Joel 2:23 - Godɨn Eghaghanim: Akar Gavgavir Dɨkɨrɨzir Ghurim ko Igiam

²³ “Ia nan damazimɨn deraghasa, kɨ ian akurvagha amozir avɨriba ia ganɨdi. Amozir dughiabar iakɨnir faragha zuiba, kɨ amoziba ia ganɨga, egha uaghan amozir dughiabar gɨn izir iakɨniba, kɨ amoziba ia ganɨdi. Kamaghɨn amizɨ, ia Saionɨn gumazamiziba, ia bar akongegh. Kɨ Ikiavɨra Itir God, ian God, kɨ ian akurvaghasa amizir biziba, ia da bagh bar akongegh.

Joel 2:23 ပူးပေါင်းရင်းမြစ်များ

Filipai 4:4

Ia Ekiam ko porogh ikɨ egh zurara bar akongegh. Kɨ ua mɨgei, ia bar akongegh.

Ofa Gami 26:4

eghtɨ kɨ amozim damutɨ, a uan izir dughiamra izam. Eghtɨ kɨ ian daghebar amutɨ, da deraghvɨra ian nguazimɨn otivtɨ, temeba bɨva ovɨzir avɨriba ikiam.

Hosea 6:3

E Ikiavɨra Itir God gɨfoghsɨ, bar puvɨra ingaram. E fo, mɨzarazibar, aruem zuraram anadi. E fo, aruem garir dughiaba gɨvaghtɨ, amozir dughiabar, amoziba nguazim giri. Kamaghɨra, e fo, Ikiavɨra Itir God izɨva deravɨra e damuam.”

Godɨn Araziba 11:14

Egh ia kamaghɨn damutɨ, an amozim amadaghtɨ amozim izamin dughiabar a izam. Azeniba oparir dughiam ko dagheba asir dughiam sara amozim izam. Eghtɨ ia dagheba ko wain ko, olivɨn boreba izɨvagham.

Aisaia 41:16

Ia osɨmtɨzir kaba isɨ pɨn da akunam, mati gumazim nguazir mɨnezim ruegha pɨn anekunizɨ, amɨnim a givaragha ghu. Egh ia Ikiavɨra Itir God bagh bar akuegham. Egh ia Israelian Godɨn Bar Zuezimɨn ziam fam.

Onger Akaba 149:2

Ia Israelia, God ian ingari, ezɨ ia an bizir kam bagh bar akongegh. Ia Saionɨn nguibamɨn gumazamiziba, ia uan atrivim bagh bar akongegh.

Filipai 3:1

Nan adarasi, kɨ uan mɨgɨrɨgɨam agɨvasa kamaghɨn ia mɨgei, ia Ekiam ko poroghav ikɨ, egh ia bar akongegh. Kɨ fo, kɨ faragh osirizir akaba, da ian akurvasi. Kamaghɨn, kɨ ua ia bagha akar kabara osiran amɨrazir puvatɨ.

Sekaraia 10:1

Dagheba aghungamin dughiamɨn, ia amozim bagh Ikiavɨra Itir Godɨn azangsɨgh. Ikiavɨra Itir God overiar pɨzim ko, ghuariam akuvima, amozim izi, ezɨ dagheba ko, biziba aghui.

Onger Akaba 28:7

Ikiavɨra Itir God uabɨ gavgavim isa na ganɨga, nan oramɨn mɨn ikia na modi. Ezɨ kɨ nɨghnɨzir gavgavim an iti. A nan akurvagha na gamima, kɨ uan navir averiamɨn, a bagha bar akuegha onger akabagh amua a mɨnabi.

Aisaia 30:23

Eghtɨ Ekiam ia oparizɨ dagher ovɨziba bagh amozim amadaghtɨ, a izighirɨ da ruam, eghtɨ da deravɨra nguazir kamɨn otivam. Eghtɨ ia dagher avɨriba ikiam. Eghtɨ ian bulmakauba uaghan damamin grazir avɨriba ikiam.

Godɨn Araziba 32:2

O Israelia, kɨ kamaghsua, kɨ uan akamɨn ian sure damuam. Mati, amozim deraghavɨra ira grazibagh izima, da otifi. Egha mati mɨzarazimɨn ghuariam ira daghebagh amima, da otiva aghua gavgafi.

Godɨn Araziba 28:12

Amozim Ikiavɨra Itir Godɨn agharimɨn iti, ezɨ an an dughiamra anemadaghtɨ a izighiram. Eghtɨ a ian ingangaribar amutɨ da deraghvɨram otivam. Eghtɨ ia ikɨzir igharaziba, men adarazir amamangatɨghtɨ, me pura ia da biziba inigh gɨn ua da ikarvagham. Eghtɨ ia bizir bar avɨriba ikiam, kamaghɨn amizɨ, ia igharaziba da pura biziba inian kogham.

Filipai 3:3

Erara guizbangɨn mɨkarzir mogomebar iniba aghorir arazimɨn gɨn zuir darasi. Ezɨ me puvatɨ. Erara Godɨn Duamɨn akurvazimɨn uari isa God ganigha Krais Iesus ko poroghav ikia bar akonge. E fo, arazir gumaziba uan mɨkarzibar amiba, da tong men akuraghan kogham, ezɨ e nɨghnɨzir gavgavim dar itir puvatɨ. Kamaghɨn amizɨ, e fo, erara guizbangɨn mɨkarzir mogomebar iniba aghorir arazimɨn gɨn zuir darasi.

Sekaraia 10:7

Israelian gumazamiziba me mɨdorozir gumazir gavgavibar mɨn otivigh bar akuegham, me mati gumaziba wainɨn dɨpaba ame. Eghtɨ men ovavir boriba gɨn otivigh, kɨ Ikiavɨra Itir God, me gamizir bizir aghuir kabagh nɨghnɨgh bar akuegham.

Jeremaia 5:24

Kɨ Ikiavɨra Itir God, ian God. Ezɨ ia nan apengan ikian aghua. Egha ia kamaghɨn nɨghnɨzir puvatɨ, kɨ uabɨ azeniba oparir dughiam ko dagheba asir dughiamɨn, amozim amadi, a izi. Egha kɨ uabɨ daghebagh amima da uan dughiamram otivima, ia azenibar, vaghvagha zurara da isi.

Onger Akaba 104:34

A na gamima, kɨ bar akonge. Kɨ kamaghsua ifonge, a nan onger akabagh ifuegham.

Jeremaia 3:3

Ezɨ bizir kam bangɨn, kɨ amozimɨn tɨvazɨma, a tong ian nguazim gizezir puvatɨ. Ezɨ ia tuavimɨn amizimɨn mɨrarama amua, akam baraghan aghuagha, aghumsɨzir puvatɨ.

Aisaia 61:10

Godɨn ingangarir gumazim ghaze: Kɨ uan Ikiavɨra Itir God bagh bar akongegham. Guizbangɨra, a nan akurazɨ, an arazir aghuim mati korotiar ruarim na avara, egha mati gumazim amuimɨn ikiasa deragha kurke, egha mati amizim pamɨn ikiasa deragha kurke. Kamaghɨn amizɨ, an navir averiamɨn aven itir bar akongezir arazim bar na gizɨfa.

Aisaia 30:21

Egh ia daruamin dughiamɨn tuavimɨn atamakuigh, ia ti tuavir agharir guvimɨn amadaghan itimɨn mangam, o agharir kɨriamɨn amadaghan itimɨn mangam, eghtɨ a ian gɨn ikɨ ia mangamin tuavim ia mɨkɨmam.

Aghuzir Akaba 16:15

Atrivim navir aghuim ikɨ egh gumazitam gakuegham, a deraghvɨra gumazir kam damutɨ, gumazim deraghvɨra ikiam. Ezɨ atrivimɨn arazir kam, mati ghuariam amozimɨn akua iza, daghebagh amima da ani.

Onger Akaba 32:11

Ia gumazamizir arazir aghuibagh amiba, Ikiavɨra Itir God ia bagh amizir biziba, ia da bagh naviba deragh bar akongegh. Ia Godɨn damazimɨn zuezir gumazamiziba, ia bar pamten dɨm mɨkɨm bar akongegh.

Jopɨn Akɨnafarim 33:23

“Eghtɨ Godɨn enselɨn bar avɨrimɨn tongɨn enselɨn tam izɨ, gumazir kamɨn akuragh, egh arazir aghuir a damuamimɨn gun a mɨkemegham.

Sekaraia 9:9

Ia Saionɨn nguibar ekiamɨn itir gumazamiziba, ia bar akongegh! Ia Jerusalemɨn itir gumazamiziba, ia bar tiariba akar pamtemɨn dɨm. Ia gan, ian atrivim mara ia bagha izi! A ziar ekiam ikiava mɨdorozim gamuava uan apaniba abɨri. Egha a uabɨ uan ziam fer puvatɨ. A gumazir kɨnir ziaba puvatɨzir mamɨn mɨn donkin mam gaperagha izi. Kar donkin amebamɨn nguzir asem.

Amos 4:7

“Dughiar kamɨn, ian azenibar dagheba tɨghar aghungamin iakɨnir 3pla ikiavɨra iti, ezɨ kɨ amozimɨn anogoroke. Kɨ amozim gamizɨ, a nguibar mabar ize, egha nguibar mabar puvatɨ. Kɨ amozim gamizɨ, an azenir mabagh ize, ezɨ azenir maba amoziba puvatɨgha bar mɨsɨngi.

Sekaraia 9:13

Judaba, kɨ uan barir pimɨn mɨn men suiragh, egh Efraimɨn adarasi, kɨ uan barir afuzibar mɨn men suiragham. Eghtɨ Saionɨn gumaziba me mati mɨdorozir sabam, eghtɨ kɨ Grikba ko mɨsogham.

Aposel 14:17

Egha a ian modozir puvatɨ, eghtɨ gumazamiziba a gɨfoghan kogham. Puvatɨ. A zuraram arazir aghuibar ia gamua, amozim ia ganɨga, dagher aghuir avɨriba ia ganɨga, dagher aghuibagh ami da otifi. Egha ia gamima ian naviba deragha bar akonge.”

Onger Akaba 84:6

Me dɨpar atuir dɨpaba puvatɨzibar zui. Danganir kamɨn ziam Temeriba Itir Danganir Zarim. Me mozir dɨpaba danganir kamɨn dagh amizɨ da otifi. Mɨzarazibar amoziba izima mozir dɨpar kaba izefi.

1 Atriviba 8:36

nɨ uan Nguibamɨn ikɨ, e Israelia, nɨn ingangarir gumazamiziba, en azangsɨziba baragh, en arazir kuraba gɨn amang. Egh nɨ uan arazir aghuibar en sure damu. Egh amozim amadaghtɨ a nguazir nɨ fomɨra e ganɨngizim girɨ.

Jopɨn Akɨnafarim 37:13

God kamaghsua amozim amadi, dughiar maba a gumazamizibar arazir kuraba akɨrasa, egha dughiar maba, a men apangkuva arazir aghuim me damuasa.

Onger Akaba 147:8

An overiamɨn ghuariaba arɨghizɨ, amozim nguazimɨn izaghirava, mɨghsɨabagh izima graziba dar otifi.

Esekiel 34:26

“Kɨ deravɨra uan gumazamiziba ko nguazir nan mɨghsɨam avɨnizibar amuam. Egh amozir dughiamɨn, kɨ amozir avɨribar amutɨ da nguazim girɨ a damightɨ a bar deragham.