Jeremaia 9:10 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁰ Kɨ Jeremaia, kɨ garima, Mɨghsɨaba ko tuziba itir danganiba, me bar adagh apongegha dagh asɨghasɨghizɨ gumazamiziba ua dagh aruir puvatɨ. Ezɨ bulmakaubar arareba puvatɨzɨ, kuarazibar arareba ua dar otivir puvatɨ. Kamaghɨn kɨ dagh nɨghnɨgha puvɨrama azi. Kɨ da bagha osemegha azir akam bange.

Jeremaia 9:10 ပူးပေါင်းရင်းမြစ်များ

Jeremaia 12:4

Gumazamizir kaba arazir kurabagh ami. Egha uaghan me ghaze, “Bizir e bativamin kaba, Jeremaia bar dar ganighan kogham.” Kamaghɨn amizɨ, nɨ gumazamizibar arazir kurabar osɨmtɨziba ikarvagha nguazim gamizɨ, an aghazagharizɨ, graziba bar mɨsɨngi. Ezɨ asɨziba ko kuaraziba tintinibar ariaghiri. Ezɨ kɨ nɨn azai, Nɨ dazoghɨn bizir kam agɨvaghtɨ, nguazim ua deragham?

Hosea 4:3

Kamaghɨn amizɨ, nguazir kam osɨmtɨzim ikia mɨsigham. Ezɨ nguazimɨn itir gumazamiziba, ko an itir biziba bar, kar asɨziba ko, kuaraziba, ko, osiriba, da bar arɨmɨghiregham.’ ”

Esekiel 33:28

Kɨ nguazir kam damightɨ a ikuvightɨ gumazamiziba ko biziba an puvatɨgham. Egh kɨ me damightɨ, me uari fava amir ifaghatir arazim, a bar gɨvagham. Eghtɨ Israelɨn mɨghsɨaba bar ruaribagh avagh, mɨtemeghtɨ me dar aruan aghuagham.

Esekiel 29:11

Eghtɨ 40plan azenibar, gumazitam o asɨzitam an ikɨva, a daruan kogham.

Esekiel 14:15

“Kɨ maghsuegh, asɨzir atiaba amadaghtɨ da izɨ gumazamizibav soghɨrarɨgham, egh nguazim damightɨ atiatim bar anevaraghtɨ, gumazitam a daruan kogham.

Jeremaia 12:10

“Kantrin Igharazibar Gumazamizibar gumazir dapanir avɨriba iza, nan wainɨn azenir dirim gasɨghasɨki. Me azenir dirir kam dɨkezɨ, a danganir mɨdiarimɨn mɨn iti. Ezɨ gumazamiziba uam an itir puvatɨ.

Jeremaia 7:29

Jerusalemia, ia uan azirakar arazim akakagh uan dapanir arɨzibagh isegh da makunigh. Nɨn gumazamiziba Ikiavɨra Itir God gamizɨ, a bar anɨngagharir ekiam iti. Egha a gumazamizir kabar aghuagha akɨrim ragha me gasara. Kamaghɨn, ia mɨghsɨabar ghuavanegh azirakar ighiaba bangɨ.

Jeremaia 23:10

Nguibar kamɨn gumazamizir avɨrim Ikiavɨra Itir God ataki, egha amiziba ko gumaziba uan paba ko amuiba ataghɨragha, tintinibar uari isava akui. Gumazamiziba zurara tuavir kurabar gɨn zui, egha me uan gavgaviba isa puv arazir kuramra anɨga, gumazamizir igharaziba paza me gami. Kamaghɨn amizɨ, Ikiavɨra Itir God, uan akamɨn gɨn ghua nguazir kam gasɨghasɨki. Ezɨ graziba bar mɨsiga gɨfa, ezɨ nguazim azi. Kɨ Ikiavɨra Itir God, kɨ mɨkemegha gɨfa.”

Jeremaia 14:6

Ezɨ donkin atiaba mɨghsɨabar tuivav ikia, afiar atiabar mɨn avɨghagha pamtemɨn amɨnim isi. Da pamtem damamin graziba bagha ruia gari. Ezɨ graziba bar puvatɨ, kamaghɨn men damaziba bar mɨkɨrvagha iraghue.

Jeremaia 8:18

Kɨ Jeremaia, kɨ kamaghɨn mɨgei: “Nan apangkuvir ekiam ko navim bar oseme, ezɨ nan nɨghnɨziba bar ikufi. Nan osɨmtɨzim agɨvamin tuaviba puvatɨ.

Jeremaia 2:6

Me na gɨnɨghnɨzir puvatɨ. Egha me bizir kɨ men akurvaghasava amiziba dagh nɨghnɨzir puvatɨ. Kɨrara Isipɨn kantrin me inigha men akua ize. Ezɨ me pura danganir dɨpaba puvatɨzir ekiam abɨki. Danganir kam, pura gigir kɨnim an iti, egha mozir konir kuraba tintinibar an iti. A gumazamiziba puvatɨzir danganim ko amoziba izir puvatɨzim. Danganir kam, mɨtater kuram anevara. Gumazamiziba uaghan danganir kam garuir puvatɨgha, uaghan an itir puvatɨ.

Aisaia 49:19

“Guizbangɨra, nɨ bar moghɨra ikuvigha bar pura iti. Ezɨ gɨn nɨn boriba uamategh izɨ bar nɨ gizɨvaghtɨ, nɨ me arɨghamin danganiba puvatɨgham. Eghtɨ nɨ gasɨghasɨghizir darasi, me bar nɨn saghon ikiam.

Aisaia 41:15

Ia gan! Kɨ ia damightɨ, ia wit dɨkava a mɨrmɨri ter ararir bar dafar me ainɨn dɨkonibar afughafughizimɨn mɨn otogham. Kar ter ararir igiam, ezɨ an dɨkonibar atariba bar ghumi. Egh bizir ian tuaviba apɨra osɨmtɨziba ia ganɨdiba, ia da dɨkabɨnigham. Mati ia mɨghsɨaba abɨagharɨzi da uaghira nguazir mɨnemniamɨn otifi.

Jeremaia 50:3

Gumazamiziba not ategh izɨ Babilonia mɨsogham. Egh apanir kaba bar Babilonɨn nguibam gasɨghasigham, eghtɨ a pura danganir kɨnimɨn otogham, eghtɨ gumazamiziba an ikian kogham. Gumazamiziba ko asɨziba bar anetegh aregham.

Esekiel 27:2

“O nguazir kamɨn gumazim, Tairɨn nguibar ekiam ikuvigham, kamaghɨn amizɨ, nɨ a bagh azirakar ighiam bangɨ.

Joel 1:13

E uan Godɨn Dɨpenimɨn ofa damuamin dagheba ko wainba puvatɨ. Kamaghɨn amizɨ, ia ofa gamir gumazir ofa gamir dakozimɨn ingangarim gamiba, ia azirakar korotiar pɨziba aghuigh egh azi. Ia dɨmagarimɨn azirakar korotiar pɨziba aghuigh, Godɨn Dɨpenimɨn aven mangegh ikɨ mangɨtɨ amɨnim tiragh.

Joel 1:19

Temeba ko graziba bar mɨsɨngi, mati avivzariam dar isi. Kamaghɨn amizɨ, O Ikiavɨra Itir God, kɨ pamten nɨ ko mɨgɨa nɨn dei.

Amos 5:1

O Israelia, ia oragh! Ia mati gumazim aremezɨ moghɨn iti. Kamaghɨn amizɨ, kɨ azirakar ighiar mam ia bagh a bangɨtɨ, ia a baragham.

Amos 5:16

Ia arazir kurar kabagh ami, kamaghɨn nan Ikiavɨra Itir Godɨn Ekiam, a Godɨn Gavgaviba Bar Itim, a kamaghɨn mɨgɨa ghaze: “Kɨ ian tongɨn izɨ ivezir kuram isɨ bar ia danɨngam. Eghtɨ ia nguibar ekiamɨn aven itir tuaviba ko biziba amadir danganibar pamten azi suam, ‘Evzika! Evzika!’ Eghtɨ ia gumazir azenibar ingaribar diaghtɨ, me uaghan aziam. Eghtɨ gumazamizir gumazir aremeziba bagha azia foziba, me uaghan izɨ ian akuragh aziam. Eghtɨ gumazamizir wainɨn azenimɨn aven itiba, me uaghan izɨ ian akuragh azirakabar amuam. Kɨ Ikiavɨra Itir God, kɨ mɨkemegha gɨfa.”

Maika 2:4

Ia bativamin bizir kaba otivtɨ, gumazamiziba ia geghan akam ia gasɨ ia mɨkɨmam. Egh me kamaghɨn azirakar ighiar amɨrizibar amuam: ‘E bar moghɨra bar ikufi. Ikiavɨra Itir God, en nguazim inigha en apanir igharazibagh anɨngi. Gumazir kaba e inigha ghua nguazir igharazimɨn e isa kalabus gatɨ. Maia! A datɨrɨghɨn manmaghɨn en nguazir, e da inizim ikarvagh e damuam?’ ”

Jeremaia 2:15

Apanir kaba Israelia abɨragha mati laionbar mɨn pamtemɨn me dazera tiariba akara iti. Egha me Israelian nguazim gamizɨ a danganir kɨnir mamɨn mɨn iti. Egha ian nguibabagh apongezɨ da isigha, nguibar sueriabar otifi.

Jeremaia 12:11

Eghtɨ nguazir kam pura ikɨtɨ, gumazamiziba an puvatɨgham. A dɨpaba puvatɨzir danganimɨn mɨn otogham. Eghtɨ nguazim ikɨva azitɨ, kɨ a baragham. Eghtɨ nguazir kamɨn itir gumaziba, ua a gɨnɨghnɨghan kogham.

Esekiel 6:6

Egh apaniba, Israelɨn nguibar ekiaba bar dagh asɨghasightɨ da ikuvigham. Eghtɨ men mɨghsɨabar pɨn itir danganir ia asebar ziaba feba ko, men ofa gamir dakoziba ikuvigh pura ikiam. Eghtɨ ian asebar marvir guaba me bar dagh asɨghasigham. Egh mughuriar aghuim zuir ofa gamir dakoziba bar da akararightɨ, Israelia amir arazir kurar kaba bar moghɨra gɨvagham.

Maika 3:12

Kamaghɨn amizɨ, ia gumazir dapaniba ko ofa gamir gumaziba ko akam inigha izir gumaziba, ia amizir osɨmtɨzir kaba bangɨn, God Jerusalem gasɨghasɨgham. Eghtɨ Jerusalemɨn biziba bar ikuvigham, egh mɨnezir pozimɨn otogham. Eghtɨ Saion nguazir kɨnimɨn mɨn ikɨtɨ, gumaziba an dagher azenibar ingaram. Eghtɨ Ikiavɨra Itir Godɨn Dɨpenim iti naghɨn mɨghsɨar kam, ruarim a batogham.