriba aghoregha men karisbagh apongezɨ da isi.

Hosea 14:3

Asiriaba en akuraghan kogham. Eghtɨ mɨdorozir hoziaba en akuraghan kogham. E uan dafaribar marvir guabar ingari, egh gɨn e kamaghɨn ua dav mɨkɨman kogh suam, ‘Kar en aseba.’ E fo, e mati asaghasazir borir e geghuvamin amebaba ko afeziaba puvatɨ, ezɨ nɨrara, zurara en apangkufi.”

Aisaia 31:1

Ia abuir gumaziba, ia kantri Isipɨn ghuava uarir akurvaghasa, men azangsɨsi, iavzika! Ia bar ikuvigham. Ia Isipian hoziaba ko men karisɨn avɨriba ko karisɨn suizir gumazir bar gavgaviba, ia nɨghnɨzir gavgavim dar iti. Ia ti ghaze, Isipia ian akuragham. Egha ia Israelian Godɨn Bar Zuezim, nɨghnɨzir gavgavim an itir puvatɨ. Egha ia uarir akurvaghasa Ikiavɨra Itir Godɨn azangsɨzir puvatɨ. Kamaghɨn amizɨ, ia bar ikuvigham. Iavzika!

Aisaia 30:16

Egha ia ghaze, “Puvatɨ! E hoziabar apiagh puv arɨ mangam.” Ezɨ God ghaze, “Guizbangɨra, ia arɨ mangɨ!” Ia ghaze, “En hoziaba puvɨra ivemaram.” Ezɨ God ghaze, “Ian apanibar hoziaba bar puvɨra ivemar ian gɨntɨgham.”

Aghuzir Akaba 20:7

Afeziatam, a gumazir aghuim, egha arazir aghuimɨn gɨn zui, eghtɨ an gɨn zamin boriba bar akongegham.

Onger Akaba 46:11

Ikiavɨra Itir Godɨn Gavgaviba Bar Itim, an e ko iti. A Jekopɨn God, a en danganir mogomem. (Ighiam gamua an suiam atugha avughsegha ua ighiam gami.)

Onger Akaba 46:9

A nguazimɨn oteviba bar dar mɨdoroziba agefi. Egha barir piba ko afuzibar suigha da apɨragharigha, oraba aviba dagh arɨzi da isi.

2 Eghaghaniba 20:16

Apaniba gurum mɨzaraghan ia mɨsoghsɨ Sisɨn mɨghsɨamɨn ghuanadir tuavimɨn izam. Eghtɨ ia mangɨ Jeruelɨn gumazamiziba puvatɨzir danganimɨn boroghɨn, aruem anadi naghɨn danganir zarimɨn me batogham.

Josua 3:5

Ezɨ Josua kamaghɨn gumazamizibav gei, “Ia uarira uari akɨrɨva, Godɨn damazimɨn zuegh ikɨ. Ia gan, Ikiavɨra Itir God gurumzaraghan dɨgavir kuram gamir biziba ian tongɨn dar amuam.”

Godɨn Araziba 7:16

Eghtɨ ikɨzir Ikiavɨra Itir God, en God, ian dafarim darɨghamiba, ia bar moghɨra me agɨfagh. Egh ia me ko men asebar ziaba fan markɨ. Ia men asebar ziaba fɨ, mati ia asɨzim azuazimɨn aven ghu, egh arazir kam bangɨn ia arɨmɨghiregham. Kamaghɨn, ia tong men apangkuvan markɨ. Bar markɨ.

Josua 11:5

Ezɨ atrivir kaba bar moghɨra uan mɨdorozir gumaziba akuvagha men akua iza Meromɨn Faner mɨriamɨn danganir mam aghuigha an ti.

Josua 11:7

Ezɨ men apaniba tɨghar mɨdorozim bagha uari akuvima, Josua uan mɨdorozir gumaziba ko Meromɨn Faner mɨriamɨn mɨdorozim fore.

Gumazir Dapaniba 7:9

Ezɨ dɨmagarir kamɨn, Ikiavɨra Itir God kamaghɨn Gideon mɨgei, “Ia mangɨ Midianian danganimɨn mɨdorozim foregh. Kɨ ian akuragh Midianian gumazibav sogh me abɨragham. Guizbangɨra, kɨ me isa ian agharim gatɨgha gɨfa.

Esekiel 39:9

Gumazamizir Israelɨn nguibar ekiabar aven itiba, me uan nguibaba ategh mangɨ mɨdorozir bizir apaniba pura taghizɨ itiba iniam. Kar men oraba ko, barir piba ko, barir afuziba ko, afuzir ruariba ko, mɨdorozir ifaniba. Me dazibar mɨn dar avibar arɨgh mangɨ 7plan azenibar tugham.

Nahum 2:13

Ikiavɨra Itir Godɨn Gavgaviba Bar Itim kamaghɨn Ninivebav gei, “Kɨrara ian apanim. Kɨ ian karisba dapongtɨ da bar isigham. Eghtɨ ian mɨdorozir gumaziba, laionɨn igiabar mɨn mɨdorozimɨn aven arɨmɨghiregham. Eghtɨ bizir ia igharaz darazi da iniziba, kɨ bar uam ada inigham. Eghtɨ Kantrin Igharazibar Gumazamiziba ua ian abuir gumaziba baraghan kogham.”

2 Atriviba 6:16

Ezɨ Elisa kamaghɨn a mɨgei, “Nɨ atiatingan markɨ. Me guizbangɨra mɨdorozir gumazir avɨrim iti, ezɨ en akurvaghamin mɨdorozir gumazir bar avɨrim iti, ezɨ en mɨdorozir gumazibar dɨbobonim, men mɨdorozir gumazibar dɨbobonim bar a gafira.”

Onger Akaba 46:10

A kamaghɨn mɨgɨa ghaze, “Ia uarir asugh nɨmɨra ikɨ. Egh deragh na gɨfogh, kɨ guizbangɨra God. Kantriba bar nan ziam fɨ. Nguazir kamɨn itir gumazamiziba bar kamaghɨn mɨkɨm suam, Kɨrara kɨ ekevegha bar pɨn iti.”