Jeremaia 50:27 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁷ Mati gumaziba bulmakaubav sozi moghɨn, ia Babilonɨn mɨdorozir gumazir gavgaviba bar me mɨsoghɨrarɨkigh. Ikiavɨra Itir God me gasɨghasɨghamin dughiam an otivasa, kamaghɨn amizɨ, me bar moghɨra ikuvigham.

Jeremaia 50:27 ပူးပေါင်းရင်းမြစ်များ

Jeremaia 46:21

Ezɨ igharaz darazir gumaziba, Isipia uan mɨdorozir gumazibar ikiasa me givese. Egha Isipia bar deraghavɨra men gari, ezɨ me bar deraghavɨra iti, mati bulmakaun mɨkarzim saram aghungiziba. Egha apaniba otivizir dughiamɨn, gumazir kaba mɨdorozim ategha are. Ezɨ Isipɨn mɨdorozir gumaziba uaghan kamaghɨn ami. Ezɨ mɨdorozimɨn aven, dughiar bar kuram me batozɨ, me bar ikufi. Kamaghɨn amizɨ, me mɨdorozim bagha tuivigha gavgavizir puvatɨ. Ezɨ dughiar kamɨn me arazir kurar me amiziba bagha ivezir kuram isi.

Aisaia 34:7

Egh Ikiavɨra Itir God, uaghan bulmakaun atiaba ko bulmakaun igiaba ko bulmakaun apurir bar gavgaviba, dav soghtɨ da arɨmɨghirɨtɨ, dar ghuziba ko oviba Idomɨn kantrin nguazim giregh anevaragham.

Jeremaia 48:44

Eghtɨ gumazitam atiatim gumazamizibagh anɨdir bizibar, arɨ mangam, a mozir ekiamɨn magɨram. Egh a mozim ategh anangɨva otoghtɨ, ivem an suiragham. Kɨ Ikiavɨra Itir God, kɨ guizbangɨra mɨgei: Kɨ Moapia gasɨghasɨghasa dughiar kam amɨsefe, ezɨ kɨ me gasɨghasɨghasava ami.

Onger Akaba 37:13

Ekiam kamaghɨn fo, gumazamizir kuraba gɨvaghamin dughiam a izi. Kamaghɨn a men ingaravati.

Onger Akaba 22:12

Nan apanir avɨriba bulmakaun apuribar mɨn na ekɨarugha gɨfa. Me mati, Distrik Basanɨn bulmakaun gavgaviba.

Akar Mogomem 19:17

Ezɨ kɨ enselɨn mamɨn garima an aruem gisɨn tughav iti. Egha overiamɨn pɨn mɨghagha aruir kuarazibar dɨa ghaze, “Ia izɨ uari akuvagh egh dagher ekiar God ia danɨngamim bagh mɨzuam.

Akar Mogomem 18:10

Egh me mɨzazir ekiar a isir kamɨn ganigh, atiatigh saghon tuivigh ikɨ, kamaghɨn mɨkɨmam: “ ‘Noka, Babilonɨn nguibar ekiam. Noka! Nɨ nguibar ekiar gavgavim itim! Nɨn arazir kurabar ivezir kuram dughiar otevimra nɨ bagha ize.’

Jeremaia 50:31

“Babilon, nɨ oragh! Nɨ ifaghata uabɨ fer gumazimɨn mɨn ami. Kɨ Ikiavɨra Itir Godɨn Gavgaviba Bar Itim, kɨ nɨn Ekiam, kɨ guizbangɨra mɨgei, Kɨ nɨn apanim gami. Kɨ nɨ gasɨghasɨghamin dughiam otogha gɨfa, kɨ ivezir kuram nɨ danɨngam.

Jeremaia 50:11

Ikiavɨra Itir God kamaghɨn mɨkeme: “Ia Babilonia, ia nan kantri gasɨghasɨki, egha nan gumazamizibar biziba ini. Mati bulmakaun nguzim raizɨn mɨseviba dɨkabɨra uabɨ fa uabɨ ekura, egha bar akongezɨ moghɨn, ia bar akongegh. Egha ia hoziar apuribar mɨn tiariba akara bar akonge.

Jeremaia 27:7

Kantriba bar an apengan ikɨ, egh uaghan an otarim ko, an igiav otarir gɨn otivamim sara men apengan ikiam. Me Babilonɨn apengan ikɨ mangɨ, kɨ Babilon gasɨghasɨghamin dughiar kɨ mɨsevezimɨn tugham. Dughiar kamɨn, kantrin avɨriba ko atrivir gavgaviba Babilonɨn dɨkabɨragh, me damutɨ me pura men ingangarir gumazir kɨnibar otivigham.

Jopɨn Akɨnafarim 18:20

Aruem anadi naghɨn itir gumazamiziba ko, aruem ghuaghiri naghɨn itir gumazamiziba, me bizir kurar gumazamizir kaba batozim bareghɨva, dɨgavir kuram damigh puvɨram atiatingam.

Jeremaia 12:3

O Ikiavɨra Itir God, nɨ bar na gɨfogha, kɨ amir araziba sara fo. Egha na tuisigha bar deravɨra na gɨfo. Nɨ na bagh apanir kaba batueghasa, kɨ ifonge. Mati gumaziba sipsipbav sueghtɨ da aremeghasa, da inigha zui. Kɨ nɨn azai, nɨ inabazir dughiamɨn, nɨ me mɨsueghtɨ me arɨghiregham.

Jeremaia 25:34

Ia gumazamizibar gumazir dapaniba ko me geghuva men gariba, mati sipsipbar garir gumaziba uan sipsipbagh eghufi, ia bar puvɨrama azi. Apaniba izɨ ia mɨsoghtɨ ia arɨmɨghiramin dughiam otogha gɨfa. Eghtɨ gɨn me gumazamizir ikiavɨra itiba batuegham. Kamaghɨn amizɨ, ia nguazim giregh a gɨpoghpogh. Ia nguazir mɨner aghuim irɨgha bɨaghirezɨ moghɨn, ia iregh bar ikuvigham.

Jeremaia 48:10

Gumazamiziba Ikiavɨra Itir God me ganɨngizir ingangarim damuan aghuaghtɨ, a me gasɨghasigham. Egh a gumazir igharaziba mɨdorozir sabamɨn me mɨsueghtɨ me arɨmɨghirɨsɨ gumazitam mɨkemeghtɨ, gumazim a damighan koghtɨ, Ikiavɨra Itir God a gasɨghasigham.

Jeremaia 48:15

“Atrivir kam, an ziam, Ikiavɨra Itir Godɨn Gavgaviba Bar itim, a kamaghɨn mɨgei: Apaniba izɨ Moap gasɨghasɨgh, an nguibaba iniam. Me Moapian gumazir igiar diribav soghɨrarɨgham.

Jeremaia 51:40

Mati gumaziba sipsipɨn nguziba ko, sipsipɨn apuriba ko, memen apuribagh ami moghɨn, kɨ men aku danganir me mɨsoghtɨ me arɨmɨghiramimɨn mangam.”

Aisaia 21:12

Ezɨ kɨ apaniba bagha garir gumazim, kɨ kamaghɨn men akam ikaragha ghaze, “Amɨnim tiragh izam, ezɨ datɨrɨghɨn dɨmagarim ikiavɨra iti. Eghtɨ ia uam azangsɨghsɨ, ia uamategh izɨv azang.”

Aisaia 34:6

Eghtɨ Idomian ghuzim ko ovim, Ikiavɨra Itir Godɨn mɨdorozir sabam bar anegɨragɨrigham, mati sipsip ko memen ghuzim ko ovim, gumaziba ofa damuasa dav sozi men ghuziba ko ovim men dafariba agɨragɨri. Ikiavɨra Itir God kantri Idomɨn aven Bosran nguibar ekiamɨn, gumazamizir bar avɨrim mɨsueghtɨ me arɨmɨghiregham. Mati a uabɨ Bosran ikɨ ofan bar dafam damuam.