Jeremaia 9:15 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁵ Kamaghɨn, kɨ Ikiavɨra Itir Godɨn Gavgaviba Bar Itim, Israelian God, kɨ ghaze, Ia gan, kɨ gumazir kabar amightɨ me osɨmtɨzir ekiaba iniam, mati me dagher akabav sozibar amam. Me bar ivezir kuram iniam, mati me imeziba itir dɨpabar amam.

Jeremaia 9:15 ပူးပေါင်းရင်းမြစ်များ

Jeremaia 8:14

Eghtɨ Judaba kamaghɨn mɨkɨmam: “Manmaghɨn amizɨ e puram apia? E uari akuvagh mangɨ nguibar ekiar dɨvazir gavgaviba itibar aven mongam. Egh e nguibar kabar aven arɨghiram. E arazir kuramɨn Ikiavɨra Itir God gami, a en God. Ezɨ a ghaze, e ovengam. A ivezir kuram e danɨngam, mati gumazir mam marasinɨn kurar gumazibagh asɨghasɨzim me danɨngtɨ me aneremam.

Onger Akaba 80:5

Nɨ e gamizɨ, e bretɨn mɨn uan temeriba apava, kavɨn temerir izɨvɨrɨzim, dɨpamɨn mɨn uarir guri.

Jeremaia 23:15

“Kɨ Ikiavɨra Itir Godɨn Gavgaviba Bar Itim, kɨ Godɨn akam inigha izir gumazir kabagh nɨghnɨgha kamaghɨn mɨgei, Jerusalemɨn itir akam inigha izir gumaziba, nan akaba barazir puvatɨ, ezɨ arazir kam bar moghɨra nguazir kam bar anevara. Kamaghɨn amizɨ, kɨ mɨzazir bar ekiam me danɨngam. Kɨ mati marasinɨn mɨsozim me ganɨga, me gamima me anepi, egha mati, kɨ me gamima me gumazamizibagh asɨghasɨzir imezir dɨpam ame.”

Akar Mogomem 8:11

Mɨkovezir kamɨn ziam kamakɨn, Marasinɨn Bar Puvɨra Mɨsozim. A dɨpar okoruar kabar mam girɨzɨ, dɨpar kaba Marasinɨn Bar Puvɨra Mɨsozimɨn oto. Ezɨ gumazamizir avɨriba dɨpar kam apima, a men navibar isizɨ me ariaghire.

Jeremaia 25:15

Ikiavɨra Itir God, a Israelian God, a kamaghɨn na mɨgei, “Jeremaia, wainɨn kavɨn kɨ suirazir kam, kar nan anɨngagharimɨn ababanim. Nɨ kavɨn kam inightɨ, kɨ nɨ amadaghtɨ, nɨ gumazamizir avɨriba bagh mangɨgh, me damightɨ, me wainɨn kavɨn kamɨn itim amɨ.

Aisaia 2:22

Ia gumazir kɨniba kamagh me gɨnɨghnɨghan markɨ, egh suam, me ian akurvagham. Puvatɨ. Me dughiar otevimra ikegh arɨmɨghiregham. Mati gumazim abuan duam suasa uabɨ gekuigha gɨfa.

Aisaia 2:17

Ikiavɨra Itir God otivamin dughiamɨn, a gumazamizir uarira uari feba bar me abɨragham, eghtɨ me bar aghumsigham. Eghtɨ marvir guaba uaghan bar gɨvagham. Eghtɨ Ikiavɨra Itir God uabɨra dughiar kamɨn ziar ekiam iniam.

Onger Akaba 75:8

Ikiavɨra Itir Godɨn anɨngagharim kamaghɨn iti. A kavɨn mamɨn suira, ezɨ wainɨn igiar gavgavir ekiam itim a gizɨfa. An a ingezɨ gumazamizir kuraba anepa bar anegɨfa. Arazir kamra, gumazamizir kuraba Godɨn kotɨn otivigh, egh bar gevegham.

Onger Akaba 69:21

Mɨtiriam nan azima, me aguiam daghem gatɨgha na ganɨngi. Ezɨ kuarim nan pɨrima, me pura wainɨn kuram amasa na ganɨngi.

Onger Akaba 60:3

E nɨn gumazamiziba, nɨ osɨmtɨzir avɨriba e ganɨngi, mati nɨ wainɨn onganim e ganɨdima, e anepava ongani.

Godɨn Araziba 29:18

Ia oragh! Ia deraghvɨra uari bagh gan, ian tongɨn gumazitam, ko amizitam, anabatam, ko ikɨzitam, ia Ikiavɨra Itir God, en God akɨrim a gasan markɨ. Ia God baghvɨra ikɨ. Egh ikɨzir igharazibar asebar gɨn mangɨ men ziaba fan bar markɨ. Gumazitam arazir kurar kam damu, a mati temer bir imezim itim, a puv mɨsosi. Eghtɨ gɨn an ghuzir igiam otogh, ekevegh anang mɨsogh, gumazir avɨrim gasɨghasigham.

Godɨn Araziba 28:36

“Eghtɨ Ikiavɨra Itir God, ia ko atrivir ia mɨsevezim ko, bar ia isɨ kantrin ia ko ian inazir afeziaba fozir puvatɨzimɨn mangɨtɨ ia an ikiam. Ia kantrin kamɨn ikɨva, men asebar ziaba fam, aser kabar marvir guaba, me temeba ko dagɨabar da ingari.

Jeremaia 44:27

Kɨ Ikiavɨra Itir God, kɨ guizbangɨra mɨgei, Kɨ deraghvɨra ia damuan kogham. Puvatɨ. Kɨ paza ia damuasa ian gari. Ia Judan Isipɨn iti darasi, kɨ apaniba amadaghtɨ, me izɨ ian taraziv soghɨrarigham. Eghtɨ tarazi dagheba puvatɨgh arɨmɨghiregham. Egh ia bar gevegham.

Jeremaia 49:37

Apaniba izɨ Elamia mɨsoghtɨ me arɨghiramin dughiam, kɨ me damightɨ me foghɨva, bar puvɨram atiatigham. Kɨ Ikiavɨra Itir God, kɨ uan anɨngagharim akakaghsɨ, bizir bar kuram damightɨ, an Elam batogham. Egh kɨ mɨdorozir gumazibar amightɨ, me, me mɨsogh men agɨntɨgh mangɨtɨ, me bar arighireghamin dughiamɨn tugham.

Esekiel 5:2

Egh 390plan aruebar gɨn ivezir kurar kam gɨvaghtɨ nɨ dɨkafigh. Eghtɨ arazir kam kamaghɨn Israelian akagham, apaniba Jerusalem inigha gɨfa. Nɨ dɨkavigh uan arɨzir pozir faragha itim inigh, Jerusalemɨn akazir ababanim gamir brighɨn kam gisɨn datɨgh, a daboroghtɨ a isi. Egh arɨzir pozir namba 2 inigh, brighɨn kamɨn mɨriam daruva da akun, uan mɨdorozir sabamɨn tintinibar ada aghor mangɨ. Egh arɨzir pozir namba 3 inigh da akunightɨ, amɨnim da ater tintinibar mangɨ. Eghtɨ kɨ uan mɨdorozir sabam inigh arɨzir kabar gɨntɨgh mangam.

Esekiel 5:12

Kɨ ia isɨ 3plan okoruabar ia arigham. Eghtɨ namba 1ɨn okoruam, mɨtiriar ekiam ian aghɨtɨ arɨmariaba ia damutɨ ia nguibar ekiamɨn aven arɨghiregham. Eghtɨ namba 2ɨn okoruam, apaniba izɨ nguibar ekiamɨn azenan mɨdorozir sababar me mɨsoghtɨ me arɨghiregham. Eghtɨ namba 3ɨn okoruam, kɨ me aghamsigh tintinimɨn me amangightɨ me nguazimɨn danganiba bar dar mangeghtɨ, kɨ apanibar amamangatɨghtɨ me uan mɨdorozir sababa inigh men agɨntɨgh mangɨ me mɨsoghɨrarɨgham.