Jeremaia 8:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Kɨ kuarim atɨgha me barazi, me deragha guizɨn akatam na mɨgeir puvatɨ. Egha men tav uan arazir kuraba gɨn amangasa mɨgeir puvatɨ. Egha nan azangsɨgha ghaze, kɨ arazir kurar manamrama ami? Me vaghvagha uan ifongiabar gɨrara ghua, mati hoziaba mɨdorozim bagha ghuaba arigha ivemara ghuavɨra iti.

Jeremaia 8:6 ပူးပေါင်းရင်းမြစ်များ

Onger Akaba 14:2

Ikiavɨra Itir God uan Nguibamɨn pɨn ikia, nguazimɨn itir gumazamizibar garima, men tav nɨghnɨzir aghuim ikia a gɨfofoghasa a buri, ti puvatɨ.

Esekiel 18:28

An arazir kurar amizir kam gɨfogha gɨvagha, anetegha arazir aghuimɨn gɨn zui. Bizir kam bangɨn, an aremeghan kogham. An angamɨra ikɨ deraghvɨra ikiam.

2 Pita 3:9

Gumazamizir maba ghaze, Ekiam nɨmɨra ingari. Ezɨ puvatɨ. Ekiam uan akar dɨkɨrɨzimɨn gɨn ghua nɨmɨra ingara arazibagh amir puvatɨ. God gumazitam o amizitam ovengan aghua. Gumazamiziba bar navibagh iraghasa a ifonge, egha an navim ian ikia ingara egha ia mɨzua iti.

Malakai 3:16

Ezɨ gɨn gumazamizir Ikiavɨra Itir Godɨn atiatiava an apengan itiba uarira uariv gei, ezɨ Ikiavɨra Itir God men mɨgɨrɨgɨam barasi. Egha Ikiavɨra Itir God mɨkemezɨ, enselba an Nguibamɨn ikia akɨnafarir rɨghizir mam isa Godɨn damazimɨn an gumazamizir kabar ziaba osiri. Kar gumazamizir Ikiavɨra Itir Godɨn atiatiava an apengan ikiava, zurazurara an ziam feba. Akɨnafarir rɨghizir kam, kar otivizir biziba gɨn dagh nɨghnɨghamin akɨnafarim.

Maika 7:2

Gumazir aghuitam nan kantrin aven itir puvatɨ. Gumazitam guizbangɨra Godɨn gɨn zuir puvatɨ. Bar puvatɨ. Dughiabar zurara gumazamiziba uarira uarir apanibagh amua uarigh asɨghasɨghasa uari bagha tuaviba buri, mati gumazim asɨzibav soghasa, azuazim agura.

Akar Mogomem 9:20

Ezɨ gumazamizir igharazir me mɨsoghezɨ, ariaghirezir puvatɨziba, me navibagh irazir puvatɨgha, akɨrim ragha marvir guar me uari ingarizibagh asarazir puvatɨ. Me aseba ko marvir guaba ataghizir puvatɨ. Marvir guar kaba, gumaziba silva ko gol ko bras ko dagɨaba ko temebar dar ingari, da bizibar garir puvatɨgha akaba barazir puvatɨgha aruir puvatɨziba. Me marvir guabar ziaba fer arazim ataghizir puvatɨ.

Hagai 1:7

Kɨ Ikiavɨra Itir Godɨn Gavgaviba Bar Itim, kɨ kamaghɨn ia mɨgei, ia bizir kurar ia bativir kabar gara nɨghnɨsi, o puvatɨ?

Hagai 1:5

Ikiavɨra Itir Godɨn Gavgaviba Bar Itim, datɨrɨghɨn ghaze, Ia bizir kurar ia bativir kabar gara nɨghnɨsi o puvatɨ?

Esekiel 22:30

“Kɨ gumazir men tongɨn itir kamaghɨn garitam, a bagha ruia an apizir puvatɨ. Tinara nguazir kamɨn gumazamiziba bagh nan damazimɨn tughɨva, nguibar ekiam avɨnizir dɨvazir akaraghireziba akɨram. Eghtɨ kɨ nguibar kam gasɨghasighan kogham. Kɨ kamaghɨn damuamin gumazitamɨn apizir puvatɨ.

Jeremaia 5:1

Ikiavɨra Itir God, kamaghɨn mɨgɨa ghaze: “Ia Jerusalemɨn gumazamiziba, ia uan tuaviba bar dar aru, uan biziba amadir danganibar ganigh fogh suam, gumazamizir aghuitam iti, o puvatɨ. Egh ia gantɨ, gumazamizir arazir aghuim ko guizɨn arazimɨn gɨn zuitam ikɨtɨ, kɨ nguibar ekiar kamɨn arazir kuraba gɨn amadagham.

Aisaia 59:16

A garima, gumazamiziba paza gumazir igharazibagh amima, men akuraghamin gumazitam itir puvatɨ. Ezɨ a kamaghɨn ganigha dɨgavir kuram gami. Egha uabɨ uan gavgavim ko uan arazir aghuimɨn, a ua me inigha, me gamizɨ me deravɨra iti.

Aisaia 30:18

Guizbangɨra, Ikiavɨra Itir God, a Godɨn guizɨn arazibagh amim. Kamaghɨn amizɨ, a ian apangkuvighasa ifongiar bar ekiam iti. A uan apangkuvim ian akakaghasa ia mɨzua iti. Gumazamizir nɨghnɨzir gavgavim an ikiava, uarir akurvaghasa a mɨzua itiba, me bar akuegham.

Jopɨn Akɨnafarim 10:2

Kɨ kamaghɨn Godɨn mɨkɨmam, nɨ pura kotɨn na tuisɨghan markɨ. Nɨ nan atarɨva, nan osɨmtɨzimɨn gurara na mɨkɨmasa kɨ ifonge.

Jeremaia 23:25

“Kɨ akam inigha izir gumaziba nan ziamɨn gun mɨgeir akar ifavariba baregha gɨfa. Me kamaghɨn mɨgei, ‘Kɨ irebamɨn gani. Kɨ irebamɨn gani.’

Jopɨn Akɨnafarim 34:31

“Ian tinara orazi Jop kamaghɨn God mɨkeme, ‘God osɨmtɨziba na garɨzima kɨ da ateri, egh kɨ uam arazir kuratam damighan kogham.

Jopɨn Akɨnafarim 34:32

God bizir kɨ fozir puvatɨziba, da nan akaghtɨ, kɨ arazir kuratam damigh, egh bar moghɨra da ategham.’

Aisaia 57:17

Me faragha bizir avɨriba iniasa, arazir kurar guar avɨribagh ami, kamaghɨn amizɨ, nan anɨngagharim men ikia, puv me gamua, egha uan guam men modo. Ezɨ me akaba barazir puvatɨgha, uan ifongiabar gɨntɨsi.

Jeremaia 3:5

Ia kamaghɨn na mɨgɨa ghaze, nɨ ti zurara en anɨngaghɨ egh zurara en ataran kogham.’ Ia kamaghɨn mɨgɨa, egha uan ifongiamɨn gɨn ghua arazir kurar avɨribagh amua ghuavɨra iti.”

Daniel 9:11

Ezɨ e Israelia bar nɨn Akar Gavgaviba abigha, nɨn akam barazir puvatɨ. Egha akɨrim ragha nɨn akam gasara. E arazir kuram nɨ gami. Kamaghɨn amizɨ, nɨ en arazir kuraba tuisigha gɨfa. Egha Akar Gavgavir kam nɨ Moses ganɨngizɨ an an osiri. Nɨ ivezir kuram gumazamizir akɨrim ragha nɨn akam gasaraziba me danɨngam. Nɨ ivezir kurar kam e gingegha gɨfa.

Sefanaia 3:7

Kɨ ghaze gumazamiziba nan arazir kabar gan, nan apengan ikiam, egh me nan amamangatɨghtɨ kɨ men arazir kuraba akɨram. Egh kɨ deraghvɨra men sure gamizir biziba, me deragh dagh nɨghnɨghtɨ, kɨ me gasɨghasighan kogham. Ezɨ me nan suren akaba barazir pu. Puvatɨ. Me zuamɨra ua dɨkavigha arazir kurabagh ami.”