Jeremaia 7:19 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁹ Ezɨ kɨ Ikiavɨra Itir God, kɨ ghaze, Me kamaghɨn amua paza nararam amir pu. Bar puvatɨ. Me paza uarira uarigh amua aghumsɨzim uarira uarigh anɨngi.

Jeremaia 7:19 ပူးပေါင်းရင်းမြစ်များ

1 Korin 10:22

E ti Ekiam damightɨ, an navim ikuvigham o? En gavgavim ekevegha, Ekiamɨn gavgavim gafiras? Bar puvatɨ!

Jeremaia 20:11

Ezɨ Ikiavɨra Itir God, mati mɨdorozir gumazir bar gavgavir mam, a nan akurvaghasa nan boroghɨn tughav iti. Eghtɨ gumazir izɨ pazɨ na damuamin kaba, bizir kuram me batoghtɨ me daghiregham. Egh me bar aghumsɨghtɨ, men aghumsɨzir kam ikɨ mamaghɨra ikɨ gɨvaghan kogham.

Jeremaia 9:19

Guizbangɨra, Saionɨn nguibar ekiamɨn aven, gumazamiziba kamaghɨn ara egha azirakar ighiabagh amua ghaze, ‘Aio! E bar ikufi! Apaniba en dɨpenibagh asɨghasigha gɨfa. Ezɨ e uan nguazim ategham. Kamaghɨn e bar aghumsɨki.’ ”

Jeremaia 2:19

Ian arazir kuramra puv ia damigham. Ia akɨrim ragha na gasara, ezɨ ian arazir kam bangɨn ia bar ikuvigham. Kɨ Ikiavɨra Itir God, ian God, ia na ataki, egha ua nan apengan itir puvatɨ. Kamaghɨn amizɨ, ia deraghvɨra nɨghnigh, egh kamaghɨn fogham, ian arazir kaba bar kufi, egha mɨzaziba ia ganɨdi. Kɨ Ikiavɨra Itir Godɨn Gavgaviba Bar Itim, kɨ mɨkemegha gɨfa.”

Aisaia 45:16

Asebar marvir guabar ingarir gumaziba bar guizbangɨra okam nɨghnɨgh bar aghumsigham.

Aisaia 1:24

Kɨ Ekiam, kɨ Ikiavɨra Itir Godɨn Gavgaviba Bar Itim. Kɨ Israelian Atrivir Bar Gavgavim, egha kɨ kamaghɨn mɨgei, “O Jerusalem, nɨ datɨrɨghɨn nan akaba baragh. Kɨ uan apaniba, ivezir kuram me ikarvagham, eghtɨ me uam osɨmtɨzim na darɨghan kogham.

Aisaia 1:20

Egh ia aghuagh nan akam batueghtɨ, ian apaniba izɨ ia mɨsoghtɨ, ia arɨghiregham. Kɨ Ikiavɨra Itir God, kɨ mɨkemegha gɨfa.”

Jopɨn Akɨnafarim 35:6

Nɨ arazir kuratam damigh, egh nɨ a gasɨghasighan kogham. Nɨ arazir kurar avɨrim gami, ezɨ da pura bizim.

Esra 9:7

Bar fomɨra, en inazir afeziabar dughiamɨn ikegha iza datɨrɨghɨn, en arazir kurabar osɨmtɨzim bar ekevegha ikiavɨra iti. En arazir kurar kaba bangɨn, nɨ en atriviba ko en ofa gamir gumaziba ko e isa, atrivir igharazibar agharim gatɨzɨ, me iza en suigha e mɨsozi e ariaghiri, me en biziba okɨa, egha kalabuziabar mɨn e atera ghue. E guizbangɨra bar ikuvigha aghumsigha kamaghɨra iti.

Godɨn Araziba 32:16

Me ikɨzir igharazibar asebar ziaba fema, men arazir kam, Ikiavɨra Itir God bar men aghuagha navim bar men ikufi. Egha men arazir kam bangɨn a bar men anɨngaghegha men atari.

Jeremaia 2:17

Israelia, kɨ Ikiavɨra Itir God, ian God, kɨ ia inigh tuavir aghuimɨn izasa, ezɨ ia aghuagha akɨrim ragha na gasara. Ia uari kamaghɨn amizɨ, osɨmtɨzir kam ia bato.

Jeremaia 8:19

Mevzika, nan adarazi nguazir oteviba bar adar ikia egha ara kamaghɨn dei, ‘Ikiavɨra Itir God ua Saionɨn nguibamɨn atrivimɨn itir puvatɨghama, a? Egha a manmaghsua en akurazir puvatɨ?’ ” Ezɨ Ikiavɨra Itir God kamaghɨn akam ikaragha ghaze: “Manmaghsua ia nan gumazamiziba kantrin igharazibar asebar nedazibar ingara egha dar ziaba fe? Ian arazir kam na gamima, kɨ bar ian anɨngaghe.”

Jeremaia 15:9

Ezɨ amizir borir 7pla batezim, an boriba bar arɨmɨghireghtɨ, amebar kamɨn navir averiam bar ikuvigh, mati mɨnemɨn mɨn isikuam, eghtɨ an kuarmɨzim mati asɨzir agharim an guraghtɨ, an angam aremeghsɨ damuam. Amebar kamɨn dughiar aghuim, ua dughiar bar kuramɨn otoghtɨ, a bar aghumsigham. Mati an aruer arɨzimɨn itima, aruem zuamɨra iraghugha gɨfa. Kamaghɨra, Judan ikiavɨra itir varazira, kɨ apaniba amangightɨ, me izɨ me mɨsueghtɨ me arɨmɨghiregham. Kɨ Ikiavɨra Itir God, kɨ mɨkemegha gɨfa.”

Jeremaia 22:22

Kamaghɨn amizɨ, apaniba amɨnir gavgavimɨn mɨn izɨva, nɨn gumazir dapaniba inigh mangam. Apaniba izɨ nɨn gumazir nɨ ifuegha me ko arazir kurabagh amiba inigh mangɨtɨ, me kantrin igharazimɨn kalabusɨn ikiam. Egh dughiar kamɨn nɨ uan arazir kurar nɨ amiziba bagh, bar aghumsigham.

Jeremaia 25:7

Ezɨ Ikiavɨra Itir God kamaghɨn mɨgei, “Kɨ Ikiavɨra Itir God, kɨ guizbangɨra mɨgei, Nan akam inigha izir gumazim nan akar kamɨn gun mɨkemezɨ, ia nan akam baraghan aghua. Puvatɨ. Ia asebar marvir guabar ingara, na gamima, kɨ anɨngaghe. Ezɨ arazir kam bangɨn, ia paza uarira uarigh ami.

Jeremaia 44:3

Judan kaba me arazir kurar avɨribagh ami, ezɨ bizir kam na gamima kɨ men anɨngaghe. Me asebar ziaba fe, egha ofan mɨgharir mughuriar aghuim zuiba me ganɨdi. Me fomɨra aser kabagh fozir puvatɨ. Ezɨ ia Judan kagh itiba, ko ian inazir afeziaba uaghan, ia bar moghɨra aser kabagh fozir puvatɨ. Kamaghɨn amizɨ, kɨ Judan gumazamizibagh asɨghasɨki.

Esekiel 16:26

Ezɨ Isipian nɨn boroghɨn itir darasi, kar gumazir mɨkarziba puvɨra dɨkaviba, nɨ men amamangatɨzɨ, me iza nɨ ko mɨsiabagh akui. Ezɨ nɨn arazir tuavibar amiziba amir arazim ekɨva ghuavɨra ikia na gamima, nan navim ikuvizɨ kɨ nɨn atari.

Jeremaia 3:25

O Ikiavɨra Itir God, en God, e uan inazir afeziaba ko, uan mugabara ikia arazir aghumsɨzir kurabar nɨ gamua iza datɨrɨkɨn tu. E nɨn akabar gɨn zuir puvatɨ. Kamaghɨn amizɨ, e bar aghumsigh guaba avigh nguazim mɨtuagham. Egh teghtɨ, en aghumsɨzir kam inimɨn mɨn e avaraghtɨ, e a sara ikiam.”