Joel 2:11 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹¹ Ikiavɨra Itir God uan mɨdorozir gumaziba Akar Gavgavim me ganɨdi, ezɨ an mɨgɨrɨgɨaba mati ararim dagarvasi. An mɨdorozir gumaziba bar avɨraseme, eghtɨ gumazitam me dɨponɨva avegham. Ikiavɨra Itir God Izamin Dughiar Ekiam, gumazamizibar amutɨ, me bar atiatigham. Eghtɨ tinara dughiar kamɨn aven mangɨ ikuvighan kogh, deravɨra ikiam? Ti puvatɨgham.

Joel 2:11 ပူးပေါင်းရင်းမြစ်များ

Malakai 3:2

Eghtɨ dughiar a izamin kam, tinara an kotiamɨn aven guizbangɨra mɨkɨmam? Eghtɨ an azenaram otogh izamin dughiar kam, tinara tugh an ganam? Bar puvatɨgham. Guizbangɨra, a mati, avim bar puvɨra isia golɨn isigha bizir kuraba bar da adangizɨ moghɨn, a izam. Egh mati, sopɨn gavgavir inir mɨzɨrɨzim rutɨ a bar zueghamimɨn mɨn ganam.

Nahum 1:6

An anɨngazir dughiam, tina deravɨra ikɨ ikuvighan kogham. Bar puvatɨgham. A gumazamizibar anɨngagha, an damazimning mati avim isiava aghefe, An anɨngagharim, dagɨaba mɨsaragharɨsi.

Akar Mogomem 18:8

Amizir kam Babilon, uan ziar gavgavim fe, kamaghɨn amizɨ, dughiar bar otevir vamɨran, bizir bar kuraba bar a bativam. Bizir kaba, arɨmariar ekiaba ko osɨmtɨzir ekiaba a bativtɨ an azitɨma, mɨtiriar ekiaba an agham. Eghtɨ avim an isigham. Ekiam God an araziba tuisɨgha gɨvagha ghaze, ‘A ikuvigham.’ Godɨn kam gavgavir ekiam iti. Kamagh amizɨ, bizir kurar avɨriba dughiar vamɨra bar moghɨram a bativam.”

Akar Mogomem 6:17

E fo, aningɨn anɨngagharimɨn dughiar ekiam datɨrɨghɨn otozɨ aning gumazamizibar arazir kuraba ikarvaghasa. Eghtɨ gumazitam aningɨn anɨngagharim iriagh, angamɨra ikian kogham!”

Joel 3:16

Ikiavɨra Itir God, Jerusalemɨn aven Saionɨn Mɨghsɨamɨn pamtemɨn deima, an dɨmdiam mati ararim dagarvasi, ezɨ overiam ko nguazim nɨsi. Ezɨ God uan gumazamizibagh eghufi, eghtɨ me ikuvighan kogham. A Israelian mogomer danganimɨn mɨn iti.

Jeremaia 30:7

Iavzika! Dughiar bar kurar mam otivasava ami. Egha dughiar kam bar dughiar kurar maba bar adagh afira. Nan gumazamiziba, Israelia, me dughiar kamɨn osɨmtɨzir bar ekiam iniam. Eghtɨ kɨ ua me iniam.”

Onger Akaba 46:6

Kantrin avɨribar gumazamiziba dɨgavir kuram damigh uarira uariv sogham. Eghtɨ atriviba uan gumazamiziba ko bar iregham. Eghtɨ Godɨn tiarim ararimɨn mɨn dagaraghtɨ, nguazim puram ameregh magɨram.

Amos 5:20

Ikiavɨra Itir God Izamin Dughiar Ekiamɨn, amɨnim bar mɨtategham. Eghtɨ angazangarim an ikian kogham. Bar puvatɨgham.

Joel 1:15

Bar guizbangɨra, dughiar kuram kɨran oveghangɨn otivam, kar Ikiavɨra Itir God Izamin Dughiar Ekiam. Kar Godɨn Gavgaviba Bar Itim, uan gavgavimɨn ivezir kuram gumazamizibar anɨngamin dughiam. Evzika! E uarira uarir apangkufi, dughiar kam, a bar moghɨra ikuvigham.

Jeremaia 50:34

Ezɨ men Akurvazir Gumazim, a gavgavir ekiam iti, ezɨ an ziam kara, Ikiavɨra Itir Godɨn Gavgaviba Bar Itim. A men akuragh men apaniba abɨragham. Egh a dabirabir aghuim isɨ nguazir kamɨn gumazamiziba bar me danɨngam. Eghtɨ Babilonia puvatɨgham. A me damightɨ me pazɨvɨra ikiam.

Aisaia 42:13

Ikiavɨra Itir God mati, mɨdorozir gumazir gavgavim, egha a datɨrɨghɨn mɨsoghasa zui. A tiarim akara diava mati, gumaziba mɨdorozim foreghasa mɨsoghamin arazibagh amua, mɨsoghasa gara iti. Egha a gavgavim ikia, uan apaniba ko mɨsoghasa atiatir puvatɨgha, bar me abɨni.

Aisaia 13:4

Ia mɨghsɨabagh isɨn nɨgɨnir dafar kam baragh, kar gumazir bar avɨribar nɨgɨnim. Kantrin avɨribar mɨdorozir gumaziba iza uari akufa. Ikiavɨra Itir Godɨn Gavgaviba Bar Itim, mɨsoghasa uan mɨdorozir gumaziba akufa.

Dɨboboniba 24:23

Egha Balam akar mam ua kamaghɨn a mɨkeme: “Iavzika! God arazir kabar amuamin dughiamɨn, tinara ikɨvɨra ikiam? Bar puvatɨgham.

Joel 2:31

Eghtɨ aruem mɨtarmeghtɨ, iakɨnim ghuzimɨn mɨn otogham. Bizir kaba faragh otivightɨ, gɨn Ikiavɨra Itir God Izamin Dughiar Ekiam otogham. Dughiar ekiar kam otoghtɨ, gumazamiziba bar atiatigham.

Jeremaia 25:30

“Jeremaia, kɨ nɨ ganɨngizir akaba, nɨ bar adar gun mɨkemegh. Nɨ gumazamizir kaba kamaghɨn me mɨkemegh: “ ‘Ikiavɨra Itir God uan Nguibamɨn overiamɨn ikɨva, pamtemɨn tiarim akarigh uan gumazamizibav kɨmam. A pamtemɨn nguazir kamɨn uan gumazamizibar diagham, mati gumaziba wainɨn dɨpaba otivasa wainɨn ovɨziba dɨka dei moghɨn dɨmam.

Amos 5:18

Ia bar moghɨra kamaghɨn ifonge, Ikiavɨra Itir God Izamin Dughiar Ekiam, a bar zuamɨrama otogham. Iavzika! Ia bizir aghuir manamra dughiar kamɨn an gantɨ an otivam? Ia ti ghaze, dughiar kamɨn amɨnim ti ian tiragham. Bar puvatɨ. Amɨnir bɨrim a ikɨ kamaghɨra ikiam.

Amos 1:2

Amos kamaghɨn mɨgei: “Ikiavɨra Itir God, Jerusalemɨn nguibar ekiamɨn Saionɨn Mɨghsɨamɨn iti. Egha an azenan iza pamtemɨn dɨa dagarvasi. Ezɨ grazir aghuariba ko, Karmelɨn Mɨghsɨamɨn orazimɨn itir terafariba bar mɨsɨngi.”

Joel 2:25

Kɨ uabɨ, mɨdorozir gumazibar mɨn, odezir okoruar kaba ia bagha da amangi. Maba, odezir bɨzir avɨrir mɨghagharuiba, maba, odezir febaba, maba, odezir bar ekiar bizibagh asɨghasɨziba, maba, da kunodezir biziba aghoriba, da bar izegha ian dagheba ame. Kamaghɨn amizɨ, kɨ ua da ikaragh deraghvɨra ia damuam.

Esekiel 22:14

Dughiar kɨ pazavɨra ia damuamin kamɨn, ia uan navir averiabar aven osɨmtɨzir kam aterɨva puvɨra atiatingam. Kɨ Ikiavɨra Itir God, kɨ mɨkemezɨ moghɨn, kɨ damuam.

Aisaia 7:18

“Eghtɨ dughiar kamɨn Ikiavɨra Itir God bobemɨn Isipian diaghtɨma, mɨdorozir gumazir bar avɨrim, saghon mar Isipɨn Faneba bar dar suiabar ikegh, berezir bɨzir bar avɨrimɨn mɨn izam. Egh an Asiriaba bobemɨn men diaghtɨ me aparir okoruabar mɨn izam.

1 Tesalonika 4:16

Ekiam pamtem mɨkɨmtɨ, an enselɨn faragha zuimɨn tiarim mɨkɨmtɨ, Godɨn sɨgham sara arangam. Eghtɨ Ekiamra uan nguibam ategh izighirɨtɨma gumazamizir Ekiamɨn poroghav ikiava ariaghireziba faragh ua dɨkavigham.

Joel 1:6

Odezir bɨzir ekiam, mati mɨdorozir gumazir bɨzir ekiam en kantri bar a noke. Da bar gavgavigha bar avɨraseme, ezɨ e da dɨponan ibura. Ezɨ dar atariba bar ghumi, mati laionɨn atariba. Egha mati laionɨn amebam uan atarir afuzibar asɨzibav sogha da aghoragharɨsi.

Joel 2:1

Ikiavɨra Itir God Izamin Dughiar Ekiam, a bar roghɨra izi. Kamaghɨn amizɨ, Saionɨn nguibam, a Godɨn mɨghsɨamra, ia a gisɨn ikɨ, sɨghabagh iviva dɨbɨaribar tong. Eghtɨ Judan nguazimɨn itir gumazamiziba bar nɨghɨva akong.

Joel 2:2

Ikiavɨra Itir Godɨn Dughiar Ekiar kam, a bar mɨtarmegham, eghtɨ ghuariar pɨzir avɨriba overiam apazagham. Odezir bɨzir ekiam, mati mɨdorozir gumazibar bɨzir bar ekiam, zuamɨra mɨghsɨabar otifi, mati amɨnim tiasava amua bar mɨtarmangi. Bizir kamaghɨn garitam fomɨram otozir puvatɨgha iza datɨrɨghɨn, egh bizir kamaghɨn garitam gɨn uam otivan kogham.

Joel 3:14

Gumazamizir bar avɨrim, bar avɨrasemegh kotiam bagh danganir zarir kamɨn uari akuvagham. Ikiavɨra Itir God Izamin Dughiar Ekiam, bar dughiar ovezimɨn danganir zarir kamɨn otivam. Danganir zarir kamɨn ziar igharazim, God Ivezir Kuram Gumazamizibar Anɨngasa Mɨkeme.

Obadia 1:15

Ikiavɨra Itir God ua kamaghɨn mɨgei: “Ikiavɨra Itir God Izamin Dughiar Ekiam, a roghɨra izegha gɨfa. Kar dughiar kɨ kantriba bar men gumazamizibar araziba tuisɨghamim. Ia Idomia amizir arazir kuraba, kɨ dar ia damuam. Osɨmtɨzir ia iniamim, kar arazir kurar ia amizibar ivezim.”

Onger Akaba 18:14

An onɨmaribagh amizɨ, da mati an barir aviba, an apanibagh asavamadi, ezɨ me tintinibar ara zui.

Onger Akaba 68:18

God mɨghsɨar kamɨn ikiasa bar pɨn ghuavanaga, kalabuziar gumazir avɨrim inizɨ, me a ko ghue. Gumazir an akam batoziba, a men bizir bar aghuiba, me dam a da ini. Kamaghɨn amizɨ, O Ikiavɨra Itir Godɨn Gavgavim, nɨ kagh ikiam.