Jona 2:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Kɨ ongarimɨn itir mɨghsɨaba bar dar apengan iraghu. Danganir kurar kam bar nan suiragha bar na ikiagharɨki. Ezɨ Ikiavɨra Itir God, nɨ nan God, nɨ uam na ini. Ezɨ kɨ danganir kuram ategha angamɨra nɨ ko iti.

Jona 2:6 ပူးပေါင်းရင်းမြစ်များ

Onger Akaba 30:3

O Ikiavɨra Itir God, kɨ atam aremeghai, ezɨ nɨ na gamizɨ kɨ ua dɨkafi. Kɨ Gumazamizir Oveaghuezibar Nguibamɨn ghugha gɨfa. Ezɨ ikɨrɨmɨrir kɨ itir kam, nɨ ua na ganɨngi.

Onger Akaba 16:10

Kɨ fo, nɨ na ateghtɨ kɨ Gumazamizir Oveaghuezibar Nguibamɨn magɨran kogham. Nɨ gumazir ua baghavɨra inabazim ateghtɨ, a mozir konimɨn ikɨ kurighan kogham.

Aisaia 38:17

Ezɨ osɨmtɨzir ekiar na bativiba, kɨ dar gara fo, da nan akurvaghasa otifi. Ezɨ datɨrɨghɨn, nɨ bar moghɨra nan arazir kuraba gɨn amadagha gɨfa. Nɨ bar moghɨra na gifuegha nan amamangatɨzir puvatɨzɨ, kɨ Gumazamizir Oveaghuezibar Nguibamɨn ghuzir puvatɨ.

Habakuk 3:6

A ghua tuzɨ dughiamɨn, nguazim bar moghɨra ivazvasi. Egha a ghua kantribar gumazamizibar garir dughiamɨn, me atiatiava agoa puvɨra nɨsi. Egha a fomɨra itir mɨghsɨar ekiar bar gavgavibagh amizɨ, da pura dɨpɨra uaghiri. Egha a mɨghsɨar muziarir a fomɨra isɨn aruizibagh amizɨ, da isɨvagha uaghiri.

Aisaia 40:12

Gumazitam ongarim tuisɨghasa uan dafarimɨn bar a tuigha an suirazir puvatɨ. Gumazitam overiamɨn arozim gɨfoghasa uan dafarim onegha an suiragha an abarazir puvatɨ. Gumazitam nguazir mɨnezim tuisɨghasa uan itarim inigha bar moghɨram a tuizir puvatɨ. Gumazitam, mɨghsɨar ekiaba ko dozibar osɨmtɨzibar dɨbobonim gɨfofoghasa, uan skel inigha da medir puvatɨ.

Onger Akaba 143:7

O Ikiavɨra Itir God, nan nɨghnɨzir gavgavim iraghu. Nɨ nan dɨmdiam baragh. Nɨ uabɨ nan mongan markɨ, kɨ ti ovegh mangɨ oveaghuezibar nguibamɨn mangɨgham.

Onger Akaba 104:8

Ongarim mɨghsɨaba bar da ategha afora danganir zaribar uaghire. Egha danganir ongarim ikiasa nɨ inabazir kamɨn, a datɨrɨghɨn an ikia kamaghɨra iti.

Onger Akaba 104:6

Nɨ ongarim atɨzɨ a ikia inimɨn mɨn nguazim avara. Ezɨ dɨpar kam mɨghsɨaba bar ada avara.

Onger Akaba 65:6

Nɨ uan gavgavimɨn mɨghsɨabagh amizɨ, da otivigha uan danganibara iti. Nɨn gavgavir kam bar moghɨram ekefe.

Onger Akaba 55:23

O God, gumazir gumazibav sozi me ariaghɨriba ko, gumazir ifariba, me uan igiabara ikɨvɨra ikɨtɨ, nɨ me batueghtɨ me mozir bar konimɨn magɨrɨgh bar ovengegh. Eghtɨ kɨ uabɨ nɨghnɨzir gavgavim nɨn ikɨ mamaghɨra ikiam.

Onger Akaba 30:9

Kɨ oveghtɨ bizir aghuir tizitam otogham? Kɨ ti dagɨar torimɨn magɨrɨghtɨ, bizir kam tinan akuragham? Gumazamizir oveaghueziba me ti ua nɨn ziam fam? Me ti ua dɨkavigh mɨkɨm suam, nɨ me mɨkemezɨ moghɨra zurara nɨ me bagha deragha bizibagh ami? Bar puvatɨgham.

Jopɨn Akɨnafarim 33:28

A ua nan ikɨrɨmɨrim givese, ezɨ kɨ Oveaghuezibar Nguibamɨn ghuzir puvatɨ. Kɨ angamɨra ikiavɨra iti, egha aruemɨn angazangarimɨn gara bar akonge.’

Jopɨn Akɨnafarim 33:24

Eghtɨ enselɨn kam, gumazir kamɨn apangkuvigh kamaghɨn Godɨn azangam, ‘Nɨ gumazir kamɨn apangkuvigh, aneteghtɨ an Oveaghuezibar Nguibamɨn mangan markɨ. Kɨ uam a givezamin tuavim batogha gɨfa.’

Godɨn Araziba 32:22

Eghtɨ nan anɨngagharim dughiar kamɨn avimɨn mɨn isiva, nguazir kamɨn itir biziba bar adar isigham. Egh avim Gumazamizir Oveaghuezibar Nguibamɨn bar nguazimɨn apengan magɨrɨgh, dagɨar bar ekiar mɨghsɨaba dagh isɨn apiaghav itibar isigham.

Matyu 16:18

Ezɨ kɨ nɨ mɨgei, nɨ Pita. Egh dagɨar kam gisɨn kɨ uan siosɨn ingaram, eghtɨ Ovevemɨn Gavgavim an suiragh anepɨrighɨva a gasɨghasighan kogham.

Onger Akaba 18:5

Ovevem bar na inizɨ kɨ Gumazamizir Oveaghuezibar Nguibamɨn magɨrasava ami. Mati me nan suighasa azuazim agurazɨ, a nan suighasa iti.

Onger Akaba 116:3

Kɨ faragha aremeghasava amima, ovevem benimɨn mɨn na ikezɨ kɨ iti. Kɨ Gumazamizir Oveaghuezibar Nguibam gɨnɨghnɨgha atiatia egha navim bar osemeghavɨra iti.

Aisaia 38:10

Kɨ kamaghɨn uabɨ gɨnɨghnɨgha ghaze, kɨ ti uan igiamram aremegh nguazir kam ategham. Egh mangɨ Gumazamizir Oveaghuezibar Nguibamɨn ikiam.

Esekiel 26:20

Kɨ nɨn amadaghtɨ, nɨ Oveaghuezibar Nguibamɨn magɨrɨ gumazamizir bar fomɨra ikeziba ko ikiam. Kɨ nɨ damightɨ, nɨ nguazimɨn apengan magɨrɨ nguibar ekiar kɨ asɨghasɨghiziba ko zurara ikiam. Bizir kam bangɨn, gumazitam ua nɨn danganimɨn ikian kogham. Eghtɨ nɨ ua nguazir kamɨn nguibar aghuitamɨn mɨn otogham kogham.

Esekiel 31:14

Kamaghɨn amizɨ, datɨrɨghɨn ikegh mangɨva temer deravɨra dɨpam isava aghuir ruaribagh amiba, ua puvatɨgham. Temeba bar arɨghiram, mati gumazamiziba ariaghira ghua Oveaghuezibar Nguibamɨn iti.

Onger Akaba 69:2

Kɨ beghneazim itir dɨpamɨn suegha uaghiri. Kɨ tugh gavgavighamin nguazir gavgaviba puvatɨ. Kɨ dɨpar konimɨn arua zuima, dɨpam bar na avaraghasava ami.