Jeremaia 50:7 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁷ Ezɨ gumazir maba men gara me mɨsosi. Ezɨ men apanir kaba kamaghɨn mɨgei: ‘Gumazamizir kaba, uari arazir kuramɨn Ikiavɨra Itir God gami. Ikiavɨra Itir God, danganir aghuimɨn mɨn iti, me an mangɨ deraghvɨra ikiam. Men ovaviba nɨghnɨzir gavgavim an ikia, a men akuraghasa me a mɨzua iti. Ezɨ Ikiavɨra Itir Godɨn kam, me anetegha arazir kuram gami. Kamaghɨn ami, e me gasɨghasɨgh egh, osɨmtɨziba puvatɨgham.’ ”

Jeremaia 50:7 ပူးပေါင်းရင်းမြစ်များ

Jeremaia 14:8

E Israelia zurara uarir akurvaghasa nɨrara nɨghnɨgha nɨ mɨzua iti. Egha osɨmtɨzibar dughiabar nɨ uam e isi. Ezɨ manmagh amizɨ, nɨ datɨrɨghɨn e gɨfozir puvatɨzɨ moghɨn iti? Manmagh amizɨ, nɨ nguibar igharazimɨn gumazir guraghav itimɨn mɨn iza dɨmagarir vamɨran e ko ikegha ghu?

Jeremaia 2:3

Egha dughiar kamɨn ia Israelia, ia nan gumazamizibara ikia, mati nan azenimɨn itir dagher faragha aniziba. Ezɨ nan dagher kabar maba isir gumazamiziba, osɨmtɨzim me batozɨ kɨ me gasɨghasɨki. Kɨ Ikiavɨra Itir God kɨ mɨkemegha gɨfa.”

Sekaraia 11:5

Sipsipɨn kabar ghuaviba dav sogha ghaze, ‘E ti arazir kuram gamir puvatɨ.’ Me sipsipbav sogha, dar tuziba dagɨaba bagha da amagava, dagɨaba isa ghaze, ‘E dagɨar gumazibar otivigha gɨfa. Kamaghɨn amizɨ e Ikiavɨra Itir Godɨn ziam fam.’ Ezɨ sipsipbagh eghuvir gumaziba me uaghan, sipsipbar apangkuvir puvatɨ.”

Jeremaia 31:23

Ikiavɨra Itir Godɨn Gavgaviba Bar Itim, Israelian God, a kamaghɨn mɨkeme: “Kɨ gɨn Judan nguazim damightɨ, a deraghvɨra ikiam. Eghtɨ Judaba uan nguazim ko nguibar ekiabar ikiam. Egh me fomɨra mɨkemezɨ moghɨn ua mɨkɨm suam, ‘Nɨ Ikiavɨra Itir Godɨn mɨghsɨam, Ikiavɨra Itir God nɨn ikia, bar arazir aghuibagh ami! Ikiavɨra Itir God bar deraghvɨra nɨ damu!’

Jeremaia 50:17

Ikiavɨra Itir God kamaghɨn mɨkeme: “Israelia mati sipsipɨn mam, ezɨ nguibar maba mati laionba, me a gasɨghasɨghasa an agɨntɨsi. Asirian atrivim faragha an suiragha aneme. Egha gɨn Babilonɨn Atrivim Nebukatnesar an aghariba ame.

1 Timoti 1:1

Kɨ Pol, kɨ Krais Iesusɨn aposel. God, en Akurvazir Gumazim, ko Krais Iesus, gumazir e ganasa mɨzuaim, aning na mɨsevezɨma kɨ aposelɨn oto.

Sekaraia 1:15

Kɨ fomɨra uan gumazamiziba mong men atara, egha Kantrin Igharazibar Gumazamizibav mɨkemezɨ, me iza mɨzazim me gase. Me izava amɨraghavɨra me gasɨghasɨghizir puvatɨ. Me, me gasɨghasɨghamin mɨtaghniam gafiragha bar me gasɨghasɨki. Ezɨ kantrin igharaziba datɨrɨghɨn osɨmtɨziba puvatɨgha deraghavɨra iti. Ezɨ kɨ osɨmtɨzir ekiam men iti.

Daniel 9:16

O Ekiam, nɨ en arazir kuraba ko en ovavibar arazir kurabar ganigha, egha puv e gamigha, Jerusalemɨn nguibar ekiam gasɨghasɨki. Ezɨ Jerusalem boroghɨra itir kantribar gumazamiziba, me bar dɨbovir akabar Jerusalem mɨgɨava, e nɨn gumazamiziba sara mɨgei. E kamaghsua, nɨ uam Jerusalemɨn ataran markɨ. Bar guizbangɨra, kar nɨn nguibam a nɨn mɨghsɨam gisɨn ti. Nɨ fomɨra an ingangarir aghuir avɨrim e bagha dagh ami, ezɨ nɨ ua kamaghɨn e bagh damuasa e ifonge.

Daniel 9:6

Nɨn akam inigha izir gumaziba, me nɨn ingangarir gumaziba, e men akam barazir puvatɨ. Me nɨn ziamɨn, akam en atrivibav kɨra, en gumazir dapanibav kɨra, egha en ovaviba ko en kantrin itir gumazamiziba bar me mɨkɨni.

Jeremaia 50:33

Ikiavɨra Itir Godɨn Gavgaviba Bar Itim, a kamaghɨn mɨkeme: “Apaniba faragha Israelia ko Judaba bar me abɨra. Egha apaniba me isa kalabus gatɨ, egh me ateghtɨ me mangan me aghua.”

Aisaia 56:9

Israelian gumazir dapaniba, deragha gumazamizibar garir puvatɨzɨ, God akar kam gami, “Apaniba ia datɨrɨghɨn izɨ. Ia ruariba ko mɨghsɨabar asɨzir atiabar mɨn izɨ. Ia izɨ Israelian gumazir dapanibagh asɨghasɨgh. Gumazir dapanir kaba, bizir kurar izɨ kantri gasɨghasɨghamibar gun gumazamizibav kɨmamin ingangarim iti. Egha me deragha uan ingangarim gamir pu. Puvatɨ. Me mati gumazir damazir okavɨrɨziba, apaniba bagha gara ikia bizitamɨn garir puvatɨ. Egha me mati afiar dapurir puvatɨziba, me okɨmakɨar gumazimɨn ganigh, a dapuran kogham. Fofozir muziaritam men dapanimɨn itir puvatɨ. Me dakuasavɨra gara, irebar igharagha garibar ganasa bar ifonge.

Aisaia 47:6

Kɨ bar puvɨra uan gumazamizibar atari, egha kɨ ua uan gumazamizibar mɨn me gɨnɨghnɨzir puvatɨ. Egha kɨ nɨ ataghizɨ, nɨ iza paza me gamua, egha nɨ tong men apangkuvizir pu. Bar puvatɨ. Nɨ bar pazavɨra me gamua osɨmtɨzir bar dafam me ganɨngi. Egha nɨ uaghan gumazamizir ghuribagh amima me osɨmtɨzir dafam ateri.

Onger Akaba 91:1

Gumazim, Godɨn Bar Pɨn Itim, deragh an gansɨ an a bagh mangɨtɨ, God deragh an ganam. A Godɨn Gavgaviba Bar Itimɨn boroghɨn ikɨtɨ, God dughuazimɨn mɨn anevaragham.

Onger Akaba 90:1

O Ekiam, nɨ bar guizbangɨra en dɨpenir, e aven itimɨn mɨn itima, en inazir afeziaba fomɨra nɨn aven ikia iza, datɨrɨghɨn e iti.

Onger Akaba 79:7

Me kamaghɨn amua, Jekopɨn ovavir boriba bar me mɨsuagharigha, men nguazim bar a gasɨghasɨki.

Onger Akaba 71:5

Ekiam, kɨ nɨghnɨzir gavgavim nɨn iti. Kɨ fomɨra uan igiamra ikia, nɨghnɨzir gavgavim Ikiavɨra Itir God, nɨn ikia, iza datɨrɨghɨn ikia kamaghɨra iti.

Jeremaia 5:17

Ia ti ghaze, ian nguibaba dɨvazir gavgaviba dar iti, eghtɨ ia deravɨra dar aven ikiam. Bar puvatɨgham. Apanir kaba izɨ ian nguibar kabagh asɨghasigham. Egh ian azenibar itir dagheba ko dɨpenibar itiba sara, dar amɨ da agɨvagham. Egh ian otariba ko guivibav soghɨrarigh, ian sipsipba, bulmakauba, bar a dav soghɨrarightɨ da arɨghiregham. Egh me ian wainɨn ikarɨziba, ko fighɨn temebagh asɨghasigham.

Jeremaia 10:25

Egh Kantrin Igharazibar Gumazamizir nɨn ziam dɨbora a fer puvatɨziba, nɨ men anɨngaghɨ me gasɨghasɨgh. Gumazamizir kaba, e Jekopɨn adarasi, me en maraziv soghezɨ me ariaghire. Me bar e agɨvagha en nguaziba ko dɨpeniba sara bar dagh asɨghasɨki. Kamaghɨn amizɨ, nɨ me gasɨghasɨgh.

Jeremaia 17:13

Ikiavɨra Itir God, e Israelia zurara nɨghnɨzir gavgavim nɨn ikia, nɨ en akurvaghasa e nɨ bagha mɨzuai iti. Gumazamizir akɨrim ragha nɨ gasaraziba, me bar aghumsigham. Men ziaba, gumazamiziba zuamɨra me bakɨnɨghnigham, mati gumazim uan ziam nguazimɨn an osirizɨma a zuamɨra angaraghire. Ezɨ gumazir kaba nɨ ataki. Ikiavɨra Itir God, nɨ mati emɨmɨrir pam, dɨpar ikɨrɨmɨrim e ganɨdimɨn mɨn iti.

Esekiel 34:5

Nan sipsipbagh eghuvir gumaziba puvatɨ, kamaghɨn amizɨ, da pura tintinibar zui, ezɨ asɨzir atiaba dav sogha da api.

Esekiel 35:12

Eghtɨ ia Idomia kamaghɨn deravɨra fogh suam, kɨ Ikiavɨra God, kɨ orazima, ia Israelian mɨghsɨaba dɨpova akar kurabar kamaghɨn dav keme, ‘Israelian mɨghsɨaba ikuvigha bar gɨfa. Eghtɨ e datɨrɨghɨn kantrin kam inigh a gativagham.’

Jeremaia 33:15

Kɨ dughiar kamɨn, Devitɨn adarazir aven gumazir bar aghuitam a damightɨ an otogham, mati Temer Ghuzir Igiam temer aguamɨn otogham. Gumazir kam atrivimɨn ikɨ arazir aghuimɨn gɨn mangɨ, guizɨn arazimɨn nguazir kamɨn itir gumazamizibagh ativagh men ganam.

Jeremaia 33:16

Eghtɨ dughiar kamɨn Jerusalemɨn nguibar ekiamɨn itir darasi, me dabirabir aghuim ko navir amɨrizimɨn ikiam. Eghtɨ Judaba, God men akurvaghtɨ, me uam osɨmtɨziba puvatɨgh deravɨra ikiam. Eghtɨ me Jerusalem ziar kam a darɨgh a dɨponam, “Ikiavɨra Itir God, A Guizɨn Arazir Aghuimɨn Mɨngarim.”

Jeremaia 50:14

Ikiavɨra Itir God kamaghɨn Babilonɨn apanibav keme: “Ia barir pibar asavamadir darasi, ia Babilonɨn nguibam ekɨarugh, egh tuivigh mɨsogh. Ia uan barir afuzibar bar a gasegh! Ia tam ataghɨraghan markɨ. Babilonia me arazir kuramɨn Ikiavɨra Itir God gami, kamaghɨn amizɨ, ia nguibar kam bar a gasɨghasɨkigh.