Jona 2:9 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁹ Ezɨ kɨ uabɨ, ighiam bangɨva nɨn ziam fɨva asɨzitam mɨsuegh ofa isɨ nɨ danɨngasa. Bizir kɨ nɨ ko akam akɨrigha gɨvaziba, kɨ dar amuam. O Ikiavɨra Itir God, nɨ uabɨra en akurvazima, e angamɨra nɨ ko iti.”

Jona 2:9 ပူးပေါင်းရင်းမြစ်များ

Onger Akaba 3:8

Ikiavɨra Itir God, nɨ uabɨra en akurvagha uam e ini, ezɨ bizir katam bar e gasɨghasɨghizir puvatɨ. Nɨ bar deraghavɨra uan gumazamizibagh ami. (Ighiam gamua an suiam atugha avughsegha ua ighiam gami.)

Onger Akaba 50:14

“Kamaghɨn deragham, ia bar God mɨnabagh. Kamaghɨn garir ofa ia a damu. Kɨ Godɨn Bar Pɨn Itim, bizir aghuir ia na danɨngasa mɨkemegha gɨvaziba, ia da isɨ na danɨng.

Hibru 13:15

Kamaghɨn amizɨ, e Iesusɨn ingangarimɨn tuavimɨn, e zurara ziar ekiam isɨ ofan mɨn God danɨng mamaghɨra ikiam. Eghtɨ en akatoriba zurara an ziam fɨ suam, a en Ekiam.

Onger Akaba 50:23

Gumazim a na mɨnabi, mati a na bagha ofa gamua nan ziam fe. Gumazamizir nan akamɨn gɨn zuiba, kɨ men akuragh ua me iniam.”

Hosea 14:2

Ia uamategh Ikiavɨra Itir God bagh izɨ, ofan mɨn kamaghɨn a ko mɨkɨm: “O God, nɨ bar moghɨra en arazir kuraba gɨn amadagh, egh e nɨ danɨngamin bizir aghuiba inigh. Datɨrɨghɨn e bulmakaun apuriba mɨsogh nɨn ofa damuan kogham. Puvatɨgham. Arazir aghuir e fomɨra damuasa nɨ ko akam akɨriziba, e dar amuam.

Onger Akaba 68:20

En God, a uabɨ God, an en akurvasi. Ikiavɨra Itir God, an en Ekiam, an en akurvazima, e ariaghiri puvatɨ.

Akɨnafarir Pol Romɨn Nguibar Ekiamɨn Itir Sios Bagha Osirizim 12:1

Kamaghɨn amizɨ, nan adarasi, kɨ Godɨn apangkuvir ekiam gɨnɨghnɨgha, kamaghɨn ia gakaghori: Ia uari uan inivafɨziba isɨ angamɨra itir ofan mɨn God danɨngvɨra ikɨ. Egh a baghvɨra ikɨva an ingangarim damu. Egh ia God damutɨ, a bizir kam bagh bar akuegham. Ia uari isɨ God danɨngamin arazir kam, kar guizɨn arazir Godɨn ziam fem.

Aisaia 45:17

Ezɨ Ikiavɨra Itir God, Israelian akuragha gɨfa. Egh a me damightɨ, me zurara deraghvɨra ikɨ mamaghɨra ikiam. Egh okam nɨghnɨghan kogh, aghumsɨghan kogham.

Akar Mogomem 7:10

Egha Me pamten kamaghɨn dei: “En Godɨn uan atrivir dabirabim gaperazim, ko Sipsipɨn Nguzim, aningra en akuragha en apanim abɨra. Kamaghɨn amizɨ, e aningɨn ziamning fe.”

Jon Osirizir Akar Aghuim 4:22

Ia Samariaba, ia fozir puvatɨzir God, ia an ziam fe. Ezɨ e Judaba e fozir God, e an ziam fe. E fo, Godɨn gumazamizibar akurvazir ingangarim, a faragh Judabar agharimɨn ikegh egh gɨn gumazamizir igharaziba bagh mangam.

Jeremaia 33:11

Egh me navir aghuimɨn ikɨva, bar akuegh poroghamiba uarir ikiamin isabar amuam. Egh gumazamiziba na mɨnabir ofaba inigh Ikiavɨra Itir Godɨn Dɨpenimɨn izam. Egh me ofaba inigh izɨ, kamaghɨn ighiaba bangam: “Ikiavɨra Itir Godɨn Gavgaviba Bar Itim bar deravɨra e gami. A zurara bar en apangkufi. Kamaghɨn, e a mɨnamam. “Dughiar kamɨn, kɨ Ikiavɨra Itir God, kɨ nguazir kam damightɨ a fomɨra ikezɨ moghɨn ua deravɨram otogham.

Jopɨn Akɨnafarim 22:27

Nɨ God ko mɨkɨmtɨ, a nɨ baragh egh bizir nɨ an azangsɨziba nɨ danɨngam. Egh nɨ God ko akam akɨrizir bizibar amusɨ bar akuegham.

Jenesis 35:3

Egh e nguibar kam ategh Betelɨn mangam. Eghtɨ kɨ God bagh ofa damuamin danganitamɨn ingaram. Godɨn kam, kɨ osɨmtɨzibar aven itir dughiamɨn, a nan akura. Ezɨ kɨ managh zui, a na ko zurara iti.”

Aposel 4:12

“Nguazir kamɨn gumazitam en akuraghan kogham, bar puvatɨ. Iesusɨn ziamra e akurvazir aghuim iniam. A uabɨra, en Akurvazir Gumazim.”

Onger Akaba 107:22

Me a mɨnamamin ofabar amuva, an amizir bizir aghuibar gun gumazamizibav kɨmsɨ bar akongegh onger akabar amu.

2 Samuel 15:7

Azenir 4pla gɨvazɨma, Apsalom ghua kamaghɨn Atrivim Devit mɨgei, “Ga uaning, nɨ na teghtɨma kɨ uamategh Hebronɨn mangɨ, akar dɨkɨrɨzir kɨ Ikiavɨra Itir God gamizir mam damightɨ, an otoka.

Godɨn Araziba 23:18

Ia uaghan, tuavir amizim o tuavir gumazimɨn arazir kam damighɨva arazir kamɨn dagɨaba inigh, egh gɨn dagɨar kaba isɨ uan akar dɨkɨrɨzir Ikiavɨra Itir God ko amizim, anekɨrsɨ izɨ, Ikiavɨra Itir God, ian God, an Dɨpenimɨn aven mangan markɨ. Bar guizbangɨra, Ikiavɨra Itir God, ian God arazir kam ko an dagɨaba, sara bar dar aghua.

Onger Akaba 27:1

Ikiavɨra Itir God, a nan angazangarim ko nan Akurvazir Gumazim. Ezɨ kɨ gumazitamɨn atiatingan kogham. Ikiavɨra Itir God, a dɨpenir gavgavimɨn mɨn na modogha na geghuva nan garima, kɨ atiatir puvatɨ.

Onger Akaba 95:2

E an boroghɨra mangɨ a mɨnabɨva, pamten dɨm ighiabar amu an ziam fɨ bar akuegham.

1 Samuel 12:21

Egh ia gavgaviba puvatɨzir asebar gɨn mangan markɨ. Da guizbangɨra pura bizir kɨniba, eghtɨ osɨmtɨzibar dughiabar me ian akuragh ua ia inighan kogham. Bar puvatɨgham.