Jeremaia 50:44 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁴⁴ “Mati laionba sipsipbagh ami moghɨn, kɨ zuamɨra Babilonia men nguazimra me batuegham. Laion Jordanɨn Fanemɨn boroghɨn itir ruarir pɨzimɨn ikegha, otogha ghua sipsipba graziba apa itir danganir aghuimɨn men agɨntɨsi. Ezɨ kɨ gumazitam amɨseveghtɨ, a nguazir kam gativagh an ganam. Kɨ kamaghɨn damuamin dughiamɨn, gumazir manam na ko ga akamɨn uaning mɨsogham? Ezɨ tina nan mɨn gavgavir kam iti? Eghtɨ gumazir sipsipbar garir manam na ko apanim damuam? Bar puvatɨgham.

Jeremaia 50:44 ပူးပေါင်းရင်းမြစ်များ

Aisaia 46:11

Kɨ aruem anadi naghɨn itir gumazir mam izasa an diagha gɨfa, eghtɨ a isamɨn mɨn mɨghegh izɨ kɨ damuasa nɨghnɨzir bizibar amuam. Kɨ damuasa mɨkemezir bizir kaba, kɨ mɨkemezir moghɨra an adar amuam. Bizir kɨ damuasa mɨseveziba, kɨ dar amuam.

Aisaia 46:9

Egha kɨ fomɨram amizir biziba, ia ua dagh nɨghnɨgh. Kɨ uabɨra kɨ God, ezɨ ua godɨn tam ua itir puvatɨ. Kɨ uabɨra kɨ God, ezɨ ua godɨn tam nan mɨn itir puvatɨ.

Aisaia 43:10

Ikiavɨra Itir God ghaze, “Israelia, ia na ko ikia uan damazibar nan gara na gɨfo, egh ia kotɨn aven nan gun mɨkɨm. Ia nan ingangarir gumazamizibar otivasa, kɨ ua baghavɨra ia amɨsefe. Kɨ ghaze, ia na gɨfogh nɨghnɨzir gavgavim nan ikɨ, deragh na gɨfogh suam, kɨ bar uabɨra kɨ guizbangɨra God. Fomɨra godɨn tam nan faragha ikezir puvatɨ, egh godɨn tam uam otogh nan danganim inighan kogham.

Aisaia 41:25

“Kɨ aruem anadi naghɨn itir gumazir mam amɨsefe. Gumazir kam ziar ekiam na ganɨdi. Ezɨ kɨ datɨrɨghɨn notɨn amadaghan a inigha izi. Ezɨ a mati, gumazir nguazir mɨnebar ingarim, a mɨnemɨn ingarasa nguazim dɨkabɨri moghɨn, an atriviba dɨkabɨra me abɨri.

Aisaia 40:25

Ezɨ Godɨn Bar Zuezim azaragha ghaze, “Tinara nan mɨn gari? Guizbangɨra, gumazitam na ko magh gari puvatɨ.”

Onger Akaba 89:6

O Ikiavɨra Itir God, nɨn Nguibamɨn aven, tav nɨn mɨn itir puvatɨ. Nɨn nguibamɨn enseltam nɨ ko magh ghuzir puvatɨ.

Ua Me Ini 15:11

O Ikiavɨra Itir God, ua godɨn manam ikia nɨn mɨn gavgafi? Tav ua itir puvatɨ. Nɨ atrivir ekiam, egha arazir aghuibaram ami. Nɨ bar pɨn kozɨ, e nɨn atiati. Tina nɨn mɨn iti? Tav ua itir puvatɨ. Nɨrara dɨgavir kuram gamir arazibagh ami, egha ingangarir ekiabagh ami.

Jeremaia 25:38

Ikiavɨra Itir God dɨkavigha, laionɨn mɨn uan danganir mogomem ataki. Ikiavɨra Itir God bar anɨngaghegha apaniba amangizɨ, me iza Judabav sosi. Ezɨ men nguazim bar ikuvigha, danganir kɨnim gava.

Aisaia 40:18

Kamaghɨn amizɨ, tinara Godɨn mɨn gari? Guizbangɨra, bizitam a ko magh garir puvatɨ.

Onger Akaba 89:8

O Ikiavɨra Itir Godɨn Gavgaviba Bar Itim. Gumazitam bar gavgavigha nɨn mɨn itir puvatɨ. O Ikiavɨra Itir God, nɨ zurara deraghavɨra e gami, egha dughiatamɨn e ataghɨrazir puvatɨ.

Dɨboboniba 16:5

Egha a dɨkavigha Kora ko an gɨn zuir adaraziv gɨa ghaze, “Gurum mɨzaraghara, Ikiavɨra Itir God, en akagham, Gumazir manaba, an gumazibara, egha guizbangɨra a baghavɨra iti. Egh gumazir kabar amamangatɨghtɨ, me a bagh izɨ an ingangarim damuam.

Jeremaia 12:5

Ezɨ Ikiavɨra Itir God na ikaragha ghaze: “Jeremaia, osɨmtɨzir nɨ datɨrɨghɨn isir kam, a gɨn otivamin osɨmtɨzim mɨn garir puvatɨ. Nɨ gumaziba ko ia tuavimɨn ivemar, nɨ me gitavɨraghsɨ damuva avegham, nɨ avɨghaghegham, egh nɨ manmaghɨn hoziaba ko ivemaram? Nɨ nɨmɨra uan kantrin aven danganir azentuzimra deragh ikɨ, nɨ manmaghɨn mangɨ Jordanɨn Fanemɨn boroghɨn itir ruarir averiamɨn ikiam?

Jeremaia 30:21

Eghtɨ men gumazitam uabɨ men gumazir dapanir ekiamɨn otogh, me gativagh men ganam. Kɨ uabɨ gumazir kamɨn aku uabɨn boroghɨra izam. Guizbangɨra, gumaziba uan ifongiabar gɨn ghua nan boroghɨra izir puvatɨ. Kɨ Ikiavɨra Itir God, kɨ kamaghɨn mɨkemegha gɨfa.

Jeremaia 50:15

Ia an dɨvazir gavgaviba ko an tauaba apɨrarightɨ da daighireghtɨ, a ua mɨsoghan iburagh, ia teghtɨ ia a inigh, dughiar kamɨn ia danganiba bar, adar dɨmɨva tiariba akar. Egh a faragha igharaz darazigh asɨghasɨghizɨ moghɨn, ia datɨrɨghɨn bar a gasɨghasɨkigh. Kɨ Ikiavɨra Itir God, kɨ ivezir kuram a danɨng, a gasɨghasɨghasava ami, kamaghɨn amizɨ, ia bar puv a damigh.

Sekaraia 11:3

Atrivibar gavgaviba ko, men ziar ekiaba gɨfa, kamaghɨn amizɨ, men naviba bar osemezɨ, me azi. Ia oragh, atriviba pamtemɨn arava azi. Me mati laionba Jordanɨn Faner mɨriamɨn moga itir ruarir ekiam, me an temer ekiaba okava, a gasɨghasɨghizɨma da aroi.

Aisaia 48:14

“Ia bar moghɨra, ia izɨ uari akuvagh, nan akam baragh! Asetam fomɨra kamaghɨn akatam ia mɨkemezir puvatɨ, ‘Gumazir Ikiavɨra Itir God bar ifongezim, Godɨn ingangarim damusɨ, a izɨ Babilonia ko mɨsogham. Ikiavɨra Itir Godɨn gavgavimɨn, a Babilon dɨkabɨragham.’ Aseba kamaghɨn mɨkemezir puvatɨ.