Jeremaia 8:19 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁹ Mevzika, nan adarazi nguazir oteviba bar adar ikia egha ara kamaghɨn dei, ‘Ikiavɨra Itir God ua Saionɨn nguibamɨn atrivimɨn itir puvatɨghama, a? Egha a manmaghsua en akurazir puvatɨ?’ ” Ezɨ Ikiavɨra Itir God kamaghɨn akam ikaragha ghaze: “Manmaghsua ia nan gumazamiziba kantrin igharazibar asebar nedazibar ingara egha dar ziaba fe? Ian arazir kam na gamima, kɨ bar ian anɨngaghe.”

Jeremaia 8:19 ပူးပေါင်းရင်းမြစ်များ

Aisaia 39:3

Ezɨ Babilonɨn izezir gumaziba uamategha ghuezɨ, Godɨn akam inigha izir gumazim Aisaia, iza kamaghɨn Atrivim Hesekian azara, “Gumazir kaba manmaghɨra mɨgei? Me kantrin manamɨn gumaziba?” Ezɨ Hesekia kamaghɨn an akam ikaragha ghaze, “Me kantri Babilonɨn gumaziba, me nan ganasa saghuiamɨn ikegha ize.”

Aisaia 13:5

Me kantrin bar saghon itimɨn ikegha ize, egha me mati Ikiavɨra Itir Godɨn piba ko bariba. A bar anɨngaghegha, me akuvagh me damutɨ, me nguazir kamɨn itir kantribagh asɨghasɨgh, bar me agɨvagham.

Akar Mogomem 2:1

Egha gumazir kam ua kamaghɨn mɨgei, “Nɨ Efesusɨn nguibar ekiamɨn itir siosɨn garir ensel bagh akataba osirigh. Akar kaba kamakɨn: “Kɨ uan agharir guvimɨn 7plan mɨkovezibar suigha, egha 7plan golɨn lambar tongɨn arui. Egha kɨ akar kam nɨ bagha anemadazɨ a izi.

Obadia 1:17

Egha Ikiavɨra Itir God ua kamaghɨn mɨgɨa ghaze: “Gumazamizir Saionɨn Mɨghsɨamɨn itiba, me ikuvighan kogham, eghtɨ Saionɨn Mɨghsɨam Nan Nguibamɨn mɨn zuegh ikiam. Eghtɨ Jekopɨn ovavir boriba, kɨ me ganɨngizir nguazir kam, me uam a iniam.

Joel 2:32

Eghtɨ dughiar kamɨn, Ikiavɨra Itir Godɨn ziamɨn diaghamin adarasi, a men akurvagham. Eghtɨ Ikiavɨra Itir God mɨkemezɨ moghɨn, gumazamizir Saionɨn Mɨghsɨam ko Jerusalemɨn nguibamɨn itiba, men tarazi oveghan kogham. Gumazamizir Ikiavɨra Itir God ua bagha inabaziba, me men tongɨn ikɨ deraghvɨra ikiam.”

Jeremaia 31:6

Eghtɨ dughiar kamɨn, Efraimɨn anabamɨn adarazir gumazir eghuvir mɨghsɨabar itiba, me kamaghɨn dɨmam, ‘Ia bar moghɨra dɨkavigh izɨ, e Saionɨn Mɨghsɨamɨn mavanangam. E Ikiavɨra Itir God bagh mangam, en God.’ ”

Jeremaia 14:19

Ezɨ kɨ kamaghɨn Ikiavɨra Itir Godɨn azangsɨsi, “O Ikiavɨra Itir God, nɨ bar akɨrim ragha Judan kantri gasara, o? Nɨ Saionɨn nguibar ekiamɨn gumazamiziba bar me gifongezir puvatɨ, a? Egha nɨ manmaghsua, bar e gasɨghasɨghizɨ, e ua deraghan kogham? E ghaze, e ti deraghvɨra dapiam. Ezɨ puvatɨ, e deragha apiazir puvatɨ. E ghaze, e ti osɨmtɨziba ategh, avughsɨ deravɨra ikiam. Ezɨ puvatɨ, apaniba iza e gamima e bar atiatingi.

Aisaia 52:1

O Saion, nɨ dɨkavigh tugh gavgavigh! O Jerusalem, nɨ God baghavɨra itir nguibar ekiam! Nɨ kurkazir bar aghuiba uabɨn kurkegh ganganir bar aghuim damuam. Guizbangɨra, Ekiam gɨfozir puvatɨziba, me gumazir uan mɨkarzir mogomer iniba aghorezir puvatɨziba, ko Godɨn damazimɨn zuezir puvatɨziba, me uam nɨn aven izan kogham.

Aisaia 33:22

Bar guizbangɨra, Ikiavɨra Itir God uabɨ, jasɨn mɨn ikɨ, egh en atrivimɨn ikɨ, en gumazir deravɨra en ganamim mɨn ikɨ, egh en Akurvazir Gumazimɨn ikiam.

Aisaia 12:6

O Saionɨn Mɨghsɨamɨn itir gumazamiziba, ia fo, Israelian Godɨn Bar Zuezim, a ian tongɨn ikia ingangarir ekiabagh amua, ziar bar ekiam iti. Kamaghɨn amizɨ, ia pamten dɨmɨva arang bar akuegh onger akabar amu.

Aisaia 1:4

Iavzika! Ia gumazamizir bar kuraba, ian araziba uaghan ikufi. Ia zurara arazir kurabagh amuavɨra itima, ian arazir kuram ia gekua ghuaghiri. Ia Israelia, ia uan Ikiavɨra Itir God ategha gɨfa. Guizbangɨra, ia akɨrim ragha Israelian Godɨn Bar Zuezim gasara.

Onger Akaba 149:2

Ia Israelia, God ian ingari, ezɨ ia an bizir kam bagh bar akongegh. Ia Saionɨn nguibamɨn gumazamiziba, ia uan atrivim bagh bar akongegh.

Onger Akaba 146:10

Ikiavɨra Itir God, Atrivimɨn ikɨ mamaghɨra ikiam. Ia Saionɨn gumazamiziba, ian God, a Atrivimɨn ikɨ, zurara ikɨvɨra ikiam. Aleluia! E bar Ikiavɨra Itir Godɨn ziam fam!

Onger Akaba 135:21

Saion, an ziar mam Jerusalem, a Ikiavɨra Itir Godɨn nguibam. Ia an itir gumazamiziba, an ziam fɨ. Aleluia! Ia bar Ikiavɨra Itir Godɨn ziam fɨ.

Jeremaia 9:16

Kɨ me batuegh me amadaghtɨ, me mangɨ tintinibar kantrin fomɨra men inazir afeziaba ko me fozir puvatɨzibar tongɨn me ko ikiam. Eghtɨ kɨ apanibar amamangatɨghtɨ, me men gɨntɨgh mangɨ dughiar kɨ me gasɨghasɨghamim otogham.”

Aposel 14:15

“Maia! Gumazamiziba, ia tizim bagha arazir kam gami? Ga pura gumazir kɨnimning, egha uaghan ian mɨrara gari. Ga kamaghsua Akar Aghuir kam ia mɨgei. Ia pura bizir kɨnir kabar ziaba fan markɨ. Ia uari isɨ Ekiam danɨng, an Angamɨra Itir God. A Godɨn overiam ko nguazim ko ongarimɨn ingarizim, egha dar itir biziba bar adar ingari.

Onger Akaba 31:6

Marvir guar gavgaviba puvatɨzibar ziaba fer gumazamiziba, nɨ bar men aghua. Ezɨ ko, kɨ nɨghnɨzir gavgavim nɨn iti.

Jeremaia 2:5

Ikiavɨra Itir God kamaghɨn mɨgɨa ghaze: “Ian inazir afeziaba arazir kurar manamɨn gari, kɨ a gamizɨ, me na ategha bar nan saghon ghue? Egha marvir guar kɨnibar ziaba fema, da tong men akurvazir puvatɨ.

Jeremaia 7:19

Ezɨ kɨ Ikiavɨra Itir God, kɨ ghaze, Me kamaghɨn amua paza nararam amir pu. Bar puvatɨ. Me paza uarira uarigh amua aghumsɨzim uarira uarigh anɨngi.

Jeremaia 8:20

Ezɨ gumazamiziba kamaghɨn diava ara mɨgei: “Aruem garir dughiam gɨfa, ezɨ me azenibar aven itir dagheba bar ada asigha gɨfa. Ezɨ God ua e iniasa nɨghnɨzir puvatɨ.”

Jeremaia 10:15

Kar me dɨbovir akabav kɨmasa pura ingarigha arɨghizir bizir kɨniba. Eghtɨ Ikiavɨra Itir God, me tuisɨghamin dughiam izɨtɨ me bar ikuvigham.

Jeremaia 14:9

Manmagh amizɨ, nɨ gumazir okam nɨghnɨzimɨn mɨn, en akurvaghamin gavgaviba puvatɨ? Manmagh amizɨ, nɨ mati, mɨdorozir gumazim uan apaniba abɨnamin gavgaviba puvatɨ? Ikiavɨra Itir God, e bar fo, nɨ kamaghɨn amir puvatɨ. E fo, nɨ en tongɨn itima, e nɨn gumazamizibara iti. Kamaghɨn, nɨ e ataghɨraghan markɨ.”

Jeremaia 27:10

Me ia gifari. Ia men akaba nɨghnɨzir gavgavimɨn dar ikɨtɨ, kɨ ia batueghtɨ ia uan nguaziba ategh saghon mangegham. Egh ia bar ikuvigham.

Jeremaia 32:30

“Israelia ko Judaba, me igiamra ikia iza datɨrɨkɨn, me nan damazimɨn arazir kurabaram ami. Kɨ Ikiavɨra Itir God, kɨ guizbangɨra mɨgei, Me arazir kurar kamɨn na gamima, kɨ anɨngaghe.

Esekiel 48:35

Kamaghɨn amizɨ, nguibar ekiam avɨnizir dɨvazimɨn 4plan mɨriaba, dar ababanim bar moghɨra 9,000 mitan tugham. Eghtɨ dughiar kamɨn ikegh mangɨ zurazurara ikiamin dughiamɨn, me nguibar ekiar kamɨn ziam dɨpon suam, ‘Ikiavɨra Itir God Kagh Iti.’ ”

Maika 4:9

Jerusalem, nɨ manmaghsua pamten arai? Nɨ tizim bagha amizim borim batasa mɨzazim isi moghɨn uabɨ barasi? Nɨ ti atriviba puvatɨ, a? Ezɨ nɨn fofozir gumaziba ti ariaghire, a?

Godɨn Araziba 31:17

Eghtɨ kɨ dughiar kamɨn bar men anɨngaghegham. Egh kɨ me ategh, egh uan guam bar men modogham. Eghtɨ me bar moghɨra ikuvigham. Eghtɨ bizir kurar avɨrim me bativtɨ, me dar gan fogh suam, ‘God ti e ko itir puvatɨzɨ, bizir kurar kaba e batifi.’

Onger Akaba 137:1

E Babilonɨn Faner mɨriabar apiaghav ikiava, Saionɨn nguibam gɨnɨghnɨgha a bagha azia iti.

Sefanaia 3:15

Ikiavɨra Itir God, ia gasɨghasɨghasa mɨkemezir akar kam, a anegɨvagha ian apanibar agɨrazɨ me are. Ikiavɨra Itir God, a Israelian atrivim, a ian tongɨn iti. Kamaghɨn amizɨ, ia bizitamɨn atiatingan markɨ.

Sekaraia 2:9

Kɨ uabɨ ivezir kuram me danɨngasava ami, eghtɨ gumazamizir me abɨrazɨ men ingangarir gumazir kɨnibar ikeziba, me dɨkavighɨva, uan apaniba pazavɨra me damuva me da men biziba iniam.” Bizir kam otoghtɨma, me bar fogh suam, Ikiavɨra Itir Godɨn Gavgaviba Bar Itim, na amada.