Jeremaia 6:26 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁶ Ezɨ Ikiavɨra Itir God, kamaghɨn mɨgei: “O, nan gumazamizir kɨ bar ifongeziba, ia azir korotiabar aghuigh averenim gɨpoghpogh. Ia fo, apanir izɨ ia gasɨghasɨghamim pura kaghɨram otoghtɨ, ia atam mangeghtɨ me ia gasɨghasigham. Kamaghɨn, ia puvɨrama aziva, azir onger akaba bangɨ. Mati poroghamimning borir bar vamɨrara iti, an aremezɨ, aning a bagh azia an kuarkufi.”

Jeremaia 6:26 ပူးပေါင်းရင်းမြစ်များ

Sekaraia 12:10

Ezɨ Ikiavɨra Itir God ua ghaze, “Kɨ Devitɨn ovaviba ko, Jerusalemɨn nguibamɨn itir gumazamizir igharaziba, kɨ me damutɨ, me uan navir averiabar aven apangkuvir arazim ko, God ko mɨgeir arazimɨn gɨn mangam. Egh gumazir me afuzimɨn ruazim, me an ganigh a bagh bar puv aziam. Mati gumazim otarir ivariamra itima, an aremezɨ, an a bagha puvɨram azi moghɨn, me bar osemegh puvɨram aziam.

Jeremaia 4:8

Ikiavɨra Itir Godɨn anɨngagharir ian itim gɨvazir puvatɨ, an anɨngagharim ikiavɨra iti. Kamaghɨn amizɨ, ia azirakar korotiabar aghuigh aziva, azirakar ighiar amɨrizibar amu.

Jems 5:1

Ezɨ datɨrɨghɨn, bizir avɨriba itir gumazamiziba, kɨ akam ia mɨkɨmasa ifonge. Ia oragh! Ia osɨmtɨzir ekiar ia bativamibagh nɨghnigh, pamtem dɨmɨva arang ikɨ.

Jems 4:9

Ia naviba bar osemegh egh pamtem arangɨva aziam. Ia gumazamizir datɨrɨghɨn atiba, ia uan akazim ategh, egh ia arang. Ia gumazamizir bar akongeziba, ia uan agoroger kam ategh, naviba bar osemegh azi ikɨ.

Luk Osirizir Akar Aghuim 7:12

Egha a nguibar kamɨn tiar akar ekiar kamɨn boroghɨn ghua garima, gumazir maba gumazir kuam gisaghpugha nguibar ekiamɨn ikegha azenan izi. Gumazir aremezir kamnagh, an amizir pam aremezimɨn otarir vamɨra. Ezɨ nguibar ekiar kamɨn itir gumazir avɨrim amuir odiarir kam ko iti.

Amos 8:10

Ia isar ekiabagh amua bar akongezir dughiaba, kɨ dagh iraghtɨ, da mati gumazim ovengezɨ, ia an aghuimazimɨn iti moghɨn ikiam. Kɨ ian onger akabagh iraghtɨ, da azir onger akabar mɨn otivigham. Kɨ ia damutɨ ia azirakar korotiabar aghuigh, egh uan osɨmtɨzim akakaghsɨ, bar moghɨra uan dapanir arɨzibagh isegham. Kɨ ia damutɨ ia mati poroghamimning borir vamɨrara itima, an areme, ezɨ aning a bagha osemezɨ moghɨn, ia azi bar osemegham. Dughiar kurar kamɨn osɨmtɨzim, mati ia dagher mɨsozim amezɨ a ia mɨsozi moghɨn, a mangɨvɨra ikɨ mangɨ gɨvagham.

Jeremaia 15:8

Eghtɨ men mɨdorozir gumazir ariaghirezibar amuir odiaribar dɨbobonim nan damazimɨn bar ghuanabogh, ongarir gigimɨn dɨbobonim gafiragham. Kɨ aruer arɨzimɨn apaniba amadazɨ, me iza, men mɨdorozir gumazir igiabav soghezɨ me ariaghire. Ezɨ bizir kam gumazir igiar kabar amebabagh amizɨ, me dɨgavir kuram gamigha, osɨmtɨzir ekiamɨn ikia bar atiatingi.

Jeremaia 14:17

“Jeremaia, nɨ gumazamizibar apangkuvamin akamɨn me mɨkɨm. Nɨ kamaghɨn mɨkɨm, ‘Kɨ Jeremaia, kɨ arueba ko dɨmagaribar azivɨra ikɨtɨ, nan damazimning temeriba dagh izɨvagh mamaghɨra ikiam. Nan gumazamiziba, guivir kɨ bar ifongezimɨn mɨn, kɨ bar deravɨra men gari. Ezɨ apaniba nan gumazamiziba puvɨra me mɨsoagharɨghizɨ, me bar moghɨra ikufi, mati me duar dafar kuraba iti.

Jeremaia 13:17

Ia Ikiavɨra Itir Godɨn gumazamiziba, ia mati an sipsipɨn bɨzim, a deravɨra ia geghufi. Ia nan akam baraghan aghuaghavɨra ikɨtɨ, apaniba izɨ, ia inigh mangɨ, kantrin igharazimɨn pura ingangarir gumazir kɨnibar mɨn ia arigham. Eghtɨ, kɨ uabɨra modogh ikɨva ian ifaghatir arazim gɨnɨghnɨgh, ia bagh pamtem azitɨ, temeriba nan damazimning gizɨvagh izighiram.

Jeremaia 12:12

Eghtɨ apanir avɨriba otivigh, gumazamiziba puvatɨzir danganir mɨghsɨabar tuavimɨn izɨ, biziba bar dagh asɨghasɨgham. Guizbangɨra, kɨ Ikiavɨra Itir God, kɨ apanibar amutɨ, me ian kantrin otevir mamɨn ikegh, mangɨ otevir igharazimɨn gumazamiziba bar me gasɨghasɨgham. Eghtɨ gumazitam ua deragh ikian kogham.

Jeremaia 9:10

Kɨ Jeremaia, kɨ garima, Mɨghsɨaba ko tuziba itir danganiba, me bar adagh apongegha dagh asɨghasɨghizɨ gumazamiziba ua dagh aruir puvatɨ. Ezɨ bulmakaubar arareba puvatɨzɨ, kuarazibar arareba ua dar otivir puvatɨ. Kamaghɨn kɨ dagh nɨghnɨgha puvɨrama azi. Kɨ da bagha osemegha azir akam bange.

Jeremaia 8:21

Kɨ Jeremaia, kɨ uan gumazamizir kɨ bar ifongezibar garima, me dɨghoraghire, ezɨ nan nɨghnɨziba ikufi. Kɨ bar osemegha aziava aravɨra iti.

Jeremaia 8:19

Mevzika, nan adarazi nguazir oteviba bar adar ikia egha ara kamaghɨn dei, ‘Ikiavɨra Itir God ua Saionɨn nguibamɨn atrivimɨn itir puvatɨghama, a? Egha a manmaghsua en akurazir puvatɨ?’ ” Ezɨ Ikiavɨra Itir God kamaghɨn akam ikaragha ghaze: “Manmaghsua ia nan gumazamiziba kantrin igharazibar asebar nedazibar ingara egha dar ziaba fe? Ian arazir kam na gamima, kɨ bar ian anɨngaghe.”

Jeremaia 6:14

Nan gumazamiziba, duar dafaba isia iti, ezɨ ofa gamir gumaziba ko akam inigha izir gumaziba men duabar gari, da pura biziba, egha deraghvɨra da akɨra da nozir puvatɨ. Egha me akar aghuimɨn gumazamizibav gɨa ghaze, ‘Biziba en derazɨ e deraghavɨra iti.’ Me kamaghɨn mɨgei, ezɨ guizbangɨra bizitam deragha itir puvatɨ.

Jeremaia 4:20

Kɨ garima, me kantrin aven itir danganiba bar dar gumazamiziba paza me gamua me gasɨghasɨzima, biziba bar moghɨra ikufi. Kɨ garima, me zuamɨra en purirpenibagh asɨghasɨki.

Jeremaia 4:11

Eghtɨ apaniba izamin dughiamɨn, Ikiavɨra Itir God kamaghɨn Judaba ko Jerusalemia mɨkɨm suam, “Amɨnir fefem nguazir mɨghsɨar gumazamiziba puvatɨzibar ikegh dɨkavigh, nan gumazamiziba iti naghɨn vang izam. Amɨnir kam nɨmɨra izɨ arazir kuraba batoghasa puvatɨ, mati amɨnim nɨmɨra iza witɨn ovɨzibar mɨsevibagh ivavamadi mokɨn. Puvatɨ.

Aisaia 32:11

Datɨrɨghɨn ian dabirabim derazɨ ia ghaze, ia deravɨra ikiam. Egh ia atiating nɨghɨva akong uan korotiar aghuiba suva, azirakar korotiabar aghuam.

Aisaia 30:13

Kamaghɨn amizɨ, ia arazir kuram gamigha gɨfa, ezɨ arazir kurar kam bar ia gasɨghasigham, mati bɨbɨzir muziarim dɨvazir ruarimɨn ghuamɨn ikia bar ekefi, egha kɨran oveghangɨn dɨpɨrasava ami. Egh dɨvazim dɨpɨrigh zuamɨra irɨgham.

Aisaia 22:12

Egha bizir kaba otivir dughiamɨn, Ikiavɨra Itir Godɨn Gavgaviba Bar Itim, nan Ekiam, a kamaghɨn ifonge, Ia aziv arang kuarkuv, egh uan dapaniba bar dagh isegh, egh azir korotiabar aghuigh.

Aisaia 22:4

Kamaghɨn kɨ ia mɨgei, Ia nan navim damutɨ, a nɨmɨra ikɨsɨ damuan markɨ. Nan navim bar ikuvizɨ kɨ azia iti, kamaghɨn amizɨ, ia na ateghtɨ kɨ uabɨra ikiam. Nan gumazamiziba bar ikufi, ezɨ kɨ me ginɨghnɨghav arai.

Jenesis 21:16

Egha a borimɨn gantɨ an ovengan aghuagha ghua mong saghon aperaghav iti. Egha azia iti.

Jopɨn Akɨnafarim 2:8

Ezɨ Jop dɨkavigha nguibar ekiamɨn azenan, uan osɨmtɨzim akaghasa danganir me bizir kuraba makurimɨn ghua, averenimɨn tongɨn aperaghav iti. Egha nguazir mɨner akuar mamɨn suiragha uabɨ isavɨra iti.

Jeremaia 9:1

Kɨ ghaze, Kamaghɨn deragham, nan dapanim dɨpamɨn mɨn ikɨtɨ, nan damazimning mozir dɨpar zurara anaga ivemarimɨn mɨn ikɨ. Eghtɨ kɨ arueba ko dɨmagaribar nan gumazamizir kɨ bar ifongeziba, apaniba mɨsoghezɨ ariaghireziba, me bagh aziva arangvɨra ikiam.

Jeremaia 18:22

Nan apaniba nan suiragh na gasɨghasɨghasa, mati asɨzim mozimɨn magɨrasa mozim gutui, egha mati gumazim asɨzimɨn suighasa azuazim aguragha a mɨzua iti. Kamaghɨn amizɨ, nɨ zuamɨra gumazir kuraba ameghtɨ me izɨ gumazir kaba ko mɨsogh, me gasɨghasɨkigh, eghtɨ me bar puvɨram atiatingɨva, uan dɨpenibar aven mongegh bar puvɨram arangam.

Jona 3:6

Ezɨ mɨgɨrɨgɨar kam Niniven atrivim batozɨ, an oregha uan Atrivir dabirabim ataki. Egha a uan atrivimɨn korotiar aghuiba suegha, ada arigha azirakar korotiaba aghui, egha averenim gisɨn aperaghav iti, egha kamaghɨn uabɨ Godɨn akagha ghaze, a uan navim gɨra.

Jopɨn Akɨnafarim 15:21

Me nɨgɨniba barazir dughiabar, me bar puvɨram atiati. Me ghaze, bizir kurar me gasɨghasɨghamim izi. Egh me suam, osɨmtɨziba puvatɨ, dughiar kamɨn apaniba izɨ, men bizibagh asɨghasɨgh men biziba okɨmam.

Aisaia 3:24

Eghtɨ dughiar kamɨn, Saionɨn amiziba, fomɨra deragha kurti moghɨn ua kurukan kogham. Me borer mughuriar aghuim zuiba puvatɨgham, eghtɨ men mɨkarziba bar puvɨra mughagham. Me ua mɨteba uan ivariaba amɨghɨnan kogham, egh uan ivariaba pura benir kɨnibar uari amɨghɨnan. Me ua deraghvɨra uan dapanir arɨzibar akɨrigh da asɨngan kogham, eghtɨ men apaniba izɨ, men dapanir arɨziba bar dagh iseghtɨma, me onariba mɨsegh ikiam. Me korotiar bar diriba ua da aghuan kogham, egh me korotiar bɨbɨzir kurabar aghuam. Eghtɨ men guar bar aghuiba, men apaniba kalabuziabar dɨghoribar mɨn me aghor me tuegham. Eghtɨ me bar aghumsigham.

Jeremaia 30:5

“Kɨ Ikiavɨra Itir God, kɨ kamaghɨn mɨkeme: E orazima, gumazamiziba navir amɨrizimɨn itir puvatɨgha, bar atiatia dɨgavir kuram gamua bar puvɨram azi.