Jeremaia 6:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ Ia Benjaminɨn anabamɨn adarasi, ia Jerusalem ategh arɨ mangɨ. Puvatɨghtɨ, ia bar ikuvigham. Ia Tekoan nguibamɨn aven sɨghabagh ivi mangɨ, Bet Hakeremɨn nguibamɨn avim atɨghtɨ an mɨgharim mavanangam, eghtɨ gumazamiziba an ganigh fogh arɨ mangam. Bizir kurar ia gasɨghasɨghamim notɨn amadaghan dɨkavigha, bar roghɨra izi.

Jeremaia 6:1 ပူးပေါင်းရင်းမြစ်များ

Nehemia 3:14

Ezɨ Rekapɨn otarim Malkia, ko gumazir maba, Tiar Akar Bizir Mɨzɨrɨziba Akurir Danganim ua an ingari. Egha tiamning isa tiamɨn danganim garɨgha, egha tiam asamin loghɨn gavgaviba ko ainɨn ruariba isa, tiam dukumasa aning garɨsi. Malkia, a Bet Hakeremɨn Distrighɨn gumazir dapanim.

Jeremaia 6:22

Ikiavɨra Itir God kamaghɨn mɨgei, “Ia gan! Mɨdorozir gumaziba notɨn amadaghan ikegha izasava ami. Me bar gavgavigha, bar saghon ti. Egha me mɨsoghasa mɨdorozir biziba akɨra iti.

2 Eghaghaniba 11:6

Me nguibar ekiar kaba avɨnizir dɨvaziba gavgavim dagh anɨngi: Betlehem, Etam, ko Tekoa,

2 Samuel 14:2

Ezɨ Joap amizir nɨghnɨzir aghuiba itim bagha uan ingangarir gumazir mam amadazɨ, a ghua Tekoan nguibamɨn a inigha ize. Ezɨ Joap kamaghɨn a mɨgei, “Nɨ kamaghɨn damuasa kɨ ifonge, nɨ ifar mati gumazim aremezɨ nɨ aghuimazimɨn iti moghɨn ikɨ. Nɨ aghuimazir korotiabar aghuigh, egh borem uan mɨkarzim daghuan markɨ. Nɨ mati gumazim aremezɨ nɨ dughiar ruarimɨn a gɨbua iti moghɨn ikɨ.

Gumazir Dapaniba 1:21

Ezɨ Benjaminɨn anabamɨn adarasi, me Jebusian Jerusalemɨn iti darazi batoghezir puvatɨ, kamaghɨn Jebusia Benjaminɨn anabamɨn adarazi ikiavɨra iti.

Amos 1:1

Kɨ Amos, kɨ Tekoan nguibar ekiamɨn gumazim, egha kɨ sipsipbar garir gumazim. Kɨ irebamɨn mɨn garir bizimɨn garima, God akar kam na ganɨngi. Dughiar kamɨn, Usia Judan kantrin atrivimɨn itima, Joasɨn otarim Jeroboam, Israelɨn kantrin atrivimɨn iti. Kɨ bizir kam irebamɨn mɨn an ganigha gɨvazɨ, azenir pumuning gɨvazɨma, mɨkɨmkɨzim oto.

Jeremaia 25:9

Kamaghɨn amizɨ, ia oragh! Kɨ Ikiavɨra Itir God, kɨ notɨn amadaghan itir ikɨzibar diaghɨva, egh uaghan Babilonɨn Atrivim Nebukatnesar, an diagham, a nan ingangarir gumazimɨn mɨn ami. Egh kɨ me inigh izɨtɨ, me nguazir kam ko an boroghɨn itir kantriba dagh asɨghasɨgham. Eghtɨ me ikuvigh mamaghɨra ikiam. Eghtɨ gumazamizir igharaziba men ganigh, akɨrim ragh me gasɨ dɨbovir akabar me mɨkɨmɨva, egh dɨgavir kuram damuva, egh puvɨram atiatingam. Eghtɨ nguazir kamɨn gumazamiziba aghumsɨzim ikɨ mamaghɨra ikiam.

Jeremaia 10:22

Ia oragh! Nɨgɨnir ekiar mam notɨn amadaghan oto. Kar apanibar mɨdorozir gumazibar mɨghsɨzir nɨgɨnir dafar kuram, me nɨga akɨzɨrɨgha izi. Me uan nguibam ategha Judan nguibaba ko mɨsoghasa izi. Me Judan nguibaba bar ada agɨvaghtɨ, da afiar atiabar nguibamɨn otogham.

Jeremaia 4:29

Kɨ Jeremaia, kɨ garima, mɨdorozir gumazir maba hoziabagh apiazɨ, gumazir maba uan pibar suigha mɨdorozim bagha izi. Ezɨ gumazamizir danganir kabar itiba, me baregha, bar moghɨra uan nguibaba ataghɨraghava are. Men marazi ara ghua ruaribar aven monge, ezɨ marazi ghua dagɨar toribar aven monge. Ezɨ nguibaba bar moghɨra pura mɨsevir kɨnibar itima, gumazamiziba puvatɨ.

Josua 15:63

Judaba Jebusia batoghan ibura, kar gumazamizir Jerusalemɨn nguibar ekiamɨn itiba. Kamaghɨn, me Judaba ko bar moghɨra uari inigha Jerusalemɨn ikiavɨra iti.

Amos 3:6

Eghtɨ mɨdorozim nguibatamɨn aven otivsɨ, gumazamiziba fofoghsɨ me sɨgham giviam. Ezɨ ia manmaghɨn nɨghnɨsi, gumazamiziba atiatingam, o? Ezɨ kamaghɨra, nguibar ekiatam asɨghasɨzim a batogham. Ezɨ ia manmaghɨn nɨghnɨsi, Ikiavɨra Itir God ti asɨghasɨzir kam amadaz, o?

Sekaraia 6:6

Hoziar pɨziba mɨkɨrvazir karis, a notɨn amadaghan itir kantrin zui. Ezɨ hoziar ghurghuriba mɨkɨrvazir karis, a kantrin aruem ghuaghiri naghɨn itimɨn zui. Ezɨ baghɨraviba dukumizir hoziaba mɨkɨrvazir karis, a sautɨn amadaghan itir kantrin zui.

Nehemia 3:5

Ezɨ Tekoan nguibamɨn gumaziba an nar mam Sadokɨn adarazi boroghɨn an ingara zui. Ezɨ Tekoan gumazir dapaniba, uari fava dɨvazim faragha an garir gumazibar akaba baraghan aghua, kamaghɨn amizɨ, gumazir dapaniba uan dafaribar ingangaritam gamizir puvatɨ.