Joel 2:27 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁷ Kamaghɨn amizɨ, ia Israelia, ia fogh suam, Kɨ ian tongɨn iti. Kɨ Ikiavɨra Itir God, ian God, ezɨ godɨn igharazitam nan mɨn itir puvatɨ. Eghtɨ ikɨzir igharazibar gumazamiziba, me ia damutɨ, ia uam aghumsɨghan kogham.”

Joel 2:27 ပူးပေါင်းရင်းမြစ်များ

Sefanaia 3:17

Ikiavɨra Itir God, a ian God, a ia ko iti. An gavgavim ian akurazɨ, ia mɨdorozimɨn uan apaniba abɨra. A ia bagha bar akongegh ighiabar amuam. Mati gumazamiziba uari akuva Godɨn ziam fa onger akabagh ami moghɨn, a ia bangɨn pamtem ongam. Guizbangɨra a bar ia gifonge, ia kamaghɨn nɨghnɨzir kam damutɨ, a mɨgɨrɨgɨabagh asagham.

Aisaia 45:5

Kɨ uabɨra, kɨ Ikiavɨra Itir God, ezɨ ua godɨn igharazir tam itir puvatɨ. Kɨ uabɨra iti, ezɨ ua godba bar puvatɨ. Nɨ na gɨfozir puvatɨ, ezɨ kɨrara kɨ gavgavim nɨ ganɨdi.

Joel 3:17

A kamaghɨn mɨgei, “Dughiar kamɨn ia Israelia fogham, kɨrara kɨ Ikiavɨra Itir God, ian God. Saion, nan mɨghsɨamra, kɨ danganir kamɨn iti. Kɨ Jerusalem damightɨ, a nan nguibar ekiamra ikiam, eghtɨ azenan itir darazi uam an aven mangan kogham.

Esekiel 39:28

Eghtɨ Israelia kɨ me gamizir bizibagh nɨghnɨgham. Kɨ me amadazɨ me ghua kantrin igharazibar kalabusɨn mɨn itima, kɨ ua me akuvagha me inigha men nguazimɨn ize. Kɨ men tav ateghtɨ, a kantrin kabar aven ikɨvɨra ikian kogham. Eghtɨ me kamaghɨn fogham, kɨ Ikiavɨra Itir God, men God.

Joel 2:26

Ia dagher avɨribar amɨ, egh bar izevegham. Kɨ dɨgavir kuram gamir arazir aghuir avɨriba ia bagha dagh ami. Eghtɨ ikɨzir igharazibar gumazamiziba, me nan gumazamizibar amutɨ, me uam aghumsɨghan kogham. Eghtɨ kamaghɨn, ia Ikiavɨra Itir God, ian God, ia an ziam fam.

Onger Akaba 46:5

God Nguibar kamɨn aven iti, ezɨ Nguibar kam ikuvighan kogham. Amɨnim tɨghar tisɨ damutɨ, God an akuragham.

Godɨn Araziba 23:14

Ikiavɨra Itir God, ian God, zurara ia ko ia itir danganimɨn ikɨ, egh ian akurvaghtɨ ia uan apaniba abɨnam. Kamaghɨn, ia itir danganim Godɨn damazimɨn zurara zuegh ikɨ. Ia Godɨn damazimɨn bizitam damightɨ a Godɨn damazimɨn mɨzeghtɨ, Ikiavɨra Itir God akɨrim ragh ia gasaragham.”

Aisaia 12:6

O Saionɨn Mɨghsɨamɨn itir gumazamiziba, ia fo, Israelian Godɨn Bar Zuezim, a ian tongɨn ikia ingangarir ekiabagh amua, ziar bar ekiam iti. Kamaghɨn amizɨ, ia pamten dɨmɨva arang bar akuegh onger akabar amu.

Akar Mogomem 21:3

Ezɨ kɨ orazi, tiarir mam atrivir dabirabimɨn iza pamtem mɨgei: “Ia orakigh. Datɨrɨghɨn God gumazamiziba ko ikiavɨra iti! Egh men tongɨn ikɨtɨ me an gumazamizibar ikiam. God uabɨ me ko ikɨ egh men Godɨn ikiam.

1 Pita 2:6

Godɨn Akɨnafarim ghaze: “Ia gan. Kɨ dagɨar aghuir mam amɨsevezɨma a bar pɨn ko. Ezɨ kɨ datɨrɨghɨn Saionɨn Mɨghsɨamɨn dagɨar kam arɨsi. Ezɨ a Dɨpenim aterir dagɨamɨn mɨn oto. Eghtɨ gumazamizir nɨghnɨzir gavgavim an itiba, me aghumsɨghan kogham.”

Onger Akaba 68:18

God mɨghsɨar kamɨn ikiasa bar pɨn ghuavanaga, kalabuziar gumazir avɨrim inizɨ, me a ko ghue. Gumazir an akam batoziba, a men bizir bar aghuiba, me dam a da ini. Kamaghɨn amizɨ, O Ikiavɨra Itir Godɨn Gavgavim, nɨ kagh ikiam.

2 Korin 6:16

Manmaghsu, e Godɨn Dɨpenim ko marvir guabar dɨpeniba isafuragham? God fomɨra kamaghɨn mɨgei, “Kɨ me ko ikɨ, egh men tongɨn daruam. Eghtɨ me nan gumazamizibar mɨn ikɨtɨ, kɨ men Godɨn ikiam.” Kamaghɨn amizɨ, ia fo, e uari Godɨn zurara itimɨn dabirabir Dɨpenim.

Esekiel 39:22

Egh dughiar kamɨn ikegh mangɨ dughiaba bar, Israelɨn ikɨzim kamaghɨn deragh fogham, Kɨ Ikiavɨra Itir God, kɨ men God.

Aisaia 53:6

Guizbangɨra, e bar moghɨra sipsipbar mɨn tintinibar arua, vaghvagha uan ifongiabar gɨn arui. Ezɨ Ikiavɨra Itir God, en arazir kuraba ikarvaghsɨ pazavɨram e damuan fɨrɨn, a kamaghɨn amizir puvatɨ. A uan ingangarir gumazim gamizɨ, a en danganim inizɨ, e iniamin mɨzaziba, an ada isa a ganɨngi.”

Aisaia 45:18

Ikiavɨra Itir God, anarɨra God. A nguazim ko overiamɨn ingarizɨ, aning gavgavighavɨra iti. Nguazim pura ikiasa God an ingarizir puvatɨ. Biziba ko gumazamiziba bar moghɨra nguazimɨn ikiasa, an an ingari. Egha a ghaze, “Kɨrara, kɨ Ikiavɨra Itir God, ezɨ ua godɨn tam ua itir puvatɨ.

Aisaia 44:8

Nan gumazamiziba, ia nɨgh akongɨva atiatingan markɨ. Bizir otivamin kaba, kɨ fomɨra dar gun ia mɨkemegha gɨfa. Ezɨ ia uan damazibar dar ganigha na gɨfo, egh kotɨn aven ia nan gun mɨkɨm. Godɨn tam ua itir puvatɨ! Bar puvatɨ. Kɨ uabɨra kɨ ian dagɨar ekiamɨn mɨn itima, ia nan aven uari modi. Kɨ bizir kam bar a gɨfo, a bar guizbangɨra!

Aisaia 45:6

Kɨ kamaghsua, nguazir kamɨn gumazamiziba, me aruem anadir naghɨn ikia ghua aruem ghuaghiri naghɨn tu, me bar moghɨra fogh suam, kɨrara kɨ Ikiavɨra Itir God, ezɨ ua godɨn tam itir puvatɨ. Kamaghɨn amizɨ, kɨ bizir kabagh ami.

Aisaia 49:23

Atriviba ko atrivir amiziba uan boribar gari moghɨn, nɨn boribar ganam. Me nɨn ziam fɨsɨ, nɨn suemningɨn boroghɨn uan teviba apɨrigh, dapaniba avigh nguazim ginivigham. Eghtɨ nɨ fogh suam, kɨ uabɨra, kɨ Ikiavɨra Itir God. Gumazamizir nɨghnɨzir gavgavim nan ikia, nan akurvazim bagha mɨzua itiba, me na mɨzuam ikɨ aghumsɨghan kogham.”

Esekiel 37:6

Kɨ agɨriba ko tuziba ia darɨgh, egh mɨkarzir inimɨn ian agɨriba ko tuzir kaba avegham. Egh kɨ ia damightɨ ia gumazamizibar mɨn otivightɨ, kɨ amɨnim ia danightɨ ia angamɨra ikiam. Eghtɨ ia deraghvɨra fogh suam, kɨ uabɨ kɨ Ikiavɨra Itir God.”

Sefanaia 3:11

“Nan gumazamiziba, ia guizbangɨra nan akam batoke. Eghtɨ kɨ bizir kabar amutɨ da otivamin dughiamɨn, ian tongɨn itir gumazir uari fa akaba batoziba, kɨ bar me batuegham. Eghtɨ ia Jerusalemɨn ikiam, kar nan mɨghsɨam, egh ia ifaghatɨ ua nan akaba batoghan kogham. Kamaghɨn amizɨ, ia uamategh Jerusalemɨn izeghɨva, nɨ ua uan arazir kurabagh nɨghnɨgh aghumsɨghan markɨ.

Dɨboboniba 11:29

Ezɨ Moses a ikaragha ghaze, “Gumazitam ti nan danganim inian nɨ aghua? Nan ifongiam kamakɨn, Ikiavɨra Itir God, uan Duam isɨ bar uan gumazamizibar anightɨ, me akam inigha izir gumazibar mɨn akam akunam!”

Dɨboboniba 23:21

Kɨ garima, Israelia bativamin araziba, dar tam me damutɨ me bar ikuvighan kogham. Bar puvatɨgham. Ikiavɨra Itir God, men God, a me ko iti. Me kamaghɨn an gun mɨgei, a men Atrivim.

Aghuzir Akaba 1:23

Ia oragh! Kɨ akar gavgavimra ia mɨgei, ia uan arazir kuraba atakigh. Kɨ ian sure damuva egh nɨghnɨzir aghuiba ia danɨngam, eghtɨ ia nan akamɨn gɨn mangɨ.

Aisaia 44:3

Kɨ mati gumazim dɨpam isɨ nguazir dɨpaba puvatɨzibagh ingɨva, egh dɨpam damightɨ, a nguazir mɨdiaribar ivemaram. Kamaghɨra, kɨ uan Duam isɨ ian boribagh ingɨva, ian ovavir boriba deragh me damuam.

Aisaia 46:9

Egha kɨ fomɨram amizir biziba, ia ua dagh nɨghnɨgh. Kɨ uabɨra kɨ God, ezɨ ua godɨn tam ua itir puvatɨ. Kɨ uabɨra kɨ God, ezɨ ua godɨn tam nan mɨn itir puvatɨ.

Esekiel 39:29

Kɨ uan Duam isɨ Israelɨn ikɨzim gingegham, egh uam akɨrim ragh me gasaraghan kogham. Kɨ Ikiavɨra Itir Godɨn Ekiam, kɨ kamaghɨn mɨkeme.”

Sekaraia 2:9

Kɨ uabɨ ivezir kuram me danɨngasava ami, eghtɨ gumazamizir me abɨrazɨ men ingangarir gumazir kɨnibar ikeziba, me dɨkavighɨva, uan apaniba pazavɨra me damuva me da men biziba iniam.” Bizir kam otoghtɨma, me bar fogh suam, Ikiavɨra Itir Godɨn Gavgaviba Bar Itim, na amada.