Jeremaia 50:20 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁰ Ezɨ kɨ Ikiavɨra Itir God, kɨ kamaghɨn mɨgei: Dughiar kamɨn kɨ Israelia ko Judan ikiavɨra itir varazira, kar kɨ taghizɨ deravɨra itiba, kɨ men arazir kuraba gɨn amadagham. Eghtɨ arazir kuratam ko osɨmtɨzir tam men ikian kogham. Eghtɨ gumazitam akatam me gasɨsɨ damuva avegham.”

Jeremaia 50:20 ပူးပေါင်းရင်းမြစ်များ

Maika 7:19

Nɨ uam en apangkufigh. Egh uan suemɨn biziba dɨka da abɨri moghɨn, en arazir kuraba dɨkɨ da abɨnigh, da akunightɨ da ongarir konim bar an aven magɨrɨgh.

Jeremaia 31:34

Kɨ Ikiavɨra Itir God, kɨ guizbangɨra mɨgei, dughiar kamɨn gumazamiziba vaghvagh uan namakaba ko uan adarazir sure damuan kogh suam, ‘Ia Ikiavɨra Itir God gɨfogh.’ Puvatɨ. Me bar moghɨra na gɨfogham, gumazamizir kɨniba ko ziaba itir gumazamiziba. Eghtɨ kɨ men arazir kuraba gɨn amadaghɨva ua dagh nɨghnɨghan kogham.”

Aisaia 43:25

Kɨrara, kɨ God, kɨ uan ziar ekiam baghavɨra nɨghnɨsi, kamaghɨn kɨ ian arazir kuraba bar da gɨn amada. Egh kɨ ua ian arazir kurar kabagh nɨghnɨghan kogham.

Aisaia 1:9

Ezɨ Ikiavɨra Itir Godɨn Gavgaviba Bar Itim, en tarazi ataghizir puvatɨzɨ, e itir puvatɨghai. Ezɨ bar guizbangɨra, e bar gevegha gɨvaghai, mati bar fomɨra Sodom ko Gomoran nguibamning, bar ikufi.

Onger Akaba 103:12

E fo, aruem anadi naghɨn ikegha ghua aruem uaghiri naghɨn, kar tizir bar ruarim. Kamaghɨra, Ikiavɨra Itir God en arazir kuraba batoghezɨ, da bar en saghon mar iti.

2 Pita 3:15

Ekiam e bagha amɨrɨghavɨra ingari. Ia fogh, a uam e iniasa, kamaghɨn an arazir kam gami. Ezɨ God bar fofozir aghuim en aveghbuam Pol ganɨngi, ezɨ a uaghan kamaghɨra mɨgɨrɨgɨar kabara ia bagha da osiri.

Aisaia 44:22

Ian arazir kuraba, kɨ da adegha da isa pɨn da akunizɨ, amɨnim da inigha ghu. Nɨn arazir kuraba gɨvagham, mati ghuariaba aruem mɨzaraghara anadi, da a sara ghuegha gɨfa. Kɨ ian akurvagha deravɨra ian gari, kamaghɨn amizɨ, ia uamategh na bagh izɨ.”

Dɨboboniba 23:21

Kɨ garima, Israelia bativamin araziba, dar tam me damutɨ me bar ikuvighan kogham. Bar puvatɨgham. Ikiavɨra Itir God, men God, a me ko iti. Me kamaghɨn an gun mɨgei, a men Atrivim.

Akɨnafarir Pol Romɨn Nguibar Ekiamɨn Itir Sios Bagha Osirizim 6:13

Egh ia arazir kuramɨn amamangatɨghtɨ a ian soroghafariba ko bizitaba ikɨrarɨghtɨ ia arazir kuratam damuan markɨ. Ia mati, gumazamizir ovegha mozimɨn ikegha ua dɨkavigha angamɨra itiba, kamaghɨn ia uari isɨ God danɨng. Egh Godɨn amamangatɨghtɨ a ian mɨkarzim bar a gativaghtɨ ia arazir aghuibar amu.

Jeremaia 33:15

Kɨ dughiar kamɨn, Devitɨn adarazir aven gumazir bar aghuitam a damightɨ an otogham, mati Temer Ghuzir Igiam temer aguamɨn otogham. Gumazir kam atrivimɨn ikɨ arazir aghuimɨn gɨn mangɨ, guizɨn arazimɨn nguazir kamɨn itir gumazamizibagh ativagh men ganam.

Akɨnafarir Pol Romɨn Nguibar Ekiamɨn Itir Sios Bagha Osirizim 11:6

Guizbangɨra, God men apangkuvigha me amɨsefe. A me amir ingangaribagh nɨghnɨzir puvatɨ. God gumazamiziba mɨsevir arazim, gumazamiziba amir ingangarimɨn tuavimɨn otoghtɨ, Godɨn apangkuvimɨn tuavim, a guizbangɨra otoghan kogham.

Akɨnafarir Pol Romɨn Nguibar Ekiamɨn Itir Sios Bagha Osirizim 5:16

Egha uaghan God puram e ganɨngizir bizim ko, gumazir vamɨran arazir kuramɨn otozir bizim, aning uaghara zuir puvatɨ. Aning arazir vamɨra e gamir pu. Bar puvatɨ. Gumazir kam arazir kurar vamɨra gamizɨ, God gumazamiziba me tuisɨgha ghaze, ia bar ikuvigham. Egha God puram e ganɨngizir bizim kamakɨn, gumazamiziba arazir kurar avɨribagh amima, God men apangkuva gari, mati me arazir kuratam gamizir puvatɨ.

Aposel 3:26

God kamaghɨn ifonge, ia vaghvagh uan arazir kuraba ateghtɨ, a deravɨra ia damuam. Bizir kam bagha a uan ingangarir gumazim amɨsevegha ia bagha faragha anemada.”

Aposel 3:19

“Ia kamaghɨn ifueghtɨma, God ian arazir kuraba angarightɨ dughiar kabar Godɨn Duam izɨva ian duaba avughsɨzim ko navir amɨrizim, ia danightɨ, God ia bagh Iesus uam anemangam, a Gumazir God Uam E Iniasa Mɨsevezim, a ia bagha anemɨsefe. Ia bizir kabagh nɨghnɨgh da inisɨ, uan navibagh iraghɨva uamategh God bagh izɨ.

Jeremaia 50:4

Ikiavɨra Itir God kamaghɨn mɨkeme: “Bizir kaba otivamin dughiamɨn, Israelian gumazamiziba ko Judaba uari akuvagh ua uan nguazimɨn izam. Me izɨva navibagh iragh aziva, uamategh na baghvɨra izam. Kɨ Ikiavɨra Itir God, men God.

Jeremaia 44:14

Ia Judan datɨrɨghɨn Isipɨn ikiavɨra itir varazira, ia Judan nguazimɨn mangasa bar ifonge. Ezɨ ian tav asɨghasɨzir kam gitaghan kogham, egh uamategh uan nguazimɨn mangɨghan kogham. Ia bar moghɨra ikuvigham. Eghtɨ gumazir bar vaghvazibara uamategh arɨ mangɨ uan nguazimɨn mangam.”

Onger Akaba 17:3

Nɨ uabɨ nan navir averiam gɨfo. Nɨ dɨmangan na bagha iza nan araziba tuisigha gɨfa, egha nan arazir kuratamɨn apizir puvatɨ. Gumazamizir igharaziba akar kurabav gei, ezɨ kɨ bar gavgavigha ghaze, kɨ akar kuratam mɨkɨman kogham. Kɨ nɨn Akar Gavgavimɨn suiragha an gɨn gua, adariba ko mɨdorozir arazibar gɨn zuir puvatɨ.

Aisaia 33:24

Eghtɨ dughiar kamɨn, Jerusalemɨn itir gumazitam kamaghɨn mɨkɨman kogham, “Kɨ arɨmariam iti.” Eghtɨ Ikiavɨra Itir God Jerusalemɨn itir gumazamizibar arazir kuraba gɨnamangam.

Jeremaia 33:8

Me na batuegha, arazir kuram gami. Ezɨ kɨ men arazir kuraba gɨnamadagham, egh men arazir kurabar osɨmtɨzim agɨvagh me damightɨ, me nan damazimɨn zuegham.

Esekiel 18:22

A datɨrɨghɨn arazir aghuibagh ami. Egha a faragha amizir arazir kuraba kɨ da gɨn amada, egh ua dagh nɨghnɨghan kogham. Kamaghɨn amizɨ, an angamɨra ikiam.

Sekaraia 3:9

Kɨ Ikiavɨra Itir Godɨn Gavgaviba Bar Itim, kɨ dagɨar aghuir mam inigha Josuan boroghɨn anetɨ. Dagɨar kam, a 7plan damaziba iti. Eghtɨ dagɨar kam gisɨn, kɨ akatam osirigham. Egh kɨ dughiar vamɨran, nguazir kamɨn arazir kurabar osɨmtɨzim gɨn amangam.

Onger Akaba 85:3

Nɨ faragha men atara men anɨngazi. Nɨ arazir kam, datɨrɨghɨn uam a gamir puvatɨ.

Aisaia 10:21

Gɨn, Jekopɨn ovavir boribar gumazamizir ikiavɨra itir varazira, me uamategh Godɨn Gavgavir Ekiam Itim bagh izam.

Sefanaia 3:12

Eghtɨ gumazamizitaba, kɨ me ateghtɨ me Jerusalemɨn nguibamɨn ikiam. Me bizir avɨriba puvatɨgh guizbangɨra uari dɨkabɨragham. Egh na bagh izɨ uarir akurvaghsɨ nan azangsɨgham.