Jeremaia 50:17 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁷ Ikiavɨra Itir God kamaghɨn mɨkeme: “Israelia mati sipsipɨn mam, ezɨ nguibar maba mati laionba, me a gasɨghasɨghasa an agɨntɨsi. Asirian atrivim faragha an suiragha aneme. Egha gɨn Babilonɨn Atrivim Nebukatnesar an aghariba ame.

Jeremaia 50:17 ပူးပေါင်းရင်းမြစ်များ

Jeremaia 2:15

Apanir kaba Israelia abɨragha mati laionbar mɨn pamtemɨn me dazera tiariba akara iti. Egha me Israelian nguazim gamizɨ a danganir kɨnir mamɨn mɨn iti. Egha ian nguibabagh apongezɨ da isigha, nguibar sueriabar otifi.

1 Pita 2:25

Ia bar sipsipbar mɨn tintinibar ghuegha ovenge. Ezɨ datɨrɨghɨn ia uamategha sipsipbar garir gumazim bagha ize, a ian duabagh eghuvir gumazim.

Joel 3:2

Eghtɨ kɨ kantriba bar dar gumazamiziba bar me inigh izɨ, danganir zarir mamɨn otogham. Me danganir zarir kam kamaghɨn a dɨbori, God Gumazamiziba Tuisɨsi. Kɨ kagh me akuvagh, arazir me nan gumazamizibagh amiziba bagh akam me gasam. Gumazamizir kaba, me nan gumazamizir kɨ ua bagha inabazibara. Kantrin kabar gumazamiziba, nan nguazim inigha anebɨgha uarigh anɨngi, egha Israelia inigha tintinimɨn kantrin igharazibar ghue.

Jeremaia 50:6

“Nan gumazamiziba sipsipbar mɨn ovegha iti. Me geghuvir gumaziba me gamima me tuavir aghuim ataki, egha tintinibar mɨghsɨamɨn arui. Me tintinibar mɨghsɨamɨn arua, egha uan avughsir danganir dɨvazim itim gɨn amada.

Daniel 6:24

Ezɨ atrivim mɨgeima me gumazir Daniel isa kot gatɨzir kaba ko, men amuiba ko boriba inigha laionbar mozim mɨkɨni. Ezɨ me tɨghar nguazim giram, laionba pɨrara men suigha men mɨkarziba aghoraghsua men aghariba orovoregha me tuvareme.

Esekiel 34:12

Nan sipsipba tintinibar ghuegha, mɨtarmer ekiamɨn aven iti. Ezɨ kɨ gumazir dagh eghuvimɨn mɨn da akumakum da inigh izam.

Jeremaia 52:1

Sedekaia 21plan azeniba ikia, Judan atrivimɨn oto. Egha 11plan azenibar Jerusalemɨn atrivimɨn ike. An amebam, Hamutal, a Jeremaian igharazimɨn guivim, a Lipnan nguibar ekiamɨn gumazir mam.

Jeremaia 51:38

Eghtɨ Babilonia laionbar mɨn tiariba akar dɨmdɨar kuram damuam. Me laionɨn nguziba asɨzibar amasa puvɨra aroi moghɨn damuam.

Jeremaia 49:19

Kɨ zuamɨra Idomian nguazimɨn me batuegham, mati laionba sipsipbagh ami mokɨn. Laion Jordanɨn Fanemɨn boroghɨn itir ruarir pɨzimɨn ikegha otogha ghua, sipsipba graziba apa itir danganir aghuimɨn men gɨntɨki. Ezɨ kɨ gumazitam amɨseveghtɨ, a nguazir kam gativagh an ganam. Kɨ kamaghɨn damuamin dughiamɨn, gumazir manam na ko ga akamɨn uaning mɨsogham? Ezɨ tina nan mɨn gavgavir kam iti? Eghtɨ gumazir sipsipbar garir manam na ko apanim damuam? Bar puvatɨgham.

Jeremaia 5:6

Gumazamizir kaba arazir kurar avɨribagh amua, egha dughiar avɨribar Ikiavɨra Itir God, akɨrim ragha a gasara. Bizir kam bagh, men apaniba, laionɨn ruarir ghuribar itiba azenan izɨ me mɨsoghtɨ me arɨmɨghiram. Apanir kaba, afiar atiar danganir kɨnibar itibar mɨn izɨ me gasɨghasɨgham. Apanir kaba, kaziar atiar ekiabar mɨn izɨ, Judan nguibar ekiabar boroghɨn mongegh ikɨ ganam, eghtɨ gumazim o amizitam nguibam ategh azenan izɨtɨ, apaniba kaziar ekiar kabar mɨn uari fɨ me mɨkɨn, men mɨkarziba abɨghɨrarigham.”

Jeremaia 4:7

Apanir kaba uan nguibam ategha mati laion uan mogomer danganir itim ataki. Apanir kaba nguibar avɨribagh asɨghasɨgha izi. Me izɨ Judan kantri bar a gasɨghasightɨ a bar ikuvightɨ, gumazamiziba ua nguibar kabar ikian kogham.”

Aisaia 47:6

Kɨ bar puvɨra uan gumazamizibar atari, egha kɨ ua uan gumazamizibar mɨn me gɨnɨghnɨzir puvatɨ. Egha kɨ nɨ ataghizɨ, nɨ iza paza me gamua, egha nɨ tong men apangkuvizir pu. Bar puvatɨ. Nɨ bar pazavɨra me gamua osɨmtɨzir bar dafam me ganɨngi. Egha nɨ uaghan gumazamizir ghuribagh amima me osɨmtɨzir dafam ateri.

2 Eghaghaniba 33:11

Kamaghɨn amizɨ, Ikiavɨra Itir God Asirian atrivimɨn mɨdorozir gumazibar gumazir dapaniba ko, an mɨdorozir gumaziba amangizɨ, me iza Judaba ko mɨsogha me abɨra. Egha Asiriaba kalabuziamɨn mɨn Manasen suiragha, akezim an atinim garugha, senɨn an dafarimning ikegha, a inigha Babilonɨn ghu.

2 Eghaghaniba 28:20

Ezɨ gɨn Asirian Atrivim Tiklat Pileser Judan ize, egha Ahasɨn akurazir puvatɨ. A uan mɨdorozir gumaziba ko iza pazavɨra Ahas gami.

2 Atriviba 24:1

Ezɨ Jehoiakim Judabar atrivimɨn itir dughiamɨn, Babilonian Atrivim Nebukatnesar uan mɨdorozir gumaziba ko iza Judan kantri mɨsosi. Egha a me abɨragha, Atrivim Jehoiakim gamizɨ, an an apengan iti. Ezɨ 3plan azeniba gɨvazɨ, Atrivim Jehoiakim, Atrivim Nebukatnesar a gativaghan a bar aghua, egha a uam an apengan itir puvatɨ.

2 Atriviba 15:29

Peka Israelian atrivimɨn itir dughiamɨn, Asirian Atrivim, Tiklat Pileser iza, Israelia mɨsogha, Ijonɨn nguibar ekiam, ko Abel Betmakan nguibar ekiam, Janoan nguibar ekiam, Kedesɨn nguibar ekiam, Hasorɨn nguibar ekiam, Gileatɨn Distrik, Galilin Distrik, ko Naptalin anabamɨn nguaziba bar ada ini. Egha a danganir kabar gumazamiziba inigha, Asirian kantrin ghua me isa kalabuziabar mɨn ingangarir gumazamizir kɨnibar me arɨki.

2 Atriviba 15:19

Menahem atrivimɨn itir dughiamɨn, Tiklat Pileser, Asirian atrivimɨn ikia, egha iza Israelia ko mɨsosi. Ezɨ Tiklat Pileserɨn ziar igharazim, Pul. Ezɨ Menahem 3,000,000 kina silva inigha, Tiklat Pileser givezasa a ganɨngi, eghtɨ a ua mɨsoghan koghɨva, egh Menahemɨn akuraghtɨ, a Israelian kantrin atrivir gavgavimɨn ikiam.

2 Atriviba 24:10

Egha Jehoiakin atrivimɨn ikiavɨra itima, Babilonian Atrivim Nebukatnesar uan mɨdorozir gumaziba inigha iza, Jerusalem korogha a iniasa mɨsosi.

2 Atriviba 25:1

Egha namba 9ɨn azenimɨn Sedekaia atrivimɨn ikia ghua, an namba 10ɨn iakɨnimɨn, namba 10ɨn iakɨnir kamɨn aruemɨn oto. Ezɨ Babilonɨn Atrivim Nebukatnesar uan mɨdorozir gumaziba bar dar akua iza Jerusalem avɨnigha, nguibam iniasa mɨsosi. Me Jerusalem korogha, ghua temeba okegha iza nguibar ekiamɨn dɨvazir gavgavimɨn boroghɨra dar pozim mɨkɨni. Egh me nguazim dav kɨnightɨ, da fɨgh ghuanaboghtɨ, me mangɨ dagh isɨn mɨtivigh, nguibar ekiam ko mɨsogham.

Jeremaia 5:17

Ia ti ghaze, ian nguibaba dɨvazir gavgaviba dar iti, eghtɨ ia deravɨra dar aven ikiam. Bar puvatɨgham. Apanir kaba izɨ ian nguibar kabagh asɨghasigham. Egh ian azenibar itir dagheba ko dɨpenibar itiba sara, dar amɨ da agɨvagham. Egh ian otariba ko guivibav soghɨrarigh, ian sipsipba, bulmakauba, bar a dav soghɨrarightɨ da arɨghiregham. Egh me ian wainɨn ikarɨziba, ko fighɨn temebagh asɨghasigham.

Jeremaia 10:25

Egh Kantrin Igharazibar Gumazamizir nɨn ziam dɨbora a fer puvatɨziba, nɨ men anɨngaghɨ me gasɨghasɨgh. Gumazamizir kaba, e Jekopɨn adarasi, me en maraziv soghezɨ me ariaghire. Me bar e agɨvagha en nguaziba ko dɨpeniba sara bar dagh asɨghasɨki. Kamaghɨn amizɨ, nɨ me gasɨghasɨgh.

Jeremaia 21:7

Kɨ Ikiavɨra Itir God kɨ ua kamaghɨn mɨgei. Gumazamizir avɨrim, arɨmariar kaba ko, mɨdorozir kam ko, dagheba puvatɨghamin dughiam bangɨn arɨghiram. Egh gɨn kɨ Atrivim Nebukatnesar ko an mɨdorozir gumaziba ateghtɨ, me Atrivim Sedekaia uan gumazir ekiaba ko gumazamizir ikiavɨra itiba inigh mangam. Apanir kaba Israelia ia mɨsoghtɨ ia aremeghasa bar ifonge. Nebukatnesar kuarkuvim ko, ifongiam ko, apangkuvir arazim tong ian ikeghan kogham. Egh ian tav ateghtɨ, a ikian kogham.’ ”